Tiokratik Oreana Naria Dalana Keristani Negana Lalonai

“Dirava ena ura namona be . . . gau iboudiai be Keriso lalonai do ia haboudia lou, guba gaudia bona tanobada gaudia danu.”​—⁠EFESO 1:9, 10, NW.

HARI gaukara, “guba gaudia” haboudia gaukarana, be lagani 33 C.E. lalonai ia matamaia, “Dirava ena Israela” ia vara neganai. (Galatia 6:16; Isaia 43:10; 1 Petero 2:​9, 10) Lagani 100 C.E. murinai, haboudia gaukarana ia maragi ia lao, badina be Keristani momokani taudia (Iesu ese ia gwauraidia “uiti” taudia) be Keristani koikoi taudia, “ava ginigini,” Satani ese ia hadoa gaudia, ese idia koudia dainai. To “dokona negana” be kahirakahira neganai, Dirava ena Israela momokanina be taunimanima vairadiai ia hedinarai lou, bona lagani 1919 lalonai Iesu ese unai orea be ena kohu ibounai naria tauna ai ia halaoa.a​—⁠Mataio 13:​24-30, 36-43; 24:​45-47; Daniela 12:⁠4.

² Tanobada ibounai tuarina ginigunana negana lalonai, horoa Keristani taudia ese siahu karadia idia karaia, Mose bona Elia be gunaguna idia karaia bamona.b (Apokalupo 11:​5, 6) Lagani 1919 amo sivarai namona be badu tanobadana dekenai idia harorolaia lalonai, edia boga-auka be Elia ena hegeregerena. (Mataio 24:​9-14) Bona lagani 1922 amo idia ese Iehova ena hahemaoro herevadia taunimanima latadiai be idia harorolaia, Mose ese hisihisi Dirava ena amo be idaunegai Aigupito latanai ia mailaidia hegeregerena. (Apokalupo 15:1; 16:​2-17) Hari inai negai unai horoa Keristani taudia oredia be Iehova ena Witness taudia edia tanobada matamatana oreana ena badina.

Hakaua Oreana ta Ia Gaukara

³ Matamana amo, Iesu idia badinaia horoa taudia be idia gaukara hebou namonamo. Hahediba taudia idia momo daekau neganai, hanua ta ta lalodiai kongregesen idia haginidia bona elda taudia idia abia hidi. (Tito 1:5) Lagani 33 C.E. murinai, aposetolo iboudiai 12 be hakaua oreana lalonai idia gaukara mai edia siahu ida. Unai dagi lalonai haroro gaukarana idia gunalaia mai edia gari lasi. (Kara 4:​33, 35, 37; 5:​18, 29) Dabu taudia dekenai aniani hariharilaia gaukarana idia naria, bona Samaria taudia edia kamonai sivaraina dainai Petero bona Ioane idia siaidia unuseni. (Kara 6:​1-6; 8:​6-8, 14-17) Banaba ese Paulo ia hakaua lao idia dekenai, do idia hamomokania guna ia dagedage henidia tauna be Keriso badinaia tauna ai ia lao vadaeni. (Kara 9:27; Galatia 1:​18, 19) Bona Petero ese Korenelio mai ena ruma taudia ida ia haroro henidia murinai, Ierusalema ia lou henia bona unai kara lalonai lauma helaga ese Dirava ena ura edena bamona ia hahedinaraia be aposetolo bona Iuda Keristani taudia ma haida ia hamaorodia.​—⁠Kara 11:​1-18.

⁴ Bena King Heroda ese hakaua oreana ia dagedage henia. Petero be dibura rumana lalonai ia koua, to aneru ta ese ia hamauria. (Kara 12:​3-11) Unai neganai, tau idauna ta, aposetolo taudia 12 tauna ta lasi, be dagi badana lalonai ia hedinarai, Ierusalema ai. Aneru ese Petero be dibura rumana amo ia hakaua lasi murinai, Petero ese Ioane Mareko ena sinana ena ruma dekenai idia hebou taudia ia noidia, ia gwau: “Iamesi [Iesu ena tadina] bona iseda varavara do umui hamaoroa.”​—⁠Kara 12:⁠17.

