Hahetoho Negadiai Ita Moale Dalana

1-2. Mataio 5:11 dekenai Iesu be dahaka ia gwau?

IESU ia gwauhamata ia murinai idia raka taudia be do idia moale. To ia hamaorodia, hahetoho do idia davaria danu. (Mat. 10:22, 23; Luka 6:20-23) Ita moale badina ita be Keriso ena hahediba taudia. To, bema iseda famili ese ita idia inai henia, gavamani ese ita idia dagedage henia, eiava gaukara o sikuli turadia ese ita idia doria kara dika ita karaia totona, eda hemami be edena bamona? Unai ese lalohekwarahi ia havaraia diba.

² Taunimanima be dagedage idia davaria neganai, idia moale lasi. To, Baibel ia gwau do ita moale. Hegeregere, hahediba tauna Iamesi ia gwau hahetoho ita davaria neganai, ita lalohekwarahi lasi to ita moale be namo. (Iam. 1:2, 12) Bona Iesu ia gwau, dagedage ita davaria neganai namona be ita moale. (Mataio 5:11 duahia.) Ena be hahetoho ita davaria to edena dala ai ita moale noho diba? Iamesi ese Keristani taudia ginigunadia dekenai ia torea revareva amo gau haida do ita dibaia. Mani idia davaria hahetoho haida ita herevalaia.

 3. Iamesi be Iesu ena hahediba tauna ai ia lao murinai dahaka ia vara?

³ Iesu ena tadina Iamesi be hahediba tauna ai ia lao murinai, Ierusalema ai Keristani taudia be dagedage idia davaria. (Kara 1:14; 5:17, 18) Hahediba tauna Stefano idia hamasea neganai, Keristani taudia momo be Ierusalema idia rakatania bona “Samaria ena gabu ibounai dekenai idia heau lao,” bona gabu daudau hegeregere Kupro bona Antioka dekenai idia lao. (Kara 7:58–8:1; 11:19) Hahediba taudia be hekwakwanai momo idia davaria. To, idia lao gabudia dekenai sivarai namona idia harorolaia, bona Roma Basileia ena gabu momo ai kongrigeisen idia haginidia. (1 Pet. 1:1) To, gabeai Keristani taudia be hekwakwanai momo idia davaria.

 4. Keristani taudia ginigunadia be dahaka hahetoho idia haheaukalaia?

⁴ Keristani taudia ginigunadia be hahetoho momo idia davaria. Hegeregere, lagani 50 C.E. bamona ai, Roma ena Pavapava Klaudio ese Iuda taudia ibounai ia oda henia Roma siti badana do idia rakatania. Unai dainai, Keristani taudia ai idia lao Iuda taudia be edia ruma idia rakatania bona gabu idauidau dekenai idia lao. (Kara 18:1-3) Lagani 61 C.E. bamona ai, aposetolo Paulo ena revareva ai ia gwau, taunimanima vairanai ma haida ese Keristani taudia idia gwauraia dika, dibura ruma ai idia atodia bona edia kohu idia dadia. (Heb. 10:32-34) Bona Keristani taudia be idia gorere bona ogogami danu.​—Roma 15:26; Fili. 2:25-27.

 5. Edena henanadai do ita haerelaidia?

⁵ Lagani 62 C.E. ai, Iamesi be ena revareva ia torea neganai, ena tadikaka taihu edia hekwakwanai ia diba vadaeni. Iehova ena siahu amo Iamesi ese ia sisiba henidia, herevana dahaka hekwakwanai idia davaria to idia moale diba. Mani Iamesi ena revareva ita itaia bona inai henanadai do ita haerelaidia: Iamesi ese ia herevalaia moale be dahaka? Dahaka ese Keristani tauna ena moale ia hadikaia diba? Bona herevana dahaka hahetoho idia vara, edena dala ai aonega, abidadama bona gari lasi karana ese ita ia durua ita moale noho totona?

