Samuela Ginigunana

1 Eparaima ororo gabudia+ ena gabu ta ladana Ramataimi-sopimi*+ ai, tau ta ladana Elikana+ ia noho bona ia be Eparaima tauna. Ia be Ierohama ena natuna, bona Ierohama be Elihu ena natuna, Elihu be Tohu ena natuna, Tohu be Supu ena natuna. 2 Elikana ena adavana be rua, ta ena ladana be Hana bona ma ta ena ladana be Penina. Penina be mai ena natudia, to Hana be natudia lasi. 3 Unai tauna be ena siti amo lagani ta ta Silo dekenai ia daekau lao tomadiho totona, bona tuari oreadia edia Iehova* dekenai boubou gauna ia henia totona.+ Unuseniai, Eli ena natudia rua, Hopini bona Pineha+ be Iehova ena hahelaga gaukarana idia karaia.+

4 Dina ta Elikana ese boubou gauna ia henia neganai, ena adavana Penina bona ena natudia memero bona kekeni ibounai dekenai boubou gauna ena kahana haida ia henidia,+ 5 to Hana dekenai boubou gauna ena kahana namo hereana ia henia, badina ia ese Hana ia lalokau henia bada. To Iehova ese ia dekenai natudia ia henia lasi. 6 Bona danu, Penina* ese Hana ia kirikirilaia momo, ena lalona ia hahisia totona, badina Iehova ese ia dekenai natudia ia henia lasi. 7 Lagani ta ta ai Penina be unai bamona ia karaia, idia be Iehova ena ruma dekenai idia daekau lao negadiai,+ Penina ese ia kirikirilaia bada, unai dainai Hana ia taitai bona ia aniani lasi. 8 To ena adavana Elikana be ia dekenai ia gwau: “Hana e, dahaka dainai oi taitai, bona dahaka dainai oi aniani lasi, bona dahaka dainai oi lalohisihisi bada? Oi dekenai lau be mai anina bada tauna, unai ese natudia memero 10 ia hereaia, ani?”

9 Bena Silo ai idia aniani bona inuinu ore murinai, Hana ia toreisi. Unai nega ai, hahelaga tauna, Eli, be Iehova ena dubu*+ ena raka vareai gabuna ai ia noho sea latanai ia helai. 10 Hana be ia lalohisihisi bada herea, bona Iehova dekenai ia guriguri matamaia+ bona ia taitai bada herea. 11 Bona inai gwauhamata ia karaia: “Tuari oreadia edia Iehova e, bema emu hesiai hahinena ena lalohisihisi oi itaia bona lau oi laloatao bona lau oi laloaboio lasi bona emu hesiai hahinena dekenai natuna mero ta oi henia,+ lau ese ia be oi, Iehova, dekenai do lau henia, unai amo ena mauri dinadia ibounai lalonai oi do ia hesiai henia, bona ena huina do idia utua lasi.”+

12 Ia be nega daudau Iehova vairanai ia guriguri noho lalonai, Eli ese ena uduna ia itaia noho. 13 Hana be ena lalona* ai ia hereva noho, bona ena udu bibina sibona idia marere, to ena gado regena be lasi. Unai dainai Eli ia laloa Hana ia kekero. 14 Eli be ia dekenai ia gwau: “Dahaka dainai oi kekero? Emu inuinu oi hadokoa.” 15 Unai neganai Hana ia haere: “Lasi, egu lohia! Lau be lau lalohekwarahi bada. Lau be wain eiava alkahol gauna ta lau inua lasi, to lau laloa gaudia ibounai be Iehova dekenai lau gwauraia noho.+ 16 Namo lasi oi laloa emu hesiai hahinena be anina lasi, badina ema bona hari egu lalohisihisi bona lalohekwarahi bada dainai lau hereva noho.” 17 Bena Eli ia gwau: “Mai maino ida oi lao bona namona be Israela ena Dirava ese oi noinoi gauna be oi dekenai do ia henia.”+ 18 Unai neganai Hana ia gwau: “Mani emu hesiai hahinena oi lalonamo henia noho.” Bena Hana ia lao bona ia aniani, bona lalohisihisi toana ia hahedinaraia lou lasi.

19 Bena daba momokani ai idia toreisi bona Iehova vairanai idia tui diho, unai murinai edia ruma dekenai idia giroa lou, unai be Rama ai.+ Elikana be ena adavana Hana ida ia mahuta hebou, bona Iehova ese Hana ia laloatao.+ 20 Lagani ta bamona murinai Hana ia rogorogo bona natuna mero ta ia havaraia bona ena ladana ia hatoa+ Samuela,* badina ia gwau, ‘Iehova amo ia totona lau noinoi.”

21 Gabeai Elikana be ena ruma bese ibounai ida idia daekau lao, lagani ta ta ena boubou gauna bona ena gwauhamata boubouna be Iehova dekenai ia henia totona.+ 22 To Hana be ia daekau lao lasi,+ badina ena adavana dekenai ia gwau: “Mero be rata ia rakatania neganai, lau ese ia do lau mailaia bena ia be Iehova ena vairanai do ia hedinarai, bona unai nega amo ia be unuseniai do ia noho matamaia.”+ 23 Ena adavana Elikana be ia dekenai ia gwau: “Edena dala ia namo, vadaeni unai hegeregerena oi karaia. Ruma ai oi noho ela bona mero ese rata ia rakatania. Oi gwauraia herevana be Iehova ese ia hagugurua be namo.” Unai dainai Hana be ruma dekenai ia noho bona ena natuna ia naria ela bona natuna be rata ia rakatania.

24 Vadaeni Hana ese natuna be rata amo ia kokia neganai, unai natuna be Silo dekenai ia abia lao. Bona mauri lagani toi boromakau, paraoa ifa ta,* bona wain hodu badana ta danu ia abia lao,+ bona Iehova ena ruma Silo dekenai ia ginidae,+ bona mero maragina be ia ida ia abia lao. 25 Bena idia ese boromakau idia alaia, bona mero be Eli dekenai idia mailaia. 26 Bena Hana ia gwau: “Egu lohia e, namona be oi diba, lau be guna inai gabu ai oi ida lau gini bona Iehova dekenai lau guriguri hahinena.+ 27 Lau be inai mero totona lau guriguri, bona Iehova ese egu noinoi ia haerelaia.+ 28 Vadaeni hari lau ese ia be Iehova dekenai lau henia. Iena mauri dinadia ibounai lalonai, ia be Iehova ena.”

Bona Elikana be unuseniai Iehova dekenai ia tui diho.