⁵ Guna, Iuda Iskariote, aposetolo dikana, be sibona ia hamasea murinai, idia diba iena aposetolo ‘dagina’ be ma tau ta, Iesu ena gaukara lalonai ia bamoa bena ena mase bona ena toreisi lou ia itaia tauna dekenai do idia henia be namo. To, Iamesi, Ioane ena kakana, be Heroda ese ia alaia mase murinai, ta ese ena aposetolo dagina ia abia lasi. (Kara 1:​20-26; 12:​1, 2) To Baibel ese ia hahedinaraia unai murinai hakaua oreana idia habadaia. Haida idia hepapahuahu, bema Iesu idia badinaia Idau Bese taudia be Mose ena taravatu do idia badinaia be namo eiava. Unai neganai idia ese unai hereva be “aposetolo bona kwarana taudia Ierusalema dekenai” idia abia lao. (Kara 15:​2, 6, 20, 22, 23; 16:⁠4) Dahaka dainai unai neganai “kwarana taudia” danu be hakaua oreana lalonai? Baibel ese unai ena badina ia gwauraia lasi, to unai kara ena namo ia hedinarai. Iamesi ia mase bona Petero be dibura rumana lalonai idia atoa neganai, unai ese ia hahedinaraia reana gabeai aposetolo be dibura lalonai do idia atodia o do idia aladia mase. Bema unai do ia vara neganai, elda taudia ma haida, hakaua oreana ena gaukara idia manadalaia taudia, do idia noho dainai, ekalesia naria gaukarana do ia hesiriu namonamo noho.

⁶ Lagani 56 C.E. ai, Paulo be Ierusalema ia lao neganai, Iamesi dekenai ia lao. Baibel ia gwau, unai neganai “ekalesia kwarana taudia ibounai idia hebou, Iamesi danu.” (Kara 21:18) Badina be dahaka ia gwau lasi aposetolo danu be idia ida idia hebou? Unai ena badina danu be Baibel ese ia gwauraia lasi. To gabeai sivarai torea tauna Eusebius ia gwau lagani 66 C.E. be do lasi neganai “aposetolo oredia be Iudea dekenai idia noho diba lasi, badina be haida ese aladia mase daladia idia tahua hanaihanai. To edia hereva harorolaia totona tano iboudiai idia lao, Keriso ena siahu lalonai.” (Eusebius, Buka III, V, v. 2) Momokani, Eusebius ena hereva be Baibel ena kahana ta lasi, to idia be ena hereva hegeregeredia. Unai hegeregerena, lagani 62 C.E. ai, Petero be Babulonia dekenai ia noho​—⁠Ierusalema amo ia daudau. (1 Petero 5:13) To, lagani 56 C.E. ai, bona reana ela bona lagani 66 C.E. hakaua oreana ta be Ierusalema lalonai ia gaukara hedinarai.

Naria Dalana Hari Inai Negai

⁷ Toana be, lagani 33 C.E. amo ela bona hisihisi be Ierusalema latanai ia kau negana, hakaua oreana taudia iboudiai be Iuda Keristani taudia. Lagani 56 C.E. ai, Paulo be Ierusalema dekenai ia lao neganai, ia davaria Iuda Keristani taudia momo unuseniai, ena be ‘Lohiabada Iesu Keriso idia abidadama henia noho,’ to “Mose ena taravatu idia badinaia namonamo danu.”c (Iamesi 2:1; Kara 21:​20-25) Reana unai Iuda taudia idia laloa Idau Bese tauna ta be hakaua oreana tauna ai do ia lao be hegeregere lasi. To hari inai negai unai orea ena oromana be ma ia idau lou. Orea taudia iboudiai be Idau Bese taudia, horoa Keristani taudia, bona Iehova ese edia naria gaukarana ia hanamoa bada vadaeni.​—⁠Efeso 2:​11-15.

⁸ Watch Tower Bible and Tract Society of Pennsylvania be lagani 1884 lalonai idia hamatamaia negana amo ela bona lagani 1972, Society ena presiden ese siahu bada ia gaukaralaia Iehova ena orea lalonai, bona Hakaua Oreana be Society ena direkta taudia ida idia gaukara hebou. Unai lagani lalodiai idia abia hahenamodia ese idia hamomokania Iehova ese unai dala ia abia dae. Lagani 1972 bona 1975 huanai, Hakaua Oreana idia habadaia ela bona ena memba be 18. Unai orea, idia habadaia vadaeni gauna, ena siahu idia habadaia neganai, idaunegai dalana idia badinaia namonamo. Tadikaka haida unai orea lalonai be Watch Tower Bible and Tract Society of Pennsylvania ena direkta taudia danu.