 6. Luka 6:22, 23 hegeregerena, dahaka dainai Keristani tauna ia moale diba ena be hahetoho ia davaria?

⁶ Taunimanima idia laloa bema idia gorere lasi, moni momo idia abia bona famili ida maino ai idia noho, do idia moale. To, Iamesi ese ia herevalaia moalena be Dirava ena lauma helaga ena huahua ta, bona herevana dahaka hekwakwanai idia vara to ita moale diba. (Gal. 5:22) Keristani tauna ia moale momokani diba, badina ia diba ia be Iehova ese ia lalonamo henia bona Iesu ena haheitalai ia badinaia noho. (Luka 6:22, 23 duahia; Kol. 1:10, 11) Lahi be lamepa ena galasi lalonai ia ara noho bamona, moale be Keristani tauna ena kudouna lalonai ia ara noho. Ita gorere eiava iseda moni ia ore, to unai moale be do ia bodo lasi. Bona famili eiava ma haida edia hevaseha eiava dagedage karana ese do ia habodoa lasi. To, nega ibounai taunimanima idia ura iseda moale idia hadikaia neganai, eda moale be do ia bada ia lao. Iseda abidadama dainai ita davaria hahetoho ese idia hamomokania ita be Keriso ena hahediba taudia momokanidia. (Mat. 10:22; 24:9; Ioa. 15:20) Unai dainai, Iamesi ia gwau: “Lauegu tadikaka e, hahetoho idauidau umui davaria neganai, umui moale.”​—Iam. 1:2.

7-8. Edena dala ai hahetoho ese eda abidadama ia hagoadaia?

⁷ Iamesi be Keristani taudia ese mai moale ida hahetoho badadia idia haheaukalaia ena badina ma ta ia hahedinaraia. Ia gwau: “Emui abidadama, idia tohoa vadaeni gauna ese haheauka ia havaraia.” (Iam. 1:3) Hahetoho be kaia idia gabua ena lahi bamona. Unai kaia be lahi lalonai idia gabua, bena idia hakerua neganai, unai kaia be ia goada momokani. Unai hegeregerena, hahetoho ita haheaukalaia neganai, iseda abidadama ia hagoadaia. Iamesi ia gwau: “Namona be haheauka ese ena gaukara ia hagugurua, unai amo do umui hegeregere momokani, bona gau ibounai do umui karaia namonamo.” (Iam. 1:4) Hahetoho dainai eda abidadama ia goada neganai, mai moale ida ita haheauka diba.

⁸ Iamesi ena revareva lalonai, iseda moale idia hadikaia diba gaudia haida ia herevalaia. Unai gaudia be dahaka bona edena bamona ita hanaia diba?

 9. Dahaka dainai ita aonega be namo?

⁹ Koua gauna: Oi diba lasi dahaka do oi karaia. Hekwakwanai idia vara neganai ita ura Iehova ena heduru amo, abia hidi maorodia ita karaia, iseda tadikaka taihu ita durua, bona iseda abidadama ita hagoadaia totona. (Ier. 10:23) Haida ese ita idia dagedage henia neganai dahaka do ita karaia bona dahaka do ita hereva totona, aonega be gau badana. Bema ia vara gauna dainai ita diba lasi dahaka do ita karaia, do ita lalomanoka bona iseda moale ita haboioa diba.

10. Iamesi 1:5 ena sisiba be dahaka?

¹⁰ Hanaia dalana: Aonega totona Iehova oi noia. Bema ita ura mai moale ida iseda hekwakwanai ita haheaukalaia, namona be Iehova ena aonega totona ita guriguri, unai amo abia hidi maorodia ita karaia diba. (Iamesi 1:5 duahia.) Dahaka do ita karaia bema Iehova ese iseda guriguri ia haerelaia haraga lasi? Iamesi ia gwau, namona be Dirava dekenai ita “noinoi noho.” Iehova do ia badu lasi bema hanaihanai aonega totona ita noinoi. Hekwakwanai hanaia totona iseda guba Tamana amo aonega totona ita noinoi, ‘mai hariharibada ida do ia henia.’ (Sal. 25:12, 13) Ia be iseda hekwakwanai ia itaia, ia hebogahisi bona ia ura bada ita do ia durua. Oibe, unai dainai ita moale bada! To, edena dala ai Iehova ese ita dekenai aonega ia henia?

