Namona be Iseda Abidadama Namona Ita Dogoatao Auka!
“Umui momo ese aiemai abidadama hegeregerena umui davaria vadaeni. Inai bamona taudia ibounai dekenai inai revareva lau torea.”—2 PETERO 1:1.
1. Iesu ese ena aposetolo taudia ia hamaoroa dahaka do idia karaia, to Petero ena heagi herevana be dahaka?
ADORAHI ginigabena ai, Iesu idia do hamasea lasi neganai, Iesu ia gwau iena aposetolo taudia ibounai ese ia do idia rakatania. Idia ta, Petero, be mai heagi ida ia gwau: “Taunimanima ibounai ese oi do idia rakatania, to lau be lasi”! (Mataio 26:33) To Iesu ia diba do ia vara. Unai dainai unai nega tamona ai Petero ia hamaoroa: “To lau be lau guriguri vadaeni oi dainai, oiemu abidadama do ia moru lasi totona. Vadaeni lau dekenai do oi giroa mai neganai, be oiemu tadikaka dekenai goada do oi henia.”—Luka 22:32.
2. Ena be Petero be sibona ena abidadama ia laloa bada, to dahaka kara ese ia hahedinaraia ena abidadama ia manoka?
2 Petero be sibona ena abidadama ia laloa bada, to unai hanuaboi ai Iesu ia dadaraia. Nega toi ia gwau Keriso ia diba lasi! (Mataio 26:69-75) Ia “giroa mai neganai,” iena Biaguna ena hereva, “oiemu tadikaka dekenai goada do oi henia,” ia kamonai goevagoeva lou bamona. Petero be ena mauri ena orena ibounai lalonai unai sisiba ia badinaia momokani, bona unai ita itaia ia torea revareva ruaosi, Baibel lalonai idia do noho gaudia amo.
Petero ese Ena Revareva Ia Toredia Ena Badina
3. Petero ese ena revareva ginigunana ia torea ena badina be dahaka?
3 Lagani 30 bamona Iesu ena mase murinai, Petero ese ena revareva ginigunana ia torea, bona Ponto, Galatia, Kapadokia, Asia, bona Bitunia, hari Turkey ena not bona west kahana gabudia dekenai, idia noho tadikaka dekenai ia siaia. (1 Petero 1:1) Iuda taudia haida be reana Pentekoste 33 C.E. ai idia be Keristani taudia ai idia lao bona Petero ia tore henia taudia bogaraginai idia noho. (Kara 2:1, 7-9) Idia momo be Iuda Lasi taudia bona dagedage taudia edia amo hahetoho dikadia idia davaria. (1 Petero 1:6, 7; 2:12, 19, 20; 3:13-17; 4:12-14) Unai dainai Petero ese unai tadikaka ia hagoadaia totona idia ia tore henia. Ia tahua gauna be do ia durudia edia ‘lauma ese hamauria idia davaria. Bona inai hamauria ena badina korikori be edia abidadama.’ Unai dainai, ena bamahuta hereva lalonai, idia ia hagoadaia: “Emui abidadama dekenai do umui gini goada, vadaeni umui ese Satani do umui koua.”—1 Petero 1:9; 5:8-10.
4. Petero ese ena revareva iharuana ia torea ena badina be dahaka?
4 Gabeai, Petero ese revareva iharuana ia torea unai Keristani taudia dekenai. (2 Petero 3:1) Dahaka dainai? Badina idia ia hadikaia momokani gauna ia noho. Abidadama taudia huanai, sihari kava idia karaia taudia ese edia miro karadia idia gwauraia namo bona mai koikoi ida haida idia hakaua kerere! (2 Petero 2:1-3) Danu, Petero ia gwau kara namo idia kirikirilaia taudia do idia mai. Iena revareva ginigunana ai ia torea “gau ibounai edia dokona ena nega be kahirakahira,” bona hari haida ese unai lalohadai idia hevasehalaia. (1 Petero 4:7; 2 Petero 3:3, 4) Namona be Petero ena revareva iharuana ita tahua bona do ita davaria edena dala ai tadikaka ia hagoadaia abidadama dekenai idia gini goada totona. Inai stadi herevana ginigunana ai, 2 Petero karoa 1 ena hereva do ita laloa.
