Emu Natuna ‘Ia Tubu Daekau ela bona Hahemauri Ia Abia’ A?

KERISTEN tama sina iboudiai idia ura edia natudia be do idia tubu daekau ela bona lo Keristen tataudia bona hahinedia ai do idia lao. To madi, nega haida unai bamona ia vara lasi. Ena be ena tama o ena sina be Keristen tauna, to natu be Keristen tauna ta ai do ia lao kava lasi. Dahaka dainai?

Petro ese badina ta ia gwauraia, ia gwau: “Beibi matamata ese rata ia ura dikadika bamona, umui ese lauma ena rata goevagoeva do umui ura henia. Badina be unai umui inua neganai do umui tubu daekau, bona hahemauri do umui abia.” (1 Petro 2:2, 3) Iseda natudia be sibodia lauma gaudia do idia ura henidia lasi, unai dainai namona be ita durudia, idia be unai gaudia idia ura henidia bona unai ura idia habadaia totona. Unai Bible siri ese ia hahedinaraia hegeregerena, bema unai bamona idia karaia, mauri do idia davaria diba. Natu idia tubu daekau bona taunimanima badadia ai do idia lao totona, namona be edia tauanina hagoadaia anianina idia ura henia; unai hegeregerena, ‘idia tubu daekau bona hahemauri do idia abia’totona, namona be lauma aniani moalelaia karana idia manadalaia.

Tama sina e—emui natudia haida edia mauri laganidia be do 13 lasi a? Emui kara unai natudia naridia bona hadibadia totona be hegeregere a? Bema oibe, unai be namo. To, edia mauri laganidia be 12 idia hanaia neganai, reana gau haida do idia idau. Tama sina, idia edia natudia idia bada vadaeni taudia, idia gwau, memero kekeni, lagani 13 ela bona lagani 19, ese hekwakwanai haida idia davaria diba. Oi emu natuna ia do maragi neganai, unai hekwakwanai totona oi hegaegae diba a? Oibe, kara haida oi karaia diba. Kara ta be inai: Namona be ita durudia bena. . .

Iehova Idia Tura Henia

Iehova ese Hana ena guriguri ia kamonai henia dainai Samuel ia vara, bona Samuel be “Iehova vairanai ia tubu daekau.” (1 Samuel 2:20, 21) Unai be heduru namona, ani? Reana oi laloatao, nega ta tama sina ese edia natudia maragidia Iesu dekenai idia mailaidia. Unai neganai Iesu ena hahediba taudia ese idia gwau henidia, to “Iesu ia itaia, ia badu, ia gwau henia, ia gwau, ‘Lau ura maragi idia mai lau dekenai, umui lulua lasi, badina idia bamona be Dirava ena Basileia taudia.’” Iesu ia ura edia natudia be ia dekenai do idia mailaidia. Ia rosidia bona ia hanamodia.—Mareko 10:13-16.

Hari inai negai, tama sina ese edia natudia idia durudia diba “Iehova vairanai idia tubu daekau” totona a? Iesu Keriso dekenai idia mailaidia diba, bona unai amo Iehova bona Iesu edia turadia ai idia lao totona idia durudia diba a? Oibe, to idia karaia haraga diba lasi. Iesu ena lalona be hegeregere ena nega do ia gaukaralaia ma haida edia natudia do ia bamodia; unai dainai namona be iseda nega ita gaukaralaia, sibona eda natudia ita bamodia totona, ani? Bema mai dalana, namona be idia beibi neganai ita durudia matamaia, Timoteo ena sinana ese ia karaia hegeregerena. (2 Timoteo 3:15) Iseda natudia maragidia ida ita herevahereva neganai, namona be Iehova bona Iesu ita gwauraidia idia mauri noho taudia korikoridia bamona, bona edia kara namodia idauidau ita hadibadia idia ura henidia totona. Iseda natudia be uda o kone dekenai ita hakaudia lao neganai, namona be ita ese Iehova ia karaia gaudia idauidau ita gwauraidia hedinarai idia dekenai. Ita herevalaia gaudia amo ita durudia diba, idia ura kara maoromaoro idia karaia, badina unai ese Iehova bona Iesu Keriso ia hamoaledia. (Deuteronomi 6:7 itaia.) Unai kara oi reaia lasi. Iseda natudia edia maragi negana be daudau lasi. Idia tubu haraga, unai dainai oiemu nega oi gaukaralaia oi durudia totona.—Mataio 19:13-15.

