Iehova Ena Lauma Helaga ese Iena Taunimanima Ia Hakaudia

“Oiemu lauma [helaga] ia namo; kara maoromaoro tanona ai lau oi hakaua.”​—SALAMO 143:10.

1, 2. Dahaka dainai Iehova ena abidadama hesiai taudia ese lalohisihisi idia davaria diba?

‘LALO-METAU ena mamina bada lau abia! Heduru be edeseniai do lau abia diba? Dirava ese lau ia rakatania, a?’ Nega haida unai bamona oi laloa, a? Bema oibe, oi be taunimanima momo herea bamona. Ena be Iehova ena abidadama hesiai taudia be lauma paradaisona dekenai idia noho, to nega haida vaia taunimanima iboudiai hegeregeredia, idia be hekwakwanai, hetoho, bona hedibagani badadia idia davaria.​—1 Korinto 10:13.

² Reana nega daudau lalonai oi ese hedibagani ta eiava lalo-metau gauna badana ta oi haheaukalaia. Reana oiemu lalokau tauna ta ia mase dainai oi lalohisihisi noho bona oi sibona oi noho dainai emu mamina be ia dika. Eiava reana emu turana namona ta be gorere dikana ia abia dainai emu kudouna ia hisihisi. Unai bamona kara ta be reana oiemu moale bona maino ia haoredia bona reana oiemu abidadama karana ia hadikaia diba. Dahaka do oi karaia be namo?

Dirava Oi Noia Ena Lauma Helaga Abia Totona

 3. Bema kara ta ese oiemu moale bona maino ia haoredia, dahaka do oi karaia be aonega dalana?

³ Bema gau ta ese oiemu maino, moale, eiava Dirava badinaia kara ta ia haorea neganai, aonega dalana be oi guriguri Dirava ena lauma helaga eiava siahuna oi abia totona. Dahaka dainai? Badina Iehova ese ena siahu amo lauma huahua namodia ia havaraia bona unai ese Keristen taudia ia durudia hekwakwanai, hetoho, bona hedibagani idia haheaukalaidia totona. Aposetolo Paulo ena sisiba “tauanina ena kara” dekenai ia gwauraia murinai, ia torea, ia gwau: “To Lauma Helaga ese inai bamona karadia ia havaraia: Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana. Inai bamona karadia idia karaia taudia be taravatu ta ese ia koudia diba lasi.”​—Galatia 5:​19-23.

 4. Hekwakwanai ta eiava hedibagani ta oi abia neganai, dahaka dainai unai gauna be emu guriguri dekenai oi gwauraia be namo?

⁴ Reana ia vara hekwakwanai dainai oi diba oiemu manau karana do oi haboioa diba. Unai neganai, namona be Iehova Dirava oi guriguri henia bona unai hekwakwanai oi gwauraia hedinarai bona oi noia lauma huahuana ta, manau karana unai, do oi abia noho totona. Gau ta ese oi ia dibagania neganai, lauma huahuana ta, tauanina ura koua karana unai, oi abia be gau badana. Danu, Dirava ena heduru abia totona do oi guriguri henia be maoro unai hedibagani do oi dadaraia totona, Satana ena siahu dekena amo oi ia hamauria totona, bona aonega oi ia henia unai hekwakwanai do oi haheaukalaia totona.​—Mataio 6:13; Iakobo 1:​5, 6.

 5. Bema ia vara gauna dainai oi lalohisihisi bada bona oi diba lasi edena lauma huahua abia totona do oi guriguri, heduru gauna be dahaka?

⁵ To, nega haida, ia vara gauna dainai oi lalohisihisi bada eiava oi daradara bada dainai oi diba lasi edena lauma huahua abia totona do oi guriguri. Nega haida emu moale, maino, bona Dirava ena lauma huahua ma haida be oi dekena amo do idia boio diba. Unai neganai dahaka do oi karaia? Namona be Dirava oi noia iena lauma helaga do oi abia totona, bena unai amo oi ia durua diba lauma huahuadia oi dekenai do ia habadaia totona, ani? Reana oi dekenai ia boio lauma huahua haida be reana lalokau, eiava moale, eiava maino, eiava lauma huahua ibounai. Danu, namona be oi guriguri Dirava ena heduru oi abia iena lauma huahua ena hakaua dalana oi badinaia totona, badina ia ese unai siahu ia gaukaralaia iena taunimanima ia hakaudia totona.

