Iehova Ena Dina Oi Laloa Hanaihanai

“Lalohadai kourana dekenai, . . . Iehova ena dina ia mai kahirakahira.”​—IOEL 3:14.

 1. Badina be dahaka Iehova ese do ia mailaia tuari helagana be taunimanima edia tuari “helagadia” amo ia idau?

“BESE idauidau bogaragidiai inai umui gwauraia, ‘Tuari umui hahelagaia!’ ” (Ioel 3:9) Unai be tuari helagana ta, a? Muslim bona Keristen taudia huanai tuaridia, tomadiho dainai tuaridia, bona tanobada ibounai tuari badadia rua​—Kerisendom be unai tuari lalonai gaukara bada ia karaia​—ita laloa neganai reana tuari “helagana” ita laloa bena ita gari. To, Ioel ena peroveta hereva lalonai ia herevalaia tuari helagana be bese idauidau bogaragidiai idia karaia tuarina lasi. Ita gwau lasi tomadiho dainai idia tuari, bena badu dainai tano eiava kohu idia hepapahuahulaia. Ia be kara maoromaoro tuarina. Ia be Dirava ena tuari, tanobada amo mataganigani, heiriheiri, kara dika, bona dagedage ia kokia oho totona. Ia be Iehova ese ia havaraia gaudia iboudiai ia lohiaia dalana maorona do ia hamomokania. Unai tuari ese dala ia kehoa Keriso ena Basileia amo taunimanima be Lagani 1,000 Negana lalonai idia vareai totona, unai neganai Dirava ena peroveta taudia ese idia perovetalaia hegeregerena, gabu ibounai dekenai be maino, kohu bada, bona moale.​—Salamo 37:​9-11; Isaia 65:​17, 18; Apokalupo 20:6.

2, 3. (a) Ioel 3:14 dekenai ia perovetalaia “Iehova ena dina” be dahaka? (b) Badina be dahaka unai dina dekenai tanobada besedia ese dika do idia abia be namo?

² Unai dainai, Ioel 3:14 dekenai ia perovetalaia “Iehova ena dina” be dahaka? Iehova ia gwau: “Unai dina dainai madi! Badina be Iehova ena dina ia kahirakahira, bona Siahu Ibounai Diravana ena amo do ia mai hadikaia ore karana bamona!” Edena dala ai ia be hadikaia ore karana? Murinai peroveta tauna be anina ia gwauraia, ia gwau: “Hutuma, hutuma herea idia noho lalohadai kourana dekenai, badina be Iehova ena dina ia mai kahirakahira.” (Ioel 1:15; 3:14) Unai dina ai Iehova be iena lohia dalana maorona guba bona tanobada dekenai idia dadaraia Dirava badinaia lasi taudia hutuma momo dekenai iena hahemaoro karana do ia karaia. Nega daudau lalonai Satana ena tanobada ese taunimanima ia koudia bona Iehova ena lalohadai be unai tanobada do ia hadikaia ore.​—Ieremia 17:​5-7; 25:​31-33.

³ Tanobada dikana be unai lalohadai ena anina do ia mamia. To momokani tanobada ia dika, a? Ena sivarai ita itaia neganai do ita diba ia dika momokani! Iesu be Mataio 7:16 dekenai diba dalana ia gwauraia, ia gwau: “Edia kara toana dekena amo do umui diba.” Tanobada ena hanua badadia be drag dikadia ania kava karadia momo amo, taravatu utua karadia momo amo, hagaria karadia amo, lebulebu karadia amo, bona tanobada bona hodahoda hamiroa karadia amo idia honu, ani? Tano momo dekenai idia abia matamata igui hesiai lasi nohona idia koua badina politikol daladia dekenai idia daradara, aniani ia hegeregere lasi, bona taunimanima idia ogogami. Taunimanima bilion bona ma haida edia aniani be hegeregere lasi. Ma danu, AIDS gorerena, drag ania kava karadia bona lebulebu mauri daladia dainai unai gorere idia bada idia lao, bona unai kara be tanobada ena kahana bada ia hadikaia gwauraia. Tanobada Ibounai Tuarina Ginigunana be lagani 1914 neganai ia vara murinai, tanobada ibounai dekenai mauri daladia iboudiai idia dika idia lao.​—2 Timoteo 3:​1-5 danu hahegeregerea.

