Emu Boga-Auka Do Ia Bada be Namo

“Emui kamonai enai . . . boga-auka do umui atoa kau.”​—2 PETERO 1:​5, 6, NW.

IESU ia gwau: “Lohia bona king edia vairana dekenai do idia hakaua umui, lau dainai.” (Mataio 10:18) Bema oi idia boiria, gavana ta, o kota biaguna ta, o praiminista ta vairanai do oi gini, dahaka do oi herevalaia? Oi idia samanilaia herevana do oi haerelaia guna reana. Dirava ena lauma ese oi do ia durua do oi haere totona. (Luka 12:​11, 12) To boga-auka do oi herevalaia a? Oi laloa unai be iseda Keristen herevana ena kahana badana ta, a?

 2, 3. (a) Dahaka dainai Paulo ese Feliki bona Drusila ia haroro henidia diba? (b) Dahaka dainai Paulo ese boga-auka ia harorolai henidia be maoro?

² Iehova ena witness tauna ta ena sivarai mani oi laloa. Idia dogoatao bena idia kota henia. Gwaumaoro idia henia do ia hereva neganai, ia ura ena Keristen abidadamana do ia gwauraia hedinarai. Ia ese “kara maoromaoro bona boga-auka bona do ia mai hahemaorona danu” ia herevalaidia. Kaisarea ai aposetolo Paulo enai ia vara gauna be ai herevalaia inai. Idia nanadaia guna, bena “dina haida murinai Feliki be ena adavana Drusila, Iuda hahinena, ida idia mai; bena Paulo ia boiria, Keriso Iesu abidadama henia herevana be iena amo ia kamonai.” (Kara 24:24) Feliki ena sivarai ia torea tauna ta ia gwau, “Ia be dagedage karadia iboudiai bona matabodaga karadia iboudiai ia karadia.” Ia be nega rua ia headava vadaeni neganai, Drusila ena alona ia ania dainai, ena adavana ia rakatania (Dirava ena taravatu ia utua unai) bona iena adavana ihatoina ai ia lao. Reana Drusila ia ura Keristen tomadihona matamatana herevana do ia kamonai.

³ Paulo ese “kara maoromaoro bona boga-auka bona do ia mai hahemaorona danu” ia herevalaidia. (Kara 24:​25, NW) Unai amo ia hahedinaraia Dirava ena kara maoromaoro be idau vaitani, Roma taudia edia dagedage karadia bona hahemaoro kereredia hegeregeredia lasi. Reana Paulo ena helaro be Feliki ena lalona do ia ania do ia hahemaoro henia maoromaoro totona. To dahaka dainai “boga-auka bona do ia mai hahemaorona danu” ia herevalaidia? Feliki mai ena adavana ida ese “Keriso Iesu abidadama henia” karana idia nanadailaia noho, unai dainai namona be do idia diba, ta ese Keriso do ia badinaia anina be sibona ena lalohadai, ena hereva, bona ena kara do ia biagudia, badina be boga-auka ena anina be unai. Unai gau dainai Dirava ese taunimanima iboudiai do ia hahemaoro henidia, gavana mai ena adavana ida danu. (Kara 17:​30, 31; Roma 14:​10-12) Paulo ena hereva ia kamonai neganai, “Feliki ia gari.”

Ia be mai Anina Bada, to Ia Haraga Lasi

⁴ Aposetolo Paulo ia diba boga-auka be Keristen karana badana ta. Aposetolo Petro, Iesu ena bamona ta, ese unai ia hamomokania. “Dirava ena mauri” guba ai do idia abia taudia ia tore henidia, ia gwau namona be abidadama, lalokau bona boga-auka bona unai bamona karadia ma haida do idia hahedinaraidia. Ma ia gwau: “Bema umui dekenai idia noho neganai . . . Iesu Keriso iseda Lohiabada umui diba dainai, do umui noho kava lasi, to emui kara be mai anina.”​—2 Petero 1:​1, 4-8.

