Noa Ena Abidadama ese Tanobada Taudia Ibounai Ia Kota Henia Bamona

NOA ena sivarai oi diba, a? Ia be Dirava gari henia tauna bona tanobada ibounai dekenai ia vara abatana amo haida ia hamauria totona lagatoi ta ia haginia. Ena be unai be idaunegai ia vara gauna, to taunimanima milioni momo ese unai sivarai idia diba. To, taunimanima momo idia diba lasi gauna be ita ibounai dekenai Noa ena mauri be mai anina bada.

Dahaka dainai lagani tausen momo gunanai ia vara sivaraina ita laloa bada be namo? Noa ena nega bona iseda nega be hegeregere, a? Bema oibe, edena bamona iena haheitalai amo namo ita davaria diba?

Noa Ena Negai Ia Noho Tanobadana

Baibel ena nega duahia dalana ese ia hahedinaraia Noa be lagani 2970 B.C.E. ai ia vara​​—⁠unai be lagani 126, Adamu ia mase murinai. Noa ena nega lalonai, tanobada be dagedage amo ia honu, bona Adamu ena bese taudia momo ese edia tubuna ena gwau-edeede karana idia tohotohoa. Unai dainai, “Lohiabada ese taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo.”​​—⁠Genese 6:​5, 11, 12.

Taunimanima edia gwau-edeede sibona dainai Iehova ia badu lasi. To Genese bukana ia gwau: “Bona Dirava ena natuna haida ese idia itaia, inai kekeni be mai edia hairai. Vadaeni, idia ura henia kekenidia idia abia, idia adavaia. . . . Unai Dirava ena natuna taudia ese taunimanima edia natuna kekeni idia adavaia bona natuna idia havaraia neganai, tatau badadia badadia idia noho tanobada dekenai. Idia be gunaguna, bona gabeai danu, goada taudia mai ladana, edia sivarai danu be bada.” (Genese 6:​2-4) Unai siri edia hereva bona aposetolo Petero ese ia torea hereva ita hahegeregerea neganai, ia hahedinaraia ‘Dirava ena natudia’ be gwau-edeede anerudia. Taunimanima ai idia lao gwau-edeede anerudia be hahine danu idia mahuta hebou, bona Nefilim natudia idia havaraia.​​—⁠1 Petero 3:​19, 20.

Nefilim, anina be “Hamorua Taudia,” taunimanima ma haida idia hamorua taudia idia laulaulaia. Idia be taunimanima idia biagua auka dagedage taudia, bona edia tamadia edia matabodaga karadia be Sodoma bona Gomora taudia edia matabodaga karadia bamona. (Iuda 6, 7) Idia ibounai ese tanobada dekenai kara dikadia idia habadaia.

“Ena Nega ai Idia Noho Taudia Huanai Ia be mai Ena Kerere Lasi”

Kara dika ia bada herea dainai Dirava ese ena lalona ia hadaia taunimanima do ia hadikadia ore. To Dirava ena lauma amo ia havaraia herevana, ia gwau: “Noa dekenai Lohiabada ia moale. . . . Noa be kara maoromaoro tauna ta. Ia hahedinaraia ena nega ai idia noho taudia huanai ia be mai ena kerere lasi. Noa be Dirava momokanina ida ia raka.” (Genese 6:​8, 9; NW ) Dirava diba lasi tanobadana, dika sibona ia abia be maoro tanobadana dekenai, edena bamona ‘Dirava ida ia raka?’

Ita daradara lasi, Noa be ena tamana, Lameka, Adamu ena negai ia noho tauna mai ena abidadama ena amo gau momo ia dibaia. Lameka ese ena natuna dekenai inai ladana Noa (anina be “Laga-ani” eiava “Lalohisihisi Hamaragia”) ia henia neganai, ia peroveta ia gwau: “Lohiabada ese tano ia hadikaia vadaeni kara dekena amo inai mero ese ita do ia hamauria, iseda imana edia gaukara, bona iseda hekwarahi dekena amo do ita laga-ani totona.” Dirava ese tano ia hadikaia herevana ia kokia neganai, unai peroveta herevana ia hagugurua.​​—⁠Genese 5:​29; 8:​21.

