Rara Ena Kahana Maragidia Bona Opereisen Daladia

Rara ena kahana maragidia. Idia be rara ena kahana badadia foa, sel kakakakadia, sel kurokurodia, pleitelet, bona plasma amo idia abia. Hegeregere, sel kakakakadia be mai edia protein hemoglobin. Taunimanima eiava animal amo idia abia hemoglobin amo muramura ta idia karaia anemia gorerena eiava rara bada idia halusia gorere taudia idia durua totona.

Plasma, ena kahana 90 pesen be ranu, bona danu ia lalonai hormone, inorganic salt, enzyme, nutrient, mineral gaudia bona suga idia noho. Plasma lalonai rara ha-aukaia gaudia, gorere idia koua gaudia, bona protein haida hegeregere, albumin idia noho. Bema ta be gorere ta ia abia, reana doketa taudia ese gamma globulin hekodo idia henia. Unai gamma globulin hekodo be guna unai gorere idia abia taudia edia plasma amo idia abia, badina edia rara lalonai unai gorere koua gaudia idia noho vadaeni. Rara ena sel kurokurodia amo interferon bona interleukin idia abia bona muramura ta idia karaia. Unai muramura amo kensa bona virus ese idia havaraia gorere haida idia hanamoa.

Keristani tauna ese ataiai ai torea gorere hanamoa daladia ia abia dae be maoro, a? Baibel ese gau iboudiai ia gwauraia lasi, unai dainai Dirava vairanai Keristani taudia ta ta be edia lalomamina hegeregerena abia hidi do ia karaia. Haida be rara ena kahana maragidia ibounai idia dadaraia, badina idia gwau Dirava ese Israela taudia dekenai ia henia hahegani be, Israela taudia ese animal ena rara be ‘tano dekenai do idia bubua.’ (Deuteronomi 12:​22-​24) Ma haida be rara o rara ena kahana badadia idia dadaraia, to rara ena kahana maragidia idia abia dae. Reana idia laloa, tau ta ena rara amo idia kokia kahana maragidia be unai tauna ena mauri ia laulaulaia lasi.

Rara ena kahana maragidia gaukaralaia totona oi ura abia hidi oi karaia neganai, inai henanadai rua oi laloa: Lau laloparara bema lau be rara ena kahana maragidia ibounai lau dadaraia, unai anina be gorere haida hanamoa totona o rara bada halusia karana koua totona rara amo idia karaia muramura do lau dadaraia danu, a? Lau ese rara ena kahana maragina ta lau abia dae o lau dadaraia ena badina be doketa dekenai lau gwauraia hedinarai diba, a?

Opereisen daladia haida. Idia rua be hemodilution bona cell salvage. Hemodilution dekenai rara be gorere tauna ena varovaro amo idia veria bona masini ta dekenai ia heau vareai, unuseniai rara be muramura haida ida idia mikisi, bona gabeai gorere tauna dekenai idia henia lou. Cell salvage dalana be opereisen lalonai gorere tauna ese ia halusia rarana idia abia bona idia henia lou. Inai dala ai gorere tauna ena bero gabuna amo o tauanina ena kahana ta dekenai matu idia karaia, rara idia kokia, idia hagoevaia bona gorere tauna dekenai idia henia lou. Unai idia karaia totona, doketa ta ta be dala idauidau idia gaukaralaia, unai dainai namona be Keristani tauna ese iena doketa ia nanadaia edena dala do ia gaukaralaia.

Unai opereisen daladia oi abia hidi gwauraia neganai, sibona oi nanadaia: ‘Bema egu rara be masini ta dekenai ia heau lao, bona nega sisina lalonai ena heau dalana idia koua bona egu tauanina dekenai ia giroa lou lasi, egu lalomamina be unai kara ia abia dae, a? Bona unai rara be ‘tano dekenai idia bubua’ lasi, to egu tauanina dekenai idia atoa lou be maoro, a? (Deuteronomi 12:​23, 24) Opereisen lalonai egu rara idia kokia, muramura haida idia atoa, bona tauanina dekenai idia atoa lou karana be egu lalomamina ese ia abia dae, a? Bema lau gwau rara idia gaukaralaia daladia idauidau lau dadaraia, anina be lau ura lasi egu rara idia abia gorere tahua totona, rara be tauanina amo ia kokia bona ia atoa lou masini (hemodialysis), o rara ia pamua masini (heart-​lung bypass) do idia gaukaralaia, a?’

Keristani tauna be sibona abia hidi do ia karaia opereisen lalonai edena dala ai iena rara do idia gaukaralaia. Gorere tahua bona heduru daladia haida lalonai, rara sisina idia kokia, muramura haida idia atoa, bena gabeai tauanina dekenai idia atoa lou karadia dekenai danu, Keristani tauna sibona ese abia hidi do ia karaia.