Hahemauri, Kara Maoromaoro Tanobada Matamatana Dekenai
“Do idia helai namonamo, mai moale bona mai maino danu.”—SALAMO 37:11.
IEHOVA be hahemauri Diravana. Gunaguna, nega momo iena bese taudia ia hamauria. Unai hahemauri karadia edia anina be mai dokona, badina unai negadiai Iehova ese ena hahemaoro karadia amo Satani ena tanobada ibounai ia haorea lasi. To iseda nega lalonai, Iehova ese dala hereadaena amo ena hesiai taudia iboudiai do ia hamauria. Inai negai ia ese Satani ena tanobada oreana ibounai do ia haorea, bona sibona ena hesiai taudia be kara maoromaoro tanobadana, do ia noho hanaihanai gauna, lalonai do ia hakaudia vareai.—2 Petero 2:9; 3:10-13.
2 Iehova ia gwauhamata, ia gwau: “Nega daudau lasi lalonai kara dika taudia do idia ore. . . . To manau taudia ese noho gabuna tano do idia abia, do idia helai namonamo, mai moale bona mai maino danu.” (Salamo 37:10, 11) Ela bona edena negai? “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29; Mataio 5:5) To unai ia do vara lasi neganai, hisihisi bada herea negana be inai tanobada dekenai do ia vara, hisihisi gunadia iboudiai do ia hereaia.
“Hisihisi Bada Herea”
3 Lagani 1914 lalonai inai tanobada ena “dina gabedia” idia matamaia. (2 Timoteo 3:1-5, 13, NW) Lagani 83 idia hanaia vadaeni unai nega amo, bona ena dokona be kahirakahira. Iesu ia gwau ena dokona ai, “hisihisi bada herea do [ia] vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mataio 24:21) Oibe, ena dika ese Tanobada Ibounai Tuarina Iharuana ena do ia hereaia, unai tuari lalonai taunimanima milioni 50 bamona idia hamasedia. Tanobada hamarerea negana badana be kahirakahira momokani!
4 Unai “hisihisi bada herea” be hoa dalanai do ia ginidae haraga, “hora tamona lalonai.” (Apokalupo 18:10) Ena matamana ai, Dirava ese tomadiho koikoi oreadia iboudiai edia davana do ia henidia, unai orea edia ladana be Dirava ena Hereva ese ia hatoa “Babulonia badana.” (Apokalupo 17:1-6, 15) Idaunegai Babulonia ese tomadiho koikoi ia goadalaia. Hari inai negai ia noho Babulonia, be unai idaunegai hanuana hegeregerena, bona ia be tanobada ibounai ena tomadiho koikoi basileiana ia laulaulaia. Ariara hahinena ta bamona ia kara, politikol oreadia ia tura henidia. Edia tuari ia durudia bona idia tuari heheni oreadia ia hanamoa, unai dainai tomadiho oreana tamona taudia be idia ala-ala heheni. (Mataio 26:51, 52; 1 Ioane 4:20, 21) Ena orea taudia edia kara kereredia ia laloa momo lasi, bona Keristani taudia korikoridia ia dagedage henidia.—Apokalupo 18:5, 24.
5 “Hisihisi bada herea” do ia matamaia, politikol oreadia ese karaharaga “Babulonia badana” do idia tuari henia neganai. Idia ese “ariara hahine do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.” (Apokalupo 17:16) Unai murinai, guna idia durua taudia be ia dainai “do idia taitai bada.” (Apokalupo 18:9-19) To Iehova ena hesiai taudia be nega daudau unai idia naria vadaeni, bona do idia gwau: “Aleluia! Dirava ita hanamoa! . . . Ia ese ariara hahine badana ia kota henia vadaeni. Unai hahine ese, iena matabodaga kara dekena amo tanobada ia hadikaia. Dirava ese ia panisia, badina be unai hahine ese, Dirava ena hesiai taudia ia alaia mase dainai.”—Apokalupo 19:1, 2.
Dirava Ena Hesiai Taudia Idia Tuari Henidia
6 Politikol oreadia ese tomadiho koikoi do idia hadikaia ore murinai, Iehova ena hesiai taudia do idia tuari henidia. Satani, peroveta herevana lalonai “Goga, Magoga tano tauna” idia gwauraia tauna, be do ia gwau: “Lau ese mai maino danu idia noho taudia, tuari idia laloa lasi taudia do lau tuari henia.” Ia laloa do ia halusidia haraga, unai dainai ia, mai ena “orea badana danu . . . ori koremakorema ese tano ia koua bamona” ese idia ia tuari henidia. (Esekiela 38:2, 10-16) Iehova ena orea taudia idia diba Satani do ia kwalimu lasi, badina idia be Iehova idia abidadama henia.
