Iehova ese Ena Taunimanima Ia Hakaua

1, 2. (a) Iehova ena Witnes taudia idia hakaua taudia bona tomadiho ma haida idia hakaua taudia edia idau be dahaka? (b) Inai stadi bona stadi gabena ai, dahaka do ita herevalaia?

“EMUI hakaua tauna be daika?” Nega momo taunimanima ese Iehova ena Witnes taudia dekenai unai henanadai idia henia. Dahaka dainai? Badina tomadiho momo dekenai, tau o hahine ta ese dubu taudia ia hakaua. To ita be idau, mai moale ida taunimanima ita hamaoroa iseda Hakaua Tauna be tanobada tauna ta lasi. Ita be Keriso ena hakaua dalana ita badinaia, bona ia be iena Tamana, Iehova, ena hakaua dalana ia badinaia.​—Mat. 23:10.

² Hari tatau haida ese Dirava ena taunimanima idia hakaua, “igui hesiai tauna mai ena kamonai bona mai ena kara maoromaoro” oreana unai. (Mat. 24:45) To edena bamona ita diba Iehova ese iena Natuna amo ita ia hakaua noho? Inai stadi bona stadi gabena ai, do ita itaia edena bamona lagani momo lalonai, Iehova ese tatau haida ia gaukaralaia iena taunimanima idia hakaua totona. Unai tatau idia durua gaudia toi do ita herevalaia danu, bona unai ese do ia hamomokania Iehova ese idia ia durua, bona ia be ena taunimanima edia Hakaua Tauna korikorina.​—Isa. 58:11.

 3. Dahaka ese Mose ia hasiahua dainai, Israela taudia ia hakaua diba?

³ Lauma helaga ese Dirava ena gwaukau taudia ia hasiahua. Mani Mose ita laloa, ia be Israela taudia ia hakaua tauna. Dahaka ese Mose ia durua unai maduna badana ia huaia totona? Iehova ese ena lauma helaga be Mose dekenai ia henia. (Isaia 63:11-14 duahia.) Oibe, Iehova ese lauma helaga amo Mose ia hasiahua neganai, ia hahedinaraia Ia ese idia ia hakaua.

 4. Israela taudia be edena bamona idia diba lauma helaga ese Mose ia durua? (Laulau ginigunana herevalaia.)

⁴ Lauma helaga be ita itaia diba lasi siahuna ta dainai, Israela taudia be edena bamona idia diba lauma helaga ese Mose ia hakaua? Lauma helaga ena heduru amo Mose ese Farao vairanai hoa karadia ia karaia bona Dirava ena ladana ia gwauraia hedinarai. (Eso. 7:1-3) Danu, lauma helaga ena heduru amo Mose be kara namodia hegeregere lalokau, manau, bona haheauka ia hahedinaraia, unai dainai ia ese Israela taudia ia hakaua diba. To idau bese taudia edia hakaua taudia be unai bamona lasi, idia be idia kara auka bona sibona edia namo idia laloa! (Eso. 5:2, 6-9) Unai ese ia hamomokania Iehova ese Mose ia abia hidi Iena taunimanima ia hakaua totona.

 5. Iehova ese ena lauma helaga amo Israela tatau haida ia hasiahua dalana mani oi herevalaia.

⁵ Gabeai, Iehova ese tatau ma haida ia abia hidi bona ena lauma helaga amo ia hasiahudia, unai amo iena taunimanima idia hakaua diba. Hegeregere, “Iosua Nunu be aonega ena lauma ese ia hahonua.” (Deu. 34:9) Iehova “ena Lauma ese Gideona . . . ia hasiahua.” (Gun. 6:34) Bona Iehova “ena Lauma be Davida danu ia noho.” (1 Sam. 16:13) Unai tatau ibounai be Dirava ena lauma helaga dekenai idia tabekau, bona unai lauma ese idia ia hasiahua dainai, idia be sibona edia goada amo idia karaia diba lasi gaudia idia karaia. (Ios. 11:16, 17; Gun. 7:7, 22; 1 Sam. 17:37, 50) Bona idia karaia kara badadia amo Iehova idia hanamoa.

