Mai Lalokau ida Hepapahuahu Hamaoromaoroa

1, 2. Genese bukana ai dahaka hekwakwanai ia sivarailaidia, bona dahaka dainai unai ita laloa bada?

OI BE nega ta Baibel ai idia noho hepapahuahu sivaraidia oi laloa, a? Genese bukana ena karoa ginigunadia mani oi laloa. Kaino ese Abela ia alaia mase (Gen. 4:3-8); Lameka ese ia ia haberoa tauna, ia alaia (Gen. 4:23); Aberahamo (Aberamo) bona Lota edia mamoe naria taudia idia hepapahuahu (Gen. 13:5-7); Hagara ese Sara (Sarai) ia matauraia lasi dainai, Sara be Aberahamo dekenai ia badu (Gen. 16:3-6); Isamaela ese taunimanima ibounai ia dagedage henia bona idia ibounai ese ia idia dagedage henia.​—Gen. 16:12.

² Dahaka dainai Baibel lalonai unai bamona sivarai idia noho? Ena badina ta be, unai sivarai ese goevadae lasi taudia do ia durua, maino ai idia noho be mai anina bada. Danu maino karaia dalana be ita dekenai ia hadibaia. Baibel ai hekwakwanai idia haheaukalaia taudia edia sivarai ita duahia neganai ita ia durua diba. Edia hekwarahi ena namo ita dibaia bona iseda mauri lalonai ita badinaia diba. Oibe, unai ibounai ese ita ia durua ita diba dahaka ita karaia totona.​—Roma 15:4.

 3. Inai stadi ai dahaka do ita herevalaia?

³ Inai stadi ai, Iehova ena hesiai taudia ese hepapahuahu idia hamaoromaoroa ena badina bona idia karaia dalana do ita herevalaia. Danu, edena bamona Baibel ena hakaua herevadia ese idia do ia durua, hepapahuahu idia hamaoromaoroa bona edia hetura karana be edia neiba taudia bona Iehova Dirava ida do ia namo totona.

 4. Satani be dahaka ia hepapahuahulaia, bona unai dainai dahaka ia vara?

⁴ Satani ese taunimanima huanai heai bona hepapahuahu ia havaraia. Eden umana ai, Satani ia gwau taunimanima ta ta sibodia ese namo bona dika idia abia hidi be namo. (Gen. 3:1-5) Unai dainai hari unai bamona kara ita itaia diba. Inai tanobada dikana ai taunimanima be idia hekokoroku, sibona idia laloa bada bona idia dagedage. Unai kara idia hahedinaraia taudia be Satani ena hepapahuahu karana idia abia dae, bona ma haida edia namo idia laloa lasi. Unai bamona lalohadai ese badu bona heiriheiri ia havaraia. Bona namona be ita laloatao, “badu tauna ese heai ia havaraia noho, bona badu momo tauna ese, kara dika momo ia havaraia noho.”​—Aon. 29:22.

 5. Edena dala ai Iesu ese taunimanima dekenai hepapahuahu hamaoromaora dalana ia hadibaia?

⁵ To, Iesu ese taunimanima ia hadibaia sibona edia namo idia laloa bada lasi bona maino karadia idia hahedinaraia. Ena Ororo Harorona ai, taunimanima dekenai hepapahuahu hamaoromaoroa daladia ia herevalaia. Hegeregere, ena hahediba taudia ia sisiba henia, namona be idia manau, maino karaia taudia ai idia lao, badu havaraia karadia idia dadaraia, hepapahuahu idia hamaoromaoroa haraga, bona edia inai taudia idia lalokau henia.​—Mat. 5:5, 9, 22, 25, 44.

6, 7. (a) Dahaka dainai hepapahuahu ita hamaoromaoroa haraga be gau badana? (b) Iehova ena taunimanima ese edena henanadai idia laloa be namo?

⁶ Bema haida ida maino ita karaia lasi, Dirava hesiai henia totona ita karaia gaudia hegeregere, guriguri, hebou lao henia karana, haroro gaukara, iseda tomadiho ena kahana ma haida be anina lasi. (Mar. 11:25) Dirava ita tura henia totona, namona be ma haida edia kerere o dika ita gwauatao.​—Luka 11:4; Efeso 4:32 duahia.