Ita gwau diba lasi, Dirava gari henia tama sina edia natudia be lauma gaudia laloa bada taudia ai idia lao, badina taunimanima ta ta ese edia hetura karana Iehova ida idia haginia be namo. Noa be Dirava ia ura henia dalana ia badinaia dainai ‘Dirava ida ia raka.’ Noa be Dirava ia dibaia karana ese ia doria Ia do ia hesiai henia totona. Noa be Dirava ena ura, ‘abata badana amo mauri gaudia ibounai do ia haorea’ urana, ia diba neganai, unai ese ena abidadama ia hamanokaia lasi.​​—⁠Genese 6:​13, 17.

Noa ia diba momokani unai dika bada herea do ia vara dainai, Iehova ena oda ia badinaia: “Lagatoi namona ta, au namodia dekenai do oi haginia. Ia lalonai daiutu do oi karaia, bona lalonai bona murimurinai pisi dekenai oi koua.” (Genese 6:14) Dirava ese unai lagatoi totona ia henia palanina ia badinaia karana be mai ena hekwarahi. To, “Noa ese unai bamona ia karaia, Dirava ena hereva ibounai hegeregere.” (Genese 6:22) Noa be ena adavana bona natudia, Sema, Hama, bona Iepeta bona edia adavadia ese idia durua dainai, unai ia karaia. Iehova ese ena abidadama ia hanamoa. Hari idia noho ruma besedia dekenai unai be haheitalai namo hereana!

Lagatoi haginia gaukarana be edena bamona? Iehova ese Noa ia hamaoroa au amo maua badana ta do ia karaia, unai maua lalonai ranu do ia vareai lasi, ia be sitori toi, ena lata be 133 mita, ena lababa be 22 mita bona ena ataiai be 13 mita. (Genese 6:​15, 16) Reana unai lagatoi ena bada be hari inai negai kago bouti idauidau edia bada bona metau hegeregerena.

Unai be gaukara badana! Anina be au tausen momo idia utua, lagatoi haginia gabuna dekenai idia veria lao, bona idia utudia palaka. Unai ena anina be patapata idia haginidia, au kokoa gaudia eiava pegi karaia audia idia karaia, ranu ia vareai lasi totona pisi idia tahua, ranu urodia bona tulu idauidau idia abia, bona ma gau haida danu idia karaia. Unai gaukara idia karaia totona hoihoi taudia ida idia herevahereva bona idia abia kohudia totona davana idia karaia. Kapenta gaukarana idia diba namonamo be namo, unai amo timba idia atoa maoromaoro bona lagatoi goadana idia haginia diba. Bona mani oi laloa​​—⁠unai gaukara be reana lagani 50 eiava 60 bamona murinai idia haorea!

Gabeai Noa ese ia bona ena ruma bese edia aniani bona animal edia aniani ia hegaegaelaia. (Genese 6:​21) Animal hutuma do ia haboua bona lagatoi lalonai do ia hakaudia vareai. Noa ese Dirava ena oda ibounai ia badinaia, bona gaukara ia haorea. (Genese 6:​22) Ia haorea murinai, Iehova ese ia hanamoa.

“Kara Maoromaoro Ia Harorolaia Tauna”

Noa ese lagatoi ia haginia sibona lasi, to taunimanima ia hadibaia danu, ia be “kara maoromaoro ia harorolaia tauna” dainai mai kamonai ida Dirava ia hesiai henia. To “taunimanima ese idia laloa lasi dahaka do ia vara, ia mai bona abata badana ia ginidae, vadaeni abata ranu ese ibounai ia abia lao.”​​—⁠2 Petero 2:5; Mataio 24:​38, 39.

