Baibel Ita Abia Dalana

Unai siri ena hereva be momokani, ena be Heberu bona Aramia Toretorediaa edia maniuskrip eiava Keristani Grik Toretoredia korikoridia be hari idia noho lasi. To, edena bamona do ita diba momokani hari ita abia Baibel ena hereva be Dirava ena siahu amo idia torea?

Heberu Toretoredia ena kahana dekenai, ataiai ia noho henanadai ena haere kahana be Dirava ese guna ena taunimanima ia hamaoroa iena hereva ena kopi do idia torea karana dekenai ia hedinarai.b Hegeregere, Iehova ese Israela ena king ia hamaorodia sibodia edia Taravatu ena kopi do idia torea. (Deuteronomi 17:18) Ma danu, Dirava ese Levi taudia dekenai maduna ia henia Taravatu do idia gimaia bona taunimanima dekenai do idia hadibaia. (Deuteronomi 31:26; Nehemia 8:7) Iuda taudia be Babulonia dekenai igui taudia ai idia lao murinai, taravatu torea hanai taudia, eiava taravatu hadibaia taudia (Soferim) edia orea idia hamatamaia. (Esera 7:​6, futnout) Lagani idia hanaia lalonai, idia ese Heberu Toretoredia edia buka 39 edia kopi momo idia torea.

Idia hanaia lagani lalodiai, taravatu hadibaia taudia ese unai buka edia kopi idia toredia. Lagani 500 ia lao 1500 C.E. lalonai, taravatu idia hadibaia Iuda taudia edia orea ta ladana Masorete ese unai gaukara ia karaia. Masorete taudia ese idia torea hanai kopi gunana momokani be Leningrad Codex, ia be lagani 1008/1009 C.E. ai idia torea. To lagani 1950 bamona ai, Baibel maniuskrip eiava edia kahana maragidia 220 bamona be Mase Davara Lokua Toretoredia huanai idia davaria. Unai Baibel maniuskrip be Leningrad Codex ida idia hahegeregerea neganai, idia be lagani 1,000 gunanai idia torea gaudia. Unai Mase Davara Lokua Toretoredia bona Leningrad Codex idia hahegeregerea neganai, inai mai anina bada gauna idia dibaia: Ena be Mase Davara Lokua Toretoredia edia hereva haida be idia idau, to unai ese Baibel ena hereva badana ia haidaua lasi.

Keristani Grik Toretoredia ena buka 27 be edena bamona? Unai buka be guna Iesu Keriso ena aposetolo taudia haida bona hahediba taudia ma haida ese idia torea. Keristani ginigunadia ese taravatu idia hadibaia Iuda taudia edia kara idia tohotohoa bona unai buka edia kopi idia toredia. (Kolose 4:16) Ena be Roma Pavapava Diocletian bona ma haida idia ura Keristani ginigunadia ese idia torea bukadia idia hadikaia ore, to toretore gunadia edia kahana maragidia bona maniuskrip tausen momo be idia noho ema bona hari.

Keristani toretoredia be gado ma haida ai idia hahanaia danu. Baibel ginigunadia be inai idaunega gado, Armenia, Coptic, Ethiopia, Georgia, Latin, bona Syria ai idia hahanaia.

Baibel maniuskrip gunadia edia kopi ibounai edia hereva be tamona lasi. Vadaeni edena dala ai toretore gunadia edia hereva do ita diba?

Unai be hegeregere tisa ta ese stiuden taudia 100 ia hamaoroa buka ta ena karoa ena kopi idia torea totona. Herevana unai karoa korikorina do ia boio, to unai kopi 100 idia hahegeregerea neganai, ena hereva korikorina idia davaria diba. Ena be stiuden ta ta ese hereva haida idia torea kerere, to idia ibounai ese kerere tamona idia karaia lasi. Unai hegeregerena, Baibel diba momo taudia ese toretore gunadia edia kahana maragidia tausen momo bona Baibel gunadia edia kopi idia hahegeregerea neganai, torea hanai ­taudia edia kerere idia itaia bona idia laloparara edena hereva maorona idia atoa diba.

