Mai Haheauka ida Iehova Ita “Naria Noho” Dalana

 1. Dahaka dainai ita hesiku diba?

LAGANI 1914 ai, Mesia ena Basileia ia lohia neganai, Satani ena tanobada ena dina gabedia ia matamaia. Unai negai, guba ai tuari ia vara bona Iesu ese Diabolo bona demoni be tanobada dekenai ia negea diho. (Apokalupo 12:7-9 duahia.) Satani ia diba iena “nega be ia kwadogi.” (Apok. 12:12) To, unai ‘nega kwadogina’ be ia do heau noho, bona reana haida idia laloa unai nega kwadogina be lata herea. Ita be Dirava ese Satani ena tanobada do ia hadikaia ore negana ita naria noho lalonai ita hesiku danu, a?

 2. Inai stadi lalonai edena henanadai toi do ita herevalaia?

² Hesiku karana ese dika ia havaraia diba. Badina ita hesiku neganai, ita laloa namonamo lasi bena kara ta ita karaia haraga diba. Dahaka ese ita do ia durua ita haheauka noho totona? Inai stadi lalonai ita ese henanadai toi do ita herevalaia, bona idia ese ita do idia durua mai haheauka ida Dirava ena dina ita naria noho totona. (1) Peroveta tauna Mika ena haheauka karana amo dahaka ita dibaia? (2) Edena dala ai do ita diba ita naria noho negana ia ginidae vadaeni? (3) Edena dala ai ita hahedinaraia Iehova ena haheauka karana ita laloa bada?

 3. Mika ena negai, Israela taudia edia kara be edena bamona?

³ Mika 7:2-6 duahia. Iehova ena peroveta tauna Mika ia itaia Israela taudia edia abidadama Iehova dekenai be ia manoka. Bona King Ahasa ia lohia neganai, edia kara dika be ia bada herea. Mika ese unai abidadama lasi Israela taudia be “ava dikadia” bona “au ginigini” ida ia hahegeregeredia. Au mai ena ginigini ese tau ta ia haberoa hegeregerena, Mika ena negai idia noho kara dika Israela taudia edia kara amo taunimanima ma haida idia hahisia bada. Edia kara dika ia bada ia lao dainai, ruma bese momo idia parara. Mika ia laloparara ia ese Israela taudia edia kara ia haidaua diba lasi, unai dainai mai ena kudouna ibounai ida Iehova ia guriguri henia. Bena mai haheauka ida ia naria Dirava ese kara ta ia karaia totona. Mika ia abia dae momokani, Iehova be Iena nega korikori ai kara ta do ia karaia.

 4. Dahaka hekwakwanai idauidau ita davaria diba?

⁴ Mika bamona, ita danu be sibona edia namo idia laloa bada taudia huanai ita noho. Momo be ‘tanikiu karana idia hahedinaraia lasi, ma haida idia badinaia lasi bona ruma bese lalonai lalokau be lasi.’ (2 Tim. 3:2, 3) Ita lalohisihisi badina ita itaia eda gaukara turadia, sikuli turadia bona neiba taudia be sibona edia namo idia laloa bada. To, Dirava ena hesiai taudia haida be hahetoho badadia idia davaria. Iesu ia gwau iena murinai idia raka taudia be edia ruma bese ese do idia dagedage henia. Iena hereva be Mika 7:6 bamona, Iesu ia gwau: “Heiriheiri havaraia totona lau mai. Mero ese tamana do ia badu henia, kekeni ese sinana do ia badu henia, bona headava matamata hahinena ese ena ravana hahinena do ia badu henia. Momokani, tau ta ena inai taudia be ena ruma bese taudia.” (Mat. 10:35, 36) Iseda Witnes lasi varavara ese ita idia kirikirilaia bona dagedage henia neganai, reana ita haheauka be auka. Namona be ita manoka lasi, to Iehova ita badinaia bona mai haheauka ida ia ita naria noho, iseda hekwakwanai ia hamaoromaoroa totona. Bema hanaihanai guriguri amo ena heduru ita noia, ita dekenai goada bona aonega do ia henia ita haheauka totona.

5, 6. Iehova ese edena dala ai Mika ia hanamoa? Mika be edena peroveta hereva ena guguru negana ia itaia lasi?

