“Hesiai Tauna Mai Ena Kamonai” be Hahetoho Ia Hanaia!

“Dirava ena Kota Badana ena nega be ia ginidae vadaeni, bona Dirava ese iena orea taudia do ia kota henidia guna.”​​—⁠1 PETERO 4:⁠17.

 1. Iesu be “hesiai tauna” ena gaukara ia sekea neganai, dahaka ia davaria?

PENTEKOSTE 33 C.E. ai, Iesu ese “hesiai tauna” ta ia abia hidi ena ‘ruma taudia’ dekenai aniani be nega korikorina ai ia henia totona. Lagani 1914 ai, Iesu be King ai ia lao, bona nega ia ginidae unai “hesiai tauna” ena gaukara ia sekea totona. Ia davaria “hesiai tauna” oreana kahirakahira ibounai be “mai ena kamonai, bona mai ena kara maoromaoro.” Unai dainai, ia ese “iena kohu ibounai naria tauna . . . ia halaoa.” (Mataio 24:​45-​47) To, ia kamonai lasi bona kara maoromaoro ia badinaia lasi hesiai tauna dikana ta danu ia noho.

‘Unai Hesiai Tauna Dikana’

2, 3. ‘Unai hesiai tauna dikana’ be edeseni amo ia mai, bona edena bamona ia vara?

² Iesu be “hesiai tauna mai ena kamonai, bona mai ena kara maoromaoro” ia herevalaia murinai, maoromaoro unai hesiai tauna dikana ia gwauraia. Ia gwau: “To hesiai tauna dikana ena lalona dekenai do ia laloa, do ia gwau, ‘Lauegu biaguna be do ia giroa mai haraga lasi.’ Vadaeni ia ese iena hesiai taudia haida do ia botaia, muramura inua kekero taudia danu do ia aniani noho, do ia inuinu noho. Unai hesiai tauna be ia laloa lasi dinana dekenai, bona hora ta ia diba lasi neganai, iena biaguna do ia ginidae. Biaguna ese kaia dekena amo unai tau do ia utua kahana maragimaragi, bona koikoi taudia danu, edia panisia gabu dekenai do ia siaia, vadaeni unuseni do idia tai, edia isena do idia koria auka masemase.” (Mataio 24:​48-51) Inai hereva ‘unai hesiai tauna dikana’ dainai Iesu ese guna ia herevalaia hesiai tauna mai ena kamonai bona kara maoromaoro ita laloa. Oibe, hesiai tauna dikana, be guna hesiai tauna mai ena kamonai oreana amo ia mai.a Edena bamona?

³ Lagani 1914 do lasi neganai, hesiai tauna mai ena kamonai oreana taudia momo idia laloa unai lagani ai Headava Matamata Tauna ida do idia hedavari guba dekenai, to idia laloa gauna ia vara lasi. Unai bona idia vara gaudia ma haida dainai, momo idia lalohisihisi bona haida idia badu. Idia haida be edia hereva amo edia tadikaka idia “botaia” bona “inuinu kekero taudia”​—⁠Kerisendom ena tomadiho oreadia​—⁠idia bamodia.​​—⁠Isaia 28:​1-3; 32:⁠6.

 4. Iesu ese “hesiai tauna dikana” bona iena kara idia hahedinaraia taudia ibounai be edena bamona ia kara henia?

⁴ Unai taudia be guna Keristani taudia, to gabeai idia gwauraia “hesiai tauna dikana,” bona Iesu ese “kaia dekena amo unai tau do ia utua.” Edena bamona? Anina be idia ia dadaraia, bona edia guba helarona idia haboioa. To idia ia hadikaia haraga lasi. Keristani kongregesen murimuri ena “dibura masemase” gabuna ai, idia taitai bona edia isena idia koria guna. (Mataio 8:​12) Unai nega amo ema bona hari, horoa taudia ma haida be unai bamona kara dikana idia hahedinaraia, unai amo idia hahedinaraia idia be “hesiai tauna dikana.” “Mamoe idaudia” haida danu ese edia kamonai lasi karana idia tohotohoa. (Ioane 10:16) Keriso idia inai henia taudia ibounai be lauma dalanai murimuri ai “dibura masemase” gabuna tamona ai do idia noho.

 5. Hesiai tauna mai ena kamonai, bona mai ena kara maoromaoro be dahaka ia karaia dainai, ia be “hesiai tauna dikana” amo ia idau?

