Dirava Ena Lalohadai Mauri Dekenai Ita Abia

 1. Daika ese mauri gaudia ibounai ia havaraia?

PEROVETA tauna Ieremia ia gwau: “Lohiabada be Dirava korikori, ia be mauri ena Dirava.” (Ieremia 10:10) Danu, Iehova Dirava be mauri gaudia ibounai ia Havaraia Tauna. Guba dekenai idia noho aneru be ia dekenai idia gwau: “Gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” (Apokalupo 4:11) King Davida ese ane amo Dirava ia hanamoa, ia gwau: “Oi be mauri ibounai ena badina.” (Salamo 36:9) Unai dainai, mauri be Dirava ena harihari gauna.

 2. Dirava ese iseda mauri ia durua totona, dahaka mauri durua gaudia ia henia?

² Iehova ese iseda mauri ia durua danu. (Kara 17:28) Ita dekenai aniani, ranu, hodahoda, bona ita noholaia tano ia henia. (Kara 14:​15-17) Iehova be unai bamona ia karaia, unai amo iseda mauri ita moalelaia diba. To iseda mauri ita moalelaia momokani totona, namona be Dirava ena taravatu ita dibaia bona ita badinaia.​—Isaia 48:​17, 18.

 3. Kaino ese Abela ia alaia mase karana be Dirava ese edena bamona ia laloa?

³ Dirava ia ura ita ese iseda mauri bona ma haida edia mauri ita matauraia. Hegeregere, Adamu bona Heva edia negai, edia natuna Kaino be ena tadina Abela dekenai ia badu dikadika. Iehova ese Kaino ia hadibaia bema ena badu ia koua lasi, kara dika badana ia karaia diba. Kaino ese unai hadibaia herevana ia laloa lasi. Ia ‘ese iena tadina Abela ia heatu henia, bona ia alaia mase.’ (Genese 4:​3-8) Kaino ese ena tadina ia alaia dainai, Iehova ese ia panisia.​—Genese 4:​9-11.

 4. Mose ena Taravatu dekenai, Dirava ese edena bamona ia hahedinaraia mauri ita laloa bada be namo?

⁴ Lagani 2,400 bamona murinai, Iehova ese Israela taudia dekenai taravatu ia henia, unai amo Ia moalelaia dalana ai ia idia hesiai henia diba. Dirava ese unai taravatu be peroveta tauna Mose amo ia henia dainai, nega haida idia gwauraia Mose ena Taravatu. Mose ena Taravatu ta be: “Taunimanima do umui alaia lasi.” (Deuteronomi 5:17) Unai amo Israela taudia idia diba, Dirava ese taunimanima edia mauri ia laloa bada bona taunimanima ese ma haida edia mauri idia laloa bada be namo.

 5. Bogana lalonai natuna hamasea karana be edena bamona ita laloa be namo?

⁵ Bogana lalonai ia noho natuna ena mauri be edena bamona? Mose ena Taravatu hegeregerena, sinana ena bogana lalonai natuna hamasea karana be kerere. Oibe, Iehova dekenai mauri be helaga. (Esodo 21:​22, 23; Salamo 127:3) Unai dainai bogana lalonai natuna hamasea karana be maoro lasi.

 6. Dahaka dainai taunimanima ita inai henia lasi be namo?

⁶ Mauri ita matauraia ena anina ta be ma haida ita lalonamo henidia. Baibel ia gwau: “Bona iena tadikakana ia badu henia noho tauna be ala-ala tauna. Umui diba mauri hanaihanai be ala-ala tauna lalonai ia noho lasi.” (1 Ioane 3:15) Bema ita ura mauri hanaihanai ita abia, namona be ma haida inai henia karana ita dadaraia, badina inai heheni karana dainai dagedage ia vara. (1 Ioane 3:​11, 12) Gau badana be lalokau heheni karana ita dibaia.

