Lauma be Tanobada ai Idia Mauri Bena Idia Mase Taudia Lasi

Lauma idia noho! Lauma namodia bona dikadia be lauma gabunai idia noho. Idia be guna tanobada idia noholaia bena idia mase taudia, a?

Lasi. Taunimanima ta ia mase neganai, ia be lauma gabuna dekenai ia hanaia lao lasi, taunimanima momo idia laloa bamona. Inai ita diba, Baibel ena hereva dainai. Baibel be hereva momokani bukana, Dirava momokani tamona ladana Iehova ese ia havaraia gauna unai. Iehova ese taunimanima ia havaradia, unai dainai ia diba dahaka ia vara idia dekenai idia mase neganai.—Salamo 83:18; 2 Timoteo 3:16.

Adamu be tano ena kahu amo ia havaraia — Adamu be kahu amo ia mai, bona kahu dekenai ia giroa lou

Baibel ia gwau Dirava ese tau ginigunana, Adamu, be “tano ena kahu dekena amo” ia karaia. (Genese 2:7) Paradaiso dekenai ia atoa, Eden umana lalonai. Bema Adamu ese Iehova ena taravatu ia badinaia, do ia mase lasi; tanobada dekenai do ia mauri noho ema bona hari. To Adamu ese Dirava ena taravatu ia utua neganai, Dirava ese ia hamaoroa, ia gwau: “Tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.”—Genese 3:19.

Anina be dahaka? Adamu be edeseni, Iehova ese kahu amo ia do karaia lasi neganai? Unai negai ia be lasi. Ia be lauma ta lasi guba dekenai. Ia noho lasi. Unai dainai Iehova ena hereva, Adamu be ‘tano dekenai do ia giroa lou’ herevana ena anina be Adamu do ia mase. Ia be lauma gabuna dekenai ia hanaia lasi. Ia mase neganai, Adamu ena mauri ia ore. Mase ena anina be mauri lasi.

To mase taudia oredia be edena bamona? Idia danu idia noho lasi, a? Baibel ena haere be inai:

“Idia ibounai [taunimanima bona animal danu] be gabu tamona dekenai idia lao noho, tano ena kahu. Idia ruaosi be kahu dekena amo idia mai, bona idia ruaosi be kahu dekenai do idia giroa lou.”—Hadibaia Tauna 3:20.
“Mase taudia be gau ta idia diba lasi.”—Hadibaia Tauna 9:5.
“Inai mase taudia edia lalokau, edia badu, bona edia mama be idia ore momokani.”—Hadibaia Tauna 9:6.
“Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.”—Hadibaia Tauna 9:10.
Taunimanima “idia mase neganai tano ena kahu dekenai idia giroa lou. Edia mase dina dekenai, idia ura do idia karaia gaudia be do idia doko.”—Salamo 146:4.

Tau ta be gwarume ia kokidia ena reke amo; tatau be bosea idia karaia; tatau be idia gaukara goada aniani idia hegaegae totona. — Mauri taudia sibodia be inai gaudia idia karaia diba

Inai Baibel siridia edia hereva oi abia dae be auka, a? Mani inai oi laloa: Ruma bese momo lalonai tatau ese edia gaukara amo moni idia abia, edia ruma taudia naria totona. Ia mase neganai, ena adavana bona ena natudia idia hekwarahi. Reana edia moni be hegeregere lasi aniani idia hoia totona. Reana unai tau ena inai taudia ese idia gwau dika henidia. Vadaeni, mani inai danu oi laloa: ‘Bema unai tau be lauma gabunai ia mauri noho, badina be dahaka ena ruma taudia ia ubudia noho lasi bona kara dika taudia amo ia gimadia lasi?’ Badina be Baibel ena hereva be momokani. Unai tau ia mauri lasi dainai gau ta ia karaia diba lasi.—Salamo 115:17.

Vabu ta bona ena natudia be aniani totona idia noinoi; natuna ia itaia tau ta be iena sinana ia botaia — Mase taudia ese hitolo taudia idia ubudia diba lasi, bona haida ese idia hahisidia taudia idia naridia diba lasi

Anina be mase taudia be nega ta do idia mauri lou lasi, a? Lasi. Toreisi lou be gabeai do ai herevalaia. To ena anina be mase taudia idia diba lasi oi be dahaka oi karaia noho. Oi idia itaia diba lasi, oi idia kamonai diba lasi, bona oi idia hereva henia diba lasi. Oi gari henidia be anina lasi. Oi idia durua diba lasi, bona oi idia hadikaia diba lasi.—Hadibaia Tauna 9:4; Isaia 26:14.