 6. Dahaka dainai Dirava ia ura ena taunimanima ese edia hakaua taudia idia matauraia?

⁶ Hamomokania gaudia ese idia hahedinaraia unai tatau be lauma helaga ese ia hasiahua, unai dainai Israela taudia be dahaka idia karaia be namo? Israela taudia be Mose ena hakaua dalana dainai idia maumau neganai, Iehova ia henanadai: “Inai taunimanima be lau dekenai do idia kamonai henia lasi ela bona edena negai?” (Num. 14:2, 11) Momokani, Iehova ese Mose, Iosua, Gideona, bona Davida ia gaukaralaia Iena taunimanima idia hakaua totona. Iena taunimanima ese unai tatau idia kamonai henia neganai, idia be edia Hakaua Tauna, Iehova, idia badinaia.

 7. Aneru ese edena dala ai Mose ia durua?

⁷ Aneru ese Dirava ena gwaukau taudia idia durua. (Heberu 1:7, 14 duahia.) Iehova ese aneru ia abidia hidi Mose idia durua bona hakaua totona. Mose be Dirava ese ia siaia “lohia bona hahemauri tauna. Au ginigini lalonai ia hedinarai aneruna ena imana amo, unai ia karaia.” (Kara 7:35) Iehova ese “aneru dekenai taravatu ia henia,” bona Mose ese unai Taravatu ia gaukaralaia Israela taudia ia hadibaia totona. (Gal. 3:19) Iehova be ia dekenai ia gwau: “Taunimanima do oi hakaua, oi dekenai lau hamaorolaia tanona dekenai do oi hakaudia vareai. Momokani lauegu aneru ese umui do ia gunalaia.” (Eso. 32:34) Baibel ia gwau lasi aneru ta be taunimanima ai ia lao bona Israela taudia ia hakaua. To, Mose ese taunimanima ia hadibaia bona hakaua dalana ese ia hamomokania, aneru ese ia durua.

 8. Aneru ese edena dala ai Iosua bona Hesekaia idia durua?

⁸ Mose ena nega murinai, “Lohiabada ena tuari oreana [ia] gunalaia” aneruna ese Iosua ia hagoadaia Dirava ena taunimanima do ia hakaua bona Kanana taudia do idia tuari henia; bona Israela taudia idia kwalimu. (Ios. 5:13-15; 6:2, 21) Gabeai, King Hesekaia ia lalohekwarahi bada, badina Asuria ena tuari taudia be Ierusalema hadikaia herevana idia siaia. To, hanuaboi tamona lalonai, “Lohiabada ena aneru be Asuria edia kamepa dekenai ia lao, tuari taudia 185,000 ia alaia mase.”​—2 Kin. 19:35.

 9. Ena be Dirava ena gwaukau taudia idia kerere, to Israela taudia be dahaka idia karaia be namo? Herevalaia.

⁹ Aneru be idia goevadae, to idia ese idia durua tatau be goevadae lasi. Nega ta Mose be Iehova ena siahu helagana ia gwauraia hedinarai lasi. (Num. 20:12) Iosua be Gibeona taudia ida gwauhamata ia karaia neganai, Dirava ena hakaua herevadia ia tahua guna lasi. (Ios. 9:14, 15) Nega sisina lalonai, Hesekaia be ia “hekokoroku.” (2 Siv. 32:25, 26) Ena be unai tatau idia kerere, to Israela taudia ese edia hakaua dalana idia badinaia be namo. Iehova be iena aneru amo unai tatau ia durua. Oibe, Iehova ese iena taunimanima ia hakaua.

