Iehova Ia Ura Dahaka Ita Karaia Hari?

“Gado ta ori lalona dekena amo ia mai, ia gwau, ‘Egu Natuna be inai, lauegu lalokau Tauna. Lauegu lalona ia moale ia dekenai. Iena hereva do umui kamonai henia.’ ”​—⁠MATAIO 17:5.

 1. Taravatu ese edena negai ena gaukara ia hagugurua?

IEHOVA ese Taravatu mai ena kahana idauidau be Israela besena dekenai ia henia. Paulo ese unai Taravatu ia herevalaia neganai, ia gwau: “Taunimanima ese inai boubou karadia edia taravatu do idia badinaia noho, ia mai bona Dirava ese dala matamata do ia haginia.” (Heberu 9:10) Taravatu ese Israela taudia ena orea maragina ia durua bena Iesu be Mesia, o Keriso, idia abia dae neganai, ena gaukara ia hagugurua unai. Unai dainai, Paulo ia gwau: “Keriso ia mai dainai, . . . Taravatu badinaia karana dekena amo maoromaoro idia tahua dalana be ia doko.”​—⁠Roma 10:4; Galatia 3:​19-25; 4:​4, 5.

 2. Daidia be Taravatu henunai idia noho, bona edena negai Taravatu ena siahu idia rakatania?

² Unai ena anina be hari inai negai Taravatu ena siahu be anina lasi ita dekenai, a? Momokani, guna danu tanobada taudia edia kahana badana be Taravatu henunai idia noho lasi, salamo torea tauna ia hereva bamona, ia gwau: “[Iehova ena] hereva be Iakobo dekenai ia hedinaraia vadaeni. Iena taravatu bona iena oda, be Israela dekenai ia henia vadaeni. Bese haida dekenai unai bamona ia karaia lasi. Unai idau bese taudia ese iena taravatu idia diba lasi.” (Salamo 147:​19, 20) Dirava ese Iesu ena boubou gauna dainai gwauhamata matamatana ia karaia neganai, Israela besena be Taravatu ena siahu amo ia ruhaia. (Galatia 3:13; Efeso 2:15; Kolose 2:​13, 14, 16) Vadaeni, bema Taravatu ena siahu ia ore, Iehova ia ura hari inai negai mai edia ura ida ia idia tomadiho henia taudia be dahaka do idia karaia?

Iehova Ia Ura Gauna

3, 4. (a) Iehova ia ura ita be dahaka ita karaia hari? (b) Dahaka dainai Iesu ena aena gabudia ai ita raka be namo?

³ Iesu ena haroro laganina ginigabena ai, ena aposetolo taudia Petero, Iamesi, bona Ioane ese idia bamoa bona ororo badana ta, reana Heremona Ororona ena kahana ta dekenai idia lao. Unuseniai matahanai ta lalonai, Iesu ena hairai idia itaia bona Dirava ena gadona idia kamonai, ia gwau: “Egu Natuna be inai, lauegu lalokau Tauna. Lauegu lalona ia moale ia dekenai. Iena hereva do umui kamonai henia.” (Mataio 17:​1-5) Iehova ia ura ita karaia gauna be unai​—⁠ena Natuna do ita kamonai henia bona ena haheitalai bona hahediba herevadia do ita badinaia. (Mataio 16:24) Unai dainai, aposetolo Petero ia gwau: “Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.”​—⁠1 Petero 2:⁠21.

⁴ Dahaka dainai Iesu ena aena gabudia ai do ita raka be namo? Badina ia ita tohotohoa neganai, ita be Iehova Dirava ita tohotohoa unai. Iesu be Tamana ia diba goevagoeva, badina tanobada dekenai ia do mai lasi neganai, lagani bilioni momo lalonai guba ai ena Tamana ida ia noho. (Aonega Herevadia 8:​22-31; Ioane 8:23; 17:5; Kolose 1:​15-17) Tanobada ai ia noho neganai, Iesu ese ena Tamana ena kara ia hahedinaraia namonamo. Ia gwau: “Tamana ese lau dekenai ia hadibaia hegeregerena lau hereva.” Oibe, Iesu ese Iehova ia tohotohoa goevagoeva dainai ia hereva diba: “Lau ia itaia tauna ese egu Tamana danu ia itaia.”​—⁠Ioane 8:28; 14:⁠9.

