Mero Maragina ta ese Dirava Ia Hesiai Henia

INAI be mero maragina mai hairai, ani? Ena ladana be Samuela. Bona Samuela ena kwarana dekenai imana ia atoa tauna be Israela ena hahelaga tauna badana, Eli. Bona Samuela ena tamana Elikana bona ena sinana Hana ese Eli dekenai Samuela idia abia mai.

Samuela ena mauri lagani be 4 eiava 5 sibona. To ia be Eli bona hahelaga taudia ma haida danu Iehova ena palai dubuna dekenai do idia noho. Dahaka dainai Elikana bona Hana ese natuna maragina idia henia Iehova ena palai dubuna dekenai ia gaukara totona? Mani ita itaia.

Lagani haida gunanai Hana ia lalohisihisi bada. Badina natuna ta ia havaraia diba lasi bona ia ura dikadika ta ia abia. Unai dainai dina ta Hana be Iehova ena palai dubuna ia vadivadi henia neganai, ia guriguri: ‘Iehova e, lau oi laloaboio lasi! Bema lau dekenai natuna ta oi henia, lau gwauhamata oi dekenai do lau henia, unai amo ena mauri dinadia ibounai oi do ia hesiai henia.’

Iehova ese Hana ena guriguri ia kamonai henia, bona hua haida murinai Samuela ia vara. Hana ese ena mero maragina ia lalokau henia bada, bona ia do maragi herea neganai ia dekenai Iehova ena dala ia hadibaia matamaia. Ena adavana ia hamaoroa: ‘Samuela ese rata ia rakatania neganai, palai dubuna dekenai do lau abia lao Iehova ena hesiai gaukara ia karaia totona.’

Inai laulau dekenai, Hana bona Elikana be unai bamona idia karaia. Bona Samuela ena tama sina ese ia idia hadibaia namonamo dainai, mai moale danu Iehova ena hesiai gaukara ia karaia. Lagani ibounai, Hana bona Elikana idia mai inai palai dubu dekenai tomadiho totona, bona edia mero maragi vadivadi henia totona. Bona lagani ibounai Hana ese Samuela ena dabua matamata ta ia abia mai.

Lagani momo idia lao, Samuela be Iehova ena palai dubuna dekenai ia gaukara noho, bona Iehova bona taunimanima ese ia idia ura henia. To hahelaga tauna badana Eli ena natuna Hopini bona Pineha, be namo lasi. Kara dika momo idia karaia bona ma haida idia veria Iehova idia kamonai henia lasi totona. Namona be Eli ese edia hahelaga gaukarana ia kokia, to unai bamona ia karaia lasi.

Ena be inai kara dika idauidau idia karaia, to Samuela ese Iehova ena hesiai gaukarana ia rakatania lasi. To Iehova idia lalokau henia taudia be momo lasi dainai, Iehova be nega daudau taunimanima ia hereva henia lasi. Samuela ia bada sisina neganai, inai ia vara:

Samuela be palai dubuna dekenai ia mahuta noho neganai, gado ta ese ia hanogaia. Ia haere: ‘Lau inai.’ Bona ia toreisi bona Eli dekenai ia heau lao bona ia gwau: ‘Lau oi boiria, bona lau mai inai.’

To Eli ia haere: ‘Oi lau boiria lasi; oi mahuta.’ Unai dainai Samuela ia mahuta.

Bena boiboi iharuana ia kamonai: ‘Samuela e!’ Vadaeni, Samuela ia toreisi bona Eli dekenai ma ia heau lao. Ia gwau: ‘Lau oi boiria, bona lau inai.’ To Eli ia haere: ‘Egu natuna e, oi lau boiria lasi. Oi hekure lou.’ Unai dainai Samuela ia mahuta lou.

Nega ihatoina unai gado ma ia boiboi, ‘Samuela e!’ Unai dainai Samuela be Eli dekenai ia heau lao. Ia gwau: ‘Lau inai, badina momokani oi boiboi.’ Hari Eli ia diba Iehova ia boiboi. Unai dainai Samuela ia hamaoroa: ‘Oi lao, oi hekure lou, bona bema ia boiboi lou, namona be oi gwau: “Iehova e, oi hereva, badina emu hesiai tauna be ia kamonai noho.” ’

Iehova ia boiboi lou neganai, Samuela be unai bamona ia hereva. Bena Iehova ese Samuela ia hamaoroa Eli bona ena natudia do ia panisia. Gabeai Pilistia taudia danu idia tuari neganai, Hopini bona Pineha idia mase, bona Eli be unai ia kamonai neganai, ia moru, ena aiona ia makohia, bona ia mase. Iehova ena hereva ia momokani.

Samuela ia bada bona Israela edia hahemaoro tauna ginigabena ai ia lao. Ia buruka neganai Israela taudia ese idia noia: ‘King ta oi abia hidi ai ia lohiaia totona.’ Samuela ia ura lasi unai bamona ia karaia, badina Iehova be edia king. To Iehova ese ia hamaoroa taunimanima edia hereva do ia kamonai.