Samuela Ginigunana

23 Vadaeni haida ese Davida idia hamaoroa: “Filistia taudia be Keila taudia idia tuari henia noho,+ bona witi kwadia gabuna amo aniani idia henaoa.” 2 Unai dainai Davida ese Iehova ia nanadaia:+ “Inai Filistia taudia tuari henia totona do lau lao, a?” Iehova be Davida dekenai ia gwau: “Oi lao, Filistia taudia oi tuari henia bona Keila taudia oi hamauria.” 3 To Davida ena tatau be ia dekenai idia gwau: “Itaia, ai be mai gari ida inai Iuda tanona dekenai ai noho.+ Unai dainai edena bamona Keila dekenai do ai daekau lao, Filistia ena tuari oreana ai tuari henia totona?”+ 4 Vadaeni Davida ese Iehova ma ia nanadaia lou.+ Bona Iehova ese ia haere henia, ia gwau: “Oi toreisi bona Keila dekenai oi diho lao, badina lau ese Filistia taudia be emu imana dekenai do lau atoa.”+ 5 Vadaeni Davida be ena tatau ida Keila dekenai ia lao bona Filistia taudia ia tuari henia. Ia ese idia momo herea ia alaia mase bona edia animal ia abidia, bona Davida ese Keila taudia ia abia mauri.+

6 Ahimeleka ena natuna Abiatara+ be Keila ai Davida dekenai ia heau neganai, iena imana dekenai epodi* ia dogoatao. 7 Haida ese Saulo idia hamaoroa: “Davida be Keila dekenai ia lao.” Bena Saulo ia gwau: “Dirava ese ia be egu imana dekenai ia atoa vadaeni,+ badina ia raka vareai siti ena geiti be auri latadia amo idia koua, ia be sibona ia tarapua inai.” 8 Vadaeni tuari totona Saulo ese ena tuari tatau ia boiridia, idia be Keila dekenai do idia diho lao bona Davida bona ena tatau do idia koua hagegea. 9 Davida ia kamonai Saulo be palani ia karaia ia ia dogoatao totona, vadaeni ia be hahelaga tauna Abiatara dekenai ia gwau: “Epodi be iniseni oi mailaia.”+ 10 Bena Davida ia gwau: “Iehova, Israela ena Dirava e, lau, emu hesiai tauna lau kamonai Saulo ia ura Keila dekenai ia mai bona lau dainai inai siti ia hadikaia.+ 11 Keila ena gunalaia taudia ese lau be ena imana dekenai do idia atoa, a? Saulo be momokani do ia diho mai, lau, emu hesiai tauna lau kamonai hegeregerena, a? Iehova, Israela ena Dirava e, mani lau, emu hesiai tauna oi hamaoroa.” Unai neganai Iehova ia gwau: “Ia be do ia diho mai.” 12 Davida ia henanadai: “Keila ena gunalaia taudia ese lau bona egu tatau be Saulo ena imana dekenai do idia atoa, a?” Iehova ia haere: “Idia ese umui be Saulo dekenai do idia henia.”

13 Davida be maoromaoro ia toreisi bona Keila ia rakatania, ena tatau 600 bamona ida,+ bona gabu idauidau dekenai idia loaloa. Saulo ia kamonai Davida be Keila amo ia heau neganai, ia be Davida murinai ia lao lasi. 14 Davida be ororo gabudia ai ia noho, unai be taunimanima lasi gabuna ai ia noho, Sipi ai,+ bona unuseniai taunimanima idia lao be auka. Saulo ese Davida ia do tahua noho,+ to Iehova ese ia be Saulo ena imana dekenai ia atoa lasi. 15 Davida be Horese tanona Sipi ena taunimanima lasi gabuna ai ia noho neganai, ia diba Saulo be ia ura ia ia hamasea.

16 Vadaeni Saulo ena natuna Ionatana be Davida dekenai ia lao, Horese ai, bona Davida ia durua Iehova ia abidadama henia totona.+ 17 Ia dekenai ia gwau: “Oi gari lasi, badina egu tamana Saulo ese oi do ia davaria lasi. Oi be Israela ena king ai do oi lao,+ bona lau be emu henunai do lau gaukara bona oi do lau durua, bona egu tamana Saulo be unai ia diba danu.”+ 18 Bena Iehova ena vairanai idia ruaosi be gwauhamata ta idia karaia,+ bona Davida be Horese dekenai ia noho, bona Ionatana be ena ruma dekenai ia lao.

19 Sipi taudia be Saulo dekenai idia daekau lao, unai be Gibea dekenai,+ bona idia gwau: “Davida be ita kahirakahira ia hunia noho,+ Hakila ena ororo ai,+ unai be Horese tanona ai,+ bona Iesimono ena saut kahana dekenai,+ taunimanima be unai gabu dekenai idia lao diba lasi. 20 King e, emu ura negana ai oi mai diba, bona emu imana dekenai ia do ai atoa.”+ 21 Unai neganai Saulo ia gwau: “Iehova ese umui ia hanamoa be namo, badina lau dekenai hebogahisi umui hahedinaraia. 22 Mani umui lao bona umui tahua ia be edeseni ia noho, bona daika ese ia be unuseni ia itaia, badina lau kamonai ia be koikoi tauna. 23 Ia hunia gabudia ibounai umui tahua namonamo bona do umui giroa mai bona lau umui hadibaia. Bena lau be umui ida do lau lao, bona bema ia be emui tano dekenai ia noho, lau ese Iuda taudia tausen momo huanai ia do lau tahua.”

24 Vadaeni Saulo idia rakatania bona Sipi+ dekenai idia lao guna, to Davida bona ena tatau be Maono ena taunimanima lasi gabuna dekenai idia noho,+ unai be Arabaha ai,+ Iesimono ena saut kahanai. 25 Bena Saulo be ena tatau ida ia mai, ia idia tahua totona.+ Davida ese unai ia kamonai neganai, maoromaoro nadi badana dekenai ia diho lao+ bona Maono ena taunimanima lasi gabuna dekenai ia noho. Saulo be unai ia kamonai neganai, Davida murinai ia lao, Maono ena taunimanima lasi gabuna dekenai. 26 Saulo be ororo ena kahana ta dekenai ia lao neganai, Davida bona ena tatau be ororo ena kahana ma ta dekenai idia noho. Davida be ia haraga Saulo amo ia heau mauri totona,+ to Saulo bona ena tatau be Davida bona ena tatau kahirakahira idia mai noho, idia dogodiatao totona.+ 27 To gwaukau tauna ta be Saulo dekenai ia mai, bona ia gwau: “Oi mai haraga, badina Filistia taudia ese iseda tano taudia idia tuari henia noho!” 28 Unai neganai Saulo be Davida murinai ia lao lou lasi,+ to ia lao Filistia taudia ia tuari henia totona. Unai dainai unai gabu ena ladana idia hatoa, Parara Ena Nadi Badana.

29 Bena unuseni amo Davida ia daekau lao bona taunimanima idia lao diba lasi gabudia ai ia noho, unai be Ene-gedi ai.+