Momokani, dala namona be Bible stadi amo hereva momokani be iseda natudia ita hadibadia bona ita durudia Iehova idia tura henia totona. Unai be heduru namona bema ita. . .

Hegaegae Namonamo

Bema sinana ia ura ena natuna ese tauanina hagoadaia anianina ia ania mai ena ura danu, unai aniani bada be ena uduna dekenai do ia udaia lasi. To, unai aniani do ia hegaegaelaia namonamo bona ena natuna do ia ha-uraia, sisina sisina do ia ania totona, ela bona unai aniani do ia ura henia. Namona be unai bamona ita karaia danu lauma anianina dekenai. Bema hari oiemu natuna oi stadi henia hamatamaia, eiava oi stadi henia karana ia moalelaia lasi, namona be oi hegaegae namonamo bona oi ha-uraia unai stadi ia ura henia totona.

Natu maragidia oi stadi henidia neganai, reana henanadai bona haere karana oi gaukaralaia lasi, bona hora ta lalonai umui stadi lasi. Oiemu natuna ena bada bona diba hegeregerena oi stadi henia. Bible ese ia gwauraia taudia haida edia sivarai oi kikilaia ia dekenai. Pepa bona pen oi henia, oi sivarailaia gaudia edia laulau ia torea totona. Bible drama haida idia karaia diba danu. Gaukara sisina oi henidia, vaira stadi totona idia hegaegae totona. Mai moale ida oi stadi henidia bona nega haida emu hadibaia dalana oi haidaua. Oi ura oiemu natuna ese Dirava ena hereva do ia “ura henia,” unai dainai namona be oi hegaegae namonamo bena iena ura do oi habadaia diba.—1 Petro 2:2, 3.

Bema unai bamona oi hekwarahi, anina namodia do idia vara, bona do idia noho daudau. Oiemu natuna ia maragi neganai bema lauma gaudia ia ura henidia, oi durua diba ena mauri laganidia iboudiai lalodiai Iehova ia tura henia totona. “Meromero oi hadibaia ena raka dalana ia diba totona; bena ia buruka neganai do ia rakatania lasi.” (Hereva Lada-isidia 22:6) To ma gau ta danu ese oiemu natuna ia durua diba lauma gaudia ia ura henidia totona. Unai be dahaka?

Ruma Bese mai Moalena

Oibe, bema tano be mai digarana bona medu bona dina be hegeregere, uhe do ia tubu namo herea. Unai hegeregerena, bema ruma bese taudia edia noho ia namo bona idia moale, lauma dalanai natuna do ia tubu namonamo. To, unai moale ia vara totona, namona be ruma bese taudia ese nega idia atoa, idia helai hebou bona kiki hebou totona. Tama sina e, unai bamona umui karaia a? Taravatu haida umui atoa vidio raraia karana dekenai a? moale karadia dekenai a? miusik dekenai a? ruma bese ena Bible stadi dekenai a? ma tomadiho karadia dekenai a? Adorahi neganai umui aniani neganai, emui kara be edena bamona? Unai be nega namona ruma bese momo dekenai, idia aniani hebou bona idia kiki hebou totona. Unai dina lalonai idia vara gaudia idia kikilaia diba bona moale havaraia herevadia haida idia kikilaidia diba danu. Unai kara ese ruma bese taudia iboudiai ia hanamodia diba.

Inai mani oi laloatao danu: Namona be natu ese tomadiho karadia bona ruma gaukara idia karaia, to danu namona be idia be mai edia nega idia gadara totona. Tau ta, ladana Charles R. Foster be buka ta, ladana Psychology for Life Today lalonai ia gwau: “Moale karadia bona gadara ese natu idia durudia diba, unai dainai namona be tama sina ese dala idia karaia, edia natudia ese unai karadia idia karaia totona . . . Natu be idia tubu daekau noho lalonai, namona be idia lalo-parara unai moale karadia haida be mai davana bada bona idia be mai edia maduna ruma gaukara haida idia karaia danu. Bema unai idia lalo-pararalaia, bona edia moale karadia idia biagudia namonamo, bona edia gaukara ruma dekenai idia karaia, ruma bese dekenai moale do ia vara.”