⁹ Lagani 1975 amo unai taudia 18 haida be edia tanobada maurina idia haorea vadaeni. Tanobada idia hadarerea vadaeni bena guba dekenai ‘Iesu danu ena helai gabuna badana latanai idia helai diho hebou’ vadaeni. (Apokalupo 3:21) Unai bona ma badina haida dainai, hari inai negai Hakaua Oreana taudia be 10, idia ta be lagani 1994 lalonai unai dagi idia henia. Idia momo be buruka momokani. To unai horoa tadikaka taudia ese edia gaukara metaudia idia karaia noho lalonai, heduru namona idia abia. Unai heduru be edeseniai idia davaria? Vanegai Dirava ena orea taudia bogaragidiai idia vara gaudia sivaraidia ese unai henanadai idia haerelaia.

Dirava Ena Israela Idia Durua

¹⁰ Guna, lagani 1884 ai, Keristani taudia kahirakahira iboudiai be Dirava ena horoa Israela taudia. To orea ma ta be metairametaira ia hedinarai, bena lagani 1935 lalonai idia diba unai be “hutuma bada herea,” Apokalupo karoa 7 (NW) ese ia gwauraia oreana. Unai orea taudia be mai edia tanobada helarona dainai, idia be “tanobada gaudia,” Iehova ese Keriso lalonai ia haboudia gwauraia. (Efeso 1:10, NW) Idia be “mamoe idaudia,” Iesu ese mamoe magudia parabolena lalonai ia gwauraidia taudia. (Ioane 10:16) Lagani 1935 amo, mamoe idaudia momo be Iehova ena orea lalonai idia vareai. Idia be “ori bamona idia heau noho . . . Idia be manu, edia ruma dekenai idia giroa lou bamona.” (Isaia 60:8) Hutuma bada herea taudia idia momo idia lao, bona horoa taudia edia namba be ia maragi ia lao badina idia mase neganai edia tanobada maurina idia haorea; unai dainai mamoe idaudia mai edia diba edia maduna Keristani gaukaradia lalodiai idia habadaia. Edena dala amo?

¹¹ Nega ibounai, Iehova ena kara namo hereadia gwauraia hedinarai gaukarana be Dirava ena “bese helagana” edia maduna korikorina. Paulo ia gwau unai be edia boubou karana ta, bona Iesu ese “King ena hahelagaia taudia” ai do idia lao taudia ia haganidia do idia haroro bona do idia hahediba. (Esodo 19:​5, 6; 1 Petero 2:​4, 9; Mataio 24:14; 28:​19, 20; Heberu 13:​15, 16) To, The Watchtower August 1, 1932 gauna, ese Ionadaba ia laulaulaia taudia ia hagoadaia, idia danu be unai gaukara do idia karaia. Momokani, unai neganai unai mamoe idaudia momo ese idia karaia noho. Hari inai negai, kahirakahira haroro gaukara ibounai be mamoe idaudia ese idia karaia; unai amo “dina bona hanuaboi idia ese Dirava ena hesiai gaukara idia karaia noho iena dubu helaga lalonai.” (Apokalupo 7:15) Unai hegeregerena, Iehova ena orea be vanegai ia hedinarai lou neganai, kongregesen edia elda taudia be horoa taudia, Iesu Keriso ena imana idibana ai idia noho “hisiu.” (Apokalupo 1:​16, 20) To, The Watchtower, May 1, 1937 ena, be ia gwau mamoe idaudia mai edia diba be company servants (kongregesen gunalaia taudia) ai do idia lao diba. Ena be horoa taudia haida idia noho, to bema unai maduna idia huaia diba lasi, mamoe idaudia do idia gaukaralaidia diba. Hari inai negai, kahirakahira kongregesen elda taudia iboudiai be mamoe idaudia.