 4. Iehova be tanobada besedia dekenai dahaka hereva aukana ia halasia?

⁴ To, tanobada besedia iboudiai amo Iehova be bese ta​—Iehova ena Witness taudia​—ia haboudia, idia be mai moale danu iena kara dekenai diba idia abia bona iena dala dekenai idia raka. Unai taudia, tanobada ena gabu ibounai dekenai, ese edia kaia be tano geia gaudia ai idia halaodia, tanobada ena dagedage karadia idia dadaraia vadaeni. (Isaia 2:​2-4) Oibe, kaia be tano geia gaudia ai idia halaodia! To unai be Ioel 3:​9, 10 dekenai Iehova ena hereva amo ia idau, ani? Unuseniai ita duahia, ia gwau: “Bese idauidau bogaragidiai inai umui gwauraia, ‘Tuari umui hahelagaia! Goada taudia hatoredia isi! Namona be idia mai kahirakahira! Tuari taudia iboudiai idia mai! Emui tano geia gaudia be kaia ai umui halaodia bona emui uma pakosi gaudia be io ai umui halaodia.’ ” Iehova be inai hereva amo tanobada lohia taudia ia boiridia edia tuari goada ibounai amo ia idia tuari henia Aramagedono dekenai. To do idia kwalimu diba lasi! Do ia halusidia momokani!​—Apokalupo 16:16.

 5. Unai ‘tanobada ena vain’ ena huahua utua neganai dahaka do ia vara?

⁵ Atai Herea Lohiabadana Iehova idia inai henia dainai, siahu lohia taudia be hagaria tuari kohudia bada idia haboua​—to unai ibounai be anina lasi! Iehova be Ioel 3:13 dekenai oda ia henia, ia gwau: “Kaia amo umui utua, badina be uiti ia mage vadaeni. Umui mai diho, uain huahua moia tanika idia honuhonudae dainai uain ia hebubu; badina edia dika be bada herea.” Unai hereva be Apokalupo 14:​18-20 ena hereva bamona, unuseniai kaia ia dogoatao aneruna be oda ia abia ‘tanobada ena vain huahuana do ia utua vain dekena amo, badina idia mage vadaeni.’ Aneru be iena kaia amo unai hekokoroku besedia ia negea ‘moia gabuna badana, semensi tanika bamona gauna lalonai. Unai be Dirava ena badu, siahu dikadika gauna.’ Laulau dalana dekenai, uain moia tanika ena amo rara ia bubua mai bona ena dobu be hosi edia uduna kwatua varo dekenai ia daekau, bona ia heau ena lata be 300 kilomita! Unai be gari dikadika gauna Iehova ena ladana idia hadikaia besedia edia vairana ai!

Taravatu Idia Badinaia Taudia

 6. Iehova ena Witness taudia be edena bamona tanobada besedia bona edia lohia taudia idia lalodia?

⁶ Anina be Iehova ena Witness taudia be tanobada besedia bona edia lohia taudia idia matauraidia lasi, a? Lasi momokani! To idia ibounai idia itaia kara dikadia dainai idia lalohisihisi bada, bona Iehova ena dina ena hahemaoro be ia mai haraga idia harorolaia. Unai negana lalonai danu, mai manau ida aposetolo Paulo ena hahegani Roma 13:1 dekenai idia badinaia, ia gwau: “Taunimanima ibounai ese gavamani do idia kamonai henia.” Unai tanobada lohia taudia idia matauraidia to idia tomadiho henidia lasi. Idia be taravatu badinaia taudia dainai, Bible ena taravatu hereva momokani, kara momokani, bona kara goeva dekenai idia badinaia bona edia ruma besedia lalonai mauri ena taravatu kara namo dekenai idia hadibaia. Idia be ma haida idia durudia danu unai bamona idia karaia diba dalana dekenai. Idia be maino dekenai taunimanima iboudiai ida idia noho hebou, idia be gavamani maumauraia karadia eiava politikol dalana dekenai gavamani hamorua toho karadia ai idia vareai lasi. Iehova ena Witness taudia idia ura haheitalai namona idia karaia tanobada ena siahu taudia edia taravatu idia badinaia karana amo, bona unai negana lalonai idia be Siahu Badana, Atai Herea Lohiabadana Iehova, dekenai idia naria ia be hari tanobadana dekenai maino goevadaena bona kara maoromaoro gavamanina ia haginia lou totona.

