Guriguri ese Namo Ia Havaraia, A?

NEGA ta eiava haida, kahirakahira taunimanima ibounai idia mamia idia guriguri be namo. Momokani, kahirakahira tomadiho ibounai edia taunimanima idia guriguri mai momokani ida. Hegeregere, dina ta lalonai reana Buddhist tauna be nega tausen momo ia guriguri, “egu abidadama lau atoa Amida Buddha dekenai.”

Tanobada ibounai lalonai idia vara noho hekwakwanai ita laloa neganai, ita henanadai diba: Taunimanima idia ura guriguri karana amo dahaka idia karaia? Unai guriguri ibounai ese gau namona ta idia havaraia, a?

Dahaka Dainai Taunimanima Idia Guriguri?

Orient taudia momo be edia tubudia bona Shinto eiava Tao diravadia dekenai idia guriguri. Unai bamona idia karaia badina idia ura sikuli ena eksam ai idia kwalimu, edia uma amo aniani namodia idia abia, eiava gorere idia koua totona. Edia hekwarahi amo, Buddhist taudia idia ura lalo-diari idia abia. Hindu taudia be mai momokani ida idia ura henia dirava tatau bona dirava hahinedia dekenai idia guriguri, diba bona taga abia totona bona idia gimadia totona.

Katolik taudia haida idia laloa mai momokani ida edia mauri idia henia bona pris eiava sista taudia bamona monasteri eiava sista edia ruma lalodiai idia noho bona idia guriguri loulou neganai namo do idia mailaia taunimanima dekenai. Katolik taudia milioni momo be Mary amo namo idia abia totona idia dibaia guriguri idia gwauraia loulou, reana rosary ageva edia heduru amo. Orient tanodia momo dekenai, taunimanima momo idia guriguri neganai uili ta bamona gauna idia gaukaralaia. Protestan taudia ese Lohiabada ena Guriguri idia gwauraia loulou, ena be reana idia ese Dirava dekenai edia hemami idia gwauraia danu. Iuda taudia momo be gabu daudau amo idia lao Ierusalema dekenai ena Western Wall ai idia guriguri totona, edia ura be dubu do ia gini lou bona maino bona noho namo ena nega matamatana do ia vara.

Ena be taunimanima milioni momo be mai edia goada ida idia guriguri, to ogogami, idia rakatania diba lasi kara dikadia, ruma bese idia parara karana, taravatu utua karadia, bona tuari ese taunimanima besedia idia hahisia noho. Reana unai taunimanima ibounai be dala maorona dekenai idia guriguri lasi, a? Danu, ta ese momokani guriguri ia kamonai henidia, a?

Ta ese Guriguri Ia Kamonai Henidia, A?

Guriguri ese gau namona ta idia havaraia diba lasi bema ta ese ia kamonai henidia lasi. Ta ia guriguri neganai, ia abia dae ita itaia diba lasi lauma gabuna dekenai ta ese ia kamonai. To, guriguri be rege amo sibona idia hanaia lao lasi. Taunimanima momo idia abia dae ta ese ia guriguri noho tauna ena lalohadai danu ia duahia diba. Unai be daika?

Edena bamona iseda kwara harana ena cereberal cortex idia karaia neuron bilioni momo lalonai lalohadai idia matamaia be idia tahua taudia ese idia lalo-pararalaia diba lasi. To, ita laloa diba, kwara harana ia Havaraia Tauna ese unai bamona lalohadai ia duahia diba. Unai be iseda Havaraia Tauna, Iehova Dirava. (Salamo 83:18; Apokalupo 4:11) Guriguri be ia dekenai ita siaia be namo. To Iehova be unai bamona guriguri ibounai ia kamonai henidia, a?

Guriguri Ibounai Ia Kamonai Henidia, A?

