Mai Moale ida Iehova Ena Hesiai Gaukara Ita Habadaia!
1 Aposetolo Paulo be ‘mai moale danu ena kohu ia haorea,’ iena hesiai gaukara ia hagugurua totona. (2 Kor. 12:15) Hari inai negai danu, Keristani taudia momo be painia gaukara idia karaia goadagoada. Haida be mai edia ruma bese bona gaukara momo idia karaia, to pura ta ta ai nega idia atoa idia haroro totona. Haida be idia gorere, to Basileia ena gaukara idia karaia. Ena be Iehova ena taunimanima edia mauri lagani eiava noho dalana be idauidau, to idia ese Iehova ena hesiai gaukara idia habadaia be hagoadaia gauna!
2 Dekena Taudia Lalokau Henia: Dirava bona dekena taudia ita lalokau henia dainai, mai eda goada ibounai ida Iehova ita hesiai henia, unai amo iseda lalomamina ia goeva. Paulo be ena mauri ia laloa lasi, to sivarai namona ia harorolaia dainai, mai moale ida ia gwau diba: “Harihari lau hamaoroa umui, bema umui ta ia boio, kerere be lau lasi.” (Kara 20:24, 26; 1 Tes. 2:8) Herevana iseda noho dalana be edena bamona, to haroro gaukara ita karaia dainai, kamonai lasi tauna ia mase neganai, ita be kerere lasi.—Ese. 3:18-21.
3 Ma haida ita durua neganai, moale do ita davaria. (Kara 20:35) Tadikaka ta ia gwau: “Daba ia lao adorahi lalonai Iehova ena hesiai gaukara lau karaia, to egu ruma dekenai lau giroa neganai, lau hesiku bada. To lau moale, bona Iehova lau tanikiu henia badina ta ese ia kokia oho diba lasi moalena be lau dekenai ia henia.”
4 Dirava Lalokau Henia: Iehova ena hesiai gaukara ita habadaia badina ita ura iseda guba Tamana ita hamoalea. Dirava ita lalokau henia dainai iena oda ita badinaia, hegeregere haroro bona hadibaia gaukara ita karaia. (1 Ioa. 5:3) Ena be taunimanima be idia kamonai lasi eiava ita idia dagedage henia, to mai moale ida Iehova ita hesiai henia noho.
5 Hari be hesiku negana lasi. Ita be uiti gogoa negana lalonai ita noho. (Mat. 9:37) Uiti gogoa negana be kwadogi dainai, nega momo biru tauna be hora momo lalonai uiti ia gogoa, bema lasi uiti do idia dika. Unai hegeregerena, taunimanima ita gogoa gaukarana be kahirakahira do ia ore. Unai ita laloa dainai, namona be ita ibounai ese haroro gaukara ita karaia goadagoada noho!—Luka 13:24; 1 Kor. 7:29-31.