Iena Hahemaoro Herevana Ia Karaia

7, 8. (a) Edena daladia ai Dirava ese tanobada besedia do ia hamarerea bona dibura ese do ia koudia? (b) Ioel be hari inai nega lalonai edena taudia ia laulaulaidia bona edena daladia ai idia be hahenamo idia abia, tanobada taudia momo idia abia lasi gaudia unai?

⁷ Anina ia hedinarai namonamo laulau herevadia amo, Iehova be iena hahemaoro hereva karaia dalana be inai bamona ia gwauraia, ia gwau: “Dina bona hua do idia dibura, bona hisiu do idia diari lasi. Iehova be Siona amo do ia boiboi bada, bona Ierusalem lalona amo do ia hereva. Bona guba bona tanobada do idia heudeheude; to Iehova be ena bese taudia edia roho mauri gabuna ai do ia lao, bona Israel ena natudia edia goada gabuna ta ai do ia lao.” (Ioel 3:​15, 16) Taunimanima edia noho toana be mai ena moale bona mai ena kohu bada bamona, to tano mareremarere badana ta bamona ese hari ia dika ia lao tanobadana do ia hamarerea ore!​—Hagai 2:​20-22.

⁸ Inai moale havaraia herevana oi laloa: Iehova be iena bese taudia edia hunia gabuna bona kohorona ta! Badina be dahaka? Badina idia be tanobada ibounai dekenai Iehova ena hereva idia badinaia besena tamona. Unai hereva be inai: “Do umui diba lau be Iehova emui Dirava.” (Ioel 3:17) Ioel ena ladana anina be “Iehova be Dirava” dainai, ia maoro ia ese hari inai negai Iehova ena horoa Witness taudia ia laulaulaidia, idia be gari lasi dekenai Iehova ena atai herea lohia dalana ena maoro idia harorolaia. (Malaki 1:11 itaia danu.) Ioel ena peroveta ena hamatamaia herevana ita itaia neganai, do ita davaria ia be hari inai negai Dirava ena taunimanima edia gaukara ia perovetalaia namonamo.

Kwadi Oreana Ta

9, 10. (a) Ioel ese dahaka dika ia perovetalaia? (b) Edena dala ai Apokalupo ena hereva be Ioel ese dika ia perovetalaia herevana bamona, bona Kerisendom dekenai unai dika be dahaka do ia havaraia?

⁹ “Iehova ena hereva Ioel dekenai” oi kamonai, ia gwau: “Umui tatau burukadia e, umui kamonai, tano umui noholaia taudia iboudiai e, emui taiana amo umui hakala. Emui negadia ai, eiava emui sene taudia edia negadia ai, inai ia vara, a? Emui natudia dekenai umui hamaorolaia, bona idia ese edia natudia idia hamaorolaia, bona unai natudia be uru ma ta dekenai idia hamaorolaia. Kwadi be gaigai maragina ese ia rakatania gaudia ia ania; bona ia roho diba lasi kwadina be kwadi ia rakatania gaudia ia ania; bona pitopito be roho diba lasi kwadina ese ia rakatania gaudia ia ania.”​—Ioel 1:​1-4.

