Samuela Ginigunana

25 Vadaeni Samuela+ ia mase, bona Israela taudia ibounai idia haboua bona ia totona idia taitai bena iena ruma kahirakahira idia guria, unai be Rama ai.+ Bena Davida ia toreisi bona Parana ena taunimanima lasi gabuna dekenai ia diho lao.

2 Vadaeni tau ta be Maono dekenai ia noho,+ ia be Karamele dekenai ia gaukara.+ Ia be taga bada tauna, ena mamoe be 3,000 bona ena nanigosi be 1,000, bona Karamele ai ia be ena mamoe edia huina ia utua noho. 3 Unai tauna ena ladana be Nabala,+ bona ena adavana ena ladana be Abigaila.+ Ia be aonega bona hairai hahinena, to ena adavana be kara auka tauna bona iena kara be dika,+ bona ia be Kaleba besena amo.+ 4 Davida be taunimanima lasi gabuna ai ia kamonai Nabala be ena mamoe edia huina ia utua noho. 5 Vadaeni Davida ese ia dekenai tatau matamata 10 ia siaidia lao, bona Davida ese idia ia hamaoroa: “Karamele dekenai umui daekau lao, bona Nabala dekenai umui lao neganai, egu ladanai ia umui hanamoa bona ia umui nanadaia ia namo eiava? 6 Bena umui gwau, ‘Namona be oi mauri daudau, bona namona be oi latanai maino ia noho, bona emu ruma bese bona oi biagua gaudia ibounai latanai danu. 7 Lau kamonai oi be mamoe edia huina oi utua noho. Oiemu mamoe naria taudia be ai ida idia noho neganai, idia ai hadikaia lasi,+ bona Karamele dekenai idia noho negadia ibounai lalonai gau ta idia haboioa lasi. 8 Emu tatau matamata oi nanadaidia bona idia ese oi do idia hamaoroa. Namona be oi ese egu tatau oi lalonamo henidia, badina ai be moale negana dekenai ai mai. Mani oi dekenai ia noho gauna be emu hesiai taudia bona emu natuna* Davida dekenai oi henia.’”+

9 Vadaeni Davida ena tatau idia lao bona Davida ia gwauraia hereva ibounai be Nabala idia hamaoroa. Idia ore neganai, 10 Nabala be Davida ena hesiai taudia dekenai ia gwau: “Davida be daika, bona Iese ena natuna be daika? Inai nega lalonai hesiai taudia momo be edia biagudia idia rakatanidia.+ 11 Lau ese egu paraoa, bona ranu, bona vamu, egu mamoe ena huina idia utua taudia totona lau utua vamu do lau abia bona umui dekenai do lau henia, a? Lau be lau diba lasi umui be edeseni amo umui mai.”

12 Unai neganai Davida ena tatau idia giroa lou bona unai hereva ibounai be Davida idia hamaoroa. 13 Davida be maoromaoro ena tatau dekenai ia gwau: “Umui ibounai emui tuari kaia umui abia hegaegae!”+ Vadaeni idia ibounai be edia tuari kaia idia abia hegaegae, bona Davida danu be ena tuari kaia ia abia hegaegae, bona tatau 400 bamona be Davida ida idia daekau, to tatau 200 idia noho edia kohu naria totona.

14 To hesiai tauna ta be Abigaila, Nabala ena adavana dekenai ia gwau: “Itaia, Davida be taunimanima lasi gabuna amo ena gwaukau taudia ia siaia iseda biaguna idia hanamoa totona, to ia ese idia ia gwau henia.+ 15 Unai tatau ese ai idia kara namo henia. Taunimanima lasi gabuna ai idia ida ai noho hebou neganai, idia ese ai idia hadikaia lasi, bona ai amo gau ta idia henaoa lasi.+ 16 Bona ai be idia ida mamoe ai naridia negana lalonai, idia be magu ta bamona ai idia gimaia, dina bona hanuaboi ai. 17 Vadaeni do oi karaia gauna mani oi laloa, badina iseda biaguna bona ena ruma bese taudia ibounai be dika do idia davaria momokani.+ Iseda biaguna be kara auka tauna+ bona ai be hegeregere lasi ia ai hereva henia.”

18 Bena karaharaga Abigaila+ ese paraoa 200, wain hodu badadia rua, idia alaia vadaeni mamoe 5, idia gabua bali bosea 5,* greips huahua keke 100, bona fig kaukau keke 200 ia abia bona ibounai be doniki latanai ia atoa.+ 19 Bena ena hesiai taudia dekenai ia gwau: “Lauegu vairanai umui lao. Bona lau be emui murinai do lau mai.” To ena adavana Nabala dekenai hereva ta ia gwauraia lasi.

20 Abigaila be doniki latanai ia guia bona hehuni ai ororo amo ia diho noho lalonai, Davida bona ena tatau be ororo amo idia diho mai, bona ia ida idia hedavari. 21 Davida be ena lalona ai ia gwau: “Taunimanima lasi gabuna ai inai tauna ese ia biagua gaudia ibounai lau gimaia kava. Ia biagua gauna ta be ia boio lasi,+ to ia ese egu kara namo be kara dika amo ia haloua.+ 22 Daba ai tau ta be do ia mauri noho lasi. Bema lau ese idia lau alaia lasi, vadaeni Dirava ese egu inai taudia do ia panisia.”