 7. Taunimanima ese edena kara haida idia karaia bona unai amo idia hahedinaraia mauri idia matauraia lasi?

⁷ Edena bamona ita hahedinaraia diba iseda mauri ita matauraia? Taunimanima be idia ura lasi idia mase, to edia mauri idia haboioa diba moale karadia idia karaia. Hegeregere, momo be kuku, buatau, eiava mariuana idia ania kava. Unai bamona gaudia ese tauanina ia hadikaia bona idia gaukaralaia taudia ia hamasea. Unai gaudia ia gaukaralaia tauna ena lalohadai dekenai mauri be helaga lasi. Dirava ena matanai unai gaudia be miro. (Roma 6:19; 12:1; 2 Korinto 7:1) Dirava ese ia moalelaia dalanai ia ita tomadiho henia totona, namona be unai bamona karadia ita rakatania. Ena be do ia auka unai ita karaia totona, to Iehova ese ita dekenai goada do ia henia. Bona Dirava do ia moale bema ita hekwarahi iseda mauri be Dirava amo ia mai harihari gauna bamona ita laloa.

 8. Dahaka dainai mauri naria daladia ita laloa bada be namo?

⁸ Bema mauri ita matauraia, mauri naria daladia do ita laloa bada. Iseda mauri do ita naria namonamo bona moale davaria totona, iseda mauri do ita haboioa lasi. Motuka taria namonamo lasi karana bona dagedage eiava mase idia havaraia spot gadara do ita dadaraia. (Aonega Herevadia 3:31) Dirava ese Israela taudia dekenai ia henia taravatu ta ia gwau: “Ruma matamata [mai ena guhi palakana] do umui haginia neganai, guhi ena isena dekenai magu maragina do umui haginia, emui ruma guhi dekena amo tau ta do ia moru garina, bona iena mase be emui kerere garina.” (Deuteronomi 22:8) Unai taravatu ena hakaua herevana hegeregerena, emu ruma ena vadavada do oi naria namonamo, unai amo ta do ia moru bona dika bada do ia davaria lasi. Bema oi be mai emu motuka, namona be oi hanamoa namonamo unai amo oi taria neganai, dika ta do oi davaria lasi. Namo lasi emu ruma eiava motuka dainai oi eiava ma ta ese dika ia davaria.

 9. Bema mauri ita matauraia, animal be edena bamona do ita kara henidia?

⁹ Animal edia mauri be edena bamona? Havaraia Tauna ena matana ai animal edia mauri danu be helaga. Aniani bona dabua abia totona, eiava taunimanima idia haberoa lasi totona animal ita alaia karana be Dirava ese ia koua lasi. (Genese 3:21; 9:3; Esodo 21:28) To, animal ita hahisia eiava ita alaia kava be kerere, bona unai ese ia hahedinaraia mauri be gau helagana bamona ita laloa lasi.​—Aonega Herevadia 12:10.

10. Dirava ese edena bamona ia hahedinaraia mauri bona rara be idia gaukara hebou?

¹⁰ Kaino ese ena tadina Abela ia hamasea murinai, Iehova ese Kaino ia hamaoroa: “Oiemu tadina ena rarana be tano dekena amo ia boiboi noho lau dekenai.” (Genese 4:10) Dirava ese Abela ena rara ia herevalaia neganai, ia be Abela ena mauri ia herevalaia. Kaino ese Abela ena mauri ia kokia dainai, Dirava ese ia panisia be maoro. Unai be hegeregere, Abela ena rara eiava mauri, ese Iehova ia noia Kaino ese ia karaia kara dika ena davana ia henia totona. Noa ena negai ia vara Abata murinai, Dirava ese mauri bona rara ia herevalaia hebou lou. Abata ia do vara lasi neganai, taunimanima be au huahua bona uma aniani idauidau sibona idia ania. To Abata murinai, Iehova ese Noa bona ena natudia ia hamaoroa: “Mauri gaudia ibounai umui ania diba, ava aniani umui ania vadaeni hegeregerena. Lau ese lau henia umui dekenai, aniani totona.” To, Dirava ese inai taravatu ia henia: “Aniani tamona umui ania diba lasi. Vamu mai rarana danu be mai taravatu, badina be rara be mauri ena badina.” (Genese 1:29; 9:​3, 4) Ia hedinarai goevagoeva, Iehova ese ia havaraia gaudia edia mauri bona rara be idia gaukara hebou.

