Stadi 24

Hereva Hegeregeredia Maorodia

¹ Hereva hegeregeredia maorodia, emu hereva ena anina hegeregerena herevadia, oi gwauraia neganai, idia ese hereva badadia edia anina idia hahedinaraia goevagoeva, bona oi hereva henidia taudia idia durudia, idia be mai edia ura ida do idia kamonai totona.

² Hereva hegeregeredia namodia amo taunimanima edia lalohadai kereredia oi hamaoromaoroa haraga diba. Hegeregere, bema oi gwau: “Tama ta ese ena natuna ena imana lahi lalonai ia atoa diba lasi ia panisia totona,” unai murinai “hel ena lahi” herevana oi hakoikoia haraga diba.

³ Hereva hegeregeredia lalodiai oi herevalaia diba gaudia haida be inai: Oi hereva henidia taudia edia gaukara, taunimanima be vaia idia karaia karadia, ruma kohudia, taunimanima ese idia karaia gaudia, hegeregere ruma eiava bouti eiava unai bamona gaudia ma haida. To herevana dahaka hereva hegeregerena oi gwauraia, namona be ia be emu hereva ena anina hegeregerena. Hereva hegeregeredia momo be nega tamona oi gwauraia lasi be namo.

⁴ Oiemu hereva oi hegaegaelaia neganai, bema hereva hegeregeredia oi laloa davari diba lasi, Society ena buka lalodiai oi tahudia. Emu hereva ena badina badadia oi lalodia, bena hereva hegeregeredia, unai badina o point do idia hahedinaraia goevagoeva gaudia sibodia, be oi abidia hidi. Emu hereva ida idia hegeregere lasi gaudia oi gaukaralaidia lasi.

⁵ Hereva hegeregeredia haragadia be taunimanima ese idia laloatao be haraga. Iesu ena hereva hegeregeredia be hereva momo lasi amo ia gwauraidia. (Mani Mataio 13⁠:​31-33; 24⁠:​32, 33 itaia.) Gau maragidia amo gau badadia ia hahedinaraia, bona hereva haragadia amo ia ese hereva badadia, edia anina davaria be auka herevadia, edia anina ia gwauraia hedinarai. Unai hegeregerena, hereva hegeregeredia haragadia, taunimanima ese edia anina idia abia haraga diba gaudia, oi gwauraidia be namo. Hereva hegeregerena ta ena kahana iboudiai be emu hereva ida idia hegeregere be namo, idia kamonai taudia be anina idia abia kerere garina.

⁶ Anina gwauraia hedinarai. Bema hereva hegeregerena ta ena anina oi gwauraia hedinarai namonamo lasi, idia kamonai taudia haida sibodia be ena anina idia lalo-pararalaia reana. Namona be ena anina idia dekenai be oi laloa namonamo guna, bena unai oi gwauraia hedinarai.​—⁠Mataio 12⁠:​10-12 itaia.

⁷ Emu hereva ena badina o point badadia oi dibaia namonamo guna, bena hereva hegeregeredia maorodia oi abia hidi. Bema hereva hegeregeredia mai siahudia amo hereva maragidia edia anina oi hahedinaraia, idia kamonai taudia be unai hereva maragidia do idia laloatao, to hereva ena badina o point badadia do idia laloaboio reana. Namona be hereva hegeregerena ta oi habadaia lasi, idia kamonai taudia ese ia do idia laloatao bona emu haroro herevana korikorina ena anina do idia laloaboio garina.

⁸ Namona be emu hereva hegeregeredia be emu hereva ida idia hegeregere sibona lasi, to kamonai taudia edia diba ida idia hegeregere danu be namo. Davida be Bataseba ida idia kara dika murinai, Natana ese Davida ia samania neganai, ogogami tauna ta mai ena mamoe natuna tamona be sivarai hegeregerena ta lalonai ia sivarailaidia. (2 Sam. 12⁠:​1-6) Unai sivarai hegeregerena be mai anina Davida dekenai, badina be guna ia be mamoe naria tauna. Ena anina ia abia haraga.

⁹ Bema hebou taudia momo be taunimanima burukadia, oi ese memero kekeni sibodia idia lalo-pararalaia hereva hegeregerena ta oi gwauraia lasi. Idia diba gaudia mo oi herevalaidia eiava oi sivarailaidia be namo. Iesu ese taunimanima edia mauri ena gau maragidia ia gwauraidia, gau idau hereadia ia gwauraidia lasi. Ena hereva idia kamonai taudia be unai gau idia diba vadaeni dainai, ena hereva ena anina idia lalo-pararalaia haraga.

¹⁰ Unai hegeregerena, ruma hahinena ta oi hereva henia neganai, bisinesi karadia be hereva hegeregerena ta ai oi gwauraia lasi, to ruma gaudia o gaukaradia oi herevalaia be namo, bena emu hereva ena anina do ia abia haraga. Emu noho gabuna dekenai idia vara gaudia, taunimanima momo be edia sivarai idia diba gaudia, be emu hereva hegeregeredia lalodiai oi herevalaidia be namo.

¹¹ Namona be hereva hegeregeredia be Keristani taudia edia lalohadai bona edia kara hegeregeredia; idia kamonai taudia edia lalona idia hahekwakwanaidia lasi bona idia habadudia lasi be namo. Vadaeni, emu hereva hegeregeredia oi abidia hidi namonamo, emu hereva ena anina dekenai bona oi hereva henidia taudia edia diba dekenai do idia hegeregere totona.