7 Gunaguna, Farao bona ena tuari oreadia idia laloa idia ese Dirava ena hesiai taudia be Davara Kakakakana badinai idia koudia vadaeni neganai, Iehova ese hoa dalanai ena bese taudia ia hamauria bona Aigupito ena tuari oreadia ia hadikaia ore. (Esodo 14:26-28) “Hisihisi bada herea” lalonai, tanobada besedia do idia laloa Iehova ena orea taudia idia koudia vadaeni neganai, hoa dalanai hahemauri karana do ia karaia lou. Ia gwau: ‘Unai dina dekenai . . . egu badu do ia toreisi. Egu badu ena siahu dainai do lau hereva.’ (Esekiela 38:18, 19) Unai neganai “hisihisi bada herea” ena dokona do ia kahirakahira momokani!
8 “Hisihisi bada herea” do ia matamaia murinai, Iehova ese inai tanobada orena ia do panisia lasi neganai, hoa gaudia badadia do idia vara. Idia dainai do idia vara gaudia be mani oi laloa. “Taunimanima ena Natuna [Keriso] ena toana guba dekenai do ia hedinarai. Unai neganai tanobada ena bese ibounai do idia tai, badina be Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu.” (Mataio 24:29, 30) “Dina, hua, hisiu dekenai toa do idia vara . . . Taunimanima edia kudouna dekenai do idia gari momokani, edia laloa danu do idia doko, unai idia vara gaudia dainai.”—Luka 21:25, 26.
“Emui Hamauria be Ia Kahirakahira Vadaeni”
9 Unai neganai, Luka 21:28 ena peroveta herevana ena anina do ia vara. Iesu ia gwau: “Inai gaudia do idia vara hamatamaia neganai, be emui kwarana do umui abia isi. Badina be umui emui hamauria be ia kahirakahira vadaeni.” Dirava ena inai taudia be do idia heudeheude mai edia gari ida, badina be do idia diba idia vara noho hoa gaudia be Iehova ena amo. To Dirava ena hesiai taudia do idia moale, badina do idia diba edia hahemauri negana be kahirakahira.
10 Bena Iehova ese Satani ena orea do ia hadikaia ore. Ia gwau: “Hanaia gorere dikadia bona tuari dekena amo Goga ena dika davana do lau henia. Medu bada herea bona aisi bamona medu, lahi bona salipa be Goga, bona iena orea taudia . . . edia latanai do lau siaia diho. . . . Unai neganai do idia diba lau be Lohiabada.” (Esekiela 38:22, 23) Satani ena orea ibounai do ia haorea vaitani. Dirava idia dadaraia taudia iboudiai do ia hamasedia ore. “Hisihisi bada herea” hagugurua gauna, Aramagedono, be unai.—Ieremia 25:31-33; 2 Tesalonika 1:6-8; Apokalupo 16:14, 16; 19:11-21.
11 Tanobada hegegemadai Iehova idia tomadiho henia taudia milioni momo be ia ese unai “hisihisi bada herea” amo do ia hamauridia. “Bese idauidau, iduhu idauidau, kopina idauidau, bona gado idauidau” taudia hutuma bada herea be unai. Badina be dahaka unai mai gari dalana amo do ia hamauridia? Badina be “dina bona hanuaboi idia ese Dirava ena hesiai gaukara idia karaia noho.” Unai dainai inai tanobada ena dokona amo do idia roho mauri, bena kara maoromaoro tanobadana matamatana lalonai do ia hakaudia vareai. (Apokalupo 7:9-15) Unai dala amo idia ese Iehova ena gwauhamata hamomokania karana do idia itaia; ia gwau: “Lohiabada dekenai do oi naria, iena dala dekenai do oi raka. Unai neganai ia ese oi dekenai ia henia tano, be do oi dogoatao diba, bona Lohiabada ese tau dikadia do ia hadikaia ore neganai, oi ese inai kara do oi itaia.”—Salamo 37:34.