11. Noa ena nega amo Dirava ese rara dekenai edena taravatu ia atoa?

¹¹ Ita hahedinaraia rara ita matauraia bema ita ania lasi. Iehova ese Israela taudia dekenai ia henia taravatuna dekenai, inai hahegani ia henia: “Bema Israela tauna ta . . . ia labana, vadaeni uda gauna ta o roho manuna ta, aniani gauna do ia alaia mase, ia ese rarana do ia habubua tano dekenai, bona tano kahu dekena amo unai rara do ia koua. . . . Lau Lohiabada ese lau oda henia vadaeni, vamu mai rarana danu do umui ania lasi.” (Levitiko 17:​13, 14) Lagani 800 gunanai, Dirava ese Noa ia hagania rara do ia ania lasi, bona unai taravatu ia haidaua lasi. Iehova ena lalohadai be: Iena hesiai taudia ese animal ena vamu idia ania diba to ena rara do idia ania lasi. Idia ese rara be tano dekenai do idia bubua​—hegeregere unai animal ena mauri be Dirava dekenai idia henia lou.

12. Aposetolo edia negai, rara dekenai lauma helaga ese edena hahegani ia henia, bona hari inai negai danu ia be mai anina bada?

¹² Keristani taudia ese unai taravatu tamona do idia badinaia. Aposetolo edia negai, Iesu murinai idia raka taudia idia gunalaia aposetolo taudia bona tatau ma haida ese hebou ta idia abia, bona unai hebou ai Keristani kongrigeisen ese do ia badinaia hahegani idia herevalaia. Bona idia karaia abia hidi be inai: “Lauma Helaga bona ai be inai bamona ai laloa. Ai be maduna metau haida ma do ai atoa lasi umui dekenai. To inai taravatu mai badina gaudia, idia sibona do umui naria: Kaivakuku vairana dekenai idia atoa aniani umui ania lasi, rara umui ania lasi, aiona idia gigia gaudia edia hidio umui ania lasi, bona heudahanai karadia umui karaia lasi.” (Kara 15:​28, 29; 21:25) Unai dainai ‘rara ita ania lasi’ be namo. Dirava ena matanai unai be mai anina bada, ia be hegeregere kaivakuku tomadiho henia bona heudahanai karana ita dadaraia bamona.

13. Dahaka dainai rara ita ania lasi taravatuna ese ia hahedinaraia rara ita abia hanai lasi danu? Haheitalai gwauraia.

¹³ Rara do ita ania lasi taravatuna ese ia hahedinaraia rara do ita abia hanai lasi danu, a? Oibe. Haheitalai ta be inai: Reana doketa ta ese oi ia hamaoroa kekero muramura do oi inua lasi. Unai ena anina be kekero muramura oi inua be kerere, to hekodo amo oi abia be namo, a? Lasi! Unai hegeregerena, rara ita ania lasi ena anina be dala ma ta ai iseda tauanina lalonai rara do ita atoa vareai lasi. Unai dainai rara ania lasi taravatuna ese ia hahedinaraia, namo lasi ma ta ese iseda varovaro lalonai rara ia atoa vareai.

14, 15. Bema doketa ia gwau Keristani tauna ese rara ia abia hanai be namo, dahaka do ia karaia, bona dahaka dainai?

¹⁴ To bema Keristani tauna ta ese bero badana ia abia eiava opereisen badana ta ia abia gwauraia, be edena bamona? Reana doketa ese ia idia hamaoroa rara do ia abia hanai be namo, bema lasi, do ia mase. Momokani, unai Keristani tauna ia ura lasi ia mase. To Dirava ese ia henia harihari gauna mauri ia gimaia totona, rara lasi muramuradia ia abia dae diba. Unai bamona muramura ia abia diba bema idia noho, unai muramura be rara ena gabu ai idia gaukaralaia gaudia.