Vadaeni, bema tama sina ese edia natuna idia durua ia be lalohadai maorona moale karadia, gaukara, bona tomadiho karadia dekediai ia abia totona, unai amo idia durua, lauma gaudia ia moalelaidia bona Iehova kahirakahira dekenai ia noho totona. (2 Timoteo 3:4b; Tito 3:3 itadia.) Edia natuna ia goada ia lao neganai do idia moale. Vadaeni, ma gau ta idia karaia diba danu, bena edia natuna ia do maragi neganai lauma gaudia do ia ura henidia. Gauna be inai:

Oi Durua Gau Namona Ia Tahua Totona

Aonega tauna King Solomon ena sisiba namona natuna habadaia karana dekenai be inai: “Meromero oi hadibaia ena raka dalana ia diba totona; bena ia buruka neganai do ia rakatania lasi.” (Hereva Lada-isidia 22:6) “Ena raka dalana ia diba” ena anina ta be, oi hadibaia ena mauri lalonai gau namodia ia tahudia totona. Unai dainai, bema tama o sina ese ena natuna ia durua mai anina bada gaudia ia tahudia totona, ena moale ia habadaia diba bona lauma dalanai ia hagoadaia diba. Ia abidia diba gaudia ia tahua be namo. Bena ia tahua gaudia haida ia abidia vadaeni neganai, ena lalona do ia hegeregere, unai ia hanaia gaudia do ia tahudia.

Tama sina momo edia kerere be inai: Idia naria ela bona edia natudia ese sibodia edia lalona do idia hadaia gau haida do idia tahudia totona. Memero bona kekeni edia diba be hegeregere lasi. Bema tama sina ese edia natuna idia durua lasi gau namodia ia tahudia totona, ma ta ese do ia durua—reana ena sikuli turana eiava sikuli tisa ese. Keristen tama sina ese edia natuna idia durua diba, ena abidadama danu idia hegeregere gaudia ia tahua totona. Memero kekeni idia tahua diba gauna ta be inai: Idia hegaegae Haroro School lalonai idia vareai totona. Haroro gaukara lalonai gau haida idia tahua diba danu, hegeregere, pablik tok hadibaia pepana henia karana, magasin ena hereva kikilaia karana, kiki herevana kwadogina henia karana. Stadi karana dekenai gau haida idia tahua diba danu. Memero kekeni ese Bible ena buka ta ta iboudiai edia ladana bona siri badadia haida danu be metairametaira idia dibadia diba. Ia do bada lasi neganai, namona be ena gaukara, do ia bada bona sikuli do ia rakatania vadaeni neganai do ia tahua gaukarana, idia kikilaia hebou. Sikuli tisa ese ena lalona do ia veria gaukara ta do ia tahua totona, to namona be Keristen tama sina ese edia natuna idia durua, ia be mai anina gaukarana ta ia tahua totona, unai gaukara ese ena lalona do ia hamoalea badina iena amo Iehova ena hesiai gaukara, hegeregere pioneer gaukara, Betele gaukara, eiava misinari gaukara do ia karaia diba.

Tama sina idia ura edia natuna do ia tubu daekau bona ena maduna do ia huaia, do ia kara kava lasi. Bible ena taravatu bona sisiba herevadia amo idia durua diba, bena ia be sibona ena lalona do ia hadibaia diba, maoro bona kerere edia toana ia diba totona. Ia tubu daekau lalonai, namona be idia hamaoroa idia abidadama henia, idia laloa do ia kara maoromaoro diba. Reana idia hamaoroa, kara ta dekenai ia be sibona ena ura do ia karaia diba; to bema ia kara kerere, namona be idia gwau dika henia dikadika lasi, to namona be unai amo dala maorona idia habibaia. Bema edia kara dainai oi laloa idia be hegeregere gau idauidau do idia karaia diba, natudia do idia moale, bona unai amo do oi durudia ‘idia tubu daekau, bona hahemauri do idia abia’ totona.