¹² Unai maduna metaudia be mamoe idaudia idia henidia be kerere, a? Lasi, unai be idaunegai karadia hegeregeredia. Gunaguna, idau bese taudia haida, Iehova idia tomadiho henia taudia, be mai edia dagi badadia Israela lalonai. (2 Samuela 23:​37, 39; Ieremia 38:​7-9) Iuda taudia be Babulonia amo idia lou murinai, idia ese Nethinim taudia mai edia diba (dubu ena hesiai taudia, Israela lasi taudia), be dubu gaukaradia ma haida idia henidia, guna Levi taudia sibodia ese idia karaia gaukaradia unai. (Esera 8:15-20; Nehemia 7:60) Inai danu, Iesu ena toana ia idau mata hanaina lalonai ia ida ia hedinarai tauna, Mose, ese Midiana tauna Ietero ena sisiba namona ia abia dae. Gabeai, ia ese Ietero ena natuna Hobaba ia noia tano gagaena dekenai do ia hakaudia hanai.​—⁠Esodo 18:​5, 17-24; Numera 10:⁠29.

¹³ Tano gagaena dekenai lagani 40 be kahirakahira idia ore neganai, Mose ia diba Gwauhamata Tanona dekenai do ia vareai lasi; unai dainai Iehova ia noia tau ta do ia abia hidi, iena gabu do ia abia. (Numera 27:​15-17) Iehova ese ia hagania, taunimanima iboudiai vairadiai Iosua be dagi do ia henia, bena ena be Mose ena tauanina ia do goada bona Israela naria gaukarana be maoromaoro ia hadokoa lasi, to unai bamona ia kara. (Deuteronomi 3:28; 34:​5-7, 9) Horoa taudia be unai bamona idia manau dainai, idia ese mamoe idaudia mai edia diba be dagi ma haida idia henidia.

¹⁴ Orea lalonai mamoe idaudia be maduna ma haida idia henidia karana be peroveta taudia ese idia perovetalaia danu. Sekaraia ia gwau Israela bese lasi Pilistia tauna be “Iuda iduhuna lohiana ta hegeregerena ai do ia lao.” (Sekaraia 9:​6, 7, NW) Iena hereva ena anina be, guna Israela ia inai henia tauna ta ese tomadiho momokani do ia abia dae bona Gwauhamata Tanona lohiana ta hegeregerena ai do ia lao. Inai danu, Iehova ese Dirava ena Israela ia hereva henidia neganai, ia gwau: “Idau bese taudia ese emui hesiai gaukara do idia karaia. Idia ese emui mamoe do idia naria, bona emui tano do idia gaukaralaia, emui vain uma do idia naria danu. Bona taunimanima ese Lohiabada ena hahelagaia taudia umui do idia gwauraia. Umui be iseda Dirava ena hesiai taudia.” (Isaia 61:​5, 6) Hari “idau bese taudia” be mamoe idaudia. Dagi ma haida idia henidia, maduna momo do idia huaia, horoa taudia oredia be edia mauri tanobada dekenai idia haorea neganai. Unai horoa taudia be idia lao guba, idia be “iseda Dirava ena hesiai taudia” unuseniai Iehova ena terona mai hairaina idia gegea ahu, bona “Lohiabada ena hahelagaia taudia” edia hesiai gaukarana idia karaia guguru.​—⁠1 Korinto 15:​50-57; Apokalupo 4:​4, 9-11; 5:​9, 10.

“Gabeai Do Idia Vara Besedia”

¹⁵ Horoa taudia oredia idia ura bada mamoe idaudia do idia hadibaia, maduna ma haida do idia huaia diba totona. Salamo 71:18 ia gwau: “Hari lau be buruka, bona egu huina idia kurokuro vadaeni. To Dirava e, lau do oi rakatania lasi. Lau ese oiemu siahu lau herevalaia noho neganai, lau dekenai do oi noho, bona oiemu goada be gabeai do idia vara besedia, dekenai do lau gwauraia hedinarai.” Unai siri be Watchtower, December 15, 1948 gauna, ese ia gwauraia, ia hahedinaraia horoa Keristani ekalesia taudia be momokani idia buruka vadaeni. Ma ia gwau, horoa taudia be “Baibel ena peroveta herevadia edia diari lalonai idia roha lao [mai edia moale ida], uru matamatana ta idia itaia.” Unai uru matamatana be daidia? The Watchtower ia gwau: “Iesu ese ia gwauraidia iena ‘mamoe idaudia.’ ” “Gabeai do idia vara besedia” anina be, tanobada gavamanina matamatana, guba Basileiana ese do ia biagua gauna, henunai do idia noho taudia.