¹⁵ Keristani tauna ese Dirava ena taravatu do ia utua inai tanobada dekenai ia noho daudau totona, a? Iesu ia gwau: “Sibona ena mauri do ia dogoatao noho tauna be iena mauri do ia halusia, to sibona ena mauri do ia halusia lau totona tauna, be iena mauri do ia davaria.” (Mataio 16:25) Ita ura lasi ita mase. To bema ita mauri noho totona Dirava ena taravatu ita utua, mauri hanaihanai helarona ita haboioa diba. Unai dainai, aonega karana be ita abia dae Dirava ena taravatu be maoro, badina bema ita mase, ita diba toreisi lou negana ai iseda Mauri Henia Tauna ese ita do ia laloatao bona ita dekenai ena harihari gauna mauri do ia henia.​—Ioane 5:​28, 29; Heberu 11:6.

16. Dirava ena hesiai taudia ese edia lalona idia hadaia dahaka idia karaia totona?

¹⁶ Hari inai negai, abidadama taudia ese edia lalona idia hadaia Dirava ena taravatu rara dekenai idia badinaia totona. Rara do idia ania lasi. Bona gorere hanamoa totona rara do idia abia dae lasi.a Idia diba rara ia Havaraia Tauna be ia diba dahaka be namo idia totona. Unai oi abia dae, a?

17. Idaunegai Israela ai, edena dala sibona ai rara idia gaukaralaia bona unai kara be Iehova Dirava ese ia moalelaia?

¹⁷ Mose ena Taravatu ese rara gaukaralaia dala maorona tamona ia gwauraia. Iehova ese idaunegai Israela taudia dekenai ia idia tomadiho henia dalana ia gwauraia: “Mauri gaudia ibounai edia mauri be rara. Unai dainai lau Lohiabada ese lau oda henia vadaeni rara ibounai be boubou patana dekenai do idia bubua, taunimanima edia kara dika davana do ia karaia totona. Rara be mauri, bona rara ese kara dika ia kokia noho.” (Levitiko 17:11) Israela taudia idia kara dika neganai, animal ta idia bouboulaia bona ena rara be Dirava ena dubu ena boubou patana dekenai idia bubua, unai amo Dirava ese edia dika ia gwauatao diba. Unai dala maorona tamona sibona ai rara idia gaukaralaia.

18. Iesu ese ena rara ia bubua dainai, dahaka hahenamo ita abia?

¹⁸ Keristani taudia momokanidia be Mose ena taravatu henunai idia noho lasi, unai dainai animal idia bouboulaia lasi bona rara danu be boubou patana latanai idia bubua lasi. (Heberu 10:1) To, idaunegai Israela taudia edia negai, boubou patana latanai idia bubua rarana ese Dirava ena Natuna, Iesu Keriso ena dava bada boubou gauna ia laulaulaia. Inai buka ena Karoa 5 dekenai ita dibaia bamona, Iesu ese ena rara be boubou gauna bamona ia bubua, unai dala amo ena mauri be ita dainai ia henia. Bena guba dekenai ia daekau bona nega tamona sibona ia bubua rarana ena davana be Dirava dekenai ia henia. (Heberu 9:​11, 12) Unai amo Dirava ese iseda kara dika ia gwauatao bona mauri hanaihanai ita abia diba. (Mataio 20:28; Ioane 3:16) Unai rara gaukaralaia karana be mai anina bada! (1 Petero 1:​18, 19) Bema Iesu ese ia bubua rarana ita abidadama henia, mauri do ita abia.

19. Edena bamona ita hahedinaraia ma haida edia mauri ita laloa bada?

¹⁹ Iehova Dirava ese ita dekenai mauri ia henia dainai, ia ita tanikiu henia be namo! Bona ma haida ita durua idia ese Iesu ena boubou gauna idia abidadama henia totona, unai amo idia danu ese mauri hanaihanai idia abia diba. Ma haida edia mauri ita laloa bada dainai, mai iseda ura bada ida idia ita durua. (Esekiela 3:​17-21) Bema unai maduna ita huaia namonamo, aposetolo Paulo bamona ita hereva diba: “Bema umui ta ia boio, kerere be lau lasi. Badina be Dirava ena ura ibounai umui dekenai lau hamaoroa, gau ta lau hunia lasi.” (Kara 20:​26, 27) Taunimanima dekenai Dirava bona ena ura ita herevalaia neganai, ita hahedinaraia mauri bona rara ita laloa bada.