Iehova ese Manau Taudia Ia Laloa Bada

 1. Iehova ese manau taudia be edena bamona ia laloa? Herevalaia.

IEHOVA ese manau taudia ia lalokau henia. Manau karana idia hahedinaraia taudia sibona be Iehova ena turana ai idia lao diba. To, ‘hekokoroku taudia be ia dekena amo idia hunia diba lasi.’ (Sal. 138:6) Ita ibounai ita ura Iehova ita hamoalea bona ia ita lalokau henia, unai dainai manau karana ita hahedinaraia be namo.

 2. Inai atikol ai dahaka do ita herevalaia?

² Inai atikol ai, ita ese henanadai toi do ita herevalaia: (1) Manau karana ena anina be dahaka? (2) Dahaka dainai unai kara ita hahedinaraia be namo? (3) Edena bamona negadia ai manau karana ita hahedinaraia be auka? Do ita itaia, manau karana ita hahedinaraia neganai, Iehova ena kudouna ita hamoalea bona namo do ita abia.​—Aon. 27:11; Isa. 48:17.

 3. Manau karana ena anina be dahaka?

³ Manau tauna be ia laloa lasi ia ese ma haida ia hereaia, bona ia hekokoroku lasi. Baibel ese ia hahedinaraia, manau tauna ese ena hetura karana Iehova Dirava ida bona ma haida ida ia laloa bada. Danu, manau tauna ia diba, dala ma haida ai, haida ese ia idia hereaia.​—Fili. 2:3, 4.

4-5. Dahaka dainai haida be manau karana idia hahedinaraia, to unai be edia kara korikorina lasi?

⁴ Taunimanima haida be manau karana idia hahedinaraia diba, to unai be edia kara korikorina lasi. Reana idia be hemarai momo taudia. Eiava idia tubu daekau ruma besena eiava edia kastom dainai hemataurai karana idia hahedinaraia. To, reana idia be hekokoroku taudia. Gabeai, edia kara korikorina do idia hahedinaraia.​—Luka 6:45.

⁵ Nega haida, ma haida be mai lalogoada ida edia lalohadai idia gwauraia, to unai ese ia hahedinaraia lasi idia be idia hekokoroku. (Ioa. 1:46, 47) To, namo lasi unai bamona taudia be edia diba dekenai idia tabekau. Herevana ita be hemarai momo taudia eiava lasi, to namona be ita gaukara goada manau karana ita hahedinaraia totona.

 6. Korinto Ginigunana 15:10 ena hereva bamona, aposetolo Paulo ena haheitalai amo dahaka ita dibaia?

⁶ Mani aposetolo Paulo ena haheitalai ita laloa. Iehova ese Paulo ia gaukaralaia siti ta ta dekenai kongrigeisen matamatadia ia hamatamaia totona. Reana ena hesiai gaukara lalonai ia karaia gaudia momo ese Iesu Keriso ena aposetolo taudia ma haida ese idia karaia gaudia ia hereaia. To, Paulo be ia laloa lasi, ia ese ena tadikaka ia hereaia. Mai manau ida ia gwau: “Aposetolo taudia ibounai huanai lau be maragi herea, bona lau be hegeregere lasi do idia gwauraia aposetolo tauna, badina lau ese Dirava ena kongrigeisen lau dagedage henia.” (1 Kor. 15:9) Gabeai, Paulo ia laloa lasi ia karaia gaukara namodia dainai Iehova ena turana ai ia lao, to Dirava ena hebogahisi karana dainai unai gaukara ia karaia. (1 Korinto 15:10 duahia.) Paulo be manau karana dekenai haheitalai namona ia hahedinaraia. Korinto Keristani taudia ia tore henidia neganai, ia hekokoroku lasi, ena be kongrigeisen dekenai haida ese ia idia maumauraia!​—2 Kor. 10:10.

 7. Edena dala ai momo ese idia dibaia tadikaka ta be manau karana ia hahedinaraia? Haheitalai gwauraia.

⁷ Guna Hakaua Oreana ena memba ta, Tadikaka Karl F. Klein, ena mauri sivarai ese Iehova ena taunimanima momo ia hagoadaia. Iena mauri sivarai lalonai, Tadikaka Klein be mai manau ida lagani momo lalonai ia davaria hekwakwanai haida ia herevalaia. Hegeregere, lagani 1920 lalonai tadikaka be ena nega ginigunana ruma-ta-ruma-ta haroro gaukara ia karaia murinai, ia mamia unai be auka bona lagani rua bamona ia karaia lasi. Gabeai, Betele dekenai ia gaukara neganai, tadikaka ta ese ia sisiba henia murinai ia lalohisihisi. Danu, ia lalometau bada dainai ia laloa namonamo lasi (nervous breakdown), to gabeai heduru ia abia. To, ia be asainmen namodia momo ia moalelaia. Mani oi laloa, ena be momo ese unai tadikaka idia dibaia, to mai manau ida ena manoka gaudia ia herevalaia. Tadikaka bona taihu momo ese Tadikaka Klein ena mauri sivarai idia laloatao.b