⁵ Iesu kamonai henia bona ena kara tohotohoa ena anina be dahaka? Anina be taravatu henunai ita noho, a? Paulo ia gwau: “Taravatu henunai lau noho lasi.” Ia ese “taravatu gunana” ia gwauraia, Dirava ese Israela ida ia karaia Taravatu gwauhamatana unai. Paulo ia gwau ia be “Keriso ena Taravatu [ia] badinaia.” (1 Korinto 9:​20, 21; 2 Korinto 3:14) Taravatu gwauhamata gunana ia ore neganai, “gwauhamata matamatana” ena siahu ia hamatamaia, “Keriso ena taravatu” danu, bona Iehova ena hesiai taudia ibounai hari inai negai ese unai taravatu do idia badinaia be gau badana.​—⁠Luka 22:20; Galatia 6:2; Heberu 8:​7-13.

 6. “Keriso ena taravatu” be edena bamona ita gwauraia diba, bona edena bamona ita badinaia?

⁶ Iehova ese “Keriso ena taravatu” be taravatu idauidau edia orea ai ia atodia lasi, Taravatu gwauhamata gunana ia karaia bamona. Keriso murinai idia raka taudia edia taravatu matamatana lalonai dahaka idia karaia diba bona dahaka idia karaia diba lasi ena lista latana ta ia noho lasi. To, Iehova ese ena Natuna ena mauri bona ena hahediba herevadia idia hahedinaraia goevagoeva sivarai hani be ena Hereva lalonai ia atoa. Unai sibona lasi, to Dirava ese Iesu murinai idia raka taudia ginigunadia haida ia hasiahua idia ese taunimanima kara henia dalana, kongregesen naria dalana, ruma bese lalonai ta ta kara henia dalana, bona ma kara haida totona hadibaia hereva haida idia torea. (1 Korinto 6:18; 14:​26-35; Efeso 5:​21-33; Heberu 10:​24, 25) Iseda mauri be Iesu Keriso ena haheitalai bona hahediba herevadia hegeregerena ai ita haidaua bona aposetolo edia negai idia noho bona lauma helaga ena siahu henunai Baibel idia torea taudia edia sisiba ita badinaia neganai, ita be “Keriso ena taravatu” ita badinaia unai. Iehova ia ura ena hesiai taudia hari inai negai be unai do idia karaia.

Lalokau be mai Anina Bada

 7. Iesu ese ena aposetolo taudia danu ia karaia Pasova ginigabena dekenai ena taravatu ena badina be edena bamona ia hahedinaraia?

⁷ Taravatu lalonai lalokau be mai anina bada, bona ia be Keriso ena taravatu ena badina korikorina. Lagani 33 C.E. ai, Pasova totona Iesu be ena aposetolo taudia ida ia hebou neganai unai ia hamomokania. Aposetolo Ioane ese unai hanuaboi ai idia vara gaudia edia sivarai ia torea neganai, ia hahedinaraia Iesu be ena kudouna lalonai idia noho gaudia ia herevalaia neganai, lalokau be nega 28 bamona ia herevalaia. Unai ese ena aposetolo taudia dekenai iena taravatu ena badina, o anina korikorina, ia hahedinaraia. Ioane ese unai hanuaboi ai idia vara gaudia ia herevalaia neganai, inai hereva amo ia hamatamaia: “Pasova aria ena dina be ia kahirakahira, vadaeni Iesu ia diba inai tanobada do ia rakatania, iena Tamana dekenai do ia lao negana ia ginidae vadaeni. Inai tanobada dekenai, sibona ena lalokau taudia dekenai ia lalokau henidia, ia lao bona dokona.”​—⁠Ioane 13:⁠1.

 8. (a) Dahaka ese ia hahedinaraia aposetolo taudia be idia hepapahuahu loulou? (b) Iesu ese edena bamona ena aposetolo taudia dekenai manau karana ia hadibaia?

