Samuela Ginigunana

13 Saulo ena mauri lagani be . . .* neganai, ia be king ai ia lao.+ Bona lagani rua lalonai Israela ia lohiaia. 2 Bena Saulo ese Israela tatau 3,000 ia abia hidi. Tatau 2,000 be ia ida Mikimasa ai idia noho, unai be Betele ena ororo gabudia ai, bona tatau 1,000 be Ionatana+ ida Gibea+ ai idia noho, unai be Beniamina tanona ai. Vadaeni Saulo ese Israela tatau oredia ia siaia lao, ta ta edia palai ruma dekenai. 3 Bena Ionatana ese Geba+ ai Filistia taudia+ edia tuari oreana ia halusia bona Filistia taudia ese unai idia kamonai. Unai dainai Saulo ese gwaukau taudia be Israela ena tano ibounai dekenai ia siaia lao bona ia hamaorodia kibi do idia hiriria+ bona do idia gwau: “Heberu taudia e, kamonai!” 4 Vadaeni Israela taudia ibounai idia kamonai Saulo ese Filistia taudia ia tuari henidia bona ia kwalimu bona Filistia taudia ese Israela taudia idia inai henia. Unai dainai taunimanima idia boiria Gilegala ai Saulo dekenai idia lao totona.+

5 Filistia taudia danu be idia haboua Israela taudia tuari henia totona, edia tuari kariota be 30,000, hosi guia taudia be 6,000 bona tuari taudia be momo herea, kone ena miri bamona.+ Idia be idia daekau bona Mikimasa dekenai idia kamepa, unai be Betavene ena ist kahana ai.+ 6 Bona Israela tatau be edia inai taudia dainai idia lalohekwarahi bada bona idia itaia dika do idia davaria, unai dainai idia be kohua, nadi matudia, nadi badadia, tano henunai idia noho gabudia bona guri lalodiai idia hunia.+ 7 Heberu taudia haida be Ioridane Sinavai idia hanaia danu, Gado bona Gileada tanodia+ dekenai idia lao totona. To Saulo be Gilegala ai ia do noho, bona ia ida idia noho taudia ibounai be gari dainai idia heudeheude. 8 Saulo be dina 7 ia naria ela bona Samuela ia abia hidi negana ia ginidae, to Samuela be Gilegala dekenai ia mai lasi, bona taunimanima be Saulo amo idia raka siri matamaia. 9 Vadaeni Saulo ia gwau: “Lau dekenai gabua boubou bona maino karaia bouboudia umui mailaia.” Bona ia ese unai gabua boubou ia henia.+

10 To ia ese gabua boubou ia henia ore murinai, Samuela ia ginidae. Vadaeni Saulo ia lao, Samuela ia hedavari henia bona hanamoa totona. 11 Bena Samuela ia gwau: “Dahaka dainai inai oi karaia?” Saulo ia haere: “Badina lau itaia taunimanima be lau idia rakatania,+ bona oi be oi abia hidi negana ai oi ginidae lasi, bona Filistia taudia be Mikimasa+ ai idia haboua noho. 12 Unai dainai lau be sibona dekenai lau gwau, ‘Filistia taudia be lau idia tuari henia totona Gilegala dekenai do idia diho mai bona lau be Iehova ena lalonamo lau abia lasi.’ Unai dainai sibona lau doria gabua boubou lau henia totona.”

13 Unai neganai Samuela be Saulo dekenai ia gwau: “Oi be kavakava karana oi karaia. Iehova ese oi dekenai ia henia oda herevadia oi badinaia lasi.+ Bema oi badinaia, Iehova ese emu basileia be Israela dekenai do ia haginia goada ela bona hanaihanai. 14 To hari emu basileia be do ia noho daudau lasi.+ Iehova ese ena kudouna ia hamoalea tauna ta do ia davaria+ bona Iehova ese ia be ena taunimanima edia gunalaia tauna ai do ia halaoa,+ badina oi be Iehova ese ia henia oda herevadia oi badinaia lasi.”+

15 Bena Samuela ia toreisi bona Gilegala amo Gibea dekenai ia daekau lao, unai be Beniamina tanona dekenai, bena Saulo ese taunimanima ia duahidia, bona ia ida idia noho tatau be 600 bamona.+ 16 Saulo, iena natuna Ionatana, bona idia ida idia do noho taudia be Geba ai idia noho,+ unai be Beniamina tanona dekenai, bona Filistia taudia be Mikimasa ai idia kamepa.+ 17 Bona Filistia taudia edia kamepa amo tuari oreadia toi idia lao. Unai orea ta be Opera ia lao henia dalana amo ia lao, unai be Sualo tanona dekenai. 18 Bona orea ma ta be Bete-horono ia lao henia dalana amo ia lao,+ bona orea ihatoina be tano hetoana ia lao henia dalana amo ia lao, unuseni amo Seboima kourana idia itaia diba, ia be taunimanima lasi gabuna dekenai.

19 Unai nega ai Israela ena tano ibounai dekenai auri karaia tauna ta ia noho lasi, badina Filistia taudia idia gwau: “Unai amo Heberu taudia ese tuari kaia eiava io do idia karaia lasi.” 20 Bona Israela taudia ibounai be Filistia tanona dekenai idia diho lao edia tano geia auridia, piki, ira bona kaia idia segea totona. 21 Idia ese tano geia auridia, piki, foka bona ira idia segea bona au mai matana hanamoa totona idia henia davana be pim* ta. 22 Bona tuari dinana ai, Saulo bona Ionatana ida idia noho taudia dekenai tuari kaia eiava io ta be lasi,+ to Saulo bona Ionatana sibona be mai edia tuari gaudia.

23 Vadaeni Filistia taudia edia tuari orea ta be Mikimasa ena koura dekenai ia noho dalana gimaia totona idia lao.+