Tanobada Matamatana
12 Unai be moale bada negana—kara dika do ia ore, bona nega namo hereana do ia matamaia! (Apokalupo 20:1-4) Aramagedono amo do idia roho mauri taudia ese Iehova do idia tanikiu henia bada, badina be tanobada matamatana, paradaiso ai do ia lao tanona, dekenai bese matamatana goevana lalonai idia vareai vadaeni! (Luka 23:43) Anina ta be lasi do idia mase totona! (Ioane 11:26) Momokani, unai nega amo, edia helaro namo hereana be Iehova hegeregerena do idia mauri ela bona hanaihanai!
13 Iehova ese guba Pavapavana ai ia horoa tauna, Iesu, ese unai roho mauri taudia hoa dalanai hanamodia gaukarana do ia biagua. Tanobada dekenai ia noho neganai, matakepulu taudia bona taia kudima taudia ia hanamoa, bona “gorere taudia bona hisihisi taudia ibounai” danu. (Mataio 9:35; 15:30, 31) Tanobada matamatana ibounai lalonai, ia ese unai gorere hanamoa gaukarana badana do ia karaia lou to unai neganai tanobada hegegemadai do ia karaia. Dirava ena Hesiai Tauna hegeregerena, inai gwauhamata do ia hamomokania: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:4) Doketa taudia o mase taudia guria taudia do idia tahua lou lasi, ela bona hanaihanai!—Isaia 25:8; 33:24.
14 Ia ese danu Dirava ena hesiai taudia mai edia kamonai, guna idia mase taudia, do ia hamauria. Tanobada matamatana lalonai, mase guridia amo do ia hamauridia. Iehova ena gwauhamata be inai: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Toana be “kara maoromaoro taudia” do ia hatorea isi lou guna, bena Paradaiso habadaia gaukarana do idia durua. Unai idaunegai taudia mai edia kamonai be do idia mauri lou murinai, Aramagedono amo idia roho mauri taudia ese edia sivarai do idia kamonai mai edia moale bada ida!—Ioane 5:28, 29.
15 Unai negai do idia noho taudia iboudiai dekenai, salamo torea tauna ese Iehova ia gwauraia herevana ena anina do ia vara: “Oi ese aniani hegeregere oi henidia, bona idia boga kunu noho.” (Salamo 145:16) Hitolo do ia vara lou lasi: Tanobada ena oromana do idia hanamoa lou, bena aniani momo do ia havaraia. (Salamo 72:16) Ruma lasi taudia be lasi: “Idia ese edia ruma do idia haginia, bona unai ruma lalonai do idia noho,” bona ta ta be “sibona edia vain uma bona fig audia, be do idia naria noho, bona tau ta ese idia do ia hagaria lasi.” (Isaia 65:21, 22; Mika 4:4) Gari do ia ore: Tuari, dagedage, o kara dika do idia vara lou lasi. (Salamo 46:8, 9; Aonega Herevadia 2:22) “Tanobada ena kahana ibounai, be idia laga-ani noho, mai maino danu idia noho. Idia ibounai ese mai moale danu ane idia abia noho.”—Isaia 14:7.
16 Tanobada matamatana ai, Satani ena hereva halasidia oreadia be idia kokia vadaeni. Idia noho taudia ese “kota maoromaoro ena anina do idia diba.” (Isaia 26:9; 54:13) Lagani ta ta iboudiai lauma herevadia namodia do idia hadibadia dainai, “tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.” (Isaia 11:9) Lalohadai bona kara namodia be taunimanima ese do idia goadalaia. (Filipi 4:8) Mani inai oi laloa: Tanobada taudia iboudiai bogaragidiai, kara dika, sibodia edia namo tahua karadia, bona mama be lasi—bese iboudiai be tadikaka bamona do idia noho, bona iboudiai ese Dirava ena lauma ena huahua do idia havaraia. Momokani, hari inai negai danu hutuma bada herea ese unai kara goadalaia daladia idia tahua noho.—Galatia 5:22, 23.
Dahaka Dainai Ia Naria Daudau?
17 To, dahaka dainai Iehova ia naria daudau kara dika do ia kokia bona ena orea taudia do ia hamauridia bona tanobada matamatana lalonai do ia hakaudia vareai totona? Ia karaia gaudia mani oi laloa. Gau badana be Iehova ena lohia siahuna ena maoro hamomokania karana. Ia naria daudau lalonai, ia hahedinaraia goevagoeva iena lohia siahuna idia dadaraia taudia edia lohia daladia be hegeregere lasi momokani. (Ieremia 10:23) Unai dainai Iehova ese taunimanima edia gavamani do ia kokidia bona iena guba Basileiana, Keriso ese ia naria gauna, be edia gabu ai do ia atoa, be maoro momokani.—Daniela 2:44; Mataio 6:9, 10.