⁸ Ena be Iesu ia hekwarahi bada ena aposetolo taudia edia lalohadai kererena dagi bona siahu dekenai ia haidaua totona bona ena be ia kwalimu momokani lasi, to ia lalokau henidia. Hua haida gunanai, Ierusalema dekenai idia do mai lasi neganai, “idia sibona idia herevahereva, daika be dohore ia tau bada herea.” Bena Pasova aria karaia totona Ierusalema dekenai idia do ginidae lasi neganai, daika be bada idia hepapahuahulaia lou. (Mareko 9:​33-37; 10:​35-45) Aposetolo taudia ese do idia karaia hebou Pasova ginigabena totona ataiai daiutuna lalonai idia vareai murinai ia vara gauna ese ia hahedinaraia unai hekwakwanai be ia vara loulou gauna. Unai nega ai, ta ese heabidae kastom karana, haida edia aena huria karana unai, ia karaia lasi. Manau karana ia hadibadia totona, Iesu ese edia aena ia huria.​—⁠Ioane 13:​2-15; 1 Timoteo 5:​9, 10.

 9. Iesu ese edena bamona Pasova ginigabena idia karaia murinai ia vara gauna ia hamaoromaoroa?

⁹ Ena be ia hadibadia, to Pasova aria idia karaia ore bena Iesu ese ena mase laloatao ena Memorial ia hamatamaia neganai, ia vara lou gauna mani oi laloa. Luka ena Evanelia bukana ia gwau: “Vadaeni idia sibona idia hepapahuahu, idia be daika do ia herea.” Iesu be mai badu ida aposetolo taudia ia gwau henia lasi, to mai manau ida ia sisiba henidia, namona be siahu bada idia mataganiganilaia tanobada ena lohia taudia edia amo do idia idau. (Luka 22:​24-27) Vadaeni, ia ese Keriso ena taravatu ena badina nadina ia herevalaia, ia gwau: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia.”​—⁠Ioane 13:⁠34.

¹⁰ Gabeai, unai hanuaboi ai, Iesu ese Keriso ena lalokau bamona lalokauna ena bada ia hahedinaraia. Ia gwau: “Lauegu taravatu be inai, umui ta ta umui lalokau henia, lau ese umui lau lalokau henia hegeregerena. Lalokau namo herea momokani be inai, tau ta ese ena mauri do ia atoa diho, iena turana totona.” (Ioane 15:​12, 13) Iesu ena hereva ena anina be bema hekwakwanai ta ia vara, ia murinai idia raka taudia be edia tadikaka dainai do idia mase be namo, a? Ioane, unai nega ai ia noho tauna, ese Iesu ena hereva be unai bamona ia lalo-pararalaia, badina gabeai inai bamona ia hereva: “Lalokau ena toana, be inai kara dekena amo do ita diba: Keriso ese ita dainai iena mauri ia atoa diho. Unai dainai ita ese iseda tadikakana dainai, iseda mauri ita atoa diho danu be namo.”​—⁠1 Ioane 3:⁠16.

11. (a) Keriso ena taravatu be edena bamona ita hagugurua? (b) Iesu ese edena haheitalai ia hahedinaraia?

¹¹ Unai dainai, haida dekenai Iesu ena sivarai ita hadibaia sibona neganai, ita be Keriso ena taravatu ita hagugurua lasi. Namona be iseda noho dalana bona kara be Iesu ena hegeregerena. Momokani, Iesu ena hereva lalodiai, ia ese hereva hereadaedia, bona hereva maorodia, ia gaukaralaia. To, ena haheitalai amo taunimanima ia hadibaia danu. Ena be guba ai Iesu be mai ena goada bada lauma ta, to ia ese tanobada dekenai ena Tamana ena ura ia karaia bona do ita noho dalana ia hadibaia gaukarana ia abia dae. Mai edia hekwakwanai bona hisihisi idia davaria taudia ia durua bona manau, kara namo, bona hebogahisi ia hahedinaraia. (Mataio 11:​28-30; 20:28; Filipi 2:​5-8; 1 Ioane 3:⁠8) Bona Iesu ese ena murinai idia raka taudia ia hagoadaia do idia lalokau heheni, ia ese ia lalokau henidia hegeregerena.