¹⁰ Unai be tuari idauna ta, ela bona hanaihanai do idia laloatao gauna ta. Manumanu oreadia momo do idia mai, ma gabeai ma haida idia mai, idia momo be kwadi, bona idia ese tano idia hadikaia momokani. Anina be dahaka? Apokalupo 9:​1-12 be kwadi ese idia havaraia dikana ia herevalaia, Iehova ese ia siaidia Keriso Iesu ena amo, ia be “edia king. Ia be guri dobu masemase ena aneru.” Iena ladadia Abadon (Heberu) bona Apolion (Greek) edia anina be “Hadikaia Ore Karana” bona “Hadikaia Ore Karaia Tauna.” Unai kwadi be Keristen horoa orena taudia idia laulaulaidia, idia be hari, Lohiabada ena dina lalonai, idia lao Kerisendom ena gabu idia hadikaia totona, idia karaia dalana be tomadiho koikoi ena kara idia gwauraia hedinarai bona Iehova ena badu do ia mai idia harorolaia.

11. Hari inai negai edena taudia ese kwadi taudia idia durua, bona idia be daidia idia tuari henidia?

¹¹ Apokalupo 9:​13-21 ese ia hahedinaraia hegeregerena, kwadi ia havaraia dikana murinai be hosi dekenai idia gui taudia ese idia havaraia dikana. Hari inai nega lalonai unai be momokani, badina idia do noho horoa orena Keristen taudia tausen haida be heduru idia abia “mamoe idaudia haida” milion hani amo, idia iboudiai be ta ese ia koua diba lasi hosi gui kau oreana ta! (Ioane 10:16) Iehova ena badu hahemaoro herevadia be Kerisendom ena kaivakuku tomadiho taudia dekenai bona ‘edia ala-ala karadia dainai bona edia lauma dikadia karadia dainai bona edia sihari kava dainai eiava edia henao karadia dainai idia helalo-kerehai lasi taudia’ dekenai idia harorolaia mai lalo-tamona ida. Dubu gunalaia taudia​—Katolik bona Protestan taudia​—be lagani 1900 C.E. murinai unai hahemaoro herevadia be taunimanima momo idia alaia tuaridia idia durua taudia dekenai, bona natuna maragidia idia hadikaia pris taudia bona idia kara miro televisen haroro taudia dekenai.

12. Badina be dahaka Kerisendom ena gunalaia taudia be hahemaoro herevadia idia abia be namo, bona nega kahirakahira dahaka do ia vara idia dekenai, bona Babulono Badana taudia ibounai dekenai?

¹² Unai kara miro idia karaia dubu “tatau namodia” dekenai, Iehova ena hereva be inai, ia gwau: “Umui kekero taudia e, umui noga bona umui taitai; uain umui inua kekero taudia e, uain ena ranu digarana dainai umui tai bada, badina emui uduna amo idia abia oho.” (Ioel 1:5) Lagani 1900 C.E. murinai, Kerisendom tomadihodia be Dirava ena Hereva ena hahegani goevadia idia rakatania bona tanobada ena kara miro koua lasi karadia idia abia dae. Tomadiho koikoi bona ena dubu taudia idia laloa ia namo idia be tanobada karadia idia karaia momo, to idia be lauma bona tauanina goreredia momo herea idia abia! Nega kahirakahira, Apokalupo 17:​16, 17 ese ia herevalaia bamona, Dirava be politikol siahudia dekenai “palani” do ia henia tanobada ibounai tomadiho koikoi oreana, Babulono Badana, idia hadikaia ore totona. Unai negana ai sibona, ia be Iehova ena hahemaoro hereva ena mamina ia abia neganai, iena inuinu kekero mahuta karana amo do ia “noga.”