⁵ Mika ena haheauka karana dainai, Iehova ese ia hanamoa. Hegeregere, ia ese King Ahasa bona ena lohia dalana dikana ia ore negana ia itaia. Ahasa ena natuna, Hesekaia be King ai ia lao bona tomadiho goevana ia haginia lou negana ia itaia. Bona ia ese Samaria totona ia peroveta hegeregerena, Asuria ese Israela ena not kahana basileiana ia hadarerea negana ia itaia danu.—Mika 1:6.

⁶ To, Mika be ena peroveta herevadia haida idia guguru negadia ia itaia lasi. Hegeregere, ena peroveta herevana ta ia gwau: “Nega gabeai dinadia neganai, Dubu Helaga ia gini ena ororo, be ataiai herea do ia lao. Ororo ibounai edia lata be ia ese do ia hanaia. Bese idauidau taudia momo, be inai ororo dekenai do idia mai. Bona idia ese do idia gwau, ‘Lohiabada ena ororo dekenai do ita lao, Israela taudia edia Dirava ena Dubu Helaga be unuseni.’” (Mika 4:1, 2) Unai peroveta herevana ia do guguru lasi lalonai, Mika ia mase. Ena be ma haida be Iehova idia badinaia lasi, to Mika be ena lalona ia hadaia Iehova do ia badinaia ela bona ia mase. Mika ia gwau: “Bese ta ta ibounai ese sibodia edia dirava, edia dirava idia tomadiho henia bona kamonai henia. To ita ese Lohiabada, iseda Dirava do ita tomadiho henia, bona kamonai henia, ela bona hanaihanai.” (Mika 4:5) Nega aukadia ai Mika be ia haheauka, badina ia abia dae momokani Iehova ese Iena gwauhamata ibounai do ia hagugurua. Oibe, ia ese Iehova ia abidadama henia.

7, 8. (a) Dahaka dainai Iehova ita abidadama henia? (b) Dahaka ita karaia noho lalonai, Iehova ena hahemaoro dinana be do ia mai haraga?

⁷ Ita danu be Iehova ita abidadama henia, a? Momokani, badina namona dainai Iehova ita abidadama henia diba. Ita be Mika ena peroveta herevana ena guguru dalana ita itaia. “Nega gabeai dinadia” ai, tano, bese bona gado idauidau taudia milioni momo be “Lohiabada ena ororo” dekenai do idia daekau. Ena be edia bese be ta ta idia tuari henia, to Iehova idia tomadiho henia taudia ese ‘edia tuari kaia, be hama dekenai idia botaia, bona tano geia auridia ai idia halaoa,’ bona ‘tuari ena dala idia tahua lou lasi.’ (Mika 4:3) Oibe, Iehova ena maino oreana lalonai ita noho be hahenamo badana!

⁸ Momokani, ita ibounai ita ura Iehova ese inai tanobada dikana do ia haorea haraga. To, mai haheauka ida ita naria noho totona, Iehova ena lalohadai ita abia be namo. Ia ese dina ta ia makaia vadaeni, “ia abia hidi tauna” Iesu Keriso ese mai maoromaoro ida taunimanima ibounai do ia hahemaoro henia totona. (Kara 17:31) To, unai dina ia do mai lasi lalonai, Dirava ese dala ia kehoa taunimanima be “hereva momokani ena diba maoromaoro do idia abia,” do idia badinaia, bena do idia roho mauri. (1 Timoteo 2:3, 4 duahia.) Bema ma haida dekenai Dirava ena hereva momokani hadibaia gaukarana lalonai ita bisi, Iehova ena hahemaoro dinana be do ia mai haraga. Kahirakahira momokani, dokona do ia ginidae. Unai ia vara neganai, do ita moale badina ita be Basileia harorolaia gaukarana dekenai ita bisi!

9-11. Tesalonika Ginigunana 5:3 ena peroveta herevana be ia guguru vadaeni, a? Herevalaia.

⁹ Tesalonika Ginigunana 5:1-3 duahia. Kahirakahira inai tanobada taudia be do idia boiboi, “Maino bona noho namo!” Unai boiboi karana ese ita ia koia lasi totona, namona be ita “noga noho bona iseda laloa maoromaoro karana ita dogoatao noho.” (1 Tes. 5:6) Hari, ita be unai boiboi herevana idia gwauraia totona idia vara gaudia haida do ita herevalaia.

