Edena Dala ai Manau Momokanina Oi Hahedinaraia Diba?

MANAU momokanina be mai anina bada Dirava dekenai. Iamesi ia gwau: “Dirava ese hekokoroku taudia edia dala ia koua, to manau taudia dekenai iena hariharibada ia henia.” (Iamesi 4:⁠6) Reana Iamesi be unai ia gwauraia neganai, Heberu Revarevadia lalonai idia torea herevadia haida ia laloa. “Lohiabada e, oi be ataiai momokani oi noho, to oi ese manau taudia oi laloa noho, bona hekokoroku taudia ese, oi dekena amo idia hunia diba lasi.” “Ia ese taunimanima edia hekokoroku do ia haorea, bona sibona edia ladana idia abia isi taudia do ia hamanaua. Unai dina dekenai, Lohiabada ena ladana sibona do idia hanamoa.” “Lohiabada ese hekokoroku taudia ia ura henia lasi, to ia ese manau taudia dekenai ia laloa namo.”​—Salamo 138:6; Isaia 2:11; Aonega Herevadia 3:⁠34.

Aposetolo Petero danu ese ma haida ia hagoadaia manau karana idia hahedinaraia totona. Ia gwau: “Umui ibounai do umui laloa manau, vadaeni umui ta ta dekenai durua do umui henia. Badina be Buka Helaga ia gwau: ‘Dirava ese hekokoroku taudia edia dala ia koua, to manau taudia dekenai iena hariharibada ia henia.’ ”​—1 Petero 5:⁠5.

Keriso Ena Haheitalai Manau Karana Dekenai

Reana inai bamona oi henanadai, Lau manau ena namo be dahaka o edena bamona lau do ia durua? Keristani momokanina ai ia lao totona ia hekwarahi tauna dekenai unai henanadai ena haere be ia auka lasi​—manau ena anina be Keriso tohotohoa. Iesu ese manau ia hahedinaraia dalana be gaukara idauna ta ia abia dae, tanobada dekenai ia mai totona guba ia rakatania, bona tanobada tauna ta ai ia lao dainai nega sisina aneru ese ia idia hereaia. (Heberu 2:⁠7) Ena be ia be Dirava ena Natuna, to tomadiho dalana ai ia idia inai henia taudia ese ia idia hahemaraia neganai, unai bamona kara ia haheaukalaia. Ena hahetoho ibounai lalonai ena lalohadai idia boio lasi, ena be aneru milioni momo ia boiria diba ia idia durua totona.​—Mataio 26:⁠53.

Danu, Iesu be mai hemarai ida satauro dekenai idia tauadae, to ena Tamana ia badinaia noho. Unai dainai, Paulo ese ia herevalaia ia gwau: “Keriso Iesu ena laloa bamona umui danu do umui laloa be namo. Ia be nega ibounai Dirava bamona ia noho. Oibe, Keriso be Dirava danu ia hegeregere, to ia laloa lasi unai bamona do ia noho, ia sibona do ia dogoatao gauna. Lasi, to ia ese sibona ena ura dainai, iena dagi badana ia negea, bona hesiai tauna momokani ia lao. Ia be taunimanima hegeregerena ia vara, bona taunimanima edia toana ia abia. Oibe, Keriso ese iena hairai ia laloa lasi, to ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.”​—Filipi 2:​5-8.

Unai dainai, edena dala ai manau momokanina ita hahedinaraia diba? Gau ta ia vara neganai, edena bamona mai manau ida do ita kara to ita hekokoroku lasi?

Manau Tauna Ena Kara

Iseda gaukara lalonai manau karana hahedinaraia dalana mani ita herevalaia, herevana ia be iseda moni gaukara gabuna ai eiava iseda Keristani hesiai gaukarana ai. Gaukara ita karaia namonamo totona, dipatmen naria taudia, biagudia, bona gunalaia taudia idia noho be namo. Ta ese abia hidi karana ia karaia be gau badana. Oiemu kara be edena bamona? Oi laloa, “Dahaka dainai ia ese lau ia hamaoroa dahaka lau karaia be maoro? Iniseniai lau gaukara guna, to ia be gabeai.” Oibe, bema oi hekokoroku, ta ena siahu henunai oi noho neganai, emu lalona do ia hisihisi. To, manau tauna ese ‘sibona ena ladana do ia habadaia gwauraia lasi, bona do ia hekokoroku lasi. To ibounai ta ta dekenai do ia manau. Nega ibounai inai bamona do ia laloa, “Haida be idia namo herea, to lau be namo lasi.” ’​—Filipi 2:⁠3.