 8. Edena dala ai 1 Petero 5:6 ese ita ia durua, unai amo ita diba Iehova ese manau karana ia moalelaia?

⁸ Manau karana ita hahedinaraia badina unai ese Iehova ia hamoalea. Aposetolo Petero ese unai ia hahedinaraia goevagoeva. (1 Petero 5:6 duahia.) Buka ladana “Come Be My Follower” ese Petero ena hereva ia durua, ia gwau: “Hekokoroku karana be poisini bamona bona dika bada ia havaraia diba. Ena be ta be mai ena diba bona ia hekokoroku, to Dirava ena vairanai ia be anina lasi. Manau karana be idau, ena be ta ena diba be bada lasi to unai kara ia hahedinaraia neganai, Iehova ese do ia laloa bada. . . . [Ia] ese . . . emu manau karana dainai oi do ia hanamoa.”c Momokani, iseda ura badana be Iehova ena kudouna ita hamoalea.​—Aon. 23:15.

 9. Edena dala ai manau karana ese ma haida ia durua iseda turadia ai idia lao totona?

⁹ Manau karana ita hahedinaraia neganai, Iehova ita hamoalea sibona lasi to hahenamo ma haida ita abia danu. Manau karana ita hahedinaraia neganai, ma haida be iseda turadia ai idia lao diba. Unai oi lalopararalaia totona, emu turadia edia kara oi laloa. (Mat. 7:12) Nega momo ita ura lasi sibodia edia lalohadai idia gwauraia bona ma haida edia lalohadai idia abia dae lasi taudia ita bamoa. To, iseda tadikaka taihu ida ita hebamo neganai ita moale, badina idia be ma haida edia hemami idia laloa, lalokau bona hebogahisi karana idia hahedinaraia bona idia lalomanau. (1 Pet. 3:8) Bema manau karana ita hahedinaraia, do idia ura iseda turadia ai idia lao.

10. Edena dala ai manau karana ese iseda mauri ia hanamoa diba?

¹⁰ Manau karana ese iseda mauri ia hanamoa danu. Momokani, nega haida iseda mauri lalonai idia vara gaudia dainai do ita lalohisihisi. Aonega tauna King Solomona ia gwau: “Hesiai mai guia danu taudia, hosi edia latanai idia helai lau itaia, to lohia taudia be aena dekenai idia raka, hesiai mai guia danu taudia bamona.” (Had. 10:7) Nega momo diba bada taudia be hahenamo idia abia lasi. Bona diba bada lasi taudia be nega haida hahenamo momo idia abia. To Solomona ia laloparara, namona be iseda mauri ai idia vara gaudia ita abia dae, bona unai gaudia dainai ita lalohisihisi lasi. (Had. 6:9) Bema manau karana ita hahedinaraia, iseda mauri ai idia vara gaudia do ita abia dae.

11. Sisiba ita abia neganai dahaka ita karaia be namo?

¹¹ Dina ta ta ai, dala idauidau ai manau karana ita hahedinaraia diba. Mani inai haheitalai haida oi laloa. Sisiba ita abia neganai. Namona be ita laloatao, reana ita be kerere badana ta ita karaia dainai ta ese ita ia sisiba henia. Unai bamona negadiai, reana do ita ura lasi sisiba ita kamonai. Eiava, sisiba ia henia tauna o sisiba ia henia dalana dainai ia do ita maumauraia. To, bema ita manau lalohadai maorona do ita abia.

12. Aonega Herevadia 27:5, 6 ena hereva bamona, dahaka dainai sisiba ita abia neganai ita manau be namo? Haheitalai gwauraia.

¹² Manau tauna be sisiba ia abia dae. Mani inai haheitalai oi laloa: Oi be Keristani hebouna ta dekenai oi noho. Tadikaka taihu haida ida oi herevahereva murinai, idia ta be hunia dalanai oi ia hadibaia emu isena dekenai aniani ena momoru sisina ia noho. Reana unai hereva dainai do oi hemarai. To, unai tadikaka eiava taihu ese oi ia hadibaia dainai do oi moale, a? Reana do oi laloa ta ese oi ia hadibaia haraga be namo! Unai hegeregerena, tadikaka eiava taihu ta ese ita ia sisiba henia neganai, ita manau be namo. Sisiba ia henia tauna be iseda turana bamona ita laloa, to iseda inai tauna lasi.​—⁠Aonega Herevadia 27:5, 6 duahia; Gal. 4:16.