“Bese Badana Mai Edia Siahu Bada”

13. Edena dala ai Kerisendom ia laloa kwadi oreana be “bese badana mai edia siahu bada” bamona?

¹³ Iehova ena peroveta tauna ia hereva noho, ia be kwadi oreana ia gwauraia “bese badana mai edia siahu bada,” bona Babulono Badana dekenai ena toana be unai bamona. (Ioel 2:2) Haheitalai be, ena dubu gunalaia taudia idia lalohisihisi badina Kerisendom ena tomadiho oreadia be Buddhist gabuna, Japan dekenai, edia orea lalonai taunimanima idia abia vareai lasi. To hari inai negai, idia koua diba lasi hosi gui kau oreana ta bamona, unai tano dekenai Iehova ena Witness Japan taudia 160,000 bona ma haida idia hutuma bona taunimanima 200,000 bona ma haida edia ruma lalodiai Bible stadi idia henidia. Italy dekenai, Katolik taudia edia namba ia bada bena edia namba murinai Iehova ena Witness taudia 180,000 edia namba ia bada. Roman Katolik ena dubu tau badana ta Italy dekenai ia lalohisihisi to gau ta ia karaia diba lasi, badina Iehova ena Witness taudia be dubu amo ‘Katolik abidadama taudia 10,000 bona ma haida’ idia abia oho lagani ta ta iboudiai lalonai.a Witness taudia idia moale unai taudia idia abidia dae dainai.​—Isaia 60:​8, 22.

14, 15. Ioel be edena dala ai kwadi oreana ia herevalaia, bona hari inai nega ai edena dala ai unai ia guguru?

¹⁴ Ioel 2:​7-9 lalonai horoa Witness taudia edia kwadi oreana ia herevalaia, ia gwau: “Goada tatau bamona idia heau. Tuari tatau bamona magu dekenai idia daekau. Bona idia ta ta be edia daladia ai idia lao, bona edia raka dalana idia haidaua lasi. Bona idia be ma haida idia doridia lasi. Idia be ta ta ena dala ai idia raka namonamo, idia lao noho; bona tuari lalonai haida be hamasea gaudia amo idia moru neganai, ma haida ese edia dala idia rakatania lasi. Idia be hanua lalonai idia vareai haraga. Magu latanai idia heau lao. Ruma dekenai idia daekau. Uindo amo idia vareai henao tauna bamona.”

¹⁵ Unai be horoa “kwadi” tuari oreana ena toana ia gwauraia namonamo, edia bamodia milion hani bona ma haida be mamoe idaudia taudia! Tomadiho ena badu ta ena “magu” ese ia koudia diba lasi. Gari lasi dekenai, idia be ‘guna idia abia dae dalana idia badinaia noho’ haroro gaukara bona ma Keristen karadia dekenai. (Filipi 3:16 itaia danu.) Idia ura lasi edia abidadama idia dadaraia, unai dainai mase garina idia gari lasi, hegeregerena ‘tuari lalonai haida be hamasea gaudia amo idia moru’ Witness taudia tausen momo bamona, idia be Nazi Germany ena Katolik tauna Hitler idia hanamoa lasi dainai. Kerisendom ena “hanua” lalonai, unai kwadi oreana idia haroro namonamo, idia be koua gaudia idia hanaia, idia be henao tauna bamona idia gaukara ruma ta ruma ta dekenai edia Bible buka bona magasin idia hariharilaidia neganai. Iehova ena ura be unai haroro gaukara ia vara, bona guba eiava tanobada dekenai siahu ta lasi ese ia koudia diba.​—Isaia 55:11.

“Lauma Helaga Dekenai Idia Honu”

16, 17. (a) Edena nega ai Ioel 2:​28, 29 ena hereva be dala badana dekenai ia guguru? (b) Edena peroveta herevadia Ioel lalonai be Keristen taudia gunadia edia nega ai idia guguru vaitani lasi?

¹⁶ Iehova be iena Witness taudia ia hamaorodia, ia gwau: “Do umui diba lau be [lauma] Israel ena bogaraginai lau noho, bona do umui diba lau be Iehova emui Dirava, bona idauna ta be lasi.” (Ioel 2:27) Iena taunimanima be unai diba namo hereana idia abia Iehova be iena hereva Ioel 2:​28, 29 dekenai ia hagugurua neganai, ia gwau: “Gabeai lauegu lauma do lau seia diho taunimanima idauidau iboudiai latadiai, bona momokani, emui natudia memero bona kekeni do idia peroveta.” Unai be Pentekoste 33 C.E. ai ia vara, Iesu ena hahediba taudia ese horoa idia abia negana, “bona idia ibounai Lauma Helaga dekenai idia honu.” Lauma helaga ena siahu dekenai idia haroro, bona unai dina tamona lalonai, “taunimanima 3000 bamona be edia orea lalonai idia vareai.”​—Kara 2:​4, 16, 17, 41.