Bema hahine ta amo, eiava ena mauri lagani ia maragi tauna amo durua herevana oi kamonai neganai, edena bamona oi kara? Bema oi manau, do oi laloa namonamo. Bema oi hekokoroku, do oi abia dae lasi o do oi dadaraia haraga. Oi ura ta ese oi ia hanamoa kava o ia hanamoa koikoi, bena dika oi davaria, eiava ta ese oi dekenai sisiba namona ia henia bona oi ia hagoadaia, a?​—Aonega Herevadia 27:9; 29:⁠5.

Hekwakwanai oi haheaukalaia diba, a? Manau karana ese oi do ia durua oi davaria hekwakwanai oi haheaukalaia totona, Iobu ese ia karaia hegeregerena. Bema oi hekokoroku, reana do oi lalohisihisi, bona oi hekwarahi eiava oi laloa ta ese oi ia hahemaraia neganai, do oi badu kava.​—Iobu 1:​22; 2:​10; 27:​2-5.

Manau Tauna ese Lalokau Ia Hahedinaraia Bona Dika Ia Gwauatao

Haida be inai bamona idia hereva be auka, “Lau sori. Lau kerere. Oi maoro.” Badina be dahaka? Idia hekokoroku dainai! To nega momo bema tau o hahine ese ena adavana dekenai sori herevana ia gwauraia neganai, unai ese edia hekwakwanai do ia haorea.

Bema ta ese oi ia hahisia, ena kerere oi gwauatao, a? Eiava oi hekokoroku dainai, dina haida eiava hua haida lalonai badu oi dogoatao, bona oi ia hahisia tauna oi hereva henia lasi, a? Eiava ia oi kara dika henia iena kerere ena davana oi henia totona, a? Unai bamona kara dainai taunimanima haida idia alaia mase vadaeni. Ma haida ese taunimanima idia samania. To, manau tauna ese lalokau ia hahedinaraia bona kerere ia gwauatao. Dahaka dainai? Badina lalokau tauna ese ta ena dika ia laloatao lasi. Iehova ese Israela taudia edia kara ia gwauatao bema idia hekokoroku lasi. Mai manau ida Iesu ia badinaia tauna ese ma ta ena kerere do ia gwauatao, bona unai do ia karaia loulou!​—Ioela 2:​12-​14; Mataio 18:​21, 22; 1 Korinto 13:⁠5.

Manau tauna ese ‘ma ta do ia matauraia’ haraga. (Roma 12:10) New International Version ia gwau: “Ta ta umui matauraia guna, oi sibona be gabeai.” Ma haida oi hanamoa bona edia diba bona kara oi laloa bada, a? Eiava hanaihanai edia kerere ta oi tahua edia ladana oi hadikaia totona, a? Oibe, mai momokani ida ma haida oi hanamoa diba, a? Bema unai bamona oi karaia be ia auka, reana oi be gari tauna bona oi hekokoroku.

Hekokoroku tauna ia haheauka lasi. Manau tauna be ia hesiku haraga lasi bona ia haheauka. Oi be edena bamona? Oi laloa ta ese oi ia kara henia namonamo lasi dainai oi lalohisihisi haraga, a? Unai be haheauka karana amo ia idau vaitani. Bema oi manau, sibona do oi laloa bada lasi. Namona be Iesu ena hahediba taudia be sibona idia laloa bada neganai ia vara gauna oi laloatao​—daika ese ibounai ia hereaia idia hepapahuahulaia. Idia laloaboio idia ibounai be “hesiai taudia” sibona!​—Luka 17:10; 22:24; Mareko 10:​35-37, 41.

France ena toretore tauna, Voltaire, ia gwau manau be “ta ese sibona ena kara ena hetoana ia abia dae . . . hekokoroku ia haorea karana.” Oibe manau ena anina be iseda lalona ai ita sibona ita laloa bada lasi. Manau tauna ena lalohadai be sibona ena kara ena hetoana ia diba, ia hekokoroku lasi. Ma haida ia matauraia bada bona ia kara namo henidia.

Unai dainai, badina be dahaka ita hekwarahi ita manau totona be namo? Badina Dirava ese manau karana ia ura henia bona ita ia durua Dirava ena hakaua herevadia ita abia totona. Peroveta tauna Daniela be ia manau dainai, Iehova ese “ia lalokau henia bada” bona ia dekenai aneru ia siaia matahanai ia henia totona! (Daniela 9:23; 10:​11, 19) Manau be mai ena davana namodia momo. Oi idia lalokau henia turadia momokanidia oi davaria. To unai sibona lasi, Iehova ena hahenamo oi abia danu. “Lohiabada do oi gari henia, bona do oi manau. Inai bamona oi karaia neganai, kohu bona matauraia, bona mauri do oi davaria.”​—Aonega Herevadia 22:⁠4.

[Picture on page 7]

Mai manau ida sori herevana gwauraia karana ese mauri dalana ia hanamoa diba