Karoa Ginigunana Ena Badina
5. Edena dala ai Petero ese ena revareva idia duahia taudia ia hegaegaelaia hekwakwanai ia herevalaia totona?
5 Petero ese hekwakwanai badadia ia herevalaia maoromaoro lasi. To, unai hekwakwanai herevalaia totona dala ia lailaia, duahia taudia be Keristani taudia ai idia lao neganai idia abia gaudia laloa bada lalohadaina ia habadaia. Ia hamaorodia lou Dirava ena gwauhamata namodia idia noho bona Baibel ena peroveta herevadia be momokani. Unai ia karaia totona, Iesu ena toana ia haidaua negana, Keriso be Basileia siahuna ia abia matahanaina, ia herevalaia.—Mataio 17:1-8; 2 Petero 1:3, 4, 11, 16-21.
6, 7. (a) Petero ena revareva ena hamatamaia herevadia amo dahaka ita dibaia? (b) Bema sisiba ita henia, nega haida dahaka ita gwauraia be namo idia ita durua totona?
6 Petero ena hamatamaia herevadia amo gau ta ita dibaia, a? Idia kamonai taudia ese sisiba do idia abia dae haraga bema Basileia helarona ena gaudia, ita ibounai ita laloa bada gaudia, ita herevalaia guna, ani? Bona ita dekenai ia vara gauna ita gaukaralaia be namo danu, ani? Reana, Iesu ena mase murinai, Petero be nega momo Keriso be Basileia siahuna ia abia matahanaina ia herevalaia.—Mataio 17:9.
7 Laloatao danu, toana be Petero be ena revareva iharuana ia torea neganai, taunimanima momo ese Mataio ena Evanelia bona aposetolo Paulo ena revareva Galatia taudia dekenai idia duahia vadaeni. Unai dainai Petero ena nega lalonai idia noho taudia momo ese Petero ena kerere bona ena abidadama edia sivarai idia diba vadaeni. (Mataio 16:21-23; Galatia 2:11-14) To, unai ese ena mai gari lasi hereva henia dalana ia koua lasi. Momokani, reana ena revareva ese edia manoka idia diba vadaeni taudia edia lalona ia veria. Unai dainai, hekwakwanai idia davaria taudia ita durua neganai, reana durua dalana namona be ita gwauraia hedinarai nega haida kerere ita karaia danu, ani?—Roma 3:23; Galatia 6:1.
Hagoadaia Hanamoa Herevana
8. Petero be inai hereva “abidadama” ia gaukaralaia neganai, ena anina be dahaka?
8 Mani Petero ena hanamoa herevana oi laloa. Maoromaoro abidadama ia herevalaia, duahia taudia ia gwauraia “aiemai abidadama hegeregerena umui davaria vadaeni” taudia. (2 Petero 1:1) Reana unuseniai “abidadama” ena anina be “abia dae momokani gaudia,” ia be Keristani hahediba herevadia ibounai ia herevalaia, nega haida Baibel ese ia gwauraia “hereva momokani.” (Galatia 5:7; 2 Petero 2:2; 2 Ioane 1) Nega momo unai hereva “abidadama” be unai dala dekenai idia gaukaralaia, nega momo idia gaukaralaia lasi tau ta o gau ta abidadama henia totona.—Kara 6:7; 2 Korinto 13:5; Galatia 6:10, NW; Efeso 4:5; Iuda 3.
9. Dahaka dainai Petero ena hanamoa herevana ese Iuda Lasi taudia edia lalona ia veria momokani?
9 Petero ena hanamoa herevana ese Iuda Lasi taudia edia lalona ia veria momokani. Iuda taudia ese Iuda Lasi taudia idia tura henia lasi, bona idia inai henidia danu, bona Keristani taudia ai idia lao vadaeni Iuda taudia dekenai unai lalohadai ia do noho. (Luka 10:29-37; Ioane 4:9; Kara 10:28) To, Petero, Iuda besena lalonai ia vara tauna bona Iesu Keriso ena aposetolo tauna, ia gwau ena revareva idia duahia taudia—Iuda bona Iuda Lasi taudia—edia abidadama bona idia abia hahenamo be iena hegeregerena.