⁷ Keristani taudia ta ta ese mai momokani ida ma haida edia dika idia gwauatao bona mai maino ida idia noho hebou. Emu tadikaka taihu edia dika oi gwauatao danu, a? Idia ida emui hebamo karana oi moalelaia, a? Iehova ia ura ena hesiai taudia ibounai ese ta ta edia dika idia gwauatao heheni be namo. Bema emu lalomamina ese oi ia doria emu kara haida oi hanamoa totona, mai guriguri ida Iehova ena heduru oi tahua! Iseda guba Tamana ese emu guriguri do ia kamonai bona do ia haerelaia.​—1 Ioa. 5:14, 15.

8, 9. Bema haida ese eda lalona idia hahisia, dahaka do ita karaia be namo?

⁸ Taunimanima ibounai be goevadae lasi dainai, nega haida edia hereva o kara ese emu lalona ia hahisia diba. Unai be vaia do idia vara. (Had. 7:20; Mat. 18:7) Dahaka do oi karaia diba? Mani ia vara gauna ita laloa. Tadikaka taihu edia moale negana ta ai, taihu ta be tadikaka rua ia hedavari henia bona ena hereva dalana ese tadikaka ta ena hemami ia hadikaia. Unai tadikaka rua be sibodia idia helai neganai, ena hemami ia dika tadikakana ese unai taihu ia maumauraia matamaia. To tadikaka ma ta ese ia hamaoroa, unai taihu be lagani 40 lalonai Iehova ia hesiai henia, herevana nega aukadia idia vara; danu ia hamaoroa unai taihu ese ia gwauraia herevana dainai do ia lalohisihisi lasi. Tadikaka ginigunana be unai ia laloa murinai, ia gwau: “Emu hereva be maoro.” Unai dainai ena maumau karana ia hadokoa.

⁹ Unai sivarai ese dahaka ia hahedinaraia? Ita ta ta ese abia hidi ita karaia diba badu idia havaraia hekwakwanai ita hamaoromaoro totona. Lalokau tauna ese ena tadikaka edia kerere maragidia ia gwauatao. (Aonega Herevadia 10:12; 1 Petero 4:8 duahia.) Iehova matanai ta ena “kara dika, do oi laloaboio be kara namona momokani.” (Aon. 19:11; Had. 7:9) Unai dainai bema ta ese oi ia kara namo henia lasi o matauraia lasi, namona be sibona oi nanadaia guna, ‘Ena dika o kerere lau laloaboio diba, a? Unai lau herevalaia be namo, a?’

10. (a) Taihu ta ese haida edia maumau karana be edena bamona ia laloa? (b) Edena Baibel siri ese taihu ia durua maino ai do ia noho totona?

¹⁰ Nega haida ia auka ma haida edia maumau karadia ita haheaukalaidia totona. To mani painia taihu ta ladana Lucy ena haheitalai ita laloa. Haida ese ena haroro gaukara bona ena nega ia gaukaralaia karana idia maumauraia. Ena be Lucy ia lalohisihisi, to ia ese lo tadikaka edia heduru ia tahua. Ia gwau: “Baibel amo lau idia durua ma haida edia hereva do lau laloa lasi bona mai anina bada gauna, Iehova, lau laloa noho totona.” Lucy be Mataio 6:1-4 (Duahia) ia duahia dainai goada ia abia. Unai siri ese ia hagoadaia namona be Iehova hamoalea karana ai laloa bada. Lucy ia gwau: “Herevana haida ese egu hesiai gaukara idia maumauraia, to mai moale ida lau gaukara goada noho Iehova lau hamoalea totona.” Ia vara gauna ia lalohadailaia murinai, ena lalona ia hadaia haida edia dika do ia laloaboio totona.

11, 12. (a) Keristani tauna ese dahaka ia karaia, bema ia laloa ena tadikaka be ‘ia dekenai ia lalohisihisi’? (b) Aberahamo ese hepapahuahu ia hamaoroamaoroa dalana amo dahaka ita dibaia? (Laulau ginigunana herevalaia.)

