Iehova ese Oi Ia Laloa Bada!

 1. Iehova ese ena taunimanima dekenai dahaka ia itaia?

IEHOVA DIRAVA be ena taunimanima dekenai ia moale. (Sal. 149:4) Unai be moale bada gauna! Iehova be iseda kara namodia ia itaia, ia diba vaira nega ai gaukara namodia do ita karaia bona ita ia durua ia ita tura henia totona. Bema ia ita badinaia ia be ita kahirakahira do ia noho ela bona hanaihanai!​—Ioa. 6:44.

 2. Dahaka dainai haida idia laloa Iehova be idia ia lalokau henia lasi?

² Haida idia gwau, ‘Lau diba Iehova be iena orea ia lalokau henia, to edena bamona lau diba ia be lau ia lalokau henia momokani?’ Dahaka dainai haida be unai bamona idia laloa? Oksana,b ia maragi neganai hekwakwanai momo ia davaria kekeni, ia gwau: “Lau bapatiso neganai lau moale bada bona painia gaukara lau hamatamaia. To lagani 15 murinai, lau maragi neganai idia vara gaudia lau laloa bona lau lalohisihisi. Unai dainai, lau laloa Iehova ese lau do ia lalokau henia lasi bona iena lalonamo lau haboioa.” Painia taihu ta Yua danu, be ia maragi neganai hekwakwanai ia davaria, ia gwau: “Iehova dekenai egu mauri lau gwauhamatalaia badina lau ura ia lau hamoalea. To gabeai lau laloa, lau do ia lalokau henia lasi.”

 3. Inai atikol ai dahaka do ita herevalaia?

³ Unai abidadama taihu rua bamona, oi be Iehova oi lalokau henia bada, to nega haida oi daradara bema ia be oi ia lalokau henia. Dahaka dainai oi ura diba Iehova be oi ia laloa bada? Bema oi laloa Iehova ese oi ia lalokau henia lasi, dahaka ese oi ia durua diba? Mani unai henanadai edia haere ita tahua.

 4. Dahaka dainai Iehova ena lalokau ita daradaralaia be dika?

⁴ Lalokau karana be mai ena goada. Ena be iseda mauri ia auka, to bema ita diba Iehova be ita ia lalokau henia, do ita gaukara goada ia ita hesiai henia totona. To bema Dirava ese ita ia naria karana ita daradaralaia, iseda “goada do ia ore.” (Aon. 24:10) Bema ita lalomanoka bona Dirava ena lalokau karana ita daradaralaia, Satani ese ita do ia tarapua.​—Efe. 6:16.

 5. Dirava ena lalokau idia daradaralaia tadikaka taihu haida dekenai dahaka ia vara?

⁵ Iseda tadikaka bona taihu haida idia laloa Iehova be idia ia lalokau henia lasi bona naria lasi dainai, edia abidadama ia manoka. Elda ta ladana James, ia gwau: “Ena be Betele dekenai lau gaukara bona gado ma ta ena kongrigeisen ai haroro gaukara lau moalelaia, to nega haida lau laloa Iehova be lau karaia gaukara ia abia dae o lasi. Bona lau daradara Iehova be egu guriguri ia kamonai henia eiava lasi.” Ful-taim hesiai gaukara ia karaia taihu ta ladana Eva, ia gwau: “Lau davaria Iehova ena lalokau daradaralaia karana ese iseda hesiai gaukara ia hadikaia diba. Bona Iehova hesiai henia karana amo ita abia moalena do ita haboioa.” Regula painia bona elda tadikaka ta ladana Michael, ia gwau: “Bema oi abia dae lasi Iehova be oi ia laloa bada, ia amo oi hure oho diba.”

 6. Bema ita laloa Dirava be ita ia lalokau henia lasi, dahaka ita karaia be namo?

⁶ Unai sivarai idauidau ese ia hahedinaraia bema ita laloa Iehova be ita ia lalokau henia lasi, unai ese iseda abidadama ia hadikaia diba. Bema unai bamona lalohadai ita abia, dahaka ita karaia be namo? Karaharaga unai lalohadai ita dadaraia! Iehova oi noia oi ia durua “lalohekwarahi gaudia” oi kokia, bona ‘Dirava ena maino ese emu kudouna bona lalona do ia gimaia.’ (Sal. 139:23; Fili. 4:6, 7) Bona laloatao oi sibona lasi, to tadikaka bona taihu ma haida danu be unai bamona idia mamia. Guna Iehova idia hesiai henia taudia danu be unai lalohadai kererena idia abia. Mani aposetolo Paulo ena haheitalai ita herevalaia.