Unai nega lalodiai, taunimanima ese lauma gaudia eiava kara maoromaoro taravatudia idia laloa lasi, unai dainai Noa ena ruma bese be edia dekena taudia ese idia kirikirilaia bona idia gwauraidia dika dalana ita lalo-pararalaia haraga diba. Reana taunimanima idia laloa, idia kavakava. To, Noa ese lauma dalanai ena ruma bese ia hagoadaia bona durua, badina idia ese edia nega lalonai idia noho Dirava diba lasi taudia edia dagedage karadia, matabodaga karadia, bona gwau-edeede karadia idia badinaia lasi. Noa ena hereva bona kara amo ena abidadama ia hahedinaraia bona unai nega ai idia noho tanobada taudia ia kota henidia bamona.​​—⁠Heberu 11:⁠7.

Abata amo Idia Roho Mauri

Nega sisina ia do noho bena medu do ia diho matamaia neganai, Dirava ese Noa ia hamaoroa lagatoi lalonai do ia vareai. Noa ena ruma bese bona animal be lagatoi lalonai idia vareai murinai, Iehova “ese lagatoi ena iduara ia koua,” unai amo taunimanima edia kiri regena idia kamonai lasi. Abata ia mai neganai, gwau-edeede anerudia be edia tanobada tauanina idia haidaua bona unai dika amo idia heau mauri. To ma haida be edena bamona? Lagatoi murimurinai, tano kaukauna dekenai idia noho mauri gaudia ibounai, Nefilim taudia danu, be idia mase ore! Noa bona ena ruma bese taudia sibona idia mauri.​​—⁠Genese 7:​1-​23.

Noa bona ena ruma bese be lagani tamona bona dina 10 lagatoi lalonai idia noho. Idia bisi bada animal idia ubua bona ranu idia henidia, momoru idia kokia, bona dina ta ta idia duahia. Genese bukana ese Abata lalonai idia vara gaudia ia gwauraia maoromaoro, bouti ena buka ai edia loaloa idia torea gaudia hegeregerena.​​—⁠Genese 7:​11, 17, 24; 8:​3-​14.

Ita diba momokani lagatoi lalonai, Noa ese ena bese ida lauma gaudia idia herevalaia bona Dirava idia tanikiu henia. Ia hedinarai goevagoeva, Noa bona ena ruma bese dainai abata ia do mai lasi neganai idia vara gaudia edia sivarai be idia torea diba. Uduna amo ta ta dekenai idia gwauraia sene taravatudia, eiava idaunegai sivarai pepadia be idia dekenai ia noho dainai, unai gaudia be Abata badana negana lalonai idia herevalaia.

Noa bona ena ruma bese be tano kaukauna dekenai idia gini lou neganai, idia moale bada herea! Ia karaia gauna ginigunana be boubou patana ta ia haginia bona hahelaga tauna bamona ena ruma bese totona idia ia hamauria Tauna dekenai boubou gauna ia henia.​​—⁠Genese 8:​18-​20.

“Noa Ena Nega Bamona”

Iesu Keriso ia gwau: “Noa ena nega bamona, Taunimanima ena Natuna do ia mai neganai, be unai bamona gaudia do idia vara.” (Mataio 24:37) Hari inai negai, Keristani taudia danu be kara maoromaoro idia harorolaia taudia, taunimanima idia hagoadaia idia helalo-kerehai totona. (2 Petero 3:​5-9) Unai hereva hegeregerena, reana do ita laloa gauna be, Abata ia do vara lasi neganai Noa be dahaka ia laloa. Ia laloa ia karaia haroro gaukara be anina lasi, a? Nega haida ia hesiku, a? Baibel ese unai ia gwauraia lasi. To ia hahedinaraia Noa ese Dirava ia kamonai henia.