¹¹ “Ita ibounai be nega momo ita kerere.” (Iam. 3:2) Bema oi itaia tadikaka ta be emu kara o hereva dainai ia lalohisihisi. Dahaka do oi karaia? Iesu ia gwau: “Bema emu harihari gauna oi abia lao pata helagana dekenai bona oi laloatao emu tadikaka be oi dekenai ia lalohisihisi, namona be emu harihari gauna be pata helagana vairanai oi rakatania bona oi lao. Emu tadikaka ida maino oi karaia guna, bena oi giroa lou neganai, emu harihari gauna oi bouboulaia.” (Mat. 5:23, 24) Iesu ena sisiba hegeregerena, namona be emu tadikaka ida unai umui herevalaia. Emui tahua gauna oi laloa namonamo. Namo lasi emu tadikaka dekenai bleim oi henia, to namona be emui kerere umui gwauraia hedinarai bona maino umui karaia. Gau badana be, emu tadikaka taihu ida maino ai umui noho.

¹² Baibel ese ia hahedinaraia edena dala ai Dirava ena hesiai taudia ese hepapahuahu idia hamaoromaoroa. Hegeregere Aberahamo bona ena vavana Lota be mai edia mamoe bona boromakau momo, to edia mamoe naria taudia be tano totona idia hepapahuahu. Aberahamo ia ura maino ia karaia dainai, Lota ia hamaoroa ena tano ta do ia abia hidi guna. (Gen. 13:1, 2, 5-9) Unai be haheitalai namona, ani? Aberahamo be sibona ena ura ia laloa lasi, to maino ia karaia. Ena kara namona dainai hahenamo ta ia abia lasi, a? Lasi. Lota ida unai hekwakwanai ia hamaoromaoroa murinai, Iehova ese Aberahamo dekenai ia gwauhamata hahenamo momo do ia henia. (Gen. 13:14-17) Dirava ese ena taravutu idia badinaia bona mai lalokau ida hepapahuahu idia hamaoromaoroa taudia edia dabu gaudia do ia henia.^[1]

13. Edena dala ai dipatmen naria tadikaka ta ese hekwakwanai ta ia hamaoromaoroa, bona ena haheitalai amo dahaka ita dibaia?

¹³ Hari inai nega ai ia vara gauna ta mani ita laloa. Hebouhebou ena dipatmen ta ena naria tauna matamatana be telefon amo tadikaka ta ia rini henia ia ia durua totona, to unai tadikaka be ia hereva auka bona telefon ia koua. Ia be unai dipatmen naria tauna gunana ena kara dainai ia do lalohisihisi noho. To dipatmen naria tadikaka matamatana be ia lalohisihisi lasi, bona ia ura unai tadikaka ia durua. Hora ta murinai, ia rini henia lou bona ia hadibaia idia be nega ta idia do hedavari lasi bona ia hadibaia unai hekwakwanai idia hamaoromaoroa be namo. Wiki ta murinai, idia ruaosi be Kingdom Hall ta dekenai idia hedavari. Idia guriguri murinai, hora ta lalonai idia herevahereva bona tadikaka ese ena sivarai ibounai ia gwauraia. Unai dipatmen naria tadikaka be mai manau ida ia kamonai bona Baibel amo tadikaka ia hagoadaia, bona idia ruaosi be mai moale ida idia giroa lou. Unai murinai, unai tadikaka be hebouhebou ena dipatmen ia durua bona dipatmen naria tauna ia tanikiu henia badina mai manau ida ia kara.

14, 15. (a) Edena bamona negadiai, Mataio 18:15-17 ena sisiba ita badinaia diba? (b) Iesu ese edena dala toi ia herevalaia, bona oi badinaia totona emu tahua gauna be dahaka?