10. Petero ena hanamoa herevana amo dahaka ita dibaia?
10 Mani oi laloa, Petero ena hanamoa herevana ese hari gau namodia momo ia hadibaia ita dekenai. Dirava ese taunimanima edia toana ia laloa lasi; bese ta o tano ta ena taunimanima ia abia isi lasi. (Kara 10:34, 35; 11:1, 17; 15:3-9) Iesu ese ia hadibaia hegeregerena, Keristani taudia ibounai be tadikaka, bona ita ta lasi ia laloa ia bada be namo. Danu, Petero ena hanamoa herevana ia hahedinaraia ita be tanobada hegegemadai tadikaka oreana, bona iseda abidadama be Petero bona aposetolo taudia edia “abidadama hegeregerena.”—Mataio 23:8; 1 Petero 5:9.
Diba Bona Dirava Ena Gwauhamata
11. Petero ena hanamoa herevana murinai, dahaka anina bada gaudia ia gwauraia?
11 Iena hanamoa herevana murinai, Petero ia torea: “Hariharibada bona maino umui abia badabada be namo.” Edena dala ai hariharibada bona maino do ita abia badabada? Petero ia haere: “Do umui abia, badina be Dirava, bona iseda Lohiabada Iesu umui diba namonamo dainai.” Bena ia gwau: “Dirava ese iena siahu dekena amo iseda mauri hanamoa gaudia ibounai, bona ia badinaia totona goada ibounai, be ita dekenai ia henia vadaeni.” To edena dala ai unai mai anina bada gaudia ita abia? “Dirava ese iena diba bada ita dekenai ia harihari henia. Vadaeni, iena hairai bona iena siahu ita diba momokani. Bona ita ia abia hidi Tauna danu ita diba momokani.” Unai amo Petero be nega rua ia hahedinaraia Dirava bona ena Natuna ita diba maoromaoro be gau badana.—2 Petero 1:2, 3; Ioane 17:3.
12. (a) Dahaka dainai Petero ia gwau diba maoromaoro abia karana be mai anina bada? (b) Dirava ena gwauhamata do ita moalelaia totona, dahaka ita karaia guna be gau badana?
12 Petero ese karoa 2 dekenai ia gwauraia “hadibaia koikoi taudia” be “sivarai koikoi dekena amo” Keristani taudia edia lalona idia ania. Unai dala amo idia ura idia veridia toho idia rakatania vadaeni lebulebu karadia idia karaia lou totona. Bema haida be “Lohiabada bona Hamauria Tauna Iesu Keriso idia diba dainai” unai gaudia idia rakatania vadaeni, to gabeai unai sivarai koikoi idia abia dae, unai bamona taudia be dika bada herea do idia davaria. (2 Petero 2:1-3, 20) Ia diba gabeai ena revareva lalonai unai hekwakwanai do ia herevalaia dainai, Petero be ena revareva ia hamatamaia neganai, ia hahedinaraia diba maoromaoro abia be gau badana, Dirava vairanai ta ia goeva noho totona. Petero ia itaia “gwauhamata gaudia namodia, Dirava ese ita dekenai ia henia gaudia, ese ita idia durua diba. . . . Dirava ena mauri bona iena kara danu ita abia.” To unai gwauhamata, iseda abidadama ena kahana badana gaudia, ita moalelaia totona, Petero ia gwau namona be guna “tanobada ena mase, bona iena kara bodaga dekena amo ita heau mauri.”—2 Petero 1:4.
13. Horoa Keristani taudia bona “mamoe idaudia” taudia idia ura dahaka idia dogoatao auka?
13 Dirava ena gwauhamata be edena bamona oi laloa? Horoa Keristani taudia oredia idia laloa hegeregerena, a? Lagani 1991 ai, Frederick Franz be Watch Tower Bible and Tract Society ena presiden, lagani 75 lalonai ful-taim hesiai gaukara ia karaia vadaeni tauna, bona Keriso danu do idia lohia taudia edia lalohadai ia gwauraia hedinarai, ia gwau: “Ema bona hari inai hora ai gini goada noho, bona do ai gini goada noho ela bona Dirava ia hamomokania ia ‘gwauhamatalaia harihari gaudia namo hereadia’ be momokani.” Tadikaka Franz ia diba momokani Dirava ena gwauhamata, guba ena toreisi lou be do ia vara, bona ena abidadama ia dogoatao auka ela bona ena mauri lagani be 99 neganai ia mase. (1 Korinto 15:42-44; Filipi 3:13, 14; 2 Timoteo 2:10-12) Unai hegeregerena, hari taunimanima milioni momo be edia abidadama idia dogoatao auka, bona Dirava ena gwauhamata, tanobada paradaisona dekenai taunimanima be mai moale danu do idia noho ela bona hanaihanai, idia laloa guna. Oi be idia ta, a?—Luka 23:43, NW; 2 Petero 3:13; Apokalupo 21:3, 4.