 5. Dahaka dainai ita ese boga-auka ita laloa namonamo be namo?

⁵ To, oi diba boga-auka ita herevalaia be haraga, dina dina iboudiai iseda mauri lalonai ita hahedinaraia be auka. Badina ta be taunimanima momo lasi idia boga-auka. Timoteo Iharuana 3:​1-5 ai Paulo ia gwau iseda nega lalonai, “nega dokonai,” taunimanima momo do idia “lebulebu,” anina be sibodia edia ura do idia biagua namonamo lasi. Unai hereva hamomokania karadia be gabu iboudiai ita itadia, ani?

 6. Haida be edena bamona idia hahedinaraia edia lalodia idia biagudia lasi?

⁶ Taunimanima momo idia laloa edia badu do idia halasia be namo. Unai lalohadai idia goadalaia, badina be idia tohotohodia taudia, taunimanima vairadiai idia hedinarai taudia unai, ese sibodia edia lalodia idia biagudia lasi to edia badu idia halasia haraga. Haheitalai ta be inai: Ragibi idia ura henia taudia ese nega momo badu karadia bona dagedage karadia idia itadia. Gadara taudia o herarai taudia idia heatu heheni be TV ai oi itaia vadaeni, ani? To unai bamona boga-auka lasi karadia do ita herevalaidia daudau be anina lasi. Oi diba kara momo ai eda lalona bona eda tauanina do ita biagudia be namo​—aniani ai, inuinu ai, tatau bona hahine idia kara heheni karadia ai, bona nega bona moni na moale karadia ai haoredia karadia ai danu. To mani gau tamona do ita herevalaia, ia lalonai do ita boga-auka be gau badana.

Eda Lalona Ita Biagua

⁷ Ita momo be iseda kara biagudia karana ai ita kwalimu. Ita henaohenao lasi, ita heudahanai lasi, ita ala-ala lasi; ita diba Dirava ese unai kara ia taravatudia. To eda lalona biagua karana ai ita kwalimu eiava? Edia lalodia idia biagudia diba lasi taudia momo be gabeai edia kara idia biagudia diba lasi. Unai dainai eda lalona do ita herevalaia be namo.

 8. Iehova ena ura be dahaka, eda lalona edia mamina hahedinaraia karana enai?

⁸ Iehova ese ita ia hagania lasi iseda lalona edia mamina iboudiai do ita hahedinaraidia lasi. Lasaro ena mase gurina ai, Iesu ena “lalona ia hisihisi bada, mamina ia abia momokani” bena “ia tai.” (Ioane 11:​32-38) Ena lalona ena mamina idau hereana ia hahedinaraia, moni senisia taudia be dubu amo ia luludia neganai; unai neganai sibona ena kara ia biagua goevagoeva. (Mataio 21:​12, 13; Ioane 2:​14-17) Ia idia badinaia taudia danu ese edia lalodia edia mamina idia hahedinaraidia. (Luka 10:17; 24:41; Ioane 16:​20-22; Kara 11:23; 12:​12-14; 20:​36-38; 3 Ioane 4) To, idia diba edia lalodia do idia biagudia be namo, do idia hakereredia garina. Efeso 4:26 ese inai ia hahedinaraia goevagoeva: “Bema umui badu neganai, kara dika do umui karaia lasi. Bona dina do ia diho lasi neganai emui badu do umui haorea.”

 9. Dahaka dainai eda lalona ita biagudia be mai anina bada?

⁹ Reana toana be Keristen tauna ta be ia boga-auka noho, to gau be ena lalona ia biagua lasi. Kain ena kara mani oi laloa; Dirava ese Abel ena boubou gauna ia abia dae neganai, “Kain be ia badu maragi lasi, bona badu dainai iena vairana ia metau. Iehova ese Kain dekenai ia gwau, Badina be dahaka oi badu noho? Badina dahaka oiemu vairana ia metau noho? Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be uda boroma bamona, ia naria noho, oi do ia hadarerea totona.” (Genese 4:​5-7) Kain ese ena lalona ia biagua lasi dainai Abel ia alaia mase. Ena lalona ia biagua lasi dainai ena kara danu ia biagua lasi.

