Iesu be Dirava Ena Basileia Ia Harorolaia

“Iesu ese hanua badadia bona hanua maragidia edia lalonai ia haroro loaloa, Dirava ena Basileia ena Sivarai Namona ia harorolaia.”​​—⁠LUKA 8:⁠1.

ITA URA ita laloa bada gaudia be ma haida dekenai ita herevalaia. Unai be Iesu ena hereva hegeregerena, ia gwau, “Tau ena lalona ia honu momokani gaudia dekena amo iena uduna ia hereva.” (Mataio 12:34) Iesu ena haroro herevadia ita laloa neganai, ita gwau diba ia be Dirava ena Basileia ia laloa bada.

Dirava ena Basileia be dahaka? Basileia be gavamani ta, bona king ta ese ia lohiaia gauna. Unai dainai, Dirava ena Basileia be Dirava ese ia haginia gavamanina. Iesu be Dirava ena Basileia ia herevalaia momo, unai be iena haroro hereva badana. Evanelia Bukadia foa dekenai inai hereva ‘Basileia’ be kahirakahira nega 110 bamona ia hedinarai. Iesu be taunimanima ia hereva henidia sibona lasi, to ena kara amo taunimanima ia hadibaia Basileia be dahaka bona dahaka gaukara do ia karaia.

King be daika? Dirava ena Basileia ena King be taunimanima ese vouti amo idia abia hidi lasi. To, unai King be Dirava sibona ese ia abia hidi. Iesu be taunimanima ia hadibaia ia be Dirava ese ia abia hidi King ai do ia lao.

Iesu be Baibel ena peroveta herevadia ia diba, idia gwau gwauhamata Mesiana ese do ia noho hanaihanai Basileiana ta do ia lohiaia. (2 Samuela 7:​12-​14; Daniela 7:​13, 14; Mataio 26:​63, 64) Reana oi laloatao, Iesu ese Samaria hahinena ia hamaoroa ia be Mesia. Unai amo ia hamomokania ia be Dirava ena abia hidi King. (Ioane 4:​25, 26) Unai dainai, nega haida Iesu ia gwau, “lauegu Basileia.”​​—⁠Ioane 18:⁠36.

Danu, Iesu ese taunimanima ia hadibaia haida be ia ida Basileia lalonai do idia lohia hebou. (Luka 22:​28-​30) Unai lohia taudia ia gwauraia “orea maragi,” badina edia namba be bada lasi. Iesu ese idia ia hamaoroa: “Emui Tamana ese ia hereva vadaeni Basileia do ia henia umui dekenai.” (Luka 12:32) Baibel ena buka ginigabena ese ia hahedinaraia taunimanima 144,000 be Keriso ida lohia gaukara do idia karaia.​​—⁠Apokalupo 5:​9, 10; 14:⁠1.

Basileia be edeseniai ia lohia? Iesu be Roma ena lohia tauna Pontio Pilato dekenai ia gwau: “Lauegu Basileia be inai tanobada gauna lasi.” (Ioane 18:36) Iesu ese Dirava ena Basileia ia lohiaia, taunimanima ese do idia lohiaia lasi. Nega momo Iesu ia gwau Dirava ena Basileia be “Guba Basileia.”a (Mataio 4:​17; 5:​3, 10, 19, 20) Unai dainai, Dirava ena Basileia be guba dekenai ia lohia gavamanina ta.

Iesu ia diba ia be nega sisina tanobada ai do ia noho, unai murinai guba dekenai do ia daekau. Ia gwau, unuseniai ‘gabu ta do ia karaia hegaegae,’ unai amo ia ida do idia lohia taudia danu be ia ida do idia noho.​​—⁠Ioane 14:​2, 3.

Basileia be dahaka gaukara ia karaia? Iesu ese taunimanima ia hadibaia Dirava dekenai inai bamona do idia guriguri: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:​9, 10) Dirava ena ura gauna be guba ai idia karaia vadaeni. Unai Basileia ese Dirava ena ura gauna be tanobada ai do ia karaia. Unai bamona ia karaia totona, Basileia ese tanobada ai gau momo do ia haidaua.

Basileia be tanobada dekenai dahaka do ia karaia? Iesu ia gwau Dirava ena Basileia ese tanobada ai kara dika do ia kokia vaitani. Unai ena anina be kara dika idia karaia noho taudia do ia hadikaia ore. (Mataio 25:​31-​34, 46) Unai ia vara neganai, kara gageva bona kara dikadia ibounai do idia ore. Iesu ia gwau, tanobada ai do idia noho taudia be, “dagedage lasi taudia,” kara maoromaoro taudia, hebogahisi taudia, “lalona goevagoeva taudia,” bona maino taudia.​​—⁠Mataio 5:​5-9.