Iehova Ia Ura Ia Heduru

 6. Iesu ese iena hahediba taudia be edena bamona ia hadibaia do idia guriguri loulou ena namo idia diba totona?

⁶ Iesu Keriso ena hahediba taudia be guriguri dala maorona idia henanadailaia neganai, ia ese idia ia hagoadaia Dirava ena lauma helaga abia totona idia guriguri. Iesu ese ia gwauraia hedinarai parabole herevana amo idia ia hasiahua do idia guriguri noho totona. Ia gwau: “Umui ta hanuaboi huanai momokani dekenai bema oi lao, oiemu turana dekenai bema oi noinoi, do oi gwau, ‘Egu turana e, aniani gaudia toi mani oi henia, lau abitore, badina be egu turana ta ena laolao ia mai vadaeni, to lau dekenai ia lau ubua gauna ta ia noho lasi.’ Do ia be ruma lalona dekena amo do ia haere, do ia gwau, ‘Oi hekwarahi henia lasi lau, iduara lau koua vadaeni, bona lau be egu natuna danu ai hekure. Lau be do lau toreisi lasi, do lau henia lasi oi dekenai.’ Lau hamaoroa umui dekenai, do ia toreisi lasi, ena turana durua totona. To bema oi noia lou, noia lou neganai ia be do ia toreisi, vadaeni oiemu ura gaudia ibounai do ia henia.”​—Luka 11:​5-8.

 7. Iesu ena hereva Luka 11:​11-13 dekenai ena anina be dahaka, bona Dirava bona iena lauma helaga dekenai ita idia hadibaia gauna be dahaka?

⁷ Iehova be iena gwauhamata abidadama hesiai taudia iboudiai ia ura durudia, bona idia gurigurilaia hereva iboudiai ia kamonai henidia. To Iesu ese idia ia hagoadaia hegeregerena, bema taunimanima ‘idia noia loulou neganai,’ unai ese edia kudouna ena ura bona edia abidadama karana ia hahedinaraia. (Luka 11:​9, 10) Keriso ma ia gwau: “Umui daika emu natuna aniani bema ia noia neganai, nadi do oi henia? O gwarume do ia noia neganai, gaigai do oi henia? O gatoi do ia noia neganai doadoa do oi henia? Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga idia noinoi taudia dekenai do ia henidia lasi, a?” (Luka 11:​11-13) Ena be kara dika be ia hanai tanobada taudia dekenai, to tamana be gau namodia ena natuna dekenai ia do henia diba, unai dainai, iseda guba Tamana ese iena lauma helaga be idia gurigurilaia abidadama hesiai taudia iboudiai dekenai do ia henia.

 8. Salamo 143:10 ena anina be dahaka David, Iesu, bona hari inai negai Dirava ena hesiai taudia dekenai?

⁸ Dirava ena lauma helaga ena heduru ita abia totona, gau badana be David hegeregerena, ena hakaua dalana ita badinaia. Ia guriguri inai bamona: “Emu ura karaia dalana oi hadibaia lau dekenai badina oi be lauegu Dirava. Oiemu lauma helaga ia namo; kara maoromaoro tanona ai lau oi hakaua.” (Salamo 143:10) David, Israel ena pavapava Saulo ese ia lulua tauna unai, be ia ura Dirava ena lauma helaga ese ia hakaua iena dala ibounai do idia maoromaoro totona. Nega sisina murinai, Abiatara be mai ena hahelaga dabua aukana, ladana ephod, danu ia mai, Dirava ena ura do ia diba totona unai gauna ia gaukaralaia. Ia be Dirava ena hahelaga bona gwaukau tauna dainai, Abiatara ese David ia hadibaia dahaka do ia karaia Iehova ia hamoalea totona. (1 Samuel 22:17–23:12; 30:​6-8) David hegeregerena, lauma helaga ese Iesu ia hakaua, bona Keriso ena horoa orea taudia danu ia hakaudia. Lagani 1918-19 lalodiai, taunimanima ese unai orea taudia idia ura henidia lasi, bona edia inai taudia idia laloa edia orea do idia haorea diba. Horoa taudia idia guriguri dala do ia kehoa edia gaukara lasi karana amo idia ruhaia totona, bona lagani 1919 ai, Dirava ese edia guriguri ia haerelaia, unai kara amo ia ruhadia, bona idia ia hagoadaia iena hesiai gaukara do idia karaia lou totona. (Salamo 143:​7-9) Oibe, unai nega amo ia mai harihari, Iehova ena lauma helaga ese iena taunimanima ia durudia bona ia hakaudia.