Edena bamona ita diba momokani Baibel ginigunana ena hereva be idia hahanaia goevagoeva? Baibel diba momo tauna, William H. Green be Heberu Toretoredia ia herevalaia neganai, ia gwau: “Baibel be idia hahanaia maoromaoro, buka gunana ma ta be inai bamona idia hahanaia lasi.” Baibel diba momo tauna, F. F. Bruce be Keristani Grik Toretoredia, eiava idia gwauraia New Testament ia herevalaia neganai, ia gwau: “New Testament toretoredia ena hamomokania gaudia be momo herea, to histori bukadia lalonai idia torea sivarai hamomokania gaudia be momo lasi, bona tau ta ese unai do ia hepapahuahulaia diba lasi.” Ma ia gwau: “Bema New Testament be taunimanima ese idia torea sivaraidia sibona, ena hamomokania gaudia be tau ta ese ia hakoikoia diba lasi.”

Heberu Toretoredia: New World Translation of the Hebrew Scrip­tures (1953-1960) be Rudolf Kittel ese ia torea Biblia Hebraica amo idia hahanaia. Unai nega amo, Heberu toretoredia idia ­hanamoa lou bona Biblia Hebraica Stuttgartensia bona Biblia Hebraica Quinta idia halasia. Unai Baibel rua be Mase Davara Lokua Toretoredia bona maniuskrip gunadia ma haida ai idia karaia tahua gaukara murinai idia torea. Bona edia hereva be Leningrad Codex amo idia abia bona futnout edia hereva be Samaritan Pentateuch, Mase Davara Lokua Toretoredia, Greek Septuagint, Aramaic Targums, Latin Vulgate, bona Syriac Peshitta amo idia abia. New World Translation Baibel matamatana idia hahanaia neganai, Biblia Hebraica Stuttgartensia bona Biblia Hebraica Quinta idia gaukaralaia.

Grik Toretoredia: Lagani 1853 ia lao 1881 lalonai, Baibel diba momo taudia, B. F. Westcott bona F.J.A. Hort ese Baibel maniuskrip bona ena kahana maragidia haida idia stadilaia namonamo, bena Grik toretoredia edia kopi idia torea bona idia itaia idia be toretore ginigunadia hegeregerena. Lagani 1950 lalodiai, New World Bible Translation Committee ese unai Grik toretoredia be edia hahanaia gaukara lalonai idia gaukaralaia. Lagani 125 C.E. ia lao 300 C.E. ai idia noho papyrus toretoredia idia gaukaralaia danu. Unai nega amo, papyrus ma haida idia davaria. Danu, Nestle, Aland bona United Bible Societies edia toretore ginigunadia ese diba matamatadia idia hahedinaraia. New World Translation lalonai unai diba matamata haida idia atoa danu.

Unai toretoredia ai stadilaia neganai, ai davaria Baibel gunadia haida hegeregere, King James Version ena Keristani Grik Toretoredia edia siri haida lalonai, Baibel idia kopi taudia be hereva ma haida idia atoa kau, bona idia be Dirava ena siahu amo idia torea herevadia lasi. To, lagani 1550 ai Baibel hahanaia gaukarana ai siri idia haria bona namba torea karana idia hamatamaia, unai dainai siri idia kokia neganai, Baibel momo lalonai hekwakwanai ia havaraia. Unai siri be Mataio 17:21; 18:11; 23:14; Mareko 7:16; 9:​44, 46; 11:26; 15:28; Luka 17:36; 23:17; Ioane 5:4; Kara 8:37; 15:34; 24:7; 28:29; bona Roma 16:24. Inai Baibel lalonai, unai siri idia kokia gabudia ai futnout idia atoa.

Mareko 16 (siri 9-20) ena hereva orena latana, Mareko 16 ena hereva orena kwadogina, bona Ioane 7:​53–8:11 ena hereva ese idia hahedinaraia, unai siri be maniuskrip ginigunadia ai idia noho lasi. Unai dainai idia atoa kau herevadia be inai Baibel lalonai ai atoa lasi.c

Siri haida edia hereva idia senisia badina Baibel diba momo taudia idia laloa unai ese toretore korikoridia edia lalohadai ia hahedinaraia namonamo. Hegeregere, maniuskrip haida dekenai, Mataio 7:13 ena hereva be inai: “Geiti maragina dekenai umui vareai, badina mase ia lao henia dalana be bada bona ena geiti be lababa herea.” New World Translation gunadia lalonai “geiti” idia atoa lasi. To, unai maniuskrip idia stadilaia lalonai idia davaria “geiti” be toretore ginigunana lalonai ia noho. Unai dainai inai Baibel lalonai ai atoa. Siri ma haida be unai bamona ai hamaoromaoroa danu. To, unai senisi be gau maragidia sibona, badina idia ese Baibel ena hereva badana idia haidaua lasi.