Famili Ena Moale Havaraia Daladia

Hepapahuahu Hamaoromaoroa Daladia

Tau ia gwau: “Lau bona Saraha ai headava murinai, ai be lauegu tama sina edia ruma dekenai ai noho. Dina ta, egu tadina ena kekeni ese lau ia noia emai motuka amo ia do lau abia lao iena ruma dekenai. Lau ura ia lau durua dainai, ia lau abia lao bona egu natuna mero maragina be ai danu ia mai. To, ruma dekenai lau giroa neganai, Sarah be ia badu bada herea. Ai heai, bona egu ruma bese taudia vairanai, ia gwau lau be hahine momo lau ura henia tauna. Lau badu dikadika bona hereva haida lau gwauraia, Sarah ena lalona lau hadikaia totona.”

Hahine ia gwau: “Aiemai natuna mero be ia gorere bada, bona unai negai ai be moni lasi. Unai dainai, Fernando be motuka dekenai iena tadina ena kekeni bona emai natuna mero ia abia lao neganai, lau be gau momo dainai lau lalohisihisi. Ia giroa mai neganai, egu lalohisihisi gauna lau gwauraia. Ai heai bada herea bona hereva dikadia ai gwauraia. Gabeai, egu hemami be ia dika.”

BEMA tau bona hahine idia hepapahuahu, anina be ta ta idia lalokau henia lasi, a? Lasi! Fernando bona Sarah be ta ta idia lalokau henia. To, headava namodia lalonai danu, nega ta ta ai hepapahuahu idia vara diba.

Dahaka dainai heai idia vara, bona dahaka oi karaia diba emu headava ia dika lasi totona? Dirava ese headava ia hamatamaia dainai, namona be iena Hereva, Baibel amo headava ena hekwakwanai hanamoa daladia ita tahua be namo.​​—⁠Genese 2:​21, 22; 2 Timoteo 3:​16, 17.

Hekwakwanai Ena Badina Oi Lalopararalaia

Headava tau bona hahine momo idia ura mai lalokau bona hebogahisi dalanai ta ta idia kara henia. To, Baibel ia gwau, “ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” (Roma 3:​23) Unai dainai, bema tau bona hahine idia lalotamona lasi, edia badu karana idia biagua diba lasi. Hepapahuahu ia vara neganai, ta ta dekenai idia boiboi badabada bona hereva dikadia idia gwauraia. Unai kara idia manadalaia dainai idia hadokoa be auka. (Roma 7:​21; Efeso 4:​31) Dahaka gaudia ese hepapahuahu idia havaraia?

Tau bona hahine edia herevahereva dalana be idauidau. Michiko ia gwau: “Ai headava matamata neganai, lau davaria emai herevahereva dalana be idauidau. Hekwakwanai ta ia vara neganai, ia vara gauna lau ura diba sibona lasi, to lau ura diba danu dahaka dainai bona edena bamona ia vara. To, egu tau be unai hekwakwanai ese ia havaraia gauna sibona ia ura ia herevalaia.

Michiko sibona be unai hekwakwanai ia davaria lasi. Headava momo lalonai, ta ia ura nega bada lalonai hekwakwanai idia kikilaia, to ena tau be hepapahuahu karana ia ura lasi dainai ia ura lasi unai hekwakwanai ia herevalaia. Nega haida, bema ta be unai hekwakwanai ia herevalaia momo neganai, ena adavana be ia hesiku. Oiemu headava lalonai unai bamona kara oi itaia danu, a? Umui ta be ia ura hekwakwanai ia herevalaia, to ta be ia ura lasi bona ia hesiku, a?

Ita laloa gauna ma ta be tau bona hahine be edia tama sina edia herevahereva dalana dekenai idia manada dainai, unai ese edia herevahereva dalana ia biagua diba. Justin, lagani 5 ia headava tauna ia gwau: “Egu tama sina bona emai ruma bese taudia be hereva momo lasi taudia bona egu lalohadai lau herevalaia be auka. Unai kara ese egu adavana ia habadua. Iena ruma bese taudia be idia herevahereva momo, bona iena lalohadai ia gwauraia hedinarai be auka lasi.”