¹⁴ Tadikaka eiava taihu huanai idia vara hepapahuahu haida be idia sibona ese idia hamaoromaoroa diba. To, Iesu ia gwau hekwakwanai ma haida hamaoromaorodia totona, elda taudia ita hadibaia be namo. (Mataio 18:15-17 duahia.) Dahaka ia vara diba bema kerere tauna be ena tadikaka, witnes, bona kongrigeisen elda taudia ia kamonai henia lasi? Baibel ia gwau, “namona be oi dekenai ia be idau bese tauna bona takisi gogoa tauna bamona ai do ia lao.” Ita gwau diba hari inai negai, ia be kongrigeisen amo do idia atoa siri. Unai ese ia hahedinaraia kerere tauna ese ia karaia karana be “kerere badana.” Badina unai kerere be (1) idia rua sibona ese idia hamaoromaoroa diba, bona danu (2) unai be kerere badana dainai bema idia hamaormaoroa lasi kongrigeisen amo do idia atoa siri. Unai bamona kerere haida be hegeregere, ta ese koikoi dalanai ma ta ena moni ia abia (fraud) o ta ena ladana ia hadikaia. Unai bamona kerere idia vara neganai Iesu ese ia herevalaia dala toi ita badinaia be namo. To bema ina bamona kara dika badadia haida hegeregere, heudahanai, tatau (o hahine) idia sihari heheni karana, aposteit karadia, kaivakuku tomadiho henia karadia, o unai bamona kara dika badadia ma haida idia vara neganai, namona be Kongrigeisen elda taudia ita hadibaia haraga.

¹⁵ Iesu ese unai sisiba ia henia badina ia ura iseda tadikaka be mai lalokau ida ita durudia. (Mat. 18:12-14) Gau ginigunana be, ia vara hepapahuahu be umui huanai dekenai sibona umui hamaoromaoroa guna. Reana ia kerere tadikaka be nega ta eiava rua oi hereva henia diba. Bema ia kamonai lasi, witnes taudia rua eiava ma haida ida unai kerere tadikaka umui hereva henia. Bema edia heduru amo unai hepapahuahu umui hamaoromaoroa, emu tadikaka be “dala maorona dekenai oi hakaua lou vadaeni.” To bema kerere tauna durua totona gau ibounai oi karaia neganai ia kamonai lasi, vadaeni elda taudia oi hadibaia be namo.

16. Dahaka ese ia hahedinaraia Iesu ena sisiba ita badinaia be lalokau karana bona namo do ia havaraia?

¹⁶ Mataio 18:15-17 ai ia noho dala toi be nega haida sibona ai ita badinaia. Unai ena anina be nega momo kerere tauna be ena kerere ia hamaoromaoroa haraga bona ia helalo-kerehai momokani dainai kongrigeisen amo idia atoa siri lasi. Unai ia vara neganai kerere lasi tauna ese iena dika do ia laloa boio bona do ia gwauatao diba. Herevana dahaka ia vara to Iesu ena sisiba ese ia hahedinaraia, hekwakwanai idia vara neganai namo lasi hanaihanai elda taudia dekenai ita lao haraga. To bema Iesu ese ia gwauraia dala rua ita badinaia to kerere ita hamaoromaoroa lasi bona hamomokania gaudia ese idia hahedinaraia kerere ia vara momokani, vadaeni elda taudia ita hadibaia be namo.

17. Dahaka hahenamo do ita moalelaia bema ta ta huanai ‘maino ita tahua’?

¹⁷ Inai nega dikana lalonai, taunimanima be goevadae lasi dainai, lalona hahisia karadia do idia karaia noho. Hahediba tauna Iamesi ia gwau: “Ita ibounai be nega momo ita kerere. Bema ta be ena hereva dekenai ia kerere lasi, ia be goevadae tauna, bona ia hegeregere ena tauanina ibounai ia biagua totona.” (Iam. 3:2) Hepapahuahu ita hamaoromaoroa totona namona be ‘maino do ita tahua, bona maino kara do ita karaia noho.’ (Sal. 34:14) Ita be maino karaia taudia dainai, iseda tadikaka taihu ida eda hetura karana do ita moalelaia bona kongrigeisen lalonai lalotamona do ita havaraia noho. (Sal. 133:1-3) Oibe, iseda hetura karana “maino ia henia Diravana” Iehova ida do ia goada. (Roma 15:33) Unai bamona hahenamo be mai lalokau ida hepapahuahu idia hamaoromaoroa taudia ese do idia moalelaia bada.