Bisinesi Teritori Dekenai Haroro Dalana
1 Oi ura taunimanima momo oi davaria diba gabunai bona vadivadi taudia idia abia dae taudia edia teritori dekenai oi haroro, a? Reana emu kongregesen ena teritori dekenai unai bamona oi karaia diba. Edena bamona? Unuseniai idia noho bisinesi gabudia dekenai oi lao diba. Pablisa taudia be sitoa-ta-sitoa-ta haroro gaukara dekenai nega momo anina namona idia davaria.
2 Kongregesen haida edia teritori lalonai, bisinesi rumadia be momo. Teritori ia naria tadikaka ese unai teritori ena mapu kadi ia karaia diba. Bema taunimanima idia noholaia rumadia ena mapu kadi dekenai bisinesi rumadia idia noho danu, namona be mapu kadi ai ia hahedinaraia goevagoeva unai bisinesi rumadia dekenai idia haroro lasi totona. Teritori ma haida ai, bisinesi bona taunimanima idia noholaia rumadia dekenai ita haroro diba. Bema nega ta bisinesi haroro oi karaia lasi, sitoa maragidia haida ai unai gaukara oi hamatamaia toho be namo.
3 Auka Lasi Hereva ta Gaukaralaia: Sitoa-ta-sitoa-ta dekenai oi haroro neganai, namona be dabua toana namona ita atoa, badina ita be bisinesi taudia do ita hereva henia. Danu, namona be sitoa tauna ia bisi lasi negana ta oi abia hidi. Bema hegeregere, kastoma idia noho lasi neganai oi vareai be namo. Oi noinoi gaukara biaguna oi hereva henia totona. Hereva kwadogina bona point oi gwauraia. Reana dahaka do oi gwau?
4 Sitoa naria tauna eiava biaguna oi hereva henia neganai, reana inai bamona oi gwau: “Bisinesi taudia be idia bisi bada dainai nega momo ruma dekenai ai davaridia lasi, unai dainai emu gaukara gabuna dekenai oi ai vadivadi henia. Aiemai magasin be tanobada hegegemadai dekenai idia vara gaudia idia herevalaia.” Bena magasin amo point kwadogina ta oi hahedinaraia.
5 Eiava inai auka lasi herevana oi gaukaralaia diba: “Taunimanima momo idia ura Baibel do idia diba namonamo to edia nega be bada lasi. Inai pepapepa ese davana lasi Baibel stadi kosi ta ia herevalaia, unai ese oi do ia durua Baibel ena henanadai edia haere oi davaria totona.” Bena Oi Ura Baibel Do Oi Diba Namonamo, A? pepapepana ena rau 4-5 oi hahedinaraia.
6 Bema bisinesi biaguna ia bisi bamona, reana pepapepa sibona oi henia bona oi gwau: “Oi bisi lasi neganai do lau mai. Lau ura diba inai pepapepa dekenai dahaka oi laloa.”
7 Kamonai Taudia Edia Ura Habadaia: Reana bisinesi teritori dekenai Baibel stadi oi karaia diba. Spesel painia tadikaka ta be bisinesi tauna ta dekenai hanaihanai magasin ia abia lao. Unai tau ia gwau ia duahia gaudia ia moalelaia neganai, painia tadikaka ese Dahaka Ita Karaia? buklet ia gaukaralaia Baibel stadi dalana ia hahedinaraia totona. Unai tau ena gaukara gabu dekenai stadi idia karaia hamatamaia. Painia tadikaka be unai tau ena gaukara ia laloa dainai, nega ta ta ai miniti 10 eiava 15 lalonai stadi idia karaia. Unai hegeregerena, namona be bisinesi teritori dekenai ita haroro amo kudou maoro taudia ita tahua noho.
[Study Questions]
1. Bisinesi teritori dekenai haroro gaukara ena namo haida be dahaka?
2. Bisinesi haroro be edena bamona idia hegaegaelaia diba?
3. Dahaka ese ita do ia durua sitoa-ta-sitoa-ta haroro gaukara ita karaia namonamo totona?
4-6. Sitoa biaguna ita haroro henia neganai, dahaka ita gwau diba?
7. Bisinesi teritori dekenai ita davaria kamonai taudia edia ura be edena dala ai ita habadaia diba?