Umui Gaukara Hebou Hekwakwanai Hamaoromaoroa Totona

Tahua gaukara idia karaia taudia idia davaria ena be tau bona hahine be ta ta idia lalokau henia, to unai ese headava lalonai moale do ia havaraia lasi. Danu, mahuta hebou karana bona moni momo ese moale do ia havaraia lasi. To, headava lalonai idia moale diba dalana tamona be: Hepapahuahu idia vara neganai, tau bona hahine be dala maorona ai unai hepapahuahu idia hamaoromaoroa diba.

Danu, Iesu ia gwau tau bona hahine idia headava neganai, Dirava ese idia ia hakapua. (Mataio 19:​4-6) Unai dainai, headava namona ese Dirava ena ladana ia abia isi. To, bema tau be iena adavana dekenai lalokau karadia ia hahedinaraia lasi eiava hahine ena lalohadai ia kamonai lasi, Iehova Dirava ese iena guriguri do ia kamonai lasi danu. (1 Petero 3:⁠7) Bema hahine ese iena tau ia matauraia lasi, ia be Iehova ia matauraia lasi, badina Iehova ese tau dekenai ruma bese ena kwara dagina ia henia.​​—⁠1 Korinto 11:⁠3.

Moale Dalana​​—⁠Ta Ta Dekenai Hereva Dikadia Gwauraia Lasi

Herevana, emui herevahereva dalana be idauidau bona emu tama sina edia herevahereva dalana oi manadalaia, to Baibel ena hakaua herevadia oi badinaia bona hekwakwanai oi hamaoromaoroa totona, hadikaia herevadia oi dadaraia be namo. Oi sibona ese inai henanadai oi laloa:

▪ ‘Lau hekwarahi hereva dikadia lau gwauraia karana lau koua totona, a?’ Aonega herevana ta ia gwau: “Udu baubauna do oi gigia neganai, rara do ia diho. Bona badu do oi hatoreisia neganai, heai do ia vara.” (Aonega Herevadia 30:33) Unai hereva ena anina be dahaka? Mani inai haheitalai oi laloa. Reana, tau bona hahine be moni gaukaralaia namonamo dalana idia kikilaia, bona hahine ia gwau: “Dava bada gaudia do ita hoia kava lasi,” to tau be adavana ia gwau henia: “Oi be anina lasi gaudia dekenai moni oi negea kava.” Unai amo hepapahuahu ia vara diba. Momokani, bema oiemu adavana ese oiemu ‘udu baubau ia gigia,’ reana oi ia gwau henia neganai, reana oi danu oi ura iena ‘udu baubau oi gigia’ danu. To, ta ena kara davana henia lou karana ese badu do ia habadaia.

Baibel buka ta ia torea tauna, Iamesi be inai sisiba ia henia: “Lahi maragina ese uda bada herea ia araia ore diba. Bona mala be lahi bamona.” (Iamesi 3:​5, 6) Tau bona hahine be edia malana idia naria lasi neganai, gau maragidia be hepapahuahu badadia ai idia lao diba. Bona bema headava lalonai hepapahuahu momo idia vara, lalokau be do ia keru.

Iesu be iena inai taudia ese idia hereva dika henia neganai, “ia hereva dika henia lou lasi.” Oi be Iesu ena haheitalai oi tohotohoa diba, a? (1 Petero 2:​23) Hepapahuahu umui hamaoromaoroa haraga totona, namona be emu adavana ena lalohadai oi abia dae bona oiemu kara dainai sori herevana oi gwauraia.

INAI TOHOA: Umui hepapahuahu neganai, oi sibona oi nanadaia: ‘Egu adavana ena lalohadai lau abia dae be dika, a? Lau be dahaka lau karaia inai hekwakwanai lau havaraia? Egu kerere dainai, sori herevana do lau gwauraia be dahaka ese ia koua?’

▪ ‘Egu adavana ena lalohadai lau dadaraia eiava lau laloa bada lasi, a?’ “Umui ibounai mai lalona tamona danu do umui noho, umui ta ta dekenai durua do umui henia.” (1 Petero 3:⁠8) Reana oi dekenai unai sisiba be auka. Mani badina rua ita kikilaia. Ginigunana be, oi be emu adavana ena lalona eiava hemami oi lalopararalaia lasi. Hegeregere, bema emu adavana be gau haida dainai ia lalohekwarahi momo, reana do oi gwau, “Oi be oi laloa momo, unai be anina lasi gaudia!” Oiemu ura be emu adavana oi durua unai hekwakwanai ia lalopararalaia totona. To, unai bamona hereva ese emu adavana do ia durua lasi. Namona be tau bona hahine idia diba idia lalokau henia taudia ese edia hekwakwanai idia lalopararalaia bona idia hebogahisi henia.