Dirava Ia Gwauhamatalaia Gaudia Dainai Ita Karaia Karadia
14. Dahaka dainai Petero ia gwau abidadama dekenai kara namodia ita atoa guna be namo?
14 Dirava ita laloa bada ia gwauhamatalaia gaudia dainai, a? Bema oibe, Petero ia gwau namona be unai ita hahedinaraia. “Unai dainai” (Dirava ese ita dekenai unai gwauhamata namodia ia henia dainai), ita hekwarahi iseda abidadama hegeregerena ita kara. Namo lasi abidadama ai ita noho o Baibel ena hereva momokani ita diba dainai ita laloa unai ia hegeregere. Unai sibona be hegeregere lasi! Reana Petero ena nega ai, kongregesen lalonai haida be edia abidadama idia herevalaia momo to lebulebu karadia idia karaia. Gau badana be edia kara ia namo, unai dainai Petero ese idia ia hagoadaia, ia gwau: “Do umui abidadama sibona lasi, to kara namodia do umui karaia danu.”—2 Petero 1:5; Iamesi 2:14-17.
15. (a) Dahaka dainai kara namo murinai diba ita atoa iseda abidadama dekenai be namo? (b) Dahaka kara ma haida ese ita do idia durua iseda abidadama dogoatao auka totona?
15 Kara namo ia herevalaia murinai, Petero ese kara ma 6 ia gwauraia do ita karaia, eiava ita atoa, iseda abidadama dekenai. ‘Abidadama dekenai ita gini goada’ totona, idia ta ta be mai anina. (1 Korinto 16:13) Badina be hereva momokani negea taudia ese “Buka Helaga ena hereva haida edia anina idia gwauraia kerere” bona “koikoi daladia” ai idia halasia dainai, Petero ia gwau diba be mai anina, ia gwau: “Diba danu do umui abia.” Ma ia gwau: “Ma diba sibona lasi, to umui ese emui tauanina edia ura do umui biagua namonamo. Ma tauanina biagua sibona lasi, to haheauka danu do umui abia. Ma haheauka sibona lasi, to Dirava badinaia kara danu do umui abia. Ma Dirava badinaia kara sibona lasi, to emui tadikaka dekenai bogahisihisi henia kara danu do umui karaia. Ma bogahisihisi sibona lasi, to taunimanima do umui lalokau henia danu.”—2 Petero 1:5-7; 2:12, 13; 3:16.
16. Bema ta be Petero ia herevalaia karadia ia atoa ena abidadama dekenai dahaka do ia vara, to dahaka do ia vara bema idia ia atoa lasi?
16 Dahaka do ia vara bema unai gau 7 ita atoa iseda abidadama dekenai? Petero ia haere, ia gwau: “Inai bamona kara namodia, bema umui dekenai idia noho neganai, idia ese emui lauma do idia hagoadaia. Vadaeni inai goada umui abia dainai, bona Iesu Keriso iseda Lohiabada umui diba [momokani] dainai, do umui noho kava lasi, to emui kara be mai anina.” (2 Petero 1:8) To danu, Petero ia gwau: “To inai kara namodia ia karaia lasi tauna be matakepulu tauna bamona. Momokani, ia laloaboio vadaeni, Dirava ese iena kara dika gunadia ia huria ore vadaeni.” (2 Petero 1:9) Mani oi itaia, Petero be hari ia gwau lasi “umui” eiava “iseda,” to ia gwau “tauna,” “ia” bona “iena.” Ena be, madi, haida idia matakepulu, idia laloaboio vadaeni, eiava idia miro, to Petero be mai hebogahisi ida ia gwau lasi ena revareva ia duahia tauna be idia ta.—2 Petero 2:2.