¹⁶ Horoa Keristani oredia iboudiai be Keriso ida hairai do idia abia totona, edia tadikaka, “gabeai do idia vara besedia,” do idia rakatanidia negana be Baibel ese ia hahedinaraia goevagoeva lasi. To unai horoa taudia idia diba momokani unai nega be kahirakahira. Iesu ena peroveta herevana badana, “dokona negana” herevana, lalonai ia gwauraia gaudia be lagani 1914 amo idia vara noho; unai ese ia hahedinaraia inai tanobada haorea negana be kahirakahira. (Daniela 12:4; Mataio 24:​3-14; Mark 13:​4-20; Luka 21:​7-24) Nega daudau lasi, Iehova ese tanobada matamatana do ia havaraia, bona ‘gabeai idia vara besedia’ ese ia lalonai ‘basileia [ese do ia biagua tanobadana] do idia abia, tanobada ia karaia neganai ia karaia hegaegae idia edia.’ (Mataio 25:34) Paradaiso do ia havaraia lou bona mase taudia milioni momo be Hade amo do ia hatoredia isi negana idia naria mai edia moale bada ida. (Apokalupo 20:13) Horoa taudia be unai toreisi lou taudia abia dae totona unuseniai do idia noho, a? Guna, lagani 1925 lalonai, May 1 ena Watch Tower ia gwau: “Namona be siboda eda lalohadai hegeregerena do ita gwau lasi Dirava be dahaka do ia karaia o do ia karaia lasi. . . . [To] iseda lalohadai be, Ekalesia taudia [horoa taudia] be hairai do idia abia guna, idaunegai taudia mai edia abidadama [Keristani neganai be do lasi neganai idia noho taudia] idia do toreisi lou lasi neganai.” Unai hegeregerena, mase taudia do idia toreisi lou neganai horoa taudia haida be abidia dae totona do idia noho eiava lasi herevana be Gima Kohorona, August 1, 1990 gauna ese ia gwauraia, ia gwau: “Lasi, unai gaukara be ma haida ese do idia karaia diba.”d

¹⁷ Momokani, ita diba lasi dahaka do ia vara horoa Keristani taudia ta ta dekenai. Mata hanai lalonai Iesu ena toana ia idau neganai Mose bona Elia be ia ida idia noho; unai ese ia hahedinaraia, Iesu be taunimanima do ia hahemaoro henidia bona idia “ta ta ibounai edia kara hegeregerena edia davana do ia henidia” totona diaridiari dekenai do ia mai neganai, horoa Keristani taudia, idia toreisi lou vadaeni taudia, be ia ida do idia mai. Inai danu, Iesu ena gwauhamata ita laloa, ia gwau horoa Keristani taudia, idia “kwalimu” taudia, be ia ida “auri itotohi dekena amo tanobada besedia do idia biagudia,” Aramagedono ai. Iesu be diaridiari dekenai do ia mai neganai, idia be ia ida do idia helai, ‘Israela edia iduhu 12 dohore idia kota henia.’ Iesu ida, idia ese ‘Satani do idia moia diho momokani, edia aena henunai.’​—⁠Mataio 16:​27–​17:9; 19:28; Apokalupo 2:​26, 27; 16:​14, 16; Roma 16:20; Genese 3:15; Salamo 2:9; 2 Tesalonika 1:​9, 10.

¹⁸ Gau ia biagudia dalana hegeregerena, Iehova ese “gau iboudiai be Keriso lalonai do ia haboudia lou” dalana ia lailaia noho. Iena palani “guba gaudia” totona ena anina hagugurua negana be kahirakahira. Iesu be 144,000 ida “Mamoe ena Natuna ena headava” totona guba lalonai do idia hebou negana be kahirakahira. Unai dainai mamoe idaudia taudia amo nega daudau lalonai idia goada tadikakadia momo, “tanobada gaudia” idia laulaulaia taudia unai, be maduna badadia idia henia, edia horoa taudia durua totona. Hari inai negai ita moale bada, badina be ita itaia Iehova ese ena palani do ia hagugurua negana ia mai noho! (Efeso 1:​9, 10, NW; 3:​10-12; Apokalupo 14:1; 19:​7, 9) Bona mamoe idaudia be edia horoa tadikakadia, ida, ‘orea tamona’ lalonai ‘naria tauna tamona’ henunai idia gaukara hebou lalonai, mai edia moale bada ida idia durudia. Idia iboudiai ese King, Iesu Keriso, idia kamonai henia, bona guba bona tanobada edia Pavapava badana, Iehova Dirava, idia hanamoa bada!​—⁠Ioane 10:16; Filipi 2:​9-11.

