Samuela Ginigunana

8 Samuela ia buruka neganai, ia ese ena natudia ia abia hidi Israela taudia edia hahemaoro taudia ai idia lao totona. 2 Ena vara guna natuna mero ena ladana be Ioela, bona iharuana ena ladana be Abaisa.+ Idia be hahemaoro taudia Bere-sieba ai. 3 To iena natudia be iena dala dekenai idia raka lasi, idia ese koikoi dalanai moni idia abia,+ laloani moni* idia abia dae,+ bona hahemaoro goevana idia hagagevaia.+

4 Gabeai Israela ena tau badadia ibounai idia haboua bona Rama dekenai idia lao Samuela itaia totona. 5 Ia dekenai idia gwau: “Itaia, oi be oi buruka vadaeni, to emu natudia be emu dala dekenai idia raka lasi. Unai dainai ai totona king ta oi abia hidi ai ia lohiaia* totona, bese ibounai hegeregerena.”+ 6 To unai hereva, “Ai dekenai king ta oi henia ai ia lohiaia totona,” idia gwauraia neganai, Samuela ia moale lasi. Bena Samuela be Iehova dekenai ia guriguri, 7 bona Iehova be Samuela dekenai ia gwau: “Taunimanima ese oi dekenai idia gwauraia hereva ibounai oi kamonai henia. Idia ese oi idia dadaraia lasi, to lau, edia king, idia dadaraia.+ 8 Lau ese Aigupito amo idia lau hakaua raka-lasi negana amo, idia karaia karana be idia karaia noho ema bona hari. Idia ese lau idia rakatania+ bona dirava ma haida idia hesiai henia noho,+ bona oi dekenai unai bamona idia karaia noho. 9 Vadaeni idia oi kamonai henia. To, namona be idia dekenai inai hadibaia hereva metauna oi henia bona oi hamaorodia, idia do ia lohiaia king be mai ena maoro gau haida ia karaia totona.”

10 Vadaeni Samuela ese Iehova ena hereva ibounai be king ta totona idia noinoi taudia ibounai dekenai ia gwauraia. 11 Ia gwau: “Umui do ia lohiaia king be mai ena maoro inai gaudia ia karaia totona,+ hegeregere ia ese emui natudia memero do ia abidia+ bona iena kariota orea lalodiai do idia gaukara+ bona hosi guia taudia ai do ia halaodia,+ bona haida be iena kariota vairanai do idia heau. 12 Bona ia sibona totona tuari orea 1,000 ta ta edia gunalaia taudia+ bona tuari orea 50 ta ta edia gunalaia taudia do ia abia hidi,+ bona haida be ena tano do idia geia+ bona gogoa gaukarana do idia karaia,+ bona iena tuari kohudia bona kariota kohudia do idia karaia.+ 13 Ia ese emui natudia kekeni do ia abidia, idia ese bonana namo muramura do idia mikisia, do idia nanadu, bona paraoa do idia gabua.+ 14 Ia ese emui tano namo hereana, vain uma bona olive au namo hereadia do ia abia+ bona ena hesiai taudia dekenai do ia henidia. 15 Ia ese emui witi umadia bona vain umadia amo kahana 10 ena kahana ta do ia abia, bona ena dagi bada taudia bona ena hesiai taudia dekenai do ia henidia. 16 Bona ia ese emui hesiai tatau bona hesiai hahine, bona emui boromakau namo hereadia, bona emui doniki do ia abia, bona iena gaukara totona do ia gaukaralaidia.+ 17 Ia ese emui mamoe serina ena kahana 10 amo kahana ta do ia abia,+ bona umui be iena hesiai taudia ai do umui lao. 18 Dina ta do ia mai, bona umui be umui abia hidi king dainai do umui taitai,+ to unai dina ai Iehova ese umui do ia haere henia lasi.”

19 To, taunimanima be Samuela ese ia herevalaia gaudia idia kamonai henia lasi, bona idia gwau: “Lasi, ai ura king ta ese ai ia lohiaia. 20 Bena ai be bese ibounai hegeregerena ai do ai lao, bona emai king ese ai do ia lohiaia bona ai do ia gunalaia bona emai inai taudia ida do ia tuari.” 21 Samuela ese taunimanima edia hereva ibounai ia kamonai murinai, Iehova dekenai unai hereva ia gwauraia lou. 22 Iehova be Samuela dekenai ia gwau: “Idia oi kamonai henia, bona king ta oi abia hidi idia ia lohiaia totona.”+ Vadaeni Samuela be Israela tatau dekenai ia gwau: “Namona be umui ta ta be emu siti dekenai umui giroa lou.”