Lauma Helaga Ena Heduru Dalana

 9. (a) Dirava ena lauma helaga be edena dala ai ia be “Durua Tauna”? (b) Edena bamona ita diba lauma helaga be tau korikorina ta lasi? (Paragraf 9 henuai hereva oi itaia.)

⁹ Iesu Keriso ese lauma helaga ia gwauraia “Durua Tauna.” Hegeregere, iena hahediba taudia dekenai ia gwau: “Lau ese Tamana do lau noia, ia ese Durua Tauna ta do ia henia umui dekenai, umui dekenai do ia noho hanaihanai, hereva momokani Laumana unai. Tanobada taudia be ia idia abia dae diba lasi, badina be ia idia itaia lasi bona ia idia diba lasi. To umui be umui diba, badina ia be umui dekenai ia noho, bona emui lalona dekenai do ia noho.” Unai “Durua Tauna” be hadibaia tauna danu, badina Iesu ia gwauhamata, ia gwau: “Durua Tauna, Lauma Helaga be unai, Tamana ese lauegu gabuna abia totona do ia siaia. Ia ese gau ibounai do ia hadibaia umui dekenai. Hereva ibounai lau henia vadaeni umui dekenai be ia ese umui emui lalona dekenai do ia hedinaraia lou.” Unai lauma ena siahu be Keriso do ia gwauraia hedinarai danu, bona Iesu be ena hahediba taudia dekenai ia gwau: “Hereva momokani lau gwauraia umui dekenai, umui dekenai hanamoa totona do lau rakatania umui, badina be umui bema lau rakatania lasi, Durua Tauna be umui dekenai do ia mai lasi, to do lau lao, vadaeni ia do lau siaia umui dekenai.”​—Ioane 14:​16, 17, 26; 15:26; 16:7.a

10. Lauma helaga be edena daladia amo taunimanima ia durudia?

¹⁰ Pentekoste 33 C.E. ai, Iesu ese guba dekena amo ia gwauhamatalaia lauma helagana be iena hahediba taudia dekenai ia bubua diho. (Kara 1:​4, 5; 2:​1-11) Ia be durua tauna dainai, unai lauma helaga ese ia durudia Dirava ena ura bona ena gaukara idia diba totona, bona iena peroveta Hereva idia dekenai ia hedinaraia. (1 Korinto 2:​10-16; Kolose 1:​9, 10; Heberu 9:​8-10) Danu, unai durua tauna ese Iesu ena hahediba taudia ia hasiahudia tanobada ibounai dekenai haroro gaukara idia karaia totona. (Luka 24:49; Kara 1:8; Efeso 3:​5, 6) Hari inai negai, bema ia gwauhamata vadaeni Keristen tauna be Dirava ese “hesiai tauna mai ena kamonai bona mai ena kara maoromaoro” orea dekena amo ia henia lauma anianina ia abia, lauma helaga ese ia durua diba lauma dalanai ena diba ia habadaia totona. (Mataio 24:​45-47) Ita be Iehova ena hesiai taudia, bona Dirava ena lauma helaga ese ita ia durua haroro gaukara be gari lasi bona mai goada danu ita karaia totona. (Mataio 10:​19, 20; Kara 4:​29-31) To, lauma helaga ese Dirava ena taunimanima be ma dala haida amo ia durudia danu.

“Mai Taitai Bada Danu”

11. Bema Keristen tauna ena hedibagani be bada herea bona ia laloa ia hanaia diba lasi, dahaka do ia karaia be namo?

¹¹ Bema Keristen tauna be hedibagani badana ta ia davaria bona ia laloa ia hanaia diba lasi, dahaka do ia karaia be namo? Namona be ia guriguri lauma helaga ia abia totona, bona ia naria ena gaukara do ia karaia totona! Paulo ia gwau: “Lauma Helaga danu ia mai, ita goada lasi taudia ia durua noho. Ita be guriguri dala maorona ita diba lasi. Unai dainai Lauma Helaga ese ita totona ia noinoi Dirava dekenai, mai taitai bada danu. Iena noinoi herevadia be taunimanima idia gwauraia diba lasi gaudia. Dirava be taunimanima edia lalona ia diba vadaeni, bona ia be Lauma Helaga ena laloa danu ia diba. Unai dainai Lauma Helaga ese iena helaga taudia totona Dirava ia noia, Dirava ena ura hegeregerena.”​—Roma 8:​26, 27.