10. Dirava ena Taravatu ese edena dala ai Mose ia hakaua?

¹⁰ Dirava ena Hereva ese iena gwaukau taudia ia hakaua. Israela taudia ese idia abia Taravatuna be Baibel ese ia gwauraia “Mose ena taravatu.” (1 Kin. 2:3) To, Toretore Helagadia ese idia hahedinaraia unai Taravatu Henia Tauna korikorina be Iehova, bona Mose be unai Taravatu ia badinaia danu. (2 Siv. 34:14) Iehova ese dubu helaga haginia dalana ia gwauraia murinai, “Mose ese gau ibounai ia karaia namonamo, Lohiabada ese ia oda henia hegeregerena.”​—Eso. 40:1-16.

11, 12. (a) Iosua bona Dirava ena taunimanima idia lohiaia king taudia be dahaka idia karaia be namo? (b) Dirava ena Hereva ese edena dala ai Dirava ena taunimanima idia hakaua taudia ia durua?

¹¹ Iosua ese Israela taudia ia hakaua matamaia negana amo, ia dekenai Dirava ena Hereva ena kopi ta ia noho. Ia idia hamaoroa: “Dina bona hanuaboi do oi tahua [o, “duahia,” NWT], bona iena torea herevadia ibounai do oi kamonai henia.” (Ios. 1:8) Gabeai, Dirava ena taunimanima idia lohiaia king taudia be unai dala tamona idia badinaia. Idia ese dina ta ta Taravatu do idia duahia, unai taravatu ena kopi ta do idia torea, bona “buka ena taravatu bona oda ibounai do [idia] kamonai henia, bona karaia momokani.”​—Deuteronomi 17:18-20 duahia.

¹² King taudia ese Dirava ena Hereva idia badinaia dainai, dahaka namo idia davaria? King Iosaia mani ita laloa. Mose ena Taravatu bukana idia davaria murinai, Iosaia ena seketere ese ia dekenai ia duahia matamaia.a King be dahaka ia karaia? Baibel ia gwau: “King Iosaia ese Taravatu Buka ena hereva ia kamonai neganai, ia ese gari dainai iena dabua ia darea.” To, unai sibona ia karaia lasi. Dirava ena Hereva ese Iosaia ia hakaua dainai, ia ese kaivakuku gaudia ibounai ia hadikaia ore bona Pasova ariana ia hegaegaelaia, guna unai bamona idia karaia lasi. (2 Kin. 22:11; 23:1-23) Dirava ena Hereva ese Iosaia bona abidadama hakaua tatau ma haida ia hakaua dainai, Dirava ena taunimanima dekenai idia henia hakaua herevadia idia gwauraia hedinarai namonamo diba. Unai idia karaia dainai, Dirava ena taunimanima be iena ura hegeregerena idia kara.

13. Dirava ena taunimanima idia hakaua taudia bona idau bese idia hakaua taudia edia idau be dahaka?

¹³ Idau bese taudia edia hakaua taudia be sibona edia aonega hegeregerena idia kara, to ita herevalaia abidadama king taudia be unai bamona lasi! Kanana taudia edia lohia henunai, taunimanima be kara dika rohorohodia idia karaia, hegeregere famili huanai sihari heheni karana, tatau be tatau ida idia mahuta hebou, animal sihari henia karana, natudia idia bouboulaia, bona kaivakuku tomadiho henia kara dika rohorohodia. (Lev. 18:6, 21-25) Danu, Babulonia bona Aigupito ena hakaua taudia be goeva karadia idia badinaia lasi, Dirava ese Israela taudia dekenai ia henia taravatu hegeregerena. (Num. 19:13) To, Dirava ena taunimanima edia hakaua taudia ese tomadiho eiava tauanina dalana dekenai goeva karana ena taravatu idia badinaia goevagoeva. Unai ese ia hahedinaraia Iehova be idia ia hakaua.

14. Dahaka dainai Iehova ese ena taunimanima idia hakaua taudia haida ia matahakani henia?

¹⁴ Idaunegai, Dirava ena taunimanima idia hakaua taudia haida be Dirava ena hakaua herevadia idia badinaia lasi. Iehova idia kamonai henia lasi taudia be Dirava ena lauma helaga, ena aneru, bona ena Hereva ena hakaua dalana idia dadaraia. Nega haida Iehova ese unai hakaua taudia ia matahakani henia o ma ta ia abia hidi edia gabu ia abia totona. (1 Sam. 13:13, 14) Iena nega korikorina ai ia ese tau ta do ia abia hidi, bona unai tauna ese Iehova ia gaukaralaia tatau ibounai do ia hereaia.

