Samuela Ginigunana

20 Vadaeni Davida be Naiota amo ia heau, unai be Rama ai. Bena Ionatana dekenai ia lao bona ia gwau: “Lau be dahaka lau karaia?+ Dahaka kerere lau karaia, bona emu tamana dekenai dahaka kara dika lau karaia, unai dainai lau ia tahua noho ia hamasea totona?” 2 Unai neganai Ionatana be ia dekenai ia gwau: “Unai bamona oi laloa lasi!+ Oi be do oi mase lasi. Itaia, egu tamana ese gau maragina eiava badana ia do karaia lasi neganai, lau dekenai unai ia gwauraia guna. Dahaka dainai egu tamana ese unai be lau amo do ia hunia? Unai do ia vara lasi.” 3 To Davida be ma ia gwau: “Emu tamana be ia diba oi ese lau oi lalonamo henia,+ unai dainai reana ia be sibona dekenai ia laloa, ‘Ionatana ese unai ia diba lasi be namo, dika ia lalohisihisi.’ To oi lau hamaoroa momokani, oi bona Iehova vairanai lau gwauraia herevana be momokani. Lau be do lau mauri daudau lasi!”+

4 Bena Ionatana be Davida dekenai ia gwau: “Herevana dahaka oi gwauraia, unai be oi totona do lau karaia.” 5 Davida be Ionatana dekenai ia gwau: “Kerukeru be hua matamata,+ bona king ia diba lau be ia ida do lau helai bona aniani. Namona be lau oi siaia lao, bona siti ena murimuri ai do lau hunia, ela bona dina ihatoina ena adorahi momokani ai. 6 Bema emu tamana ese lau ia tahua, do oi gwau, ‘Davida ese lau ia noia ia dekenai gwaumaoro do lau henia ena siti Betelehema dekenai ia lao haraga totona,+ badina lagani ta ta ai famili ibounai be boubou idia henia.’+ 7 Bema ia gwau, ‘Unai be namo,’ emu hesiai tauna be maino ai do ia noho. To bema ia badu, do oi diba momokani ia be ia ura lau ia hamasea. 8 Emu hesiai tauna dekenai lalokau* oi hahedinaraia be namo,+ badina oi be emu hesiai tauna ida Iehova ena vairanai gwaubou oi karaia.+ To bema lau be kerere,+ vadaeni oi sibona ese lau do oi hamasea. Dahaka dainai emu tamana dekenai lau do oi henia?”

9 Unai neganai Ionatana ia gwau: “Lau be oi dekenai unai bamona lau karaia diba lasi! Bema lau kamonai egu tamana be ia ura oi ia hadikaia, lau ese oi do lau hamaoroa.”+ 10 Bena Davida be Ionatana dekenai ia gwau: “Bema emu tamana ese oi ia hereva auka henia, daika ese lau do ia hamaoroa?” 11 Ionatana be Davida dekenai ia gwau: “Oi mai, siti ena murimuri dekenai ita lao.” Vadaeni idia ruaosi be siti ena murimuri dekenai idia lao. 12 Bona Ionatana be Davida dekenai ia gwau: “Iehova, Israela ena Dirava be iseda witnes, kerukeru inai bamona nega ai eiava dina ihatoina ai lau ese egu tamana do lau hereva henia. Bema ia ese oi ia lalonamo henia, lau ese oi do lau hadibaia. 13 To bema egu tamana ia ura oi ia hadikaia, bona oi dekenai unai lau gwauraia lasi bona mai maino ida oi lau siaia lasi, namona be Iehova ese lau ia panisia, bona egu panisi davana ia habadaia. Namona be Iehova be oi ida ia noho,+ guna egu tamana ida ia noho hegeregerena.+ 14 Lau mauri noho lalonai bona lau mase neganai danu, oi be lau dekenai Iehova ena lalokau* do oi hahedinaraia noho, a?+ 15 Namona be emu lalokau* be egu ruma bese dekenai oi hahedinaraia noho,+ ena be Iehova ese emu inai taudia ibounai be tanobada amo ia hadikaia ore.” 16 Vadaeni Ionatana be Davida ena ruma bese ida gwaubou ta ia karaia, ia gwau, “Iehova ese emu inai taudia dekenai davana do ia henia.” 17 Vadaeni Ionatana ese Davida ia hamaoroa ia karaia gwauhamatana do ia gwauraia lou bona iena lalokau do ia noho. Badina ia ese Davida ia lalokau henia, ia sibona ia lalokau henia hegeregerena.+

18 Ionatana be Davida dekenai ia gwau: “Kerukeru be hua matamata,+ bona egu tamana be oi do ia tahua, badina emu sea be do ia noho kava. 19 Dina ihatoina ai ia be momokani oi totona do ia henanadai, bona namona be inai gabu, guna oi hunia gabuna dekenai do oi mai bona iniseniai nadi badinai do oi noho. 20 Bona unai nadi ena kahana ta dekenai diba toi do lau pidia, gau ta lau pidia noho hegeregerena. 21 Hesiai tauna lau siaia neganai, do lau gwau, ‘Oi lao bona diba oi tahudia.’ Bema hesiai tauna dekenai lau gwau, ‘Itaia, diba be oi kahirakahira idia noho, oi abidia,’ vadaeni oi giroa mai diba. Oi lau hamaoroa momokani, oi bona Iehova vairanai lau gwauraia herevana be momokani, unai ena anina be gau ibounai be idia namo, bona oi be dika ta do oi davaria lasi. 22 To bema mero dekenai lau gwau, ‘Itaia, diba be emu vairanai idia noho,’ vadaeni do oi lao, badina Iehova ese oi ia siaia lao. 23 To Iehova ese ita rua huanai ita karaia gwaubou+ be nega ibounai do ia hagugurua.”+