10. Hamana ena sivarai ese oi dahaka ia hadibalaia?

¹⁰ Morodekai bona Eseta edia nega ai ia vara gauna danu mani oi laloa. Hamana ia badu, badina be Morodekai ese ia igo diho henia lasi. Gabeai Hamana ia laloa hahenamo do ia abia, unai dainai “ia raka lasi mai ena moale ida; ena lalona be ia moale bada. To Hamana ese Morodekai na hanua pavapavana ena ikoukou ai ia itaia, ia be ia toreisi lasi, bona ia garina ia gari lasi, bena ia ese Morodekai ia badu henia dikadika. Gau tamona, Hamana be ia haheauka bona ena ruma ia lao.” (Eseta 5:​9, 10) Moale ena mamina ia abia haraga. To ia ese ia lalo-dika henia tauna ia itaia neganai ia badu haraga danu. Oi laloa Baibel ena hereva, Hamana “be ia haheauka,” anina be ena lalona ia biagua namonamo, a? Lasi. Unai neganai Hamana ese ena lalona ena mamina ia hahedinaraia lasi, to ena mama bona ena badu ia biagua lasi dainai Morodekai hamasea dalana ia tahua.

11. Dahaka hekwakwanai be Filipi kongregesen ai ia vara, bona badina be dahaka reana?

¹¹ Unai hegeregerena, hari inai negai bema Keristen taudia ese edia lalodia idia biagudia lasi, unai ese ia hadikadia bada diba. Reana haida idia laloa unai ese kongregesen do ia hadikaia lasi. To gunaguna horoa Keristen hahinedia rua Filipi ai be idia lalo-tamona lasi. Reana badina be inai: Euodia ese haida ia boiridia do idia aniani hebou. Sunutuke ia boiria lasi dainai ena lalona ia hisihisi. Bena Euodia ena kara ena davana henia totona, reana nega gabena ta ai ia ese ia boiria lasi. Bena ruaosi idia maumau heheni bona idia hedadarai heheni. Unai hekwakwanai ena badina be dahaka? Ta ese ta aniani totona ia boiria lasi dainai ia vara a? Lasi, unai be kimorekimore mo. Idia ruaosi ese edia lalodia idia biagudia lasi neganai, unai kimorekimore be lahi badana ai ia lao. Unai hekwakwanai ia bada ia lao ela bona aposetolo ta ese ia sisiba henidia.​—Filipi 4:​2, 3.

Emu Lalona Bona Emu Tadikaka

¹² Momokani, bema ta be mamina ia abia ta ese ia dadaraia o ia hadikaia o ia lalo-dika henia, ena lalona ia biagua be auka. Iehova be unai ia diba, badina be matamana negana amo ia ese taunimanima idia kara heheni daladia be ia itadia. Ita ia sisiba henia, ia gwau: “Oi badu haraga lasi, badina be badu haraga karana be kavakava taudia edia lalodia ai ia noho.” (Kohelete 7:9) Dirava ese taunimanima edia lalodia ia tahudia guna, edia kara lasi. (Hereva Lada-isidia 14:17; 16:32; Iakobo 1:19) Sibomu oi henanadai, ‘Egu lalona biagua dalana do lau tahua namonamo be namo a?’

13, 14. (a) Taunimanima momo be edia lalodia idia biagudia lasi dainai, dahaka ia vara? (b) Keristen taudia haida idia badu, reana badina be dahaka?

¹³ Taunimanima momo be edia lalodia idia biagudia lasi dainai idia be nega daudau lalonai idia hepapahuahu heheni. Reana badina be haida ese idia o edia varavara idia kara dika henidia dainai o idia laloa unai ia vara dainai. Unai ese ia hadikadia diba ela bona nega daudau. (Genese 34:​1-7, 25-27; 49:​5-7; 2 Samuel 2:​17-23; 3:​23-30; Hereva Lada-isidia 26:​24-26 itadia.) Momokani, Keristen taudia, herevana idia be edena bese taudia, namona be edia lalodia idia parara, unai bamona inai heheni karadia be kerere bona dika dainai, idia amo do idia raka siri be namo. (Levitiko 19:17) Oi laloa unai dala amo emu lalona do oi biagua be namo, a?