15. (a) Peroveta taudia ese edena bamona idia hahedinaraia hakaua tauna hereadaena be do ia mai? (b) Idia perovetalaia hakaua tauna be daika?

¹⁵ Lagani momo gunanai, Iehova ia peroveta ia ese ena taunimanima totona hakaua tauna hereadaena do ia abia hidi. Mose ese Israela taudia ia hamaoroa: “Lohiabada, emui Dirava ese peroveta tauna, lau hegeregere, umui dekenai do ia siaia. Ia be umui emui bese tauna ta, bona umui ese do umui kamonai henia.” (Deu. 18:15) Isaia ia peroveta, unai Tauna be “gunalaia tauna, bona bese idauidau edia lohia” ai do ia lao. (Isa. 55:4) Daniela danu ese do ia mai “Mesia, Hakaua Tauna unai” ia perovetalaia. (Dan. 9:25, NWT) Ma danu, Iesu Keriso sibona ia gwau ia be Dirava ena taunimanima edia “Hakaua Tauna.” (Mataio 23:10 duahia.) Iesu ena hahediba taudia be mai ura bada ida ia idia badinaia, bona idia abia dae ia be Iehova ese ia abia hidi. (Ioa. 6:68, 69) Edena bamona idia hamomokania Iehova ese Iesu Keriso ia abia hidi Iena taunimanima ia hakaua totona?

16. Dahaka ese ia hamomokania lauma helaga ese Iesu ia hasiahua?

¹⁶ Lauma helaga ese Iesu ia hasiahua. Iesu ia bapatiso neganai, Ioane Bapatiso ia itaia “guba ia kehoa, bona lauma helaga be pune ta bamona ia latanai ia diho.” Unai murinai, “lauma helaga ese ia hasiahua dainai, tano gagaena dekenai ia lao.” (Mar. 1:10-12) Iesu be tanobada ai ia haroro neganai, lauma helaga ese ia hasiahua dainai, ia be hoa karadia momo ia karaia bona mai siahu ida ia hereva. (Kara 10:38) Ma danu, Iesu ese lauma helaga ena huahua, hegeregere lalokau, moale, bona abidadama goadana ia hahedinaraia. (Ioa. 15:9; Heb. 12:2) Hakaua taudia ma haida be unai bamona lasi. Unai ese ia hamomokania Iehova ese Iesu ia abia hidi.

17. Aneru ese edena dala ai Iesu idia durua?

¹⁷ Aneru ese Iesu idia durua. Iesu ia bapatiso bena nega sisina murinai, “aneru idia mai bona Iesu idia hesiai henia.” (Mat. 4:11) Ia do mase lasi neganai, “guba amo aneru ta be ia dekenai ia hedinarai bona ia hagoadaia.” (Luka 22:43) Iesu ia diba Iehova ese aneru do ia siaia bona idia ese ia do idia durua Dirava ena ura ia hagugurua totona.​—Mat. 26:53.

18, 19. Dirava ena Hereva ese edena dala ai Iesu ena mauri bona hahediba dalana ia hakaua?

¹⁸ Dirava ena Hereva ese Iesu ia hakaua. Iesu ese ena haroro gaukara ia matamaia negana amo, ia ese Toretore Helagadia ena hakaua dalana ia badinaia. (Mat. 4:4) Oibe, ia ese Dirava ena Hereva ia badinaia ela bona hisihisi auna dekenai ia mase. Danu, ia do mase lasi neganai, ia ese Mesia idia perovetalaia herevadia haida ia hagugurua. (Mat. 27:46; Luka 23:46) To unai nega ai, tomadiho gunalaia taudia ese Dirava ena Hereva idia dadaraia, bema ia be edia kastom hegeregerena lasi. Iesu ese Iehova ena hereva, peroveta tauna Isaia amo idia ia gwauraia: “Inai taudia be edia udu bibina amo lau idia hanamoa, to edia kudouna be lau amo ia daudau masemase. Lau idia tomadiho henia kava noho, badina edia hahediba herevadia be taunimanima edia taravatu sibona.” (Mat. 15:7-9) Oi laloa Iehova ese unai bamona taudia do ia abia hidi iena taunimanima idia hakaua totona?