23 Abigaila ese Davida ia itaia neganai, doniki amo ia diho haraga bona Davida vairanai ia tui diho bona ena vairana be tano dekenai ia atoa diho. 24 Bena ena aena badinai ia tui diho bona ia gwau: “Lauegu lohia e, inai kerere be lau dekenai oi atoa, mani lau, emu hesiai hahine, ese oi ia hereva henia, bona egu hereva oi kamonai. 25 Lauegu lohia e, namo lasi inai anina lasi tauna ena hereva oi kamonai henia, badina ia be ena ladana ena anina hegeregerena ia kara. Iena ladana be Nabala.*+ Oibe, ia be kavakava tauna, ena ladana ena anina hegeregerena. To egu lohia e, oi ese tatau oi siaidia neganai, lau, emu hesiai hahine, ese lau itadia lasi. 26 Lauegu lohia e, oi bona Iehova vairanai lau gwauraia herevana be momokani, Iehova ese oi ia koua dainai+ idia oi alaia lasi bona edia kerere davana oi haloua lasi.+ Namona be Nabala dekenai ia vara gauna be emu inai taudia dekenai ia vara danu. 27 Vadaeni lau, emu hesiai hahine, ese egu lohia totona lau mailaia harihari gaudia+ be emu tatau dekenai lau henia be namo.+ 28 Mani lau, emu hesiai hahine, egu dika oi gwauatao, badina Iehova ese emu bese taudia be king ai do ia halaodia bona do idia lohia nega daudau,+ badina egu lohia be Iehova totona ia tuari noho,+ bona emu mauri dinadia ibounai lalonai oi dekenai dika ta idia davaria lasi.+ 29 Bema tau ta ia toreisi bona oi ia lulua ia hamasea totona, Iehova emu Dirava ese oi do ia gimaia, ta ese baege lalonai dava bada gaudia ia gimaia bamona, to emu inai taudia be ia ese do ia negedia, ta ese nadi be vilipopo amo ia negea hegeregerena. 30 Bona Iehova ese egu lohia totona ia gwauhamatalaia gau namodia ibounai be do ia hagugurua bona oi be Israela ena lohia ai do ia halaoa.+ 31 Vadaeni egu lohia e, dahaka dainai rara do oi bubua kava bona unai kara amo emu lalomamina oi hadikaia.+ Iehova ese oi ia hanamoa neganai, emu hesiai hahinena do oi laloatao.”

32 Unai neganai Davida be Abigaila dekenai ia gwau: “Iehova, Israela ena Dirava hanamoa, ia ese hari dina oi ia siaia lau oi hedavari henia totona! 33 Bona emu laloa namonamo karana dainai, namona be Dirava ese oi ia hanamoa! Bona hari dina oi ese lau oi koua dainai, rara dekenai lau kerere lasi+ bona lau ese dika davana lau haloua lasi. 34 Momokani, Israela ena Dirava, Iehova, ia mauri noho Diravana unai, ese lau ia koua dainai oi lau hadikaia lasi,+ bema lau hedavari henia totona oi mai haraga lasi,+ daba ai Nabala ena tau ta be do ia mauri lasi.”+ 35 Vadaeni Davida ese Abigaila ia mailaia gaudia ia abia dae bona ia dekenai ia gwau: “Mai maino ida emu ruma dekenai oi daekau lao. Itaia, lau ese emu hereva lau kamonai vadaeni, bona oi noia gauna do lau karaia.”

36 Gabeai Abigaila be Nabala dekenai ia giroa lou, Nabala be ena ruma ai king bamona ia aniani noho bona ena lalona ia moale bona ia kekero momokani. Vadaeni ia dekenai hereva ta ia gwauraia lasi ela bona daba ia rere. 37 Daba ai, Nabala ia kekero lasi neganai, iena adavana ese idia vara gaudia be ia dekenai ia gwauraia. Bona ena kudouna be mase tauna ena bamona ia lao, bona ia hekure marere lasi, nadi bamona. 38 Dina 10 murinai Iehova ese Nabala ia hamasea.

39 Davida ia kamonai Nabala ia mase neganai, ia gwau: “Iehova hanamoa, Nabala ese lau ia hadikaia ena davana be ia dekenai ia henia vadaeni,+ bona ena hesiai tauna ia koua dainai dika ta ia karaia lasi,+ bona Nabala+ be sibona ena kara dika dainai Iehova ese ia panisia!” Bena Davida ese hereva ia siaia Abigaila ia adavaia totona. 40 Vadaeni Davida ena hesiai taudia be Abigaila dekenai idia mai, unai be Karamele ai, bona ia dekenai idia gwau: “Davida ese ai ia siaia oi ai hakaua lao totona, bona ia do oi adavaia.” 41 Karaharaga Abigaila be tano dekenai ia igo diho bona ia gwau: “Lau noho hegaegae emu hesiai hahinena ai lau lao, bona egu lohia ena hesiai taudia edia aena lau huria totona.”+ 42 Bena Abigaila+ be ia toreisi haraga, ena doniki dekenai ia guia bona ia lao, bona ena hesiai kekeni 5 danu ia abia lao, ia be Davida ena gwaukau taudia danu ia lao bona Davida ese ia adavaia.

43 Davida ese Ieserele+ hahinena Ahinoama+ ia adavaia danu, bona unai hahine rua be ena adavana ai idia lao.+

44 To Saulo ese ena natuna Mikala,+ Davida ena adavana unai, be Laisi ena natuna Paliti+ dekenai ia henia, ia be Galimi amo.