13. Edena dala ai manau karana ita hahedinaraia diba, bema haida be hahenamo idia abia?

¹³ Ma haida be hahenamo idia abia neganai. Elda ta ladana Jason, ia gwau: “Ma haida lau itaia hahenamo idia abia neganai, nega haida lau laloa, dahaka dainai lau idia abia hidi lasi.” Nega haida unai bamona oi laloa, a? Momokani, Iehova ena hesiai gaukara ai “maduna” ma haida ita ura abia be kerere lasi. (1 Tim. 3:1) To, namona be iseda laloa dalana ita gimaia. Bema ita naria namonamo lasi, iseda kudouna dekenai hekokoroku karana ia matamaia diba. Hegeregere, Keristani tauna ta be do ia laloa, ia sibona be hegeregere kongrigeisen dekenai asainmen ta ia karaia totona. Eiava, reana Keristani hahine ta do ia laloa, ‘Egu adavana ese inai gaukara do ia karaia namonamo diba, ma haida be hegeregere lasi!’ To, bema ita manau, unai bamona hekokoroku lalohadai do ita dadaraia.

14. Mose ese hahenamo idia abia taudia ia kara henidia dalana amo dahaka ita dibaia?

¹⁴ Mose ese hahenamo idia abia taudia ia kara henidia dalana amo gau ta ita dibaia. Mose ese Israela besena gunalaia gaukarana ia laloa bada. Iehova ese ma haida ia abia hidi Mose ida do idia gaukara hebou neganai, Mose ena kara be edena bamona? Ia mama lasi. (Num. 11:24-29) To, ia manau, ma haida dekenai gaukara ia henia unai amo ia idia durua taunimanima idia hahemaoro henia totona. (Eso. 18:13-24) Unai dala amo hahemaoro do idia abia Israela taudia be do idia naria daudau lasi. Unai ese ia hahedinaraia Mose be sibona ena hahenamo ia laloa lasi, to haida durua daladia ia laloa bada. Ita dekenai haheitalai namona ia hahedinaraia! Bema ita ura Iehova ese ita ia gaukaralaia ena ura ita karaia totona, vadaeni ita manau be namo. Ena be ‘[Iehova] . . . be ataiai momokani ia noho, to ia ese manau taudia ia laloa noho.’​—Sal. 138:6.

15. Dahaka badina ma haida dainai momo edia asainmen ia senisi?

¹⁵ Asainmen matamata ita abia neganai. Lagani gunadia ai, nega daudau lalonai Iehova ena hesiai gaukara idia karaia taudia edia asainmen ia senisi. Hegeregere, lagani 2014 ai distrik naria taudia bona edia adavadia idia boiria ful-taim hesiai gaukara ma ta do idia karaia totona. Unai lagani tamona ai, sekit naria taudia idia hadibaia mauri lagani 70 idia abia neganai, sekit naria gaukara do idia karaia lasi. Bona mauri lagani 80 idia abia tadikaka be kongrigeisen ai elda orea ena kodineita gaukara do idia karaia lasi. Danu, idia hanaia laganidia ai Betele famili momo edia asainmen idia haidaua bona painia gaukara idia karaia. Ma haida be edia helt, ruma bese ena maduna haida, eiava badina ma haida dainai edia ful-taim hesiai gaukara idia karaia lou lasi.

16. Edena dala ai asainmen matamata idia abia tadikaka bona taihu be manau karana idia hahedinaraia?

¹⁶ Tadikaka taihu momo dekenai ia auka unai bamona senisi idia karaia totona. Momokani, idia be edia asainmen gunana idia ura henia, reana unai be lagani momo lalonai idia karaia asainmen. Idia haida be idia “lalohisihisi” badina guna idia ura henia bada asainmen idia reaia. To, lagani haida murinai unai senisi idia abia dae. Dahaka dainai? Badina Iehova idia lalokau henia. Idia diba edia mauri be Dirava dekenai idia gwauhamatalaia, to edia gaukara, dagi, eiava asainmen dainai lasi. (Kol. 3:23) To, idia be mai manau ida dala idauidau ai Iehova idia hesiai henia noho. Edia ‘lalohekwarahi ibounai be ia dekenai idia negea,’ badina idia diba ia ese idia ia laloa bada.​—1 Pet. 5:6, 7.

17. Dahaka dainai ita moale?

¹⁷ Ita moale badina Dirava ena Hereva ese ita ia hagoadaia manau karana ita hahedinaraia totona. Bema unai kara hereadaena ita hahedinaraia, ita bona ma haida be namo do ita davaria. Danu, ita davaria hekwakwanai idauidau ita haheaukalaia diba. Mai anina bada gauna, be iseda guba Tamana kahirakahira ita lao. Ita moale badina ita diba herevana ia be ‘Ataiai, bona ia be Helaga Diravana,’ to mai manau ida ia idia hesiai henia taudia ia lalokau henia bona laloa bada!​—Isa. 57:15.