Idaunegai Israela ena King Davida be ia guriguri momo tauna. Ia be Dirava ena lauma amo salamo ia torea tauna, bona ia gwau: “Badina be oi ese aiemai guriguri oi kamonai. Taunimanima ibounai be oi dekenai do idia mai.” (Salamo 65:⁠2) Iehova be taunimanima ese idia hereva gado tausen momo amo idia gwauraia guriguridia ia lalo-pararalaia diba. Ena be taunimanima edia lalona ese unai bamona hereva momo ia dogoatao diba lasi, to ita gwau lasi Dirava ese ia abia dae dalana ai ia dekenai idia guriguri taudia edia guriguri ia kamonai diba lasi.

To, Iesu Keriso​​—⁠ia danu be guriguri momo tauna​​—⁠ia hahedinaraia Dirava ese guriguri iboudiai ia moalelaia lasi. Mani Iesu ese idia dibaia guriguri gwauraia loulou karana, idia karaia momo karana, ia herevalaia dalana oi itaia. Ia gwau: “Umui guriguri neganai, hereva kava momo do umui gwauraia lou, gwauraia lou lasi, Dirava diba lasi taudia bamona, badina be idia laloa edia hereva momo dainai, Dirava ese idia do ia kamonai.” (Mataio 6:⁠7) Ita laloa diba lasi Iehova ese iseda guriguri do ia kamonai henidia bema iseda mamina korikoridia idia hahedinaraia lasi.

Dirava ese guriguri haida ia moalelaia lasi ena badina ia hahedinaraia neganai, Baibel ena aonega hereva ta ia gwau: “Bema Dirava ena taravatu ita kamonai henia lasi, ia ese iseda guriguri do ia kamonai henia lasi.” (Aonega Herevadia 28:⁠9) Aonega hereva ma ta ia gwau: “Lohiabada ese kara namo taudia edia guriguri be ia kamonai henia noho, to kara dika taudia edia noinoi, be ia kamonai henia lasi.” (Aonega Herevadia 15:29) Idaunegai Iuda besena edia hakaua taudia edia dika ia metau neganai, Iehova ia gwau: “Emui imana guriguri totona umui abia isi neganai, lau ese egu vairana umui dekena amo do lau hunia. Sedira guriguri momo do umui gwauraia, to lau be do lau kamonai lasi, badina emui imadia be rara dekenai idia honu vadaeni.”​​—⁠Isaia 1:​1, 15.

Aposetolo Petero ese gau ta ia herevalaia, unai gauna dainai Dirava ese guriguri haida ia abia dae lasi. Petero ia gwau: “Tatau e, umui danu, emui adavana danu umui noho hebou ena dala do umui laloa namonamo. Hahine ena tauanina be goada herea lasi, unai dainai do umui naria namonamo, bona matauraia. Umui laloaboio lasi, umui, mai emui adavana danu, ese Dirava ena hariharibada umui abia hebou dainai, mauri hanaihanai umui davaria. Unai bamona do umui karaia neganai, emui guriguri haere dalana be gau ta ese do ia koua lasi.” (1 Petero 3:⁠7) Unai sisiba ia laloa lasi tauna ena guriguri be Dirava ese do ia kamonai henia lasi!

Ia hedinarai goevagoeva, Dirava ese iseda guriguri ia kamonai henia totona gau haida ita karaia be namo. To, idia guriguri taudia momo be Dirava ia ura ita karaia gaudia idia badinaia karana idia laloa bada lasi. Unai dainai mai momokani ida guriguri momo karana ese tanobada namona ia havaraia lasi.

Dirava ia ura dahaka ita karaia be namo iseda guriguri ia kamonai henidia totona? Haere be iseda guriguri ena badina dekenai. Momokani, bema ita ura diba iseda guriguri ese namo idia havaraia eiava lasi, namona be edia badina ita lalo-pararalaia. Dahaka dainai Iehova ese dala ia karaia ia ita hereva henia totona?

[Picture Credit Line on page 3]

G.P.O., Jerusalem