Oi laloa unai bamona taunimanima namodia be tanobada mirona ai do idia noho, a? Lasi! Iesu ia gwauhamata, Dirava ena Basileia ena lohia henunai tanobada dekenai gau namodia momo do idia vara. Iesu ena badinai idia hasatauroa tauna ta ese Iesu ia hamaoroa: “Iesu e, emu basileia lalonai oi vareai neganai lau oi laloa.” Iesu ia haere, ia gwau: “Hari dina oi lau hamaoroa momokani, oi be lau ida Paradaiso ai do ita noho.” (Luka 23:​42, 43, NW ) Momokani, Dirava ena Basileia ese inai tanobada ibounai be paradaiso ai do ia halaoa​​—⁠idaunegai Eden umana ia paradaiso bamona.

Basileia be taunimanima totona dahaka gau ma haida do ia karaia? Iesu be Basileia ese taunimanima totona do ia karaia gaudia ia gwauhamatalaia sibona lasi. To, Basileia ese do ia karaia gaudia ia hahedinaraia danu. Iesu be hoa dalanai gorere momo ia hanamoa, ia hedinarai vaira negana ai Basileia ia lohiaia neganai, ia be hoa kara badadia momo do ia karaia. Evanelia bukana ena hereva ta ese Iesu be inai bamona ia herevalaia: “Iesu be Galilea kahana ibounai dekenai ia loaloa, edia dubu lalonai ia hadibaia, bona Basileia ena Sivarai Namona ia harorolaia. Bona taunimanima edia gorere bona edia hisihisi idauidau dekena amo ia hamauridia.”​​—⁠Mataio 4:​23.

Iesu be gorere idauidau ia hanamoa. Hegeregere, “mai matakepulu danu ia vara tauna ta ena matana ia kehoa.” (Ioane 9:​1-7, 32, 33) Tau ta be lepera gorere dikana ia abia, to Iesu be mai hebogahisi ida imana ia atoa unai lepera tauna dekenai bona ia hanamoa. (Mareko 1:​40-​42) Haida ese “taia kudima bona hereva diba lasi tauna” idia hakaua lao neganai, Iesu ia hahedinaraia ia be mai ena siahu “taia kudima tauna ena taiana ia kehoa, hereva diba lasi tauna ena malana ia hanamoa” totona.​​—⁠Mareko 7:​31-​37.

Unai King be Dirava ese ia abia hidi tauna dainai, ia be mai ena siahu mase taudia ia hamauria lou totona. Baibel ese ia sivarailaia negadia toi lalonai, Iesu ese idia mase taudia ia hatorea isi lou. Ia ese vabu ta ena natuna, ena mauri lagani be 12 kekenina, bona ena turana namona Lasaro ia hatorea isi lou.​​—⁠Luka 7:​11-​15; 8:​41-​55; Ioane 11:​38-​44.

Iesu ese ia hahedinaraia vaira negana ai Dirava ena Basileia ena lohia henunai idia noho taudia be mauri namona do idia moalelaia, bona Iesu be aposetolo Ioane amo inai peroveta herevana ia gwauraia: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 1:1; 21:​3, 4) Mani oi laloa: Tanobada matamata lalonai taitai be lasi, hisihisi be lasi, bona mase be lasi! Unai negai Lohiabada ena Guriguri do ia guguru, anina be Dirava ena ura gauna tanobada dekenai do ia vara, guba dekenai ia vara bamona.

Dirava ena Basileia be edena negai do ia mai? Iesu ia gwau King gaukara ia karaia matamaia negana be ena “giroa mai” negana danu idia hegeregere. Iesu ena peroveta hereva ese ia hahedinaraia, edena negai ia be King gaukara do ia karaia matamaia. Iena giroa mai negana lalonai, tanobada dekenai, metau dikadia do idia vara, hegeregere tuari, hitolo, tano mareremarere, gorere, bona taravatu utua karadia do idia bada idia lao. (Mataio 24:​3, 7-​12; Luka 21:​10, 11) Unai bona Iesu ese ia perovetalaia gaudia ma haida be lagani 1914 amo idia vara matamaia​—⁠unai lagani lalonai Tanobada Tuarina Ginigunana ia matamaia. Unai nega amo, Iesu be King gaukarana ia karaia matamaia. Kahirakahira, Basileia do ia mai bona Dirava ena ura gauna tanobada ai do ia vara.b

Oi dekenai Basileia do ia mai ena anina be dahaka? Haere be oi sibona ese do oi henia bona Iesu ena hereva oi abia dae o lasi karana ese unai do ia hahedinaraia.

[Footnotes]