Iesu Keriso​—Eda Henanadai Edia Haere

“Taunimanima idia gwau lau be daika?”​—⁠Luka 9:18.

IESU be ena hahediba taudia dekenai unai henanadai ia henia, badina ia diba taunimanima edia lalohadai ia dekenai be idauidau. To unai lalohadai edia badina maorona ta be lasi. Iesu be taunimanima amo ia hunia lasi o hunia dalanai ena gaukara ia karaia lasi. To, ia be hanua bona taoni ai taunimanima ia hereva henidia. Ia ura taunimanima ese ena sivarai momokanina idia dibaia, unai dainai idia ia haroro henia bona hadibaia.​—⁠Luka 8:1.

Iesu ena sivarai momokanina be ena hereva bona kara amo ita dibaia, unai sivarai be Baibel ena Evanelia bukadia foa​—⁠Mataio, Mareko, Luka bona Ioane​—⁠lalonai idia noho. Unai Evanelia bukadia ese Iesu dibaia totona ita henia henanadaidia ia haerelaia.a​—⁠Ioane 17:17.

HENANADAI: Momokani Iesu be guna ia noho, a?

HAERE: Oibe. Aposetolo taudia edia negai idia noho histori torea taudia Josephus bona Tacitus idia gwau, Iesu be momokani guna ia noho. Gau badana be, Evanelia bukadia ese idia hahedinaraia Iesu be tau korikorina, ia be gori ai idia sivarailaia tauna ta lasi. Evanelia bukadia ese Iesu ia karaia gaudia edia nega bona gabu idia hahedinaraia. Hegeregere, Evanelia bukana ia torea tauna Luka ese Iesu ena negai idia lohia taudia seven ia herevalaia​—⁠edia ladana be histori torea taudia ese idia gwauraia danu​—⁠unai amo Iesu ena haroro ia hamatamaia laganina ia hahedinaraia.​—⁠Luka 3:1, 2, 23.

Gau momo ese idia hamomokania Iesu be guna ia noho. Buka ta (Evidence for the Historical Jesus) ia gwau: “Diba bada taudia momo idia gwau Nasareta tauna Iesu be aposetolo edia negai ia noho.”

HENANADAI: Iesu be Dirava, a?

HAERE: Lasi. Iesu ia gwau lasi ia be Dirava hegeregerena. To ia gwau ia be Iehovab ena siahu henunai ia noho. Hegeregere, Iesu ese Iehova ia gwauraia “egu Dirava” bona “Dirava momokani tamona.” (Mataio 27:46; Ioane 17:3) Ta ena siahu henunai ia noho tauna ese unai hereva ia gwauraia diba. Gaukara tauna ta ese ena biaguna ia gwauraia “egu bosi” o “gaukara naria tauna,” unai ese ia hahedinaraia unai gaukara tauna be biaguna ena siahu henunai ia noho.

Danu, Iesu ese ia hahedinaraia ia be Dirava amo ia idau. Nega ta Iesu be ena inai taudia ia hamaoroa: “Umui sibona emui Taravatu ia gwau, ‘Taunimanima rua edia hereva be momokani.’ Lau be sibona lau gwauraia hedinarai, bona Tamana, lau ia siaia tauna, ese lau ia gwauraia hedinarai.” (Ioane 8:17, 18) Iesu be Iehova amo ia idau. Idia be hereva hamomokania taudia rua, ani?c

HENANADAI: Iesu be tau namona ta sibona, a?

HAERE: Lasi. Ia be tau namona ta sibona lasi. Iesu ia laloparara Dirava ena ura hagugurua karana dekenai ia be gaukara badadia ia karaia. Idia haida be inai:

● “Dirava ena Natuna korikorina.” (Ioane 3:18) Iesu ia diba ia be edeseni amo ia mai. Tanobada ai ia do vara lasi neganai, ia be guna ia noho. Ia gwau: “Guba amo lau diho mai.” (Ioane 6:38) Iesu be Dirava ese ia havaraia tauna ginigunana bona Dirava ia durua gau ibounai idia karaia totona. Iesu be Dirava sibona ese ia havaraia dainai, idia gwauraia diba, “Dirava ena Natuna korikorina.”​—⁠Ioane 1:3, 14; Kolose 1:15, 16.