24 Vadaeni Davida be siti murimurina ai ia hunia. Bona hua ena matamana ai, king be ena sea dekenai ia helai, ia aniani totona.+ 25 King be vaia ia helai gabuna ai ia helai, unai be haba kahirakahira. Ionatana be ia ia vaira henia, bona Abinere+ be Saulo ena badinai ia helai, to Davida ena gabu ai ta ia helai lasi. 26 Unai dina ai Saulo be hereva ta ia gwauraia lasi, badina sibona dekenai ia gwau: ‘Gau ta ia vara dainai ia be ia goeva lasi.+ Oibe, ia miro.’ 27 Hua matamata ena murina dinana ai danu, Davida ena gabu ai ta ia helai lasi. Vadaeni Saulo be ena natuna Ionatana dekenai ia gwau: “Dahaka dainai Iese ena natuna+ be varani bona hari dina aniani totona ia mai lasi?” 28 Bena Ionatana be Saulo dekenai ia gwau: “Davida be lau ia noia ia dekenai gwaumaoro do lau henia Betelehema dekenai ia lao totona.+ 29 Ia gwau, ‘Mani maoro oi henia lau lao totona, badina siti dekenai famili ibounai be boubou do idia henia, bona egu tadikaka korikorina ese lau ia boiria danu. Vadaeni bema oi ese lau oi lalonamo henia, mani lau lao haraga, egu tadikakadia lau itaia totona.’ Unai dainai ia be king ena aniani patana dekenai ia mai lasi.” 30 Bena Saulo be Ionatana dekenai ia badu dikadika, bona ia dekenai ia gwau: “Oi gwau-edeede natuna e, oi be Iese ena natuna ena kahanai oi gini, oi laloa lau be unai lau diba lasi, a? Oi be inai kara amo oi sibona bona emu sinana oi hahemaraia. 31 Iese ena natuna be tanobada ai ia mauri noho lalonai, oi be king ai do oi lao diba lasi bona emu basileia do ia noho daudau lasi.+ Vadaeni tau ta oi siaia lao ia be lau dekenai ia hakaua mai totona, badina ia mase be namo.”+

32 To Ionatana be ena tamana Saulo dekenai ia gwau: “Dahaka dainai ia do idia hamasea?+ Ia be dahaka ia karaia?” 33 Unai neganai Saulo ese ia dekenai io ia negea, ia gwadaia totona,+ vadaeni Ionatana ia diba iena tamana be ia ura Davida ia hamasea.+ 34 Vadaeni Ionatana be maoromaoro mai badu ida teibolo amo ia gini toreisi, bona unai dina ai ia aniani lasi, badina ia be Davida dainai ia lalohisihisi+ bona ena tamana ese ia hahemaraia.

35 Daba ai Ionatana be siti murimuri dekenai ia lao Davida ia hedavari henia totona, bona hesiai mero matamatana be ia ida ia lao.+ 36 Bona ia dekenai ia gwau: “Mani oi heau lao bona do lau pidia diba oi tahudia.” Vadaeni hesiai tauna ia heau lao, bona Ionatana ese diba ia pidia, bona unai hesiai tauna ena vaira kahanai ia moru. 37 Hesiai tauna be Ionatana ena diba ia moru gabuna dekenai ia ginidae neganai, Ionatana be hesiai tauna dekenai ia boiboi: “Diba be emu vaira kahanai ia noho, ani?” 38 Ionatana be hesiai tauna dekenai ma ia boiboi: “Karaharaga! Oi heau lao! Oi naria lasi!” Bona Ionatana ena hesiai tauna ese diba ia abidia bona ena biaguna dekenai ia giroa lou. 39 Hesiai tauna be ia vara gauna ia diba lasi, to Ionatana bona Davida sibona be unai idia diba. 40 Bena Ionatana ese ena tuari gaudia be ena hesiai tauna dekenai ia henia bona ia hamaoroa: “Inai gaudia be siti dekenai oi abidia lao.”

41 Hesiai tauna ia lao neganai, Davida be ia hunia gabuna amo ia toreisi, unai be saut kahana dekenai. Bena ia tui diho bona ena kwarana be nega toi tano dekenai ia atoa diho, bona ta ta idia kisi henia bona idia taitai, to Davida be ia taitai bada. 42 Ionatana be Davida dekenai ia gwau: “Mai maino ida oi lao, badina ita ruaosi be Iehova ena ladanai ita gwauhamata vadaeni,+ ita gwau, ‘Namona be Iehova be lau bona oi huanai ia noho hanaihanai, bona emu bese bona egu bese huanai danu.’”+

Bena Davida ia toreisi bona ia lao, bona Ionatana be siti dekenai ia giroa lou.