12, 13. (a) Lalohisihisi bada herea ia vara neganai, ita guriguri neganai Roma 8:​26, 27 ena anina be dahaka? (b) Paulo bona ia bamoa taudia be Asia ena distrik dekenai dagedage bada herea idia davaria neganai, dahaka idia karaia?

¹² Lauma helaga be helaga taudia totona ia noinoi, idia be Iesu ena horoa hahediba taudia, edia helaro be guba dekenai do idia lao. To herevana oiemu helaro be guba dekenai eiava tanobada dekenai do oi noho, oi be Keristen tauna dainai Dirava ena lauma helaga ena heduru oi abia diba. Nega haida Iehova ese maoromaoro guriguri do ia haerelaia. To, nega haida, reana oi lalohisihisi bada herea dainai hereva amo oi guriguri diba lasi, to mai emu taitai bada sibona amo Iehova oi guriguri henia. Oibe, reana oi diba lasi dahaka do oi karaia be namo, bona bema lauma helaga ena heduru abia totona oi guriguri lasi, reana do oi gurigurilaia gauna be do ia kerere. Dirava ia diba oi ura iena ura do ia vara, bona ia diba dahaka heduru oi abia be namo. Ma danu, iena lauma helaga ena siahu amo, guriguri haida be Bible dekenai idia torea hedinarai, bona lalohisihisi bada gaudia idia vara neganai unai guriguri be namo. (2 Timoteo 3:​16, 17; 2 Petero 1:21) Unai dainai, Iehova ena hesiai taudia be unai lauma helaga ena siahu amo idia torea guriguri edia hereva idia gwauraia neganai, Iehova ese unai guriguri ia kamonai henidia, badina ia diba unai hereva oi abia dae momokani, bona oi ia durua totona unai guriguri do ia haere henidia.

¹³ Paulo bona ia bamoa taudia ese Asia distrik dekenai dagedage bada idia davaria neganai, reana idia diba lasi edena heduru gauna abia totona do idia guriguri. Idia be ‘metau bona hisihisi bada herea idia abia dainai, edia goada ia ore bona idia laloa do idia mase.’ To taunimanima haida edia guriguri ena heduru idia tahua bona Dirava dekenai idia tabekau noho, badina idia diba ia ese mase taudia do ia hatoredia isi lou, bona momokani Dirava ese unai dika amo idia ia hamauridia. (2 Korinto 1:​8-11) Ita moale badina Iehova Dirava ese ena abidadama hesiai taudia edia guriguri ia kamonai henidia bona ia haere henidia dainai!

14. Hedibagani ita davaria bona Iehova ese ia kokia haraga lasi neganai, dahaka namo do ia havaraia diba?

¹⁴ Dirava ena taunimanima edia orea be nega momo hedibagani ia abia. Ai kikilaia vadaeni hegeregerena, Tanobada Ibounai Tuarina Ginigunana ena nega lalonai, taunimanima ese unai orea taudia idia dagedage henidia. Ena be unai nega lalonai idia lalo-parara namonamo lasi, unai dainai idia diba lasi dahaka totona do idia guriguri, to Iehova ena Hereva lalonai, peroveta guriguri haida idia noho, bona unai guriguri ia haerelaia idia ia durudia totona. (Salamo 69, 102, 126; Isaia, karoa 12) To bema Iehova ese hedibagani ta ia kokia haraga lasi be edena bamona? Reana unai kara ese haida do ia durudia hereva momokani do idia abia dae totona, bona Keristen taudia ia durudia tadikaka ese lalokau heheni karana do idia hahedinaraia totona. Idia ese edia heduru karadia amo eiava edia guriguri kara amo hisihisi idia davaria Witness taudia ma haida idia durudia diba. (Ioane 13:​34, 35; 2 Korinto 1:11) Inai oi laloatao, Iehova ese iena lauma helaga siahuna amo iena taunimanima ia hakaudia, idia dekenai namo karadia ia karaia, bona herevana dahaka ia karaia ia durudia totona, unai kara iboudiai ese iena ladana helagana ia hanamoa bona ia hahelagaia.​—Esodo 9:16; Mataio 6:9.