12. Badina be dahaka ita gwau diba Keriso ena taravatu ese Iehova lalokau henia karana ena anina ia hamaragia lasi?

¹² Keriso ena taravatu lalonai Iehova lalokau henia karana​—⁠Taravatu ena hahegani badana​—⁠ena anina be edena bamona? (Mataio 22:​37, 38; Galatia 6:⁠2) Ia be anina bada lasi gauna, a? Lasi momokani! Iehova lalokau henia karana be iseda Keristani tadikaka lalokau henia karana ida ia tamona. Ta ese Iehova ia lalokau henia momokani diba lasi bema ena tadikaka ia lalokau henia lasi, badina aposetolo Ioane ia gwau: “Tau ta bema ia gwau, ‘Lau ese Dirava lau lalokau henia,’ to ia ese iena tadikakana ia badu henia, unai tau be koikoi tauna. Badina be iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba?”​—⁠1 Ioane 4:20; mani 1 Ioane 3:​17, 18 itaia.

13. Hahediba taudia be Iesu ena taravatu matamatana idia badinaia dainai dahaka ia vara?

¹³ Iesu ese ena hahediba taudia dekenai inai taravatu matamatana, ta ta do idia lalokau henia ia ese ia lalokau henidia hegeregerena, ia henia neganai, unai kara ese do ia havaraia gauna ia herevalaia. Ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Tertullian, Iesu ia mase bena lagani 100 mai kahana murinai ia noho tauna, ese ia sivarailaia hegeregerena, Keristani taudia ginigunadia ese edia tadikaka idia lalokau henia karana ese unai ia havaraia. Tertullian ia gwau Keristani lasi taudia ese Keriso murinai idia raka taudia idia kikilaia, idia gwau: ‘Itaia, idia be ta ta idia lalokau henia bada bona idia hegaegae ta ta dainai do idia mase.’ Namona be ita sibona ita nanadaia, ‘Egu Keristani tadikaka dekenai lau hahedinaraia lalokauna ese ia hamomokania lau be Iesu ena hahediba tauna ta, a?’

Iseda Lalokau Ita Hamomokania Dalana

14, 15. Dahaka ese Keriso ena taravatu badinaia karana ia ha-aukaia diba, to dahaka ese ita ia durua ita badinaia totona?

¹⁴ Iehova ena hesiai taudia ese Keriso ena lalokau bamona lalokauna idia hahedinaraia be mai anina bada. To sibodia edia ura idia tahua Keristani tadikaka oi lalokau henidia be auka, a? Vadaeni, ita itaia hegeregerena, aposetolo taudia danu idia hepapahuahu bona sibodia edia ura idia tahua. (Mataio 20:​20-24) Galatia tadikaka danu be sibodia edia huanai idia hepapahuahu. Paulo ese ia hamaorodia badibadinai ia noho tauna lalokau henia karana ese Taravatu ia hagugurua bona murinai ia sisiba henidia, ia gwau: “Bema umui ta ta umui hadikaia bona heatu henia neganai, do umui naria namonamo, umui sibona do umui haorea garina.” Tauanina ena kara be Dirava ena lauma helaga ena kara ida ia hahegeregerea murinai, Paulo ese ia sisiba henidia lou, ia gwau: “Ita hekokoroku lasi, ita ta ta ita habadua lasi, bona ita ta ta dekenai kohu totona ita mama henia lasi.” Bena aposetolo Paulo ese inai hagoadaia herevana ia gwauraia: “Umui ta ta dekenai umui durua henia, emui metau do umui huaia totona. Inai dala dekenai Keriso ena taravatu do umui badinaia.”​—⁠Galatia 5:14–6:⁠2.