⁵ To, hesiai tauna mai ena kamonai, bona mai ena kara maoromaoro be unai “hesiai tauna dikana” ese ia abia hahetoho bamona ia abia. To ia badu lasi, ena lalohadai ia haidaua. (2 Korinto 13:11) Unai ese edia lalokau Iehova bona edia tadikaka totona ia hagoadaia. Unai dainai, inai “nega ena dokona” ai idia be ‘hereva momokani ena du, bona gimaia maguna.’​​—⁠1 Timoteo 3:​15; 2 Timoteo 3:⁠1.

Aonega Bona Kavakava Kekenidia

 6. (a) Iesu ese hesiai tauna mai ena kamonai oreana ena aonega be edena bamona ia haheitalaia? (b) Lagani 1914 do lasi neganai, horoa taudia be dahaka sivarai idia harorolaia?

⁶ Iesu ese ‘unai hesiai tauna dikana’ ia herevalaia murinai, parabole rua amo ia hahedinaraia dahaka dainai horoa Keristani taudia haida be idia kamonai bona kara maoromaoro idia badinaia, to haida be lasi.b Aonega karana ia haheitalaia totona, ia gwau: “Guba Basileia be kekeni 10 bamona, edia lamepa idia abia lao, headava matamata tauna danu idia hedavari gwauraia. Kekeni 5 be mai kavakava, to kekeni 5 be mai aonega. Badina be kekeni mai kavakava ese edia lamepa idia abia neganai, be oela idia abia lao lasi. To kekeni mai aonega ese edia lamepa idia abia lao mai oela danu.” (Mataio 25:​1-4) Unai kekeni 10 dainai ita ese lagani 1914 do lasi neganai idia noho horoa Keristani taudia ita laloatao. Idia diba headava matamata tauna, Iesu Keriso, be kahirakahira do ia hedinarai. Unai dainai idia lao ia idia hedavari henia totona, mai gari lasi ida idia haroro idia gwau “idau bese edia nega” be lagani 1914 ai do ia ore.​​—⁠Luka 21:⁠24.

 7. Edena negai bona dahaka dainai horoa Keristani taudia be “idia mahuta” bamona?

⁷ Idia be maoro. Lagani 1914 ai idau bese taudia edia nega ia ore, bona Dirava ena Basileia, Keriso Iesu ese ia lohiaia gauna, be ia gaukara matamaia. To unai be guba dekenai ia vara dainai ita itaia lasi. Tanobada ai, taunimanima be ia ese ia perovetalaia “nega dika” idia davaria matamaia. (Apokalupo 12:​10, 12) Hahetoho negana ia matamaia. Horoa Keristani taudia be gau ibounai idia do lalo-pararalaia namonamo lasi dainai idia laloa “headava matamata tauna ia mai haraga lasi.” Idia daradara bona tanobada ese ia dagedage henidia dainai, haroro gaukara idia karaia goadagoada lasi bona kahirakahira unai gaukara idia hadokoa momokani. Parabole ese ia gwauraia kekeni taudia bamona, lauma dalanai “edia matana idia metau, vadaeni ibounai idia mahuta.” Iesu ena aposetolo taudia idia mase murinai, kamonai lasi Keristani taudia ese idia karaia bamona.​​—⁠Mataio 25:5; Apokalupo 11:​7, 8; 12:⁠17.

 8. Dahaka ia vara bena inai boiboi: “Headava matamata tauna ia mai inai” idia halasia, bona nega ia ginidae horoa Keristani taudia ese dahaka idia karaia totona?

⁸ Bena lagani 1919 ai gau idauna ta ia vara. Baibel ia gwau: “Hanuaboi huanai tau ta ia boiboi, ia gwau, ‘Headava matamata tauna ia mai inai, umui raka mai, ia danu umui hedavari.’ Vadaeni inai kekeni ibounai idia toreisi, edia lamepa idia karaia hegaegae.” (Mataio 25:​6, 7) Gaukara idia hadokoa gwauraia neganai, boiboi ta ia mai idia haroro totona! Lagani 1918 ai, Iesu, “hereva do ia gwauraia Tauna,” be Iehova ena lauma dubuna dekenai ia mai Dirava ena kongregesen ia itaia bona hagoevaia totona. (Malaki 3:⁠1) Unai dainai, horoa Keristani taudia be tanobada ai ia noho dubu ena ariara gabuna dekenai idia lao bona ia idia hedavari henia be namo. Unai be edia nega “diari” idia hahedinaraia totona.​​—⁠Isaia 60:1; Filipi 2:​14, 15.