¹⁴ Euodia bona Sunutuke hegeregeredia, haida be edia lalodia idia biagudia lasi dainai hekwakwanai idia vara. Reana taihu ta ena lalona ia hisihisi, badina be ia o ena natuna o ena varavarana idia vavea lasi headava anibouna do ia lao. Reana tadikaka ta ese motuka gunana ta be iena Keristen bamona ta ena amo ia hoia, bena nega daudau lasi murinai ia dika dainai ena lalona ia hisihisi. Vadaeni, dahaka do idia karaia be namo?

15. (a) Keristen taudia idia inai heheni dainai, dahaka ia vara? (b) Baibel ese unai kara edena bamona ia sisibalaia?

¹⁵ Bema lalohisihisi tauna ese ena lalona ia biagua toho lasi bona ena tadikaka ida do idia maino dalana ia tahua lasi, reana do ia badu henia daudau. Witness tauna ta ia gwau ia ura lasi Kongregesen Buka Stadi grup ta lalonai do idia atoa, badina be unai grup tauna ta ia ura henia lasi. Madi! Baibel ia gwau Keristen taudia be kota ai idia samani heheni be kerere; unai hegeregerena, bema tadikaka ta ita dadaraia badina be guna ia ese ita eiava eda varavara ta ia kara henia mai ena hemataurai lasi dainai, unai danu be kerere, ani? Unai dala amo ita hahedinaraia iseda varavara ita lalodia bada bona iseda orea taudia ita lalodia maragi, a? Ita gwau eda lalona idia hegeregere ta dainai do ita mase a, to ita badu henia dainai hari ita dadaraia, a? (Ioane 15:13 itaia.) Dirava ia gwau: “Bema tau ta ese umui dekenai ia kara dika henia neganai, iena kara dika davana do umui karaia lasi . . . Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.”​—Roma 12:​17-19; 1 Korinto 6:7.

16. Abraham ese sibona ena lalona edena bamona ia biagua namonamo?

¹⁶ Iseda lalona do ita biagua lou totona maino do ita karaia be namo, ta do ita inai henia daudau be namo lasi. Mani oi laloa, Abraham bona Lota edia boromakau bona mamoe be momo dainai, tano be ia hegeregere lasi, idia ruaosi gabu tamona ai do idia noho hebou, bona unai dainai edia hesiai taudia idia heai. Abraham ia badu a? Eiava ena lalona ia biagua a? Maino herevana ia gwauraia, ia gwau do idia parara be namo. Lota ia noia ia ese tano ena kahana ta do ia gwauraia hidi guna. Gabeai Abraham be Lota hamauria totona ia tuari; unai amo ia hahedinaraia ia ese ia lalo-dika henia lasi.​—Genese 13:​5-12; 14:​13-16.

17. Paulo bona Banaba be edena bamona idia kara kerere, to unai murinai dahaka ia vara?

¹⁷ Paulo bona Banaba idia karaia karana ta sivaraina danu ese boga-auka ita ia hadibalaia. Lagani momo lalodiai idia gaukara hebou murinai, Mareko idia heailaia, ia do idia laohaia eiava. “Idia ruaosi idia hepapahuahu bona idia parara. Banaba ese Mareko ia abia, lagatoi dekenai idia guia, Kupro idia heau lao.” (Kara 15:39) Unai neganai unai lo taudia ruaosi ese edia lalodia idia biagudia lasi; unai ita laloa namonamo be namo, badina be ita danu be unai bamona do ita hekwakwanai diba. To idia parara daudau lasi bona idia inai heheni lasi. Gabeai edia lalodia idia biagudia lou bona maino ai idia gaukara hebou lou.​—Kolose 4:10; 2 Timoteo 4:11.