¹⁵ Iehova ia ura ita be Keriso ena taravatu ita badinaia, unai be kara metauna, a? Ena be ita dekenai idia hereva dika taudia eiava iseda lalona idia hahisia taudia ita kara namo henia be auka, to ita be mai eda maduna ‘Dirava ena kara bamona do ita karaia bona lalokau ena dala dekenai do ita mauri noho.’ (Efeso 5:​1, 2) Namona be Dirava ena haheitalai do ita raraia noho, ia “ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase.” (Roma 5:⁠8) Ma haida, ita idia kara dika henia taudia danu, ita durua totona kara ta ita karaia guna neganai, do ita moale badina ita diba ita be Dirava ita tohotohoa noho bona Keriso ena taravatu ita badinaia.

16. Iseda lalokau Dirava bona Keriso dekenai be edena bamona ita hamomokania?

¹⁶ Namona be ita laloatao, iseda lalokau ita hamomokania dalana be iseda hereva amo sibona lasi, to iseda kara amo. Iesu danu ia davaria do idia vara gaudia dainai, Dirava ena ura ena kahana ta ia badinaia be auka. Iesu ia guriguri, ia gwau: “Egu Tamana e, oiemu lalona bema ia hegeregere, inai kapusi be lau dekena amo do oi kokia.” To haraga momokani ma ia gwau: “To lauegu ura lasi, oiemu ura sibona.” (Luka 22:42) Ena be Iesu ese hisihisi bada herea ia davaria, to Dirava ena ura ia karaia. (Heberu 5:​7, 8) Kamonai karana ese iseda lalokau ia hamomokania bona ia hahedinaraia ita diba Dirava ena dala be dala namo hereana. Baibel ia gwau: “Dirava ita lalokau henia ena anina be inai: Dirava ena taravatu do ita badinaia.” (1 Ioane 5:⁠3) Bona Iesu ese ena aposetolo taudia ia hamaoroa: “Bema lau dekenai umui lalokau henia, be lauegu taravatu do umui badinaia.”​—⁠Ioane 14:⁠15.

17. Dahaka mai anina bada haheganina be Iesu ese ia murinai idia raka taudia dekenai ia henia, bona edena bamona ita diba hari ita ese ita badinaia danu be namo?

¹⁷ Keriso ese ia murinai idia raka taudia ia hagania do idia lalokau heheni, bona dahaka mai anina bada hahegani ma ta ia henidia? Ia haganidia idia dekenai ia hadibaia haroro gaukarana do idia karaia. Petero ia gwau: “Ai dekenai ia hadibaia, taunimanima ibounai dekenai do ai haroro, bona do ai gwauraia hedinarai.” (Kara 10:42) Iesu ese inai hahegani ia henia: “Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20; Kara 1:⁠8) Iesu ia hahedinaraia hari, “dokona negana” ai, ia murinai idia raka taudia ese unai hahegani do idia badinaia danu, badina ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Daniela 12:4; Mataio 24:14) Oibe, Dirava ena ura be do ita haroro. To, haida idia laloa Dirava ia ura ita be gaukara metauna do ita karaia. To, momokani ia be metau, a?

Toana be Ia Metau Ena Badina

18. Iehova ia ura ita karaia gauna ita karaia dainai hisihisi ita davaria neganai, dahaka ita laloatao be namo?

¹⁸ Ita itaia vadaeni hegeregerena, taunimanima edia sivarai lalonai, Iehova ia ura idia ese hahegani idauidau idia badinaia. Bona ia ura idia karaia gaudia be idauidau hegeregerena, idia davaria hahetoho danu be unai bamona. Dirava ena lalokau Natuna be hahetoho aukadia momokani ia davaria, bena dokonai hisihisi bada dalanai idia hamasea badina Dirava ia ura do ia karaia gauna ia karaia dainai. To Dirava ia ura ita karaia gauna ita karaia dainai hisihisi ita davaria neganai, namona be ita laloatao ia ese unai hahetoho ia havaraia lasi. (Ioane 15:​18-20; Iamesi 1:​13-15) Satani ena gwau-edeede karana ese kara dika, hisihisi, bona mase ia mailaia, bona ia ese hari ia noho dalana ia havaraia dainai Iehova ia ura ena hesiai taudia ese do idia karaia gaudia idia karaia be auka.​—⁠Iobu 1:​6-19; 2:​1-8.

