Abidadama Noho Dirava bona Keriso Dekenai

Kolose Bukana ena Hereva Badadia

MAURI ita abia totona, gau badana be Iehova Dirava bona Iesu Keriso ita abidadama henidia. To iseda abidadama ita dogoatao noho be mai ena hekwarahi. Keristen taudia Kolose hanua dekenai be unai idia diba, Kolose hanua be Asia Minor dekenai, Efeso amo dina ia daekau kahana dekenai ia noho. Dahaka dainai idia hekwarahi? Badina unuseniai hahediba koikoi taudia ese taunimanima idia hadibaia mauri abia dalana be kopina utua karana, idia ania gaudia, bona taravatu badinaia karana amo, to unai be maoro lasi.

Unai dainai, aposetolo Paulo be Keristen taudia totona ia lalo-hekwarahi, ia ura lasi lauma dalanai do idia manoka, ia ura edia abidadama karana Dirava bona Keriso dekenai ia goada noho. Unai dainai (lagani 60-61 C.E. ai bamona), Paulo be dibura rumana noholaia negana ginigunana Roma dekenai be kahirakahira ia ore neganai, Paulo ese Kolose taudia dekenai revareva ta ia torea, unai revareva ena hereva amo hereva momokani idia ia hadibaia lalohadai kereredia idia negea totona, bona edia abidadama ia hagoadaia totona. Namona be hari ita itaia edena bamona iena lalokau herevadia amo heduru ita abia diba danu.

Keriso ena Dagi Laloatao

Unai revareva ena hamatamaia herevana lalonai, Paulo ese Iesu ena dagi ia gwauraia hedinarai, bona ia gwau iena dagi dainai ita moale be gau badana. (1:1–2:12) Kolose taudia ese Keriso idia abidadama henia, bona idia bamoa kamonai taudia idia lalokau henidia dainai, Paulo ese idia ia hanamoa. Paulo ese Keriso ena dagi badana ia gwauraia hedinarai, ia gwau Ia dekena amo gau ibounai idia vara, ia be kongregesen ena Kwarana, bona ia be mase amo ia toreisi lou tauna ginigunana. Dirava turana henia lou karana ena dala be Keriso dekena amo sibona, badina ia lalonai aonega bona diba ibounai idia noho. Unai idia diba neganai, namona be Keristen taudia ibounai be mai edia lalo-tamona ida Keriso danu idia raka noho, namo lasi taunimanima edia aonega hereva ese idia ia koia.

Keriso dekena amo, Dirava ese Taravatu ia kokia. (2:​13-23) Iesu ia mase neganai unai Taravatu be mase auna dekenai idia kokoa kau bamona. Taravatu ena hereva be “guna be mai edia anina, to hari edia anina be bada lasi. Anina korikori gauna be Keriso sibona.” Bema Keriso idia abidadama henia noho, taunimanima edia aonega hereva do ia koidia lasi, bona guba dekenai mase diba lasi maurina do idia abia.

Dirava bona Keriso Moalelaidia

Murinai Paulo ese Kolose taudia ia hagoadaia mauri dala matamatana idia atoa totona, bona Iesu Keriso ena siahu henunai idia noho totona. (3:​1-17) Guba gaudia idia laloa noho neganai, edia mauri lalonai lauma gaudia do idia laloa guna. Unai idia karaia totona gau badana be edia lalohadai bona hereva kereredia do idia negedia. Hahenamo bada do idia abia bema inai kara be dabua bamona idia atoa: bogahisihisi, lalo-manau, bona lalokau! Bema gau iboudiai be Iesu ena ladana dekenai do idia karaia, bona ia dekena amo Dirava do idia tanikiu henia, vadaeni unai anina be Keriso ena maino be edia kudouna lalonai ia gaukara noho.

Bema Iehova Dirava bona Iesu Keriso ita moalelaia, namona be unai kara be ia hanai ma Keristen taudia haida ita kara henidia neganai. (3:18–4:18) Namona be headava hahine, headava tatau, natudia, hesiai taudia, bona biaguna taudia be edia gaukara idia karaia Dirava idia gari henia dainai, bona Keriso idia abia dae dainai. Gau badana be idia guriguri noho bona aonega dalanai idia raka noho!

Paulo ena revareva Kolose taudia dekenai ese ita ia durua diba hahediba koikoi herevadia ita dadaraia totona, bona mauri hanaihanai do ita reaia lasi. Aposetolo tauna ia hahedinaraia gau badana be Iehova bona ena Natuna edia siahu henunai ita noho, badina unai ese ita ia durua taunimanima ma haida ita kara namo henidia totona. Bona hahenamo momo do ita davaria diba bema Dirava bona Keriso ita abidadama henidia noho.

[Box/Picture on page 22]

Revareva Laodikea dekenai: Kolose taudia dekenai Paulo ia torea, ia gwau: “Inai revareva umui huanai dekenai umui duahia murinai Laodikea ekalesia orea dekenai do umui siaia, idia danu do idia duahia. Bona revareva ta Laodikea taudia dekenai lau siaia vadaeni. Unai revareva danu do umui duahia.” (Kolose 4:16) Laodikea be taga bada sitina ta Asia Minor dekenai, ia dekena amo dala ia lao Filadelefia bona Efeso edia siti badadia dekenai. Ena be Paulo be Laodikea dekenai ia haroro lasi, to reana ena hesiai gaukara ena sivarai idia kamonai. Ia ese revareva ta be Laodikea Keristen taudia dekenai ia siaia, to hari inai negai, diba tahua taudia haida idia laloa unai revareva bona Efeso dekenai ia siaia revarevana edia hereva be tamona. Laodikea dekenai ia torea revarevana be Bible dekenai ia noho lasi, badina reana unai hereva be anina lasi hari inai nega lalonai, eiava reana Bible ena toretore ma haida lalonai unai sivarai idia torea hedinarai vadaeni dainai.

[Picture]

Laodikea ena hanua gunana