Noa ena nega bona iseda nega idia hegeregere dalana oi itaia, a? Ena be dagedage bona metau ia davaria, to Iehova ia badinaia. Unai dainai Iehova ese ia gwauraia kara maoromaoro tauna. Noa ena ruma bese idia diba momokani lasi Dirava ese edena negai Abata do ia mailaia, to idia diba do ia mai. Unai hekwarahi bada laganidia ai bona toana be anina ia havaraia lasi haroro gaukara dekenai, Dirava ena hereva abidadama henia karana ese Noa ia durua. Momokani, Baibel ese ita ia hadibaia ia gwau: “Noa ese Dirava ia abidadama henia, vadaeni Dirava ese dohore idia vara gaudia Noa dekenai ia hadibaia guna. Vadaeni Noa ese Dirava ia kamonai henia, bona lagatoi badana ia karaia. . . . Noa ena abidadama ese tanobada taudia ibounai ia kota henia bamona. Bona Noa ena abidadama dainai, Dirava ese kara maoromaoro tauna ia gwauraia. Ma Dirava idia abidadama henia taudia ibounai, be Dirava ese maoromaoro do ia gwauraidia.”​​—⁠Heberu 11:⁠7.

Noa ese edena bamona unai abidadama ia abia? Nega ia atoa Iehova amo ia dibaia gaudia ibounai ia lalohadailaia bona unai diba ese ia hakaua. Ita diba momokani, Noa be guriguri amo Dirava ia hereva henia. Momokani, Noa be Iehova ia dibaia namonamo dainai, ia be hegeregere ‘Dirava ida ia raka’ bamona. Noa be ruma bese ena kwarana dainai, nega ia atoa ena ruma bese be mai ena lalokau ida ia naria totona. Anina be ena adavana, edia natudia toi, bona ena ravana hahinedia edia namo lauma dalanai ia naria namonamo.

Noa bamona, hari Keristani taudia momokanidia idia diba kahirakahira Iehova ese inai Dirava diba lasi tanobadana do ia haorea. Unai dina eiava hora ita diba lasi, to unai “kara maoromaoro ia harorolaia tauna” ena abidadama bona kamonai karana ita tohotohoa neganai, “mauri do ita abia.”​—⁠Heberu 10:​36-39.

[Box on page 29]

Ia Vara Momokani, A?

Taunimanima edia noho dalana bona kastom idia stadilaia saiens taudia ese iduhu bona bese idauidau ibounai amo abata ena sivarai 270 bamona be idia haboua vadaeni. Diba bada tauna Claus Westermann, ia gwau: “Abata ena sivarai be tanobada ibounai dekenai ia noho. Dirava ese gau ibounai ia havaraia ena sivarai hegeregerena, ia be iseda sene taudia amo ita abia gauna ta. Ia be hoa gauna momokani: tanobada ena gabu ibounai dekenai unai idaunegai ia vara abata badana ena sivarai ita davaria.” Unai ena badina be dahaka? Diba tauna ta Enrico Galbiati ia gwau: “Abata ena sivarai be taunimanima idauidau bona gabu idauidau dekenai ia noho ese ia hahedinaraia unai sivarai be mai ena badina bona ia vara momokani.” Keristani taudia ese diba bada taudia edia lalohadai idia abia dae, to idia dekenai mai anina bada gauna be, Iesu ese idaunegai sivaraidia lalonai Abata ia vara momokani sivaraina ia herevalaia.​​—⁠Luka 17:​26, 27.

[Box on page 30]

Gori Sivaraidia ese Nefilim Taudia Ia Gwauraia, A?

Greek, Egypt, Ugarit, Hurrian, bona Mesopotamia taudia edia lalohadai dekenai, dirava bona taunimanima idia mahuta hebou sivaraidia​​—⁠bona idia amo idia vara “kwalimu taudia” eiava “goada herea taudia”​​—⁠be vaia sivarai matamatana lasi. Greek taudia edia gori sivaraidia lalonai, edia dirava be taunimanima edia tauanina idia abia bona mai edia hairai bada. Idia aniani, inuinu, mahuta, mahuta hebou, hepapahuahu, heatu, lalo-ani bona reipi karadia idia karaia. Ena be taunimanima idia laloa idia be helaga, to idia koikoi bona taravatu idia utua. Idia gwau kwalimu taudia hegeregere Achilles be dirava bona