11. Ita aonega totona, dahaka ita karaia be namo?

¹¹ Iehova be Baibel amo ita dekenai aonega ia henia. (Aon. 2:6) Unai dainai, namona be Baibel bona pablikeisen idauidau ita stadilaia. To, diba sibona ita abia be hegeregere lasi. Namona be iseda mauri lalonai Dirava ena aonega herevadia ita badinaia. Iamesi ia gwau: “Namona be hereva badinaia taudia ai umui lao, to kamonai taudia sibona lasi.” (Iam. 1:22) Bema Dirava ena sisiba ita badinaia, ita be maino, laloa maoromaoro bona hebogahisi taudia ai do ita lao. (Iam. 3:17) Unai kara ese ita do idia durua hekwakwanai ita haheaukalaia bona ita moale noho totona.

12. Dahaka dainai Baibel ita dibaia be mai ena namo?

¹² Dirava ena hereva be hevarivari bamona. Ita ia durua eda manoka gaudia ita itaia bona ita hamaoromaoroa totona. (Iam. 1:23-25) Hegeregere, Baibel ita stadilaia murinai, ita laloparara iseda badu haraga karana ita biagua be namo. Iehova ena heduru amo manau karana ita dibaia. Unai amo ma haida eiava hekwakwanai ta ese iseda lalona idia hahisia neganai, manau ita hahedinaraia diba. Ita manau dainai, hekwakwanai idia vara neganai ita haheauka diba. Ita laloa maoromaoro bona disisen maorodia ita karaia diba. (Iam. 3:13) Oibe, Baibel ita dibaia be mai ena namo!

13. Dahaka dainai abidadama hesiai taudia edia haheitalai ita stadilaia be namo?

¹³ Nega haida kara ta ita karaia murinai, ita laloparara ita karaia gauna be kerere. To unai be dala maorona lasi. Aonega ita abia diba dala namona ta be, ma haida ese idia karaia kara namodia bona kara kereredia ita stadilaia. Iamesi ese ita ia hagoadaia, abidadama hesiai taudia hegeregere, Aberahamo, Rahaba, Iobu bona Elia ita tohotoho totona. (Iam. 2:21-26; 5:10, 11, 17, 18) Unai hesiai taudia be edia moale ia hadikaia diba hekwakwanai idia davaria to idia haheauka. Edia haheauka karana ese ia hahedinaraia ita danu be Iehova ena heduru amo unai bamona ita karaia diba.

14-15. Dahaka dainai daradara gaudia ita hamaoromaoroa be namo?

¹⁴ Koua gauna: Daradara gaudia. Nega haida ita hekwarahi Baibel ena Hereva ta ita lalopararalaia totona. Eiava Iehova ese iseda guriguri be ita laloa dalana ai ia haerelaia lasi. Unai ese daradara ia havaraia diba. Bema daradara gaudia ita hamaoromaoroa lasi, iseda abidadama do idia hamanokaia bona eda hetura karana Iehova ida idia hadikaia diba. (Iam. 1:7, 8) Bona iseda helaro vaira nega totona ita haboioa diba.

¹⁵ Aposetolo Paulo ese iseda helaro vaira nega totona be dogo ta bamona ia gwauraia. (Heb. 6:19) Lai gubana lalonai dogo ese bouti ia dogoatao unai amo nadi dekenai ia bampa lasi. Dogo ese bouti ia durua diba bema bouti dekenai idia kwatua seini be ia makohia lasi. Rasta ese dogo ena seini ia hamanokaia hegeregerena, ita hamaoromaoroa lasi daradara gaudia ese iseda abidadama idia hamanokaia diba. Daradara tauna be hekwakwanai ia davaria neganai, ena abidadama Iehova ese ia gwauhamatalaia gaudia dekenai ia manoka diba. Bema iseda abidadama ia manoka, iseda helaro ita haboioa diba. Iamesi ia gwau, ia daradara tauna “be davara ena hurehure bamona, lai ese ia odaia lao odaia mai.” (Iam. 1:6) Unai bamona tauna be do ia moale diba lasi!