● “Taunimanima ena Natuna.” (Mataio 8:20) Iesu be nega momo sibona ia gwauraia “taunimanima ena Natuna,” unai hereva be nega 80 bamona Evanelia bukadia ai ia hedinarai. Unai hereva ese ia hahedinaraia Iesu be taunimanima korikorina, to ia be Dirava lasi. Edena dala ai Dirava ena Natuna korikorina be taunimanima ta bamona ia vara? Iehova ese ena lauma helaga amo, Iesu ena mauri be guba amo ia abia bona rami-hebou Iuda kekenina Maria, ena bogana lalonai ia atoa. Unai dainai, Iesu ia vara neganai, ia be goevadae tauna.​—⁠Mataio 1:18; Luka 1:35; Ioane 8:46.

● “Hadibaia Tauna.” (Ioane 13:13) Iesu ese ia hahedinaraia Dirava ese ia henia gaukarana be taunimanima do “ia hadibaia” bona “Basileia ena sivarai namona ia harorolaia.” (Mataio 4:23; Luka 4:43) Iesu ese Basileia ena anina bona Basileia ese Iehova ena ura hagugurua totona do ia karaia gaudia be auka lasi dalanai ia herevalaia.​—⁠Mataio 6:9, 10.

● “Hereva.” (Ioane 1:1) Iesu be Dirava ena hereva gwauraia tauna. Iehova ese ia gaukaralaia taunimanima dekenai Iena hereva ia gwauraia totona.​—⁠Ioane 7:16, 17.

HENANADAI: Iesu be gwauhamata Mesiana, a?

HAERE: Oibe. Baibel ese Mesia o Keriso, anina be “Horoa Tauna,” ena mai ia perovetalaia. Iehova ena ura hagugurua karana lalonai, unai Gwauhamata Mesiana be gaukara badana do ia karaia. Nega ta, Samaria hahine ta ese Iesu ia hamaoroa: “Lau diba Mesia be do ia mai, ia idia gwauraia Keriso.” Iesu be ia dekenai ia gwau: “Tauna be lau inai, oi dekenai lau hereva noho.”​—⁠Ioane 4:25, 26.

Dahaka ese idia hamomokania Iesu be Mesia? Gau toi ese idia hamomokania Iesu sibona be Mesia. Unai gaudia be hegeregere tau tamona ena ima kwakikwaki ena maka. Iesu dekenai unai gaudia idia vara, a? Mani inai oi laloa:

● Iena bese taudia. Baibel ia peroveta Mesia be Aberahamo ena bese tauna bona Davida ena iduhu amo ia vara. (Genese 22:18; Salamo 132:11, 12) Iesu be idia ruaosi edia tubuna.​—⁠Mataio 1:1-16; Luka 3:23-38.

● Idia guguru peroveta herevadia. Heberu Toretoredia lalonai Mesia ena mauri tanobada ai, iena vara bona mase idia perovetalaia herevadia momo idia noho. Iesu ese unai peroveta herevadia ibounai ia hagugurua. Idia haida be inai: Ia be Betelehema ai ia vara (Mika 5:2; Luka 2:4-11), Aigupito amo ia boiria (Hosea 11:1; Mataio 2:15), bona ia idia hamasea to ena turia ta idia makohia lasi (Salamo 34:20; Ioane 19:33, 36). Iesu ese ena mauri ai idia vara gaudia ia biagua lasi, Mesia idia perovetalaia herevadia ibounai ia hagugurua totona.d

● Dirava ena hereva. Iesu ia vara neganai, Dirava ese aneru ia siaidia mamoe naria taudia do idia hadibaia, Mesia ia vara. (Luka 2:10-14) Iesu ena hesiai gaukara lalonai Dirava be guba amo ia hereva ia gwau, ia ese Iesu ia lalonamo henia. (Mataio 3:16, 17; 17:1-5) Iehova ese Iesu dekenai siahu ia henia hoa karadia ia karaia totona, unai ese ia hamomokania Iesu be Mesia.​—⁠Kara 10:38.