¹⁷ Unai moale negana ai, Petro be Ioel 2:​30-32 ia gwauraia danu, ia gwau: “Toa do lau hahedinaraia guba dekenai bona tanobada dekenai, rara bona lahi bona kwalahu. Dina do ia dibura, bona hua be rara ai do ia lao, Iehova ena dina badana, gari havaraia dinana, ia do mai lasi neganai. Bona Iehova ena ladana idia noinoi henia taudia ibounai be mauri do idia davaria.” Ierusalem be 70 C.E. lalonai idia hadikaia ore neganai unai hereva ena kahana ia guguru.

18. Ioel 2:​28, 29 ena anina badana be edena negai ia guguru matamaia?

¹⁸ To Ioel 2:​28-32 ena hereva be ma dala ta dekenai do ia guguru danu. Momokani, unai peroveta hereva ena guguru dalana namona ta be September 1919 murinai ia vara. Unai negana ai, Iehova ena taunimanima be Cedar Point, Ohio, U.S.A. dekenai, nega daudau do idia laloatao hebouhebouna ta idia karaia. Dirava ena lauma ia hedinarai namonamo, bona iena horoa hesiai taudia be goada idia abia tanobada ibounai dekenai idia haroro ia mai bona harihari. Unai murinai taunimanima momo idia vareai! Cedar Point hebouhebouna dekenai idia lao taudia edia namba 7,000 bona ma haida be hari ia bada ia lao ela bona March 30, 1991 neganai Iesu ena mase ena Memorial dekenai idia mai taudia iboudiai be 10,650,158. Unai namba amo taunimanima 8,850 sibona idia gwau idia be horoa Keristen taudia. Unai taudia iboudiai idia moale bada herea badina Iehova ena lauma goadana ese tanobada ibounai dekenai huahua ia havaraia dainai!​—Isaia 40:​29, 31.

19. Iehova ena dina ia mai kahirakahira dainai, ita ta ta iboudiai be edena bamona ita laloa be namo?

¹⁹ Nega vairai be “Iehova ena dina badana, gari havaraia dinana,” unai dina ai Satana ena tanobada do ia hadikaia ore. (Ioel 2:31) Moale gauna be “[Iehova] ena ladana dekenai do idia boiboi taudia be mauri do idia davaria.” (Kara 2:21) Edena dala ai? Aposetolo Petro be ita ia hamaoroa “[Iehova] ena Dina be do ia ginidae, henaoa tauna ia ginidae bamona” bona ma ia gwau: “Vadaeni, bema inai gau ibounai unai bamona do idia ore, umui be edena bamona do umui noho? Umui emui kara ibounai do idia helaga be namo, bona [Iehova] do umui badinaia namonamo. Ma [Iehova] ena Dina do umui naria noho, bona do ia ginidae haraga totona do umui gaukara goada noho.” Iehova ena dina ia mai kahirakahira ita laloa noho neganai, do ita moale badina Iehova ena gwauhamata, kara maoromaoro “guba matamata bona tanobada matamata” do ia vara gwauhamatana unai, do ia guguru dainai.​—2 Petero 3:​10-13.

[Footnotes]

Anina Oi Gwauraia Diba, A?

◻ “Iehova ena dina” be dahaka?

◻ Iesu be edena dala ai ‘tanobada ena vain’ do ia utua, bona badina be dahaka?

◻ Edena dala ai 1919 murinai kwadi oreana ese Kerisendom ia hahisia?

◻ Iehova ena lauma be edena dala ai iena taunimanima dekenai ia bubua 33 C.E. neganai, bona 1919 neganai ma ia bubua lou?