Ena Tadikaka Ia Hagoadadia
17. Dahaka dainai Petero be mai hebogahisi ida idia ia noia unai gaudia do idia karaia?
17 Reana ia diba ta ese tadikaka matamatadia ia koia haraga diba dainai, Petero be mai hebogahisi ida idia ia hagoadaia, ia gwau: “Lauegu varavara taudia e, Dirava ese umui ia boiria, bona umui ia abia hidi vadaeni. Unai dainai do umui gaukara goada, inai boiboi, bona inai abia hidi do umui hamomokania totona. Badina unai bamona umui karaia neganai, emui abidadama dekena amo do umui moru lasi.” (2 Petero 1:10; 2:18) Bema horoa Keristani taudia be unai gau 7 idia atoa edia abidadama dekenai, kwalimu ahuna namona do idia moalelaia. Petero ia gwau: “Iseda Lohiabada bona Hamauria Tauna, Iesu Keriso ena noho hanaihanai Basileia lalonai do umui vareai.” (2 Petero 1:11) “Mamoe idaudia” taudia ese noho hanaihanai ahuna do idia abia Dirava ena Basileia ia lohia tanobadana ai.—Ioane 10:16; Mataio 25:33, 34.
18. Dahaka dainai Petero be nega ibounai idia ‘ia hamaoroa loulou’?
18 Petero ia ura momokani ena tadikaka be unai kwalimu ahuna namona idia abia. Ia torea: “Momokani, inai gaudia umui diba vadaeni, bona Dirava ena hereva momokani lalonai umui gini goada noho. To lau laloa inai hereva umui dekenai do lau hamaoroa lou nega ibounai, do umui laloaboio garina.” (2 Petero 1:12) Petero ese Greek herevana ste·riʹzo ia gaukaralaia, unai siri lalonai idia hahanaia “gini goada,” to guna Iesu ese Petero ia sisiba henia neganai idia hahanaia “goada do oi henia.” Ia gwau: “Oiemu tadikaka dekenai goada do oi henia.” (Luka 22:32) Reana Petero ese unai hereva ta ia gaukaralaia badina ena Lohiabada amo ia abia sisiba goadana ia laloatao. Petero be hari ia gwau: “Lau laloa inai bamona: Lau be do lau mauri noho neganai, inai gaudia umui dekenai do lau sisiba henia, umui hagoadaia totona. Inai be maoro. Badina be lau diba, inai [tanobada] tauanina do lau rakatania ena nega be kahirakahira vadaeni.”—2 Petero 1:13, 14.
19. Hari inai nega ai dahaka heduru ita reaia lasi be namo?
19 Ena be mai ena hebogahisi ida Petero ia gwau ena revareva idia duahia taudia be hereva momokani dekenai idia “gini goada noho,” to ia lalo-parara edia abidadama ia dika diba, vanagi be davara nadi dekenai ia kamokau bona ia dika bamona. (1 Timoteo 1:19) Ia diba kahirakahira do ia mase dainai, ena tadikaka dekenai hagoadaia herevadia ia henia, gabeai unai do idia laloatao diba lauma dalanai do idia goada noho totona. (2 Petero 1:15; 3:12, 13) Unai hegeregerena, abidadama dekenai ita gini goada totona, gau haida ita kamonai loulou be namo. Herevana ita be daika eiava hereva momokani lalonai ita noho daudau vadaeni, to Baibel duahia, sibona eda stadi karana, bona hebou lao henia karana ita reaia lasi be gau badana. Haida be hebou dekenai idia lao lasi ekskius haida dainai; idia gwau idia hesiku, o hebou dekenai gau haida sibona idia herevalaia loulou, eiava lalona ia veria dalana ai program idia karaia lasi. To, Petero ia diba ita ta ta ibounai iseda abidadama ia boio haraga diba bema sibona eda diba ita laloa bada matamaia.—Mareko 14:66-72; 1 Korinto 10:12; Heberu 10:25.
Iseda Abidadama Ena Badina Aukana
20, 21. Iesu be Basileia siahuna ia abia matahanaina ese edena dala ai Petero bona ena revareva idia duahia taudia, ita danu, ia hagoadaia?