9, 10. Lagani 1919 ai, dahaka dainai Keristani taudia haida be “mai aonega” to haida be “kavakava”?

⁹ To naria! Parabole lalonai, kekeni matamata haida be mai edia hekwakwanai. Iesu ma ia gwau: “Kekeni mai kavakava ese kekeni mai aonega dekenai idia noinoi henia, idia gwau, ‘Emui oela haida umui henia ai dekenai, badina aiemai lamepa be kahirakahira idia bodo.’ ” (Mataio 25:⁠8) Oela be lasi neganai lamepa do ia diari lasi. Lamepa ena oela dainai Dirava ena Hereva ena hereva momokani bona ena lauma helaga ita laloatao, unai ese tomadiho momokani taudia ia hasiahua diari idia hahedinaraia taudia ai idia lao totona. (Salamo 119:130; Daniela 5:​14) Lagani 1919 do lasi neganai, mai edia aonega horoa Keristani taudia be Dirava ena ura idia totona be dahaka idia tahua, ena be nega sisina lalonai idia manoka. Unai dainai, diari hahedinaraia boiboina ia mai neganai, idia hegaegae vadaeni.​​—⁠2 Timoteo 4:2; Heberu 10:​24, 25.

¹⁰ To horoa taudia haida idia hegaegae lasi sibona edia ura gaudia idia dadaraia totona, eiava idia goada karaia lasi​​—⁠ena be idia ura bada headava matamata tauna ida idia noho. Unai dainai sivarai namona harorolaia goadagoada negana ia mai neganai, idia hegaegae lasi. (Mataio 24:14) Danu, idia ura edia gaukara goadagoada bamodia idia hamanokaia, unai be hegeregere, edia oela totona idia noinoi. Iesu ena parabole ai, aonega kekenidia be edena bamona idia haere? Idia gwau: “Lasi, ai bona umui be do ita hegeregere lasi garina. Namona be inai, sitoa dekenai umui lao, umui sibona emui oela do umui hoia.” (Mataio 25:⁠9) Unai hegeregerena, lagani 1919 ai, abidadama horoa Keristani taudia be idia ura lasi edia goada ia hamaragia karana ta idia karaia, bena diari do idia halasia lasi. Unai dainai, hahetoho idia hanaia.

11. Kavakava kekenidia dekenai dahaka ia vara?

¹¹ Sivarai ena dokonai Iesu ia gwau: “Hoihoi totona idia [kavakava kekenidia] lao noho neganai, headava matamata tauna ia ginidae, vadaeni idia hegaegae noho kekeni be ia danu headava ena aria dekenai idia raka vareai, vadaeni iduara idia koua. Gabeai kekeni haida idia mai, idia gwau, ‘Lohia e, lohia e, ai dekenai iduara oi kehoa.’ To ia haere idia dekenai, ia gwau, ‘Umui lau hamaoroa momokani, lau be lau diba lasi umui.’ ” (Mataio 25:​10-12) Oibe, haida be Headava Matamata Tauna ena mai totona idia hegaegae lasi. Unai dainai, hahetoho negana idia hanaia lasi bona guba ena headava ariana dekenai lao dalana idia haboioa. Unai be dika momokani!

Moni Ena Parabole

12. (a) Iesu be dahaka ia gaukaralaia kamonai karana ia haheitalaia totona? (b) “Gabu daudau dekenai ia lao” tauna be daika?

¹² Iesu ese aonega karana ia haheitalaia murinai, kamonai karana ena haheitalai ia gwauraia. Ia gwau: “Tau ta gabu daudau dekenai ia lao gwauraia, vadaeni iena hesiai taudia ia dekenai ia boiria, iena kohu ia henia idia dekenai. Vadaeni ia ese ta dekenai 5000 kina ia henia, ma ta dekenai 2000 kina ia henia, ma ta dekenai 1000 kina ia henia, idia ta ta edia diba hegeregerena. Vadaeni ia lao gabu daudau dekenai.” (Mataio 25:​14, 15) Parabole ese ia gwauraia tauna be Iesu, lagani 33 C.E. ai guba dekenai ia lao neganai, “gabu daudau dekenai ia lao” unai. To Iesu ia do daekau lasi neganai, iena kamonai hahediba taudia dekenai “iena kohu” ia henia. Edena dala ai?

13. Iesu ese edena dala ai gaukara badana ta ia hamatamaia bona ena “hesiai taudia” dekenai gwaumaoro ia henia bisinesi idia karaia totona?