¹⁹ Iesu ese ena kara bona ena hahediba dalana amo ia hahedinaraia ia be Dirava ena Hereva ia badinaia. Dubu gunalaia taudia ida ia herevahereva neganai, ia be sibona ena aonega o ia diba gaudia ia herevalaia lasi. To, nega ibounai Toretore Helagadia lalonai idia noho herevadia ia gwauraia. (Mat. 22:33-40) Bona kamonai taudia ia hereva henia neganai, ena guba maurina o iunives idia havaraia dalana ia sivarailaia lasi, to “edia lalona ia kehoa momokani, vadaeni Toretore Helagadia edia anina idia lalopararalaia.” (Luka 24:32, 45) Iesu be Dirava ena Hereva ia ura henia bada, bona ia ura ma haida ida unai ia herevalaia.

20. (a) Iesu ese edena dala ai ia hahedinaraia ia be Dirava ia badinaia? (b) Iesu bona Heroda Agripa Ginigunana edia kara amo dahaka ita dibaia?

²⁰ Ena be Iesu ena kamonai taudia be ia gwauraia “hereva namodia” dainai idia hoa, to ia ese hanamoa ibounai be iena Hadibaia Tauna, Iehova, dekenai ia henia. (Luka 4:22) Taga tauna ta be ia ura Iesu ia hanamoa dainai, ia gwau “Hadibaia Tauna Namona,” to Iesu be mai manau ida ia dekenai ia gwau: “Dahaka dainai lau oi gwauraia namo? Tau ta be ia namo lasi, to tamona sibona, Dirava unai.” (Mar. 10:17, 18) To Iesu ia mase bena lagani 8 bamona murinai Iuda ia lohiaia o hakaua tauna, Heroda Agripa Ginigunana, be unai bamona lasi! Aria ta totona, Heroda be “king ena dabua ia hahedokilaia.” Idia hebou taudia idia boiboi, idia gwau: “Inai be dirava ta ena gadona, taunimanima ta ena gadona lasi!” Heroda idia hanamoa dainai, ia moale. Gabeai dahaka ia vara? “Maoromaoro Iehova ena aneru ese ia botaia, badina Dirava ia hanamoa lasi. Vadaeni gaigaigaigai ese ena tauanina idia ania bona ia mase.” (Kara 12:21-23) Momokani, Heroda ena kara amo ia hahedinaraia ia be Iehova ese ia abia hidi lasi iena taunimanima ia hakaua totona. To Iesu be ena kara amo ia hamomokania, ia be Dirava ese ia abia hidi, bona nega ibounai Iehova dekenai hanamoa ia henia, badina ia be ena taunimanima edia Hakaua Tauna Badana.

21. Stadi gabena ai dahaka do ita herevalaia?

²¹ Iesu ese Dirava ena taunimanima be lagani haida sibona lalonai do ia hakaua lasi. Ia toreisi lou murinai, ia gwau: “Dirava ese lau dekenai siahu ia henia, gau ibounai guba ai bona tanobada ai lau naria totona. . . . Bona lau be dina iboudiai umui ida do lau noho ela bona inai nega oromana ena dokona.” (Mat. 28:18-20) To Iesu be guba ai ia noho bona ia ita itaia diba lasi dainai, edena dala ai tanobada ai Dirava ena taunimanima do ia hakaua? Iehova ese daika do ia abia hidi Keriso ena hakaua henunai do ia gaukara bona Iena taunimanima do ia hakaua? Bona Keristani taudia be edena dala ai Dirava ena gwaukau taudia do idia diba? Stadi gabena ese unai henanadai do ia haerelaidia.