¹⁰ Tanobada ibounai tuaridia rua murinai, tanobada taudia be idia hekwarahi maino idia havaraia totona. Hegeregere, tanobada ibounai tuari ginigunana murinai, League of Nations idia haginia maino ia havaraia totona. Gabeai, Tanobada tuarina iharuana murinai, United Nations idia haginia badina idia laloa ia ese maino do ia havaraia. Gavamani bona tomadiho gunalaia taudia be unai orea idia abidadama henia, maino idia havaraia totona. Hegeregere, United Nations be lagani 1986 ia gwauraia, Tanobada Ibounai Maino Laganina. Unai lagani ai, gavamani bona tomadiho gunalaia taudia momo be Assisi, Italy ai, Katolik dubu ena gunalaia tauna ida idia hebou bona maino totona idia guriguri.

¹¹ To, unai boiboi herevana bona maino herevadia ma haida be 1 Tesalonika 5:3 ena peroveta herevana idia hagugurua lasi. Dahaka dainai? Badina “karaharaga dika bada herea” be ia do vara lasi.

12. “Maino bona noho namo” boiboi herevana dekenai dahaka ita diba?

¹² Daika ese vaira negana ai inai boiboi herevana, “Maino bona noho namo” do ia gwauraia? Edena dala ai Kerisendom oreadia bona tomadiho ma haida edia gunalaia taudia ese unai boiboi herevana do idia durua? Edena dala ai gavamani oreadia ese unai boiboi herevana do idia durua? Baibel ese unai ia herevalaia lasi. Ena be ita diba lasi edena bamona unai boiboi herevana do idia halasia, bona reana taunimanima ese do idia abia dae, to ita diba momokani maino bona noho namo korikorina do ia vara lasi. Satani be inai tanobada dikana ia do gunalaia noho. Inai tanobada be ia dika momokani bona do ia namo diba lasi. Unai dainai, namo lasi Satani ena koikoi herevadia ita abia dae, bona eda Keristani gini siri karana ita hadikaia!

13. Dahaka dainai aneru goadadia be hisihisi badana ena lai 4 idia do dogoatao auka noho?

¹³ Apokalupo 7:1-4 duahia. Tesalonika Ginigunana 5:3 ena guguru negana ita naria noho lalonai, aneru goadadia be hisihisi badana ena lai 4 idia do dogoatao auka noho. Dahaka idia naria noho? Aposetolo Ioane ia gwau, “Dirava ena hesiai taudia” ibounai ese edia maka do idia abia karana idia naria noho.a Unai ia vara murinai, aneru ese idia dogoatao noho hisihisi badana ena lai do idia rakatania. Bena dahaka do ia vara?

14. Dahaka ese idia hamomokania Babulonia Badana be kahirakahira do ia moru?

¹⁴ Babulonia Badana—tanobada ena tomadiho koikoi oreadia ibounai—be kahirakahira do ia ore. Unai ia vara neganai, “kopina idauidau taudia, hutuma, bese bona gado idauidau taudia” ese do idia durua lasi. Idia vara gaudia momo ese idia hamomokania ia be kahirakahira do ia moru. (Apok. 16:12; 17:15-18; 18:7, 8, 21) Hari inai negai, niusi dekenai ita itaia taunimanima ese tomadiho oreadia bona edia gunalaia taudia idia gwauraia dika. To, tomadiho gunalaia taudia idia laloa dika ta do idia davaria lasi. Idia be sibona idia koia noho! “Maino bona noho namo!” boiboi herevana idia halasia murinai, tanobada gavamanidia ese tomadiho koikoi oreadia ibounai do idia tuari henidia bona haorea vaitani. Babulonia Badana be do ita itaia lou lasi! Unai dainai mai haheauka ida unai nega ita naria noho be gau badana.—Apok. 18:8, 10.

15. Dahaka dainai Iehova ia haheauka noho?

¹⁵ Ena be taunimanima ese Iehova ena ladana idia hadikaia, to ia haheauka noho bona nega maorona ai kara ta do ia karaia. Iehova ia ura lasi kudou maoro tauna ta do ia mase. (2 Pet. 3:9, 10) Oi danu be unai bamona oi laloa, a? Iehova ena dina ia do ginidae lasi lalonai, dala idauidau ai ita hahedinaraia diba iena haheauka karana ita laloa bada.