¹³ Iesu be tanobada ai hesiai gaukara ia karaia neganai, Israela ena tano ibounai ai sivarai namona ia harorolaia, unai dala amo gaukara badana ta ia hamatamaia. (Mataio 9:​35-​38) “Gabu daudau dekenai” ia do lao lasi neganai, ena kamonai hahediba taudia dekenai unai gaukara ia henia, ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​18-20) Unai hereva amo Iesu ese ena “hesiai taudia” dekenai gwaumaoro ia henia “idia ta ta edia diba hegeregerena” bisinesi idia karaia, ela bona ia giroa mai.

14. Dahaka dainai Keristani taudia ibounai idia karaia gaukara ena bada be idauidau?

¹⁴ Unai hereva ese ia hahedinaraia aposetolo taudia edia negai idia noho taudia be edia noho daladia hegeregerena idia gaukara. Paulo bona Timoteo bamona, haida be idia hegeregere haroro bona hadibaia gaukarana idia karaia badabada totona. To haida be edia noho dalana dainai, unai ese edia gaukara dalana ia koua. Hegeregere, Keristani taudia haida be igui hesiai taudia, ma haida be idia gorere momo, idia buruka, eiava mai edia ruma bese maduna idauidau. Oibe, kongregesen ena maduna be hahediba taudia ibounai ese idia abia lasi. Horoa hahine bona horoa tatau haida be kongregesen lalonai idia hadibaia lasi. (1 Korinto 14:34; 1 Timoteo 3:1; Iamesi 3:⁠1) Keriso ena horoa hahediba taudia ibounai​​—⁠tatau eiava hahine​​—⁠herevana edia mauri daladia ta ta be edena bamona, to edia noho daladia ta ta hegeregerena Keristani hesiai gaukarana idia karaia. Hari idia noho Keriso ena hahediba taudia danu be unai bamona idia karaia.

Gaukara Sekea Negana Ia Hamatamaia!

15, 16. (a) Iesu ese edena negai ena moni idia naria dalana ia sekea? (b) Dahaka dala matamatadia be kamonai taudia dekenai idia henia “bisinesi” idia karaia totona?

¹⁵ Parabole ena sivarai ma ia gwau: “Nega daudau ia lao, vadaeni unai hesiai taudia edia biaguna ia giroa mai, bona idia dekenai ia nanadaia edena bamona ena moni idia naria.” (Mataio 25:19) Lagani 1914 ai​​—⁠lagani 33 C.E. murinai unai be daudau momokani​​—⁠Keriso Iesu ia lohia matamaia. Lagani toi mai kahana murinai, lagani 1918 ai, Dirava ena lauma dubuna dekenai ia mai bona Petero ena hereva ia hagugurua: “Dirava ena Kota Badana ena nega be ia ginidae vadaeni, bona Dirava ese iena orea taudia do ia kota henidia guna.” (1 Petero 4:17; Malaki 3:⁠1) Nega ia ginidae ena moni idia naria dalana ia sekea totona.

¹⁶ Hesiai taudia, Iesu ena horoa tadikakadia unai, be King ena “moni” dekenai dahaka idia karaia? Lagani 33 C.E. amo, lagani 1914 ia lao henia laganidia danu, momo idia gaukara goada Iesu ena moni dekenai “bisinesi” idia karaia totona. (Mataio 25:​16, NW ) Tanobada Tuarina Ginigunana lalonai danu, Biaguna idia hesiai henia totona edia ura bada idia hahedinaraia. Unai dainai kamonai taudia dekenai dala matamatadia idia kehoa be namo “bisinesi” idia karaia totona. Inai tanobada ena dokona negana ia ginidae vadaeni. Tanobada ibounai dekenai sivarai namona idia harorolaia be namo. “Tanobada ena anina” idia gogoa be namo. (Apokalupo 14:​6, 7, 14-​16) Uiti orea taudia ginigabedia idia davaria bona mamoe idaudia edia hutuma bada herea taudia idia haboua be namo.​​—⁠Apokalupo 7:9; Mataio 13:​24-​30.