18 Lagani handred momo lalodiai idia vara gaudia be Aberahamo ena negai idia vara gaudia hegeregerena. Iehova ese Aberahamo ia hamaoroa iena tubuna taudia ese Kanana tanona do idia abia—gau tamona, lagani 400 do idia naria guna, badina be Amoro taudia ese edia kara dika idia do hagugurua lasi. (Genese 12:1-5; 15:13-16) Reana Kanana taudia iboudiai be “Amoro taudia” (bese badana ta) ia gwauraidia unai. Anina be, lagani 400 bamona do idia ore guna, bena Iehova ese ena bese taudia do ia durudia, Kanana do idia abia totona. Unai lagani lalodiai Kanana besedia ese edia noho dalana idia goadalaia noho lalonai, Iehova ese ia koudia lasi. Unai dainai dahaka ia vara?
19 Henry H. Halley ese ia torea bukana Bible Handbook, lalonai ia gwau, Megido dekenai akioleji taudia ese Asataroto, Bala ena adavana dirava hahinena, ena dubu ena momoru nadidia idia davaria. Ma ia gwau: “Unai dubu badinai be mase guria gabuna ta. Unuseniai hodu momo idia davaria, idia lalodiai be unai dubu lalonai idia bouboulaia beibi edia turia . . . Bala bona Asataroto edia peroveta taudia edia dagi gaukarana ta be memero kekeni maragidia hamasea gaukarana.” “Edia kara dika rohorohona ma ta be idia gwauraia ‘badina bouboudia.’ Ruma ta idia haginia gwauraia neganai, edia natudia ta idia bouboulaia, bena ena tauanina be haba lalonai idia atoa.”
20 Halley ia gwau: “Bala, Asataroto bona Kanana diravadia ma haida . . . tomadiho henia karana lalonai . . . inuinu kekero lebulebuna bada herea idia karaia; edia dubu badadia dekenai kara bodaga idauidau idia karaia. . . . Kanana taudia idia tomadiho neganai, edia dirava vairadiai kara bodaga idia karaia, unai be edia tomadiho karana dainai; bona murinai, edia vara guna natudia idia hamasedia bona edia dirava dekenai idia bouboulaidia. Reana, Kanana tanona be Sodoma bona Gomora hanuadia bamona, to Kanana tanona dekenai unai kara idia habadaia momokani. . . . Unai kara bodaga bona dagedage karadia bada hereadia idia karaia bese taudia be mai edia maoro idia do mauri noho totona, a? . . . Kanana hanua gunadia dekenai tano idia geia taudia idia daradara, idia gwau dahaka dainai Dirava ia naria, namona be unai hanua taudia ia haoredia haraga.”—1 King Taudia 21:25, 26 itaia.
21 Unai neganai Amoro taudia ese edia kara dika idia hagugurua vadaeni. Unai dainai Iehova ese ia hamasedia ore be maoro momokani. Hari inai nega danu be unai bamona. Tanobada be dagedage karadia, matabodaga karadia, bona Dirava ena taravatu dadaraia lalohadaidia amo ia honu. Mai eda maoro ida ita laloa idaunegai Kanana dekenai memero kekeni bouboulaidia karadia be dika rohoroho; vadaeni, inai tanobada ena tuari lalodiai taunimanima matamatadia milioni momo bouboulaidia karana, Kanana taudia edia kara dika ia hereaia karana, be edena bamona? Momokani, Iehova ese inai tanobada dikana do ia haorea be maoro momokani.
Ia Havaraia Gauna Ma Ta
22 Iehova ena haheauka inai dina gabedia lalodiai ese ma gau haida ia havaraia. Nega ia henia hutuma bada herea idia gogoa bona idia hadibadia; hari inai negai unai hutuma edia momo be milioni ima mai kahana. Iehova ena hakaua siahuna henunai, ia goada ia lao noho oreana ta ai idia halaodia. Tatau, hahine, bona memero kekeni idia hadibaia, bena idia ese ma haida be Baibel ena hereva momokani idia hadibadia. Edia hebou bona Baibel bukadia amo Dirava ena lalokau daladia idia dibaia. (Ioane 13:34, 35; Kolose 3:14; Heberu 10:24, 25) Inai danu, ruma haginidia, kompiuta gaukaralaidia, printa gaukarana, bona gaukara ma haida dekenai edia diba idia habadaia noho, “Sivarai Namona” harorolaia gaukarana durua totona. (Mataio 24:14) Toana be tanobada matamatana lalonai edia diba unai bamodia be do idia gaukaralaia momo.