Natu ia tubu daekau lalonai,ena tamana bona sinana ese ena kara idia itaia, sbona bema idia itaia, ena kara o lalohadai haida ia haidaudia, namona be edia hadibaia dalana bona sisiba henia dalana idia haidaua, iena kara o lalohadai idaudia hegeregeredia. Namona be idia koikoi lasi o hereva haida iena amo idia hunia lasi, to edia lalohadai iena kara dekenai idia gwauraia hedinarai be namo. Bema hereva ta idia hunia lasi, unai amo dala idia kehoa, ia ese ena lalohadai idia dekenai ia gwauraia hedinarai totona, bena idia herevahereva hebou diba.

David ia tauhau neganai lauma gaudia ia ura ura henidia bada. Salamo haida ia torea, bona idia hahedinaraia ia be Iehova ena lalokau ia moalelaia bada. (Salamo 23:1-6) Iehova ia abidadama henia dainai, ia gari lasi, bea bona laion idia mai neganai, bona Filistia tau badana, Goliata, ia mai bona Israel ena tuari taudia iboudiai ia hagaridia neganai danu David ena tamana, Iese ese David moalelaia bada ena abidadama dainai! David ese ai tura henia ela bona ia mase. (Samuel 17:32-37, 45-50; Salamo 19:9, 10, 14; 15:1, 2; 24:3, 4) Bema ita durudia, iseda natudia danu be David ia karaia bamona Iehova idia tura henia diba bena do ita moalelaidia. To ita sibona be hegeregere lasi.

Guriguri amo Heduru Oi Tahua

Manoa ia diba ena adavana ese natuna ta do ia havaraia neganai, Iehova ia noia, do ia hadibaia unai natuna be edena bamona do ia naria bona do ia hadibaia. Iehova ese ena noinoi ia kamonai.(Hahemaoro Taudia 13:8, 12, 24) Namona be hari inai neganai danu tama sinana ese Iehova idia nioa, aonega do ia henidia edia natudia be mauri dalana dekenai idia hakaudia totona. Iehova ena peroveta tauna Samuel ia laloa, bema Iehova ena taunimanima dainai ia guriguri lasi, unai be “Iehova kara dika henia” karana hegeregerena. (1 Samuel 12:23; Hereva Lada-isidia 1:24, 25 itaia.) Namona be unai bamona ita laloa iseda natudia dekenai. Ita ura idia be lauma gaudia idia laloa momo. Guriguri loulou be heduru namona.

Oi Hesiku Lasi

Inai kara ta ia haraga a? Lasi. Ena be ia be mai ena hekwarahi, to dokonai davana namona do oi abia. Oiemu natuna ena mauri laganidia be 12 idia hanaia neganai, hekwakwanai haida do idia vara. Idia vara neganai, oi gari lasi. Idia ta ta idia vara neganai, oi hanaidia toho, to namona be oi laloa lasi hoa dalanai do idia ore. Oi gini auka, to emu natuna oi gwau dika henia lasi; oi haheauka bona hekwakwanai oi hanaia toho. Bema ita be iseda lalona ita biagua namonamo diba, unai hekwakwanai momo do idia ore, bena dala do ia kehoa ita be iseda natuna ida ita lalo-Tamona diba.

Dirava garina idia gari tama sina iboudiai idia ura edia natudia be namo sibona do idia abia. Ita ura idia ese helaga gaudia idia matauraidia bona Dirava ena hereva idia ura henia, bena unai amo ‘do idia tubu daekau, bona hahemauri do idia abia.’ Nega haida, ena be Keristen tama sina idia hekwarahi bada edia natudia idia hadibadia namonamo totona, to idia tubu daekau neganai hereva momokani idia dadaraia. To, bema mai eda lalo-goada ida iseda natudia ita hadibadia, reana unai kerere do ia vara lasi. Iehova ena heduru amo do ita gaukara goada, iseda natudia be edia rakalaia dalana ita hadibadia totona. Ita ura iseda natudia do ita itadia, hereva momokani ena dala dekenai do idia raka edia mauri dinadia iboudiai lalodiai.—Heberu 12:16; 1 Petro 2:2; Hereva Lada-isidia 22:6.

[Box on page 30]

Iesu ese ma haida edia natudia ia bamodia hegeregerena, namona be sibona eda natudia ita bamodia

[Box on page 31]

Oi emu natuna ese Dirava ena hereva do ia “ura henia” totona, namona be unai hereva oi hegaegaelaia namonamo