Lauma Helaga Hahisia Lasi

15. Keristen taudia be Iehova ena lauma helaga dekenai idia abidadama neganai, idia diba dahaka do ia karaia idia ia durudia totona?

¹⁵ Vadaeni, bema oi be Iehova ena hesiai tauna ta, hedibagani oi davaria neganai, bona ma nega haida dekenai danu, oi guriguri lauma helaga do oi abia totona. Bona ena hakaua dalana oi badinaia be gau badana, badina Paulo ia gwau: “Dirava ena lauma helaga do umui hahisia lasi. Badina lauma helaga be Dirava ena toana umui latanai, bona boubou karana dainai do ia noho ela bona hahemauri Dinanai.” (Efeso 4:​30, NW) Dirava ena lauma helaga be maka ta, eiava abidadama horoa Keristen taudia dekenai ‘dohore idia vara gaudia’ ia hahedinaraia​—unai be, mase diba lasi guba maurina do idia abia. (2 Korinto 1:22; Roma 8:15; 1 Korinto 15:​50-57; Apokalupo 2:10) Horoa Keristen taudia bona tanobada ena helaro do idia abia taudia danu be mai edia abidadama Iehova ena lauma helaga dekenai, idia diba idia do ia durua bada diba. Ia hakaudia diba mai abidadama danu idia mauri noho totona, bona ia durudia diba kara dika karadia idia dadaraidia totona, badina unai kara dika ese ia hakaudia Dirava ena badu idia abia totona, lauma helaga idia haboioa totona, bona mauri hanaihanai dalana idia haboioa totona.​—Galatia 5:​19-21.

16, 17. Keristen tauna be edena dala amo lauma helaga ia hahisia diba?

¹⁶ Ena be ia diba eiava ia diba lasi, to Keristen tauna be edena bamona ia ese lauma helaga ia hahisia diba? Iehova ese iena lauma helaga ia gaukaralaia kongregesen dekenai lalo-tamona ia havaraia totona, bona lo taudia dekenai dagi gaukaradia ia henidia totona. Unai dainai, bema kongregesen tauna ta be dagi idia abia elda taudia ia maumauraidia, idia dekenai ia udu-mauri, bona koikoi kara ma haida ia karaia, ia be Dirava ena lauma helaga ena hakaua dalana ia badinaia lasi, bona maino bona lalo-tamona do ia havaraia lasi. Unai dala amo ia be lauma helaga ia hahisia bamona.​—1 Korinto 1:10; 3:​1-4, 16, 17; 1 Tesalonika 5:​12, 13; Iuda 16.

¹⁷ Paulo ese Keristen taudia Efeso dekenai ia tore henidia neganai, ia sisiba henidia, ia gwau, koikoi kara, badu momo, henaohenao, hereva dikadia, sihari kava ura henia, hemarai kara, bona hevaseha dikadia do idia dadaraidia. Bema Keristen tauna ta be sisina sisina unai kara dikadia ia ura henidia, ia be Bible dekenai lauma helaga ena siahu ese ia torea sisiba herevadia ia dadaraidia. (Efeso 4:​17-29; 5:​1-5) Oibe, unai neganai ia be dala haida dekenai Dirava ena lauma helaga ia hahisia bamona.

18. Lauma helaga ena siahu amo Dirava ese ena Hereva ia torea, bona bema Keristen tauna ta be iena sisiba hereva ia badinaia lasi ia dekenai dahaka do ia vara diba?

¹⁸ Oibe, Iehova ese iena lauma helaga ena siahu amo Bible ia torea, bona bema Keristen tauna ta be iena sisiba hereva ia dadaraia hamatamaia, iena lalohadai eiava iena kara do idia idau bona mai ena ura danu do ia kara dika diba, bona unai neganai Dirava ena lalo-namo ia dekenai do ia haboioa. Ena be hari ia be kara dika ia karaia lasi, to reana unai dala dekenai ia raka lao. Unai bamona Keristen tauna be lauma helaga ia hahisia badina ena hakaua dalana ia badinaia lasi dainai. Unai neganai ia ese Iehova ia dadaraia bona ia hahisia danu, badina lauma helaga be Iehova dekena amo ia vara. Dirava idia lalokau henia taudia ta be unai bamona do ia ura lasi karaia!