 7. Paulo be dahaka hekwakwanai ia davaria?

⁷ Nega haida emu gaukara be momo bona oi hagugurua diba lasi dainai oi lalomanoka, a? Bema oibe, Paulo ena hemami oi lalopararalaia diba. Ia be “kongrigeisen iboudiai dainai ia lalohekwarahi,” to kongrigeisen tamona sibona totona lasi. (2 Kor. 11:23-28) Oi be gorere badana ta oi davaria dainai oi moale lasi, a? Paulo be hanaihanai ‘ginigini ta ese ena tauanina ia gwadaia’ bamona. Reana unai be gorere ta bona ia ura unai gorere do ia ore. (2 Kor. 12:7-10) Oi be emu kara dika haida dainai nega haida oi lalomanoka, a? Paulo be nega haida unai bamona ia mamia danu. Unai dainai sibona dekenai ia gwau, “lau madi o,” badina hanaihanai ia hekwarahi kara maoromaoro ia karaia totona.​—Roma 7:21-24.

 8. Dahaka ese Paulo ia durua ena hekwakwanai ia haheaukalaia totona?

⁸ Paulo be hekwakwanai momo ia davaria, to Iehova ia hesiai henia noho. Dahaka ese ia dekenai goada ia henia? Ena be ia karaia kara dika ia diba to mauri davana ia abidadama henia. Bona ia diba Iesu ia gwauhamata, “ia idia abidadama henia taudia ibounai be . . . mauri hanaihanai do idia abia.” (Ioa. 3:16; Roma 6:23) Oibe, Paulo be mauri davana ia abidadama henia. Ia abia dae momokani Iehova be kara dika badadia idia karaia taudia ia gwauatao, bema idia helaro-kerehai.​—Sal. 86:5.

 9. Galatia 2:20 ai Paulo ena hereva amo dahaka ita dibaia?

⁹ Paulo ia diba Dirava be ia ia lalokau henia, badina Iesu ia siaia ia totona ia mase. (Galatia 2:20 duahia.) Unai siri ena dokonai idia noho hagoadaia herevadia mani ita itaia. Paulo ia gwau: “Dirava ena natuna . . . ese lau ia lalokau henia bona lau totona sibona ia henia.” Paulo ena hereva amo ia hahedinaraia Dirava ena lalokau be hetoana lasi. To, ia gwau lasi, ‘Iehova be egu tadikaka ma haida ia lalokau henia, to lau ia lalokau henia lasi.’ Paulo ese Roma tadikaka ia hamaorodia: “Ita be do kara dika taudia neganai, Keriso be ita totona ia mase.” (Roma 5:8) Oibe, Dirava ena lalokau be hetoana lasi!

10. Roma 8:38, 39 amo dahaka ita dibaia?

¹⁰ Roma 8:38, 39 duahia. Paulo ia diba momokani Dirava ena lalokau be bada herea. Ia gwau, gau ta ese ‘Dirava ena lalokau amo ita ia hapararaia diba lasi.’ Paulo be Iehova ese mai haheauka ida Israela taudia ia kara henia dalana ia diba. Danu ia diba Iehova ese iena kara dika ia gwauatao. Anina be Paulo ia gwau, ‘Iehova ese iena Natuna ia siaia lau totona ia mase dainai, iena lalokau do lau daradaralaia lasi.’​—Roma 8:32.

11. Ena be Paulo be 1 Timoteo 1:12-15 ese ia hahedinaraia kara dikadia ia karaia, to dahaka dainai ia abia dae Dirava ese ia lalokau henia?

¹¹ Timoteo Ginigunana 1:12-15 duahia. Nega haida Paulo be reana guna ia karaia gaudia dainai ia lalohisihisi. Unai dainai ia gwau, ia be “dika momokani” tauna! Paulo be hereva momokani ia do dibaia lasi neganai, siti ta ta dekenai Keristani taudia ia dagedage henia, dibura ruma ai ia atodia bona kota dekenai idia ura hamasedia neganai, unai ia durua. (Kara 26:10, 11) Paulo be edia tama sina ia hamasea Keristani matamatadia ida ia hedavari neganai, ena hemami mani oi laloa. Paulo be ena kara dika ia lalohisihisilaia to ia diba ia haidaua diba lasi. Ia abia dae Keriso be ia totona ia mase, unai dainai ia gwau: “Dirava ena hebogahisi hereadaena dainai, inai gaukara lau abia.” (1 Kor. 15:3, 10) Paulo ena sivarai amo dahaka ita dibaia? Namona be oi abia dae Keriso be oi totona ia mase, bona dala ia kehoa Iehova oi tura henia totona. (Kara 3:19) Dirava be hari bona vaira negai do ita karaia gaudia ia laloa bada. To, guna ita be Iehova ena Witnes ta eiava lasi neganai, ita karaia kara dikadia ia laloa lasi.​—Isa. 1:18.