20 Iseda abidadama ena badina be gori sivaraidia, a? Petero be mai ena goada ida ia gwau: “Iseda Lohiabada Iesu Keriso ena siahu, bona do ia mai sivaraina umui dekenai ai hamaoroa neganai, ai be gori kava ai gwauraia lasi. Lasi momokani. Badina korikori be, aiemai matana dekena amo iena hairaina ai itaia.” Petero, Iamesi, bona Ioane be Iesu ida idia noho, Iesu be Basileia siahuna ia abia matahanaina idia itaia neganai. Petero ia gwau: “Oibe, Tamana Dirava ese Keriso ena ladana ia hanamoa bada, bona hairai ia henia neganai, ai danu be unuseni ai noho. Unai neganai, hairai bada gabuna dekena amo Dirava ia hereva, ia gwau, ‘Inai be lauegu Natuna, lauegu lalokau, lau ese ia lau ura henia bada.’ Inai gado guba dekena amo ia diho, be ai ese ai kamonaia. Inai kara ia vara, be Iesu danu ororo helagana dekenai ai noho neganai.”—2 Petero 1:16-18.
21 Petero, Iamesi, bona Ioane ese unai matahanai idia itaia neganai, Basileia be gau momokanina idia dekenai! Petero ia gwau: “Unai dainai ai daradara lasi momokani, to ai diba peroveta taudia edia hereva be momokani. Umui danu peroveta taudia edia hereva do umui badinaia be namo.” Oibe, Petero ena nega ai ena revareva idia duahia taudia, bona hari ita danu, be mai badina badana Dirava ena Basileia idia perovetalaia herevadia badinaia totona. Edena dala ai ita badinaia be namo? Petero ia haere, ia gwau: “Edia hereva be lamepa, dibura gabuna ia hadiaria bamona, ela bona daba ia rere, bona daba ena hisiu bada ese emui kudouna lalonai do ia toreisi.”—2 Petero 1:19; Daniela 7:13, 14; Isaia 9:6, 7.
22. (a) Mai iseda kudouna ibounai ida ita ese dahaka ita naria? (b) Edena dala ai peroveta herevana ita badinaia?
22 Bema peroveta hereva ese ia hadiaria lasi, iseda kudouna do idia dibura noho. To unai hereva idia badinaia dainai, Keristani taudia be mai edia kudouna ibounai ida daba ia rere dinana idia naria, neganai “daba ena hisiu bada,” Iesu Keriso, be Basileia hairaina ai do ia gini toreisi. (Apokalupo 22:16) Hari, edena dala ai ita be peroveta taudia edia hereva ita badinaia? Baibel stadilaia, hebou hegaegaelaia bona haere henia, ‘mai iseda lalona ibounai ida ita abia diba bona goada do ita gaukaralaia’ karadia amo ita badinaia. (1 Timoteo 4:15) Bema unai peroveta herevana be “dibura gabuna” (iseda kudouna) ia hadiaria lamepa, namona be iseda ura gaudia, hemami, doria gaudia, bona tahua gaudia be ia dainai idia idau. Namona be ita be Baibel stadilaia taudia, badina be Petero ese karoa ginigunana ia hadokoa, ia gwau: “Tau ta ese sibona ena laloa dekena amo peroveta hereva Buka Helaga lalonai ena anina do ia gwauraia lasi. Badina be peroveta hereva gunadia be tau ta ese sibona ena ura dekenai ia gwauraia lasi. Lasi momokani. To Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.”—2 Petero 1:20, 21.
23. Petero Iharuana ena karoa ginigunana ese duahia taudia be dahaka kara karaia totona idia ia hegaegaelaia?
23 Iena revareva iharuana ena karoa ginigunana ai, Petero ese ita ia hagoadaia momokani iseda abidadama namona ita dogoatao auka totona. Hari ita hegaegae vadaeni hereva gabena ai idia herevalaia gau badadia ita laloa totona. Hereva gabena ese 2 Petero karoa 2, aposetolo tauna ese kongregesen lalonai idia vareai lebulebu karadia tuari henia karana, ia herevalaia.
Oi Laloatao, A?
◻ Dahaka dainai Petero ia gwau diba maoromaoro be anina bada gauna?
◻ Dahaka dainai kara namodia be abidadama dekenai ita atoa guna be gau badana?
◻ Dahaka dainai Petero be ena tadikaka dekenai hereva haida ia hamaoroa loulou?
◻ Petero be edena badina aukana ia henia iseda abidadama totona?
[Picture on page 9]
Petero be ena kerere dainai ena abidadama ia rakatania lasi