HENANADAI: Dahaka dainai Iesu ia hisihisi bona ia mase?

HAERE: Goevadae tauna Iesu ia hisihisi be maoro lasi. Danu, kara dika tauna ta bamona au dekenai idia kokoa kau bona idia rakatania ia mase be maoro lasi. To, Iesu ia diba unai gaudia do idia vara bona mai ena ura ida unai gaudia ia koua lasi.​—⁠Mataio 20:17-19; 1 Petero 2:21-23.

Mesia idia perovetalaia herevadia idia gwau, ia be hisihisi do ia abia bona do ia mase kara dika kokia totona. (Isaia 53:5; Daniela 9:24, 26) Iesu sibona ia gwau ia be “ena mauri ia henia, taunimanima momo edia mauri davana karaia totona.” (Mataio 20:28) Unai boubou gauna idia abidadama henia taudia be kara dika bona mase amo do ia ruhadia bona tanobada Paradaisona ai mauri hanaihanai do idia abia.e​—⁠Ioane 3:16; 1 Ioane 4:9, 10.

HENANADAI: Ita abia dae momokani Iesu be mase amo ia toreisi lou, a?

HAERE: Oibe. Iesu ia diba momokani ia be mase amo do ia toreisi lou. (Mataio 16:21) To gau badana be ita diba, Iesu bona Baibel torea taudia idia gwau lasi, Iesu be siahu gauna ta ese mase amo ia hatorea isi lou. Unai bamona lalohadai ita abia dae be auka. To, Baibel ia gwau: “Dirava ese ia hatorea isi lou neganai, mase ena igui amo ia ruhaia.” (Kara 2:24) Bema ita abia dae Dirava ia noho bona ia be gau ibounai Havaraia Tauna, vadaeni ita abia dae ia ese ena Natuna be mase amo ia hatorea isi lou diba.​—⁠Heberu 3:4.

Iesu ena toreisi lou be gau haida ese idia hamomokania, a? Henunai idia noho herevadia oi laloa.

● Idia itaia taudia edia hereva. Iesu ia mase bena lagani 22 murinai, aposetolo Paulo ia gwau taunimanima 500 mai kahana ese toreisi lou tauna Iesu idia itaia, bona Paulo be revareva ia torea neganai, idia momo idia do mauri noho. (1 Korinto 15:6) Taunimanima ta o rua ese idia itaia lasi, to 500 mai kahana ese idia itaia, unai dainai ta ese Iesu ia toreisi lou herevana ia hakoikoia diba lasi.

● Edia hereva ita hamomokania taudia. Iesu ena hahediba taudia ginigunadia be mai gari lasi ida Iesu ia toreisi lou herevana idia gwauraia, badina Iesu dekenai ia vara gauna idia diba momokani. (Kara 2:29-32; 3:13-15) Idia laloa Keristani abidadama dekenai Iesu ena toreisi lou be mai anina bada. (1 Korinto 15:12-19) Unai hahediba taudia idia diba do idia mase, to idia ura lasi edia abidadama Iesu dekenai idia rakatania. (Kara 7:51-60; 12:1, 2) Bema unai gaudia be momokani lasi, idia be do idia ura lasi idia mase, ani?

Taunimanima ese Iesu dibaia totona idia henia henanadai badadia siks be Baibel ese ia haerelaia. Unai haere ese idia hahedinaraia Iesu be daika. To unai haere ita diba be mai anina bada, a? Eiava, Iesu dekenai oi abia dae gaudia be mai anina bada, a?

[Footnotes]