Hebogahisi Dainai Ita Karaia Hesiai Gaukarana
1 Iesu ia itaia ia hereva henia taudia momo “edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mat. 9:36) Unai dainai, mai hebogahisi bona lalokau ida Iehova ena dala ia hadibadia, edia lalona ia hagoadaia, bona Dirava ena hereva amo idia ia durua. Iesu ena kara ita laloa dobu karana ese ita ia durua iena kara ita tohotohoa, bona iseda haroro gaukara ai hebogahisi karana ita hahedinaraia totona.
2 Taunimanima be heduru idia abia totona Iesu dekenai idia lao neganai, Iesu ese idia ia kara henia dalana mani ita laloa. (Luka 5:12, 13; 8:43-48) Ia ese taia kudima, hereva diba lasi taudia bona matakepulu taudia ia lalodia bada. (Mar. 7:31-35) Ia be toana ia laloa lasi, to taunimanima edia hemami ia laloa bada dainai ia kara namo henidia. (Luka 7:36-40) Oibe, Iesu ese Dirava ena hebogahisi bada karana ia hahedinaraia goevagoeva.
3 ‘Ia Hebogahisi’: Iesu ese ena hesiai gaukara be maduna ta sibona dainai ia karaia lasi. To taunimanima ia hebogahisi henia dainai ia karaia. (Mar. 6:34) Unai hegeregerena, hari ita harorolaia sivaraina amo ita ura taunimanima ita durua idia danu ese mauri hanaihanai do idia abia. Bema idia ura lasi ita harorolaia sivaraina idia kamonai, ena badina ita lalopararalaia be namo. Dahaka dainai idia ura lasi kamonai? Tomadiho koikoi gunalaia taudia ese idia naria lasi dainai lauma dalanai idia matakepulu, a? Namona be iseda kara amo ita hahedinaraia idia ita laloa bada, unai ese edia lalona ia veria diba sivarai namona idia kamonai totona.—2 Kor. 6:4, 6.
4 Hebogahisi karana ese ta ena kudouna ia hamarerea diba. Haheitalai ta be inai: Hahine ta be ena hua toi natuna kekeni ia mase dainai ia lalohisihisi bada. Taihu rua ese ia idia vadivadi henia neganai, ia boiridia ena ruma lalonai, to ia ura Dirava ese hisihisi ia koua lasi ena badina ia hakoikoia. To, gabeai unai hahine ia gwau: “Mai hebogahisi ida egu sivarai idia kamonai, bona lau idia rakatania neganai, egu hemami ia namo, unai dainai idia lau hamaoroa lau do idia vadivadi henia lou totona.” Oi hekwarahi haroro gaukara ai oi davaria taudia ibounai dekenai hebogahisi oi hahedinaraia totona, a?
5 Hebogahisi kara ese ita do ia durua ma haida edia lalona ita hagoadaia totona. Unai bamona ita karaia neganai, ita be ‘iseda Tamana, hebogahisi Diravana’ Iehova, ita hanamoa.—2 Kor. 1:3.