17. Kamonai horoa Keristani taudia be edena bamona ‘edia biaguna danu idia moale hebou’?

¹⁷ Uma aniani haboua negana be moale negana. (Salamo 126:⁠6) Unai dainai, lagani 1919 ai, Iesu ese ena kamonai horoa tadikakadia dekenai maduna ma haida ia henia be maoro, ia gwau: “Gau momo lasi oi naria namonamo dainai, gau momo edia biaguna do lau halaoa oi. Oi mai, oiemu biaguna danu do ita moale hebou.” (Mataio 25:​21, 23) Danu, Biaguna be Dirava ena King matamatana ai ia lao dainai ena moale be bada herea momokani. (Salamo 45:​1, 2, 6, 7) Hesiai tauna mai ena kamonai oreana be King ena gaukara idia karaia bona ena ura tanobada ai idia habadaia dainai, unai moale idia mamia. (2 Korinto 5:​20) Edia moale be Isaia 61:10 ena peroveta herevana ai ita itaia, ia gwau: “Ierusalema be ia moale bada noho, Lohiabada ese ia karaia vadaeni gaudia dainai. . . . Dirava ese hamauria ena dabua, be Ierusalema dekenai ia atoa vadaeni.”

18. Dahaka dainai haida be tohoa negana idia hanaia lasi, bona dahaka ia vara?

¹⁸ Madi, haida be tohoa negana idia hanaia lasi. Baibel ia gwau: “Vadaeni 1000 kina ia abia tauna ia mai, ia gwau, ‘Lohia e, lau diba vadaeni oi be auka momo tauna. Oi hadoa lasi gauna be oi utua, bona oi negea lao, negea mai lasi gauna, be oi haboua. Unai dainai lau gari, lau lao, oiemu 1000 kina tano dekenai lau guria. Oi itaia, vadaeni oiemu oi abia.” (Mataio 25:​24, 25) Unai hegeregerena, horoa Keristani taudia haida be “bisinesi” idia karaia lasi. Lagani 1914 do lasi neganai, edia helaro be ma haida ida idia herevalaia lasi, bona lagani 1919 ai idia ura lasi idia matamaia. Edia hemataurai lasi karana dainai Iesu be dahaka ia karaia? Edia hahenamo ibounai ia kokia. Idia be ‘idia negea murimuri dekenai mai diburana, unuseni idia tai bona edia isena do idia koria auka masemase.’​​—⁠Mataio 25:​28, 30.

Gaukara Ia Sekea Noho

19. Edena dala ai Iesu ese sekea gaukarana ia karaia noho, bona horoa Keristani taudia ibounai edia lalona idia hadaia dahaka idia karaia totona?

¹⁹ Oibe, Iesu be lagani 1918 ai gaukara ia sekea matamaia neganai, dokona negana ai Keriso ena horoa hesiai taudia ai idia lao taudia momo be unai negai Iehova idia do hesiai henia lasi. Anina be Iesu ese edia gaukara ia sekea lasi, a? Lasi momokani. Gaukara sekea negana be lagani 1918 amo ia matamaia ia lao lagani 1919 ai, unai nega ai hesiai tauna mai ena kamonai bona mai ena kara maoromaoro oreana be hahetoho idia hanaia. Iesu ese Dirava ia abia hidi Keristani taudia edia gaukara ia sekea noho ela bona edia maka idia abia haorea. (Apokalupo 7:​1-3) Keriso ena horoa tadikakadia be unai idia diba dainai, edia lalona idia hadaia mai kamonai ida “bisinesi” do idia karaia noho totona. Idia ura idia aonega, idia dekenai oela bada ia noho be namo unai dala amo edia lamepa be do ia diari noho. Idia diba ta be mai kamonai ida ena tanobada maurina ia haorea neganai, Iesu ese unai tauna be guba dekenai do ia abia dae.​​—⁠Mataio 24:13; Ioane 14:​2-4; 1 Korinto 15:​50, 51.

20. (a) Hari, mamoe idaudia taudia be edia lalona idia hadaia dahaka idia karaia totona? (b) Horoa Keristani taudia be dahaka idia diba?

²⁰ Mamoe idaudia taudia hutuma bada herea be edia horoa tadikakadia idia tohotohoa. Idia lalo-parara edia diba Dirava ena ura dekenai ese hahenamo badadia ia mailaia. (Esekiela 3:​17-​21) Unai dainai, Iehova ena Hereva bona lauma helaga ena heduru amo, stadi karana bona Keristani hebou amo edia oela ia bada noho. Bona haroro bona hadibaia gaukarana amo edia diari idia hahedinaraia noho, bona unai amo edia horoa tadikaka ida “bisinesi” idia karaia hebou. To, horoa Keristani taudia idia diba goevagoeva Iesu ese unai moni be edia imana dekenai ia atoa. Lohiabada ena kohu tanobada ai idia naria dalana be ia dekenai do idia gwauraia hedinarai be namo. Ena be idia be momo lasi, to edia maduna be hutuma bada herea taudia dekenai idia henia lasi. Unai idia laloa noho lalonai, hesiai tauna mai ena kamonai, bona mai ena kara maoromaoro ese King ena bisinesi naria gaukarana ia gunalaia noho, bona hutuma bada herea taudia edia heduru dainai ia moale. Hutuma bada herea taudia ese edia horoa tadikakadia edia maduna idia lalo-pararalaia bona idia moale edia henari henunai idia gaukara.