Guriguri Noho Lauma Helaga Abia Totona

19. Hari inai negai, dahaka dainai Iehova ena taunimanima be iena lauma helaga idia abia be gau badana?

¹⁹ Bema oi be Iehova ena hesiai tauna ta, namona be oi guriguri noho ena lauma helaga oi abia totona. Hari inai “nega dokonai,” metau dikadia idia noho, unai dainai Keristen taudia be Dirava ena lauma helaga ena heduru idia abia be gau badana. (2 Timoteo 3:​1-5) Diabolo bona iena demoni be guba dekena amo idia negea diho tanobada kahirakahira dekenai, bona idia be Iehova ena orea idia inai henia bada. Unai dainai, Dirava ena lauma helaga ese iena taunimanima ia hakaudia, eiava ia gunalaidia, badina unai neganai hekwakwanai bona dagedage karadia idia haheaukalaidia diba; guna unai be mai anina bada, to hari ia be mai anina bada herea momokani.​—Apokalupo 12:​7-12.

20, 21. Dahaka dainai Iehova ena Hereva, iena lauma helaga, bona iena orea edia hakaua herevadia ita badinaia be gau badana?

²⁰ Iena lauma helaga siahuna amo Iehova Dirava ena heduru ita dekenai be bada dainai, namona be iseda moale ia dekenai ita hahedinaraia noho. Iena lauma helaga ena siahu dekena amo ia torea Bible ena hakaua sisiba herevadia oi badinaia noho. Dirava ena lauma helaga ese ia hakaua tanobada oreana ida oi gaukara hebou. Namo lasi Bible ia gwauraia dika karadia oi karaia, badina unai kara amo lauma helaga oi hahisia diba, bona oi hahisia neganai Dirava ese lauma helaga be oi dekena amo do ia kokia, bona unai neganai lauma dalanai do oi dika momokani.​—Salamo 51:11.

²¹ Lauma helaga ese oi ia hakaua neganai, Iehova oi hamoalea bona emu mauri lalonai maino bona moale do oi davaria. Danu, inai oi laloatao, Iesu ese lauma helaga ia gwauraia “Durua Tauna.” (Ioane 14:​16) Ia dekena amo, Dirava ese Keristen taudia ia hamoaledia bona ia hagoadadia hedibagani do idia haheaukalaidia totona. (2 Korinto 1:​3, 4) Lauma helaga ese Iehova ena taunimanima ia hasiahudia sivarai namona idia harorolaia totona bona do idia haroro namonamo totona, ia durudia Bible ena hereva idia lalodia tao totona. (Luka 12:​11, 12; Ioane 14:​25, 26; Kara 1:​4-8; 5:32) Guriguri karana amo bona lauma helaga ena hakaua dalana dainai, Keristen taudia be hedibagani idia abia neganai idia ese guba ena aonega idia gaukaralaia diba idia haheaukalaidia totona. Unai dainai, mauri ena hekwarahi iboudiai lalonai, idia guriguri noho Dirava ena lauma helaga idia abia totona. Unai dala amo, Iehova ena lauma helaga ese iena taunimanima ia hakaudia.

Oiemu Haere be Dahaka?

◻ Dahaka dainai oi guriguri Dirava ena lauma helaga oi abia totona?

◻ Edena bamona lauma helaga be durua tauna?

◻ Lauma helaga hahisia karana anina be dahaka, bona edena bamona unai kara ita dadaraia diba?

◻ Dahaka dainai lauma helaga abia totona ita noinoi loulou bona ena hakaua dalana ita badinaia?

[Picture on page 15]

Lalokau tamana ese ena natudia dekenai gau namodia ia henidia, unai hegeregerena, Iehova ena hesiai taudia idia guriguri neganai lauma helaga idia abia totona, ia ese ia henidia

[Picture on page 17]

Dirava ena lauma helaga be idia guriguri Keristen taudia totona ia noinoi dalana oi diba, a?