12. Edena dala ai 1 Ioane 3:19, 20 ese ita ia durua diba?

¹² Nega haida do oi laloa, ‘Dahaka dainai Iesu be egu kara dika gwauatao totona ia mase, lau be kara dika tauna.’ Dahaka dainai unai bamona oi laloa? Iseda goevadae lasi kudouna ese ita ia koia dainai, ita laloa ita be anina lasi eiava Dirava be ita ia lalokau henia lasi. (1 Ioane 3:19, 20 duahia.) Unai bamona negadiai, namona be ita laloatao “Dirava be iseda kudouna ia hereaia.” Ena be unai bamona lalohadai kereredia ita abia, to iseda guba Tamana be ita ia lalokau henia noho bona gwauatao noho. Namona be ita abia dae momokani Iehova be ita ia lalokau henia. Unai bamona ita karaia totona, namona be hanaihanai iena hereva ita stadilaia, ia ita guriguri henia bona ena taunimanima ita bamoa. Dahaka dainai unai gaudia ita karaia be mai anina bada?

13. Edena dala ai Baibel stadilaia karana ese ita ia durua diba? (Maua itaia danu, “Baibel ese Idia Ia Durua Dalana.”)

¹³ Dina ta ta ai Baibel oi stadilaia, bona Iehova ena kara namodia do oi itaia. Bena do oi laloparara ia be oi ia lalokau henia bada. Dina ta ta ai Baibel ena hereva laloa dobu karana ese oi do ia durua emu lalona bona kudouna ai idia noho gaudia oi hamaoromaoroa totona. (2 Tim. 3:16) Elda ta ladana Kevin, ia laloa ia be anina lasi, ia gwau: “Salamo 103 lau duahia bona laloa dobu karana ese lau ia durua, Iehova ese lau ia laloa dalana lau lalopararalaia totona.” Matamanai ita herevalaia taihu Eva, ia gwau: “Adorahi ibounai Iehova ese ia laloa bada gaudia lau laloa dobu. Unai ese lau dekenai lalomaino ia henia bona egu abidadama ia hagoadaia.”

14. Edena dala ai guriguri ese ita ia durua diba?

¹⁴ Nega ibounai oi guriguri. (1 Tes. 5:17) Oi ura ta oi tura henia neganai, hanaihanai ia ida oi herevahereva bona ia dekenai emu lalohadai oi gwauraia. Iseda hetura karana Iehova ida be unai bamona. Guriguri amo Dirava dekenai iseda hemami, lalohadai bona lalohekwarahi ia gwauraia neganai, ita hahedinaraia ia ta abidadama henia bona ita abia dae ita ia lalokau henia. (Sal. 94:17-19; 1 Ioa. 5:14, 15) Matamanai ita herevalaia taihu Yua, ia gwau: “Lau guriguri neganai, dina ai lau dekenai idia vara gaudia sibona lau herevalaia lasi. To Iehova dekenai egu lalohadai bona hemami ibounai lau gwauraia hedinarai. Metairametaira lau laloparara, Iehova be kampani ena bosi badana ta bamona lasi, to ia be Tamana ta bamona iena natudia ia lalokau henia.”​—Maua itaia: “Oi Duahia Vadaeni, A?”

15. Edena dala ai Iehova ese ita ia laloa bada?

¹⁵ Tura namodia oi bamoa, idia be harihari gaudia Iehova amo. (Iam. 1:17) Iseda guba Tamana be ita ia laloa bada dainai, ita dekenai Keristani tura namodia ia henia. Idia be ‘nega ibounai lalokau idia hahedinaraia.’ (Aon. 17:17) Paulo ese Kolose kongrigeisen dekenai revareva ia siaia neganai, ia hahedinaraia Keristani turadia haida be ia idia “durua bona hagoadaia bada.” (Kol. 4:10, 11) Iesu Keriso danu be ena turadia, aneru bona taunimanima edia heduru bona hagoadaia karana ia laloa bada.​—Luka 22:28, 43.

16. Edena dala ai tura namodia ese ita idia durua?

¹⁶ Oi be kongrigeisen turadia edia heduru oi tahua, a? Iseda lalohekwarahi be lo turadia dekenai ita herevalaia neganai, unai ese ita ia durua bona gimaia. Matamanai ita herevalaia tadikaka ladana James, ia gwau: “Lo Keristani taudia lau tura henia karana ese lau ia durua bada. Idia ese egu lalohekwarahi idia kamonai, bona idia hahedinaraia lau idia lalokau henia. Idia amo Iehova ena lalokau bona laloa bada karana lau mamia.” Momokani Keristani turadia ita bamoa karana be mai anina bada!

17-18. Daika do ita kamonai henia bona dahaka dainai?

¹⁷ Satani ia ura kara maoromaoro badinaia karana ita rakatania. Ia ura ita abia dae Iehova be ita ia lalokau henia lasi bona ita ia hamauria be anina lasi. To inai stadi amo ita itaia, unai be momokani lasi.

¹⁸ Iehova be oi ia lalokau henia. Ia ese oi ia laloa bada. Bema ia oi badinaia oi be Iesu bamona, ‘Iehova ena lalokau lalonai do oi noho’ hanaihanai. (Ioa. 15:10) Unai dainai, Satani bona emu goevadae lasi kudouna oi kamonai henia lasi. To namona be Iehova oi kamonai henia, ia be eda kara namodia ia itaia. Oi abia dae momokani Iehova be “ena taunimanima ibounai dekenai ia moale,” bona oi danu!