21. Lagani 1919 do lasi neganai ema bona hari Keristani taudia ibounai be edena hagoadaia herevana idia badinaia be namo?

²¹ Unai dainai, ena be unai parabole rua be lagani 1919 bamona ai idia vara gaudia ia herevalaia, to edia hakaua hereva be do mai anina bada inai nega dokona ai idia noho Keristani taudia momokani ibounai dekenai. Ena be kekeni 10 ena parabole dokonai Iesu ese ia gwauraia hagoadaia herevana be lagani 1919 do lasi neganai idia noho horoa Keristani taudia dekenai ia guguru guna, to ena hakaua herevana be mai anina Keristani taudia ibounai dekenai danu. Namona be ita ibounai ese Iesu ena hereva ita badinaia, ia gwau: “Unai dainai, do umui naria namonamo noho. Badina dina bona hora be umui diba lasi.”​​—⁠Mataio 25:⁠13.

[Footnotes]

Anina Oi Gwauraia Diba, A?

• Iesu ese edena negai ena murinai idia raka taudia edia gaukara ia sekea, bona dahaka ia davaria?

• Dahaka dainai horoa Keristani taudia haida be unai “hesiai tauna dikana” ena kara idia hahedinaraia?

• Edena bamona ita hahedinaraia diba lauma dalanai ita aonega?

• Iesu ena kamonai horoa tadikakadia ita tohotohoa dainai, edena dala ai “bisinesi” ita karaia noho?

[Box on page 28

IESU BE EDENA NEGAI DO IA MAI?

Mataio karoa 24 bona 25 ai ia hahedinaraia Iesu do ia “mai,” to ena anina be idauidau. Ia be tauanina dalanai do ia diho “mai” diba lasi. To, ia “mai” anina be iena taunimanima eiava ia murinai idia raka taudia do ia laloa, nega momo unai be hahemaoro henia totona. Unai dainai, lagani 1914 ai ia “mai” bona King dagina ia abia neganai, ena noho ia matamaia. (Mataio 16:28; 17:1; Kara 1:​11) Lagani 1918 ai, hereva gwauraia tauna bamona ia “mai” bona sibodia idia gwauraia Iehova idia hesiai henia taudia ia hahemaoro henia. (Malaki 3:​1-3; 1 Petero 4:​17) Aramagedono ai, do ia “mai” Iehova idia inai henia taudia ia hahemaoro henia totona.​​—⁠Apokalupo 19:​11-​16.

Inai hereva mai (eiava, ginidae) be Mataio 24:​29-44 bona 25:​31-46 ai nega sisina momo ia hedinarai, bona “hisihisi badana” negana ai do ia vara. (Apokalupo 7:​14, NW) To, Mataio 24:45 ela bona 25:30 ese nega sisina momo inai hereva mai ia gwauraia, unai be sibodia idia gwauraia hahediba taudia be lagani 1918 amo ia hahemaoro henia karana ia herevalaia. Unai hegeregerena hesiai tauna mai ena kamonai edia ahuna henia negana, kavakava kekeni bona Biaguna ena moni ia hunia lahedo hesiai tauna hahemaoro henia negana, be hisihisi badana negana ai Iesu ia “mai” neganai do ia vara lasi. Bema ia vara unai ese do ia hahedinaraia Dirava ese ia abia hidi taudia momo be unai nega ai edia gaukara idia karaia namonamo lasi bona ia haidaua be namo. To, Apokalupo 7:3 ese ia hahedinaraia Keriso ena horoa hesiai taudia ibounai be unai nega ai “maka” idia abia vadaeni.

[Picture on page 26]

Lagani 1919 ai “hesiai tauna dikana” be hahenamo ia abia lasi

[Picture on page 27]

Headava matamata tauna ia ginidae neganai, aonega kekenidia be idia hegaegae vadaeni

[Picture on page 29]

Kamonai hesiai taudia be moni ida “bisinesi” idia karaia

Lahedo hesiai tauna be unai bamona ia karaia lasi

[Pictures on page 30]

Horoa taudia bona “hutuma bada herea” taudia be edia diari idia hahedinaraia noho