Hekokoroku karana dainai ta ese ena adavana ena hemami eiava lalohadai ia laloa bada lasi. Hekokoroku tauna ia ura sibona ia abia isi bona ma haida ia atoa diho. Reana, ma haida edia ladana do ia hadikaia eiava idia karaia gaudia ia gwauraia dika. Iesu ena negai idia noho Farisea bona taravatu hadibaia taudia mani oi laloa. Bema tau ta eiava Farisea tauna ta ena lalohadai be unai hekokoroku Farisea taudia edia amo ia idau, idia ese unai tauna idia gwauraia dika. (Ioane 7:​45-​52) To, Iesu be idau. Ma haida be ia dekenai edia lalohadai idia gwauraia hedinarai neganai, edia hemami ia laloa bada.​​—⁠Mataio 20:​29-​34; Mareko 5:​25-​34.

Mani oi laloa, emu adavana be ena lalohadai ia gwauraia hedinarai neganai, oiemu kara ia dekenai be edena bamona? Oiemu hereva, gado regena, bona vairana ena toana ese ia hahedinaraia oi be emu adavana oi hebogahisi henia, a? Eiava, karaharaga oi hahedinaraia emu adavana ena lalohadai be anina lasi, a?

INAI TOHOA: Pura vairadiai, emu adavana oi hereva henia dalana oi laloa namonamo. Bema ia herevalaia gauna oi laloa bada lasi, eiava ia oi hereva dika henia, namona be sori herevana oi gwauraia haraga.

▪ ‘Nega momo lau laloa egu adavana be sibona ena ura gaudia ia laloa bada, a?’ “Bema Iobu ese oi dekena amo gau ta ia abia lasi neganai, oi dekenai do ia gari, a? Oi be nega ibounai oi ese ia bona iena famili oi naria noho. Oi ese ia biagua gaudia ibounai danu oi naria noho.” (Iobu 1:​9, 10) Satani ena hereva amo, ia hahedinaraia reana abidadama tauna Iobu be sibona ena namo ia laloa bada dainai, Dirava ia hesiai henia.

Bema tau bona hahine be idia naria namonamo lasi, unai bamona lalohadai idia abia diba. Hegeregere, bema emu adavana be oi totona gau namona ta ia karaia, oi laloa ia ese kerere ta ia hunia dainai unai bamona ia karaia, a? Bema emu adavana be kerere ta ia karaia, oi laloa unai kara ese ia hahedinaraia ia be sibona ia laloa bada bona oi ia lalokau henia lasi, a? Karaharaga, guna ia karaia kereredia danu oi gwauraia lou, a?

INAI TOHOA: Emu adavana ese oi totona ia karaia gau namodia bona ia karaia ena badina namodia be lista ta dekenai oi torea.

Aposetolo Paulo ia gwau: “Lalokau ese edia dika ia laloatao noho lasi.” (1 Korinto 13:​4, 5) Lalokau korikorina idia hahedinaraia taudia idia diba idia ta ta be mai edia kara dika, to idia ese edia adavana edia kara dika idia laloatao noho lasi. Danu, Paulo ia gwau lalokau be “nega ibounai iena abidadama ia goada noho.” (1 Korinto 13:⁠7) Momokani, unai bamona lalokau ia hahedinaraia tauna be gau ibounai ia abia dae kava lasi, to adavana ia abidadama henia dainai ia lalokau henia. Ena adavana ena kara dekenai ia daradara lasi bona ia badu kava lasi. Baibel ese ia herevalaia lalokauna be ta ena kara dika ia gwauatao bona ia abia dae ena adavana be ia dekenai mai lalonamo ida kara ta ia karaia. (Salamo 86:5; Efeso 4:​32) Headava taudia be ta ta dekenai unai bamona lalokau idia hahedinaraia neganai, edia headava do idia moalelaia.

SIBONA OI NANADAIA . . .

▪ Inai hereva matamanai ita gwauraia tau bona hahine edia kerere be dahaka?

▪ Egu headava lalonai edena dala ai unai bamona kerere lau dadaraia diba?

▪ Inai hereva lalonai edena point lau badinaia be namo?

[Footnote]