[Footnotes]

Oi Gwauraia Diba, A?

◻ Lagani 100 C.E. be do lasi neganai, Dirava ena orea be edena bamona ia goada ia lao?

◻ Vanegai bona hari inai negai, Iehova ena Witness taudia edia Hakaua Oreana be edena bamona ia gaukara?

◻ Edena Baibel siri ese idia hamomokania Iehova ena orea ena mamoe idaudia dekenai siahu idia henia be maoro?

◻ Dirava ese “guba gaudia” and “tanobada gaudia” be Keriso lalonai edena bamona ia haboudia vadaeni?

[Study Questions]

1, 2. (a) “Guba gaudia” haboudia gaukarana be lagani 33 C.E. ai ia matamaia bena edena bamona ia heau? (b) Lagani 1914 amo horoa Keristani taudia ese Mose bona Elia edia kara be edena bamona idia tohotohoa?

 3. Dahaka dahaka ese idia hahedinaraia Keristani ekalesia taudia be matamana amo idia gaukara hebou namonamo?

 4. Daika ese Petero ia alaia mase gwauraia, to daika ese ia hamauria?

 5. Heroda ese Iamesi ia alaia mase murinai, hakaua oreana ena oromana be edena bamona idia haidaua?

 6. Hakaua oreana taudia ginigunadia be Ierusalema lalonai idia noho lasi neganai, unai orea be unai hanua lalonai edena bamona ia gaukara noho?

 7. Hari inai negai Hakaua Oreana be edena bamona ia idau vaitani, idaunegai hakaua oreana hegeregerena lasi?

8, 9. Hakaua Oreana lalonai dahaka dahaka be vanegai idia vara?

10. Inai dina gabedia ai, daidia be horoa taudia ida Iehova ena hesiai idia lao henia, bona Baibel ese edena bamona unai ia perovetalaia?

11. Dahaka gaukara namodia, guna horoa Keristani taudia sibodia ese idia karaia, be idia ese mamoe idaudia idia henidia vadaeni?

12. Dahaka sivarai Baibel lalonai ese idia hahedinaraia mamoe idaudia mai edia diba ese orea ena maduna metaudia idia abia be namo?

13. Horoa taudia be mai edia manau ida maduna be mamoe idaudia mai edia diba idia henidia neganai, daika ena kara namona idia tohotohoa?

14. Dahaka peroveta herevadia ese idia hahedinaraia mamoe idaudia edia maduna orea naria gaukarana lalonai be do ia bada ia lao?

15. Hari inai dokona negana ai, edena Keristani taudia idia “buruka” vadaeni, bona edena orea taudia be “gabeai do idia vara besedia”?

16. “Gabeai do idia vara besedia” ese dahaka hahenamo idia naridia mai edia ura bada ida?

17. Dahaka gaukara namodia be horoa taudia edia orea ese terona latanai ia helai Pavapavana, Iesu Keriso ida do idia karaia?

18. (a) ‘Guba gaudia be Keriso lalonai haboudia’ gaukarana be edena bamona? (b) ‘Tanobada gaudia Keriso lalonai haboudia’ gaukarana be edena bamona?

[Pictures on page 16]

Hakaua oreana taudia ginigunadia be Ierusalema lalonai idia noho lasi neganai danu, unai orea be unai hanua lalonai ia gaukara noho

[Picture on page 18]

Horoa Keristani taudia goadadia dainai Iehova ena orea taudia ese hahenamo idia abia

C. T. Russell 1884-​1916

J. F. Rutherford 1916-​42

N. H. Knorr 1942-​77

F. W. Franz 1977-​92

M. G. Henschel 1992-