16. Bema ita daradara dahaka ita karaia be namo?

¹⁶ Hanaia dalana: Daradara gaudia oi hamaoromaoroa; emu abidadama oi hagoadaia. Kara ta oi karaia haraga. Elia ena dina ai, Iehova ena taunimanima be idia lalorua. Elia ese ia hamaorodia: “Laloa rua ena dala dekenai do umui noho, ela bona edena negai? Bema Lohiabada be Dirava, ia dekenai do umui tomadiho, to bema Bala be Dirava, ia dekenai do umui tomadiho.” (1 Ki. 18:21) Hari danu be unai bamona. Namona be orea ena pablikeisen idauidau dekenai tahua gaukara ita karaia, bona ita hamomokania Iehova be Dirava, Baibel be iena Hereva, bona Iehova ena Witnes taudia be iena taunimanima. (1 Tes. 5:21) Unai ita karaia neganai, iseda daradara gaudia do ita hamaoromaoroa bona iseda abidadama do ita hagoadaia. To bema heduru ita ura, elda taudia ita noia diba. Bema ita ura mai moale ida Iehova ita hesiai henia noho, kara ta ita karaia be namo.

17. Bema ita manoka dahaka do ia vara?

¹⁷ Koua gauna: Lalomanoka. Baibel ia gwau: “Bema hekwakwanai neganai oi manoka neganai, oiemu goada be maragimaragi momokani.” (Aon. 24:10) Bema oi manoka, emu moale do ia boio haraga diba.

18. Ita haheauka ena anina be dahaka?

¹⁸ Hanaia dalana: Oi haheauka totona Iehova dekenai oi tabekau. Hahetoho ita haheaukalaia totona, namona be ita lalogoada. (Iam. 5:11) Iamesi ese ia gaukaralaia herevana idia hahanaia “haheauka,” ese iena gabu ai ia gini goada tauna ia herevalaia. Reana ita ese tuari tauna do ita laloa, ena be ena inai taudia be mai dagedage ida idia tuari henia, to mai gari lasi ida iena gabu ai ia gini bona ia tuari noho.

19. Aposetolo Paulo ena haheitalai amo dahaka ita dibaia?

¹⁹ Aposetolo Paulo be gari lasi bona haheauka tauna. Nega haida ia lalomanoka. To, ia haheauka badina Iehova ena goada dekenai ia tabekau. (2 Kor. 12:8-10; Fil. 4:13) Bema ita manau bona ita laloparara Iehova ena heduru ita abia be namo, ita danu be unai bamona ita karaia.​—Iam. 4:10.

20-21. Dahaka ita abia dae diba?

²⁰ Ita diba ita davaria hahetoho be Iehova ese ia havaraia lasi. Iamesi ia gwau: “Ta ese hahetoho ia davaria neganai, namo lasi ia gwau: ‘Dirava ese lau ia tohoa.’ Badina ta ese dika gaudia amo Dirava ia tohoa diba lasi bona Dirava ese dika gaudia amo tau ta ia tohoa lasi.” (Iam. 1:13) Unai hereva momokanina ita abia dae neganai, iseda lalokau Tamana kahirakahira ita lao diba.​—Iam. 4:8.

²¹ Iehova be “ia senisi diba lasi.” (Iam. 1:17) Keristani taudia ginigunadia edia hahetoho negadiai ia durudia hegeregerena, ita ta ta do ia durua danu. Iehova oi noia oi do ia durua aonega, abidadama, bona goada oi abia totona. Ia ese emu guriguri do ia haerelaia. Bena do oi abia dae momokani oi do ia durua, unai amo ena be hahetoho idia vara to do oi moale noho!