18. Bema ta ese ena lalona ia hahisia, lo Keristen tauna be edena bamona do ia karaia be namo?

¹⁸ Ita diba lalohisihisi bona badu be Dirava ena orea taudia bogaragidiai do idia vara. Heberu neganai idia vara bona aposetolo edia negai danu. Hari inai negai danu Iehova ena hesiai taudia bogaragidiai idia vara, badina be ita ibounai ita goevadae lasi. (Iakobo 3:2) Iesu ese ena orea taudia ia sisiba henidia, do idia kara haraga unai bamona hekwakwanaidia haoredia totona. (Mataio 5:​23-25) To dala hereana be, iseda boga-auka do ita habadaia bena unai amo do ita koudia. Bema emu tadikaka o emu taihu ena hereva maragina ta o ena kara maragina ta ese oi ia habadua, namona be emu lalona do oi biagua bona unai kerere do oi laloa nege, ani? Do oi samania bena do oi naria ela bona ena kerere do ia gwauraia hedinarai, anina be dahaka? Oi ese emu lalona oi biagua namonamo a?

Ia be mai Dalana!

¹⁹ Eda lalona biagua dalana ita herevalaia vadaeni. Inai be mai anina bada, badina be, bema eda lalona ita biagua lasi, reana unai dainai eda malana, eda hegahusi, eda aniani karana, bona eda kara ma haida do ita biagudia lasi dainai do ita kerere. (1 Korinto 7:​8, 9; Iakobo 3:​5-10) To namona be do oi goada karaia, badina be emu lalona biagua karana do oi hanamoa diba.

20. Dahaka dainai ita diba eda kara do ita hanamoa diba?

²⁰ Iehova ena lalona ia hegeregere ita do ia durua, badina be boga-auka be iena lauma ena huahua ta. (Galatia 5:​22, 23) Unai dainai, bema dala ita tahua lauma helaga na Iehova ena amo do ita abia bona ena huahua do ita hahedinaraia totona, eda lalona biagua karana ai do ita kwalimu. Iesu ena gwauhamata oi laloaboio lasi; ia gwau: “Tamana guba dekenai ia noho ese Lauma Helaga idia noinoi taudia dekenai do ia henidia.”​—Luka 11:13; 1 Ioane 5:​14, 15.

21. Dahaka oi karaia gwauraia, emu lalona do oi biagua namonamo totona?

²¹ Emu lalona ai oi gwau lasi unai bamona do oi karaia be haraga. Idia boga-auka lasi taudia bogaragidiai idia tubu daekau taudia, bona lalo-haraga taudia, bona guna idia boga-auka toho lasi taudia be reana do idia hekwarahi bada. Unai bamona Keristen tauna ese ena lalona do ia biagua momokani be auka herea reana. To ia be mai dalana. (1 Korinto 9:​24-27) Dokona be ia kahirakahira dainai, lalo-hekwarahi idauidau do idia momo daekau. Eda lalona do ita biagudia namonamo be namo. Sibomu emu kara oi tahua. Bema oi davaria emu lalona biagua karana do oi hanamoa be namo, vadaeni oi hanamoa toho. (Salamo 139:​23, 24) Dirava ena lauma oi noia. Ia ese oi do ia kamonaia bona oi do ia durua, bena emu boga-auka do ia bada.​—2 Petero 1:​5-8.

Inai Oi Laloa Lou

◻ Dahaka dainai emu lalona do oi biagua be gau badana?

◻ Hamana ena sivarai bona Euodia bona Sunutuke edia sivarai ese oi dahaka idia hadibalaia?

◻ Bema emu lalona hahisia karana ta ia vara, dahaka do oi karaia toho?

◻ Boga-auka ese oi edena bamona ia durua, ta do oi inai henia garina?

 1. Keristen tauna be edena gabu idauna ai do ia haroro reana?

 4. Dahaka dainai boga-auka be Keristen karana badana ta?

 7. Siboda eda dahaka biagua karana do ita herevalaia be namo?

12. Dahaka dainai Dirava ese Kohelete 7:9 ena sisiba ita ia henia?

19. Dahaka dainai eda lalona biagua dalana ita herevalaia momo be namo?

[Picture on page 18]

Feliki bona Drusila vairadiai, Paulo ese kara maoromaoro bona boga-auka ia herevalaidia