16, 17. (a) Dahaka dainai idia manoka tadikaka taihu ita durua be namo? (b) Dahaka dainai idia manoka tadikaka taihu be Iehova dekenai idia giroa haraga be gau badana?

¹⁶ Idia manoka tadikaka taihu durua. Iesu ia gwau, guba taudia idia moale bada bema ia boio mamoena ta be ia giroa lou. (Mat. 18:14; Luka 15:3-7) Ena be hari idia manoka, to Iehova be guna ia idia lalokau henia taudia ia laloa bada. Unai bamona taudia ita durua bona kongrigeisen ai idia giroa lou neganai, Iehova bona aneru idia moale bada.

¹⁷ Oi be oi manoka bona Dirava oi hesiai henia lasi, a? Reana kongrigeisen ai ta ena kara ese emu lalona ia hahisia dainai, hebou oi lao lasi. To, reana unai be idaunegai ia vara gauna. Unai dainai namona be sibona oi nanadaia: ‘Hari, Dirava lau hesiai henia lasi dainai, egu mauri ia namo bona lau moale, a? Iehova ese egu lalona ia hahisia, eiava ia goevadae lasi tauna ta? Iehova Dirava be nega ta lau ia hahisia, a?’ Iehova be hanaihanai ita dekenai kara namodia ia karaia. Ena be nega momo eda gwauhamata ia dekenai ita badinaia lasi, to ita dekenai gau namodia momo ia henia ita moale totona. (Iam. 1:16, 17) Iehova ena dina be kahirakahira do ia ginidae. Unai dainai, hari be nega namona eda lalokau Tamana Iehova bona ena kongrigeisen dekenai do ita giroa lou. Inai nega dokona ai kongrigeisen sibona be iseda heau mauri gabuna.—Deu. 33:27; Heb. 10:24, 25.

18. Dahaka dainai elda taudia ida ita gaukara hebou be namo?

¹⁸ Elda taudia ida ita gaukara hebou. Mamoe naria tauna bamona, Iehova be mai lalokau ida ita ia hakaua bona gimaia. Ia ese ena Natuna be “Mamoe Naria Tauna Badana” ai ia halaoa. (1 Pet. 5:4) Kongrigeisen 100,000 mai kahana lalonai elda taudia be Dirava ena mamoe ta ta idia durua. (Kara 20:28) Elda taudia ida ita gaukara hebou amo, ita hahedinaraia Iehova bona Iesu ese ita totona idia karaia gaudia ibounai ita laloa bada.

19. Tadikaka taihu ida ita gini hebou ena anina be dahaka?

¹⁹ Tadikaka taihu ida gini hebou. Unai ena anina be dahaka? Tuari taudia be edia inai taudia ese idia tuari henidia neganai, idia be ta ta ida idia gini hebou, unai amo edia inai taudia be hegeregere lasi idia hadarerea totona. Satani be Dirava ena taunimanima tohoa karana ia habadaia noho. Unai dainai, namo lasi eda tadikaka taihu huanai heiriheiri ia vara. To namona be ita gini hebou, ma haida edia kerere ita laloaboio, bona Iehova ita abidadama henia.

20. Hari, dahaka ita karaia be namo?

²⁰ Namona be iseda hetura karana Iehova ida ita hagoadaia bona mai haheauka ida ita naria noho. Namona be mai haheauka ida “Maino bona noho namo!” boiboi herevana, bona horoa taudia edia maka ginigabena do idia abia negana ita naria noho. Unai murinai, aneru 4 ese hisihisi badana ena lai do idia rakatania bona Babulonia Badana do ia haorea. Unai gaudia ita naria noho lalonai, namona be Iehova ena orea idia gunalaia taudia edia hakaua herevadia ita badinaia. Danu, Diabolo bona ena demoni ita koudia totona, namona be tadikaka taihu ida ita gini hebou! Inai be nega namona salamo torea tauna ena hereva ita badinaia totona, ia gwau: “Lohiabada ena nega namona umui naria noho taudia ibounai e, do umui goada, do umui boga auka.”—Sal. 31:24.