19. Dahaka dainai Dirava ese ena Natuna amo ia gwauraia gaudia ita karaia be hahenamo ta?

¹⁹ Iehova ese ena Natuna amo hahegani ia henia inai nega dokona ai, iena hesiai taudia ese tanobada hegegemadai Basileia do idia harorolaia do idia hahedinaraia Basileia ena lohia siahuna be taunimanima ese idia davaria hisihisi iboudiai ia hanamoa dalana tamona. Unai Dirava ena gavamani ese tanobada dekenai idia vara hekwakwanai iboudiai do ia haorea​—⁠tuari, raskol karadia, ogogami, buruka, gorere, mase. Unai Basileia ese paradaiso tanobadana mai hairaina do ia havaraia, bona unuseniai mase taudia do idia toreisi lou danu. (Mataio 6:​9, 10; Luka 23:43; Kara 24:15; Apokalupo 21:​3, 4) Unai bamona kara edia sivarai namona ita harorolaia be hahenamo badana! Vadaeni, ia hedinarai goevagoeva, Iehova ia ura ita karaia gauna ese hekwakwanai ia havaraia lasi. Ita be dagedage ita davaria, badina Satani Diabolo bona ena tanobada ese unai dagedage idia havaraia.

20. Diabolo ese ia havaraia hahetoho iboudiai be edena bamona do ita hanaia diba?

²⁰ Satani ese ia havaraia hahetoho iboudiai be edena bamona ita hanaia diba? Inai hereva do ita laloatao noho karana amo: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” (Aonega Herevadia 27:11) Iesu ese ena noho gabuna namona guba dekenai ia rakatania bona tanobada dekenai ia mai ena Tamana ena ura ia karaia totona neganai, ia ese Iehova dekenai dala ia kehoa Satani ena hepapahuahu herevana ia haerelaia totona. (Isaia 53:12; Heberu 10:⁠7) Iesu be taunimanima bamona ia mauri neganai, hahetoho idauidau, satauro ai idia hamasea karana danu, ia haheaukalaia. Bema Iesu be iseda Haheitalai Tauna bamona ita tohotohoa, ita danu be hisihisi do ita haheaukalaia diba bona Iehova ia ura do ita karaia gaudia do ita karaia.​—⁠Heberu 12:​1-3.

21. Iehova bona ena Natuna ese idia hahedinaraia lalokauna be edena bamona oi laloa?

²¹ Dirava bona ena Natuna ese ita dekenai lalokau bada herea idia hahedinaraia! Iesu ena boubou gauna dainai, kamonai taudia be mai edia dala Paradaiso lalonai idia mauri hanaihanai totona. Unai dainai namona be gau ta ese iseda helaro ia koua lasi. To, Paulo bamona namona be ita ta ta be Iesu ese ia kehoa dalana ita laloa bada, ia gwau: “Dirava ena Natuna . . . ese lau ia lalokau henia, bona lau dainai iena mauri ia atoa diho.” (Galatia 2:20) Bona namona be iseda lalokau Diravana, Iehova, ita tanikiu henia mai eda kudouna ibounai ida, badina ia ura ita karaia gaudia be idia metau lasi.

Edena Bamona Do Oi Haere?

◻ Iehova ia ura dahaka do ita karaia hari?

◻ Ena aposetolo taudia ida ia noho hanuaboina ginigabena ai, Keriso ese edena dala ai ia hahedinaraia lalokau be mai anina bada?

◻ Edena bamona ita hamomokania diba ita be Dirava ita lalokau henia?

◻ Dahaka dainai Iehova ia ura ita karaia gaudia ita karaia be hahenamo ta?

 5. Keristani taudia be edena taravatu henunai idia noho, bona unai taravatu ena siahu be edena negai ia hamatamaia?

10. Iesu ese ena hahediba taudia dekenai dahaka taravatu ia henia, bona ena anina be dahaka?

[Picture on page 23]

Iesu ese ena aposetolo taudia edia aena ia huria neganai, dahaka ia hadibadia?

[Picture on page 25]

Herevana dahaka dagedage ita davaria, sivarai namona ita harorolaia be hahenamo hereadaena