23 Oibe, hari inai negai Iehova ese ena hesiai taudia ia hegaegaelaidia noho, “hisihisi bada herea” do idia hanaia bena tanobada matamatana, kara maoromaoro gabuna, lalonai do idia vareai. Unai neganai, Satani bona ena tanobada dikana do idia hekwarahilaia lasi, bona gorere, lalohisihisi, bona mase be idia ore vadaeni. Dirava ena orea taudia ese paradaiso do idia karaia mai edia ura bada bona mai edia moale bada ida; unuseniai dina iboudiai do idia “moale” dikadika. Hari ita abia hahenamo badana be inai: Inai nega ena dokona ai ita noho, Iehova ita diba bona ena hesiai ita lao henia, bona ita diba nega daudau lasi ‘iseda kwarana do ita abia isi, badina be iseda hahemauri be ia kahirakahira vadaeni’!—Luka 21:28; Salamo 146:5.
Riviu Henanadaidia
◻ “Hisihisi bada herea” be dahaka, bona edena bamona do ia matamaia?
◻ Goga ese Iehova ena hesiai taudia do ia tuari henidia neganai, dahaka dainai do ia lusi?
◻ “Hisihisi bada herea” ena dokona be edena bamona?
◻ Tanobada matamatana lalonai dahaka hahenamo badadia do ita abia?
◻ Dahaka dainai Iehova ia naria daudau inai tanobada do ia haorea totona?
[Study Questions]
1, 2. (a) Iehova ena hahemauri karana iseda negai do ia karaia be, idaunegai hahemauri karadia amo edena bamona do ia idau? (b) Iehova ese ena orea taudia be edena bamona tanobadana lalonai do ia hakaudia vareai?
3. Iesu ese “hisihisi bada herea” be edena bamona ia gwauraia?
4. Dahaka dainai Dirava ese “Babulonia badana” do ia panisia?
5. “Hisihisi bada herea” be edena bamona do ia matamaia?
6, 7. Dahaka dainai Iehova ena hesiai taudia edia lalona do idia goada diba, Satani ese “hisihisi bada herea” lalonai do ia tuari henidia neganai?
8. Iehova ese kara dika taudia ia do hamasedia ore lasi neganai, dahaka hoa gaudia do idia vara guna, bona unai dainai dahaka do ia vara?
9. Unai hoa gaudia do idia vara neganai, dahaka dainai Iehova ena hesiai taudia ese ‘edia kwaradia do idia abia isi’ diba?
10. Dirava ena Hereva ese “hisihisi bada herea” hagugurua negana be edena bamona ia gwauraia?
11. Dahaka dainai Iehova ese ena hesiai taudia be “hisihisi bada herea” amo do ia hamauridia?
12. Aramagedono amo do idia roho mauri taudia edia helaro namona be dahaka?
13. Iesu ese tanobada ai ia hamatamaia gorere hanamoa gaukarana, be edena bamona do ia karaia lou?
14. Iehova ena hesiai taudia, idia mase vadaeni taudia, be edena bamona do ia hamauridia?
15. Tanobada matamatana lalonai do idia vara gaudia haida mani oi gwauraia.
16. Dahaka dainai tanobada matamatana be kara maoromaoro amo do ia honudae?
17. Dahaka dainai Iehova ia naria daudau kara dika do ia haorea totona?
18. Aberahamo ena tubuna taudia ese Kanana tanona be edena negai do idia abia?
19, 20. Kanana taudia be edena bamona besena ai idia lao?
21. Kanana taudia edia kara bona hari inai negai idia vara karadia be edena bamona idia hegeregere?
22. Iehova ena haheauka iseda nega lalonai ese dahaka gau ma haida ia havaraia?
23. Dahaka dainai hari inai negai ita noho be hahenamo ta?
[Picture on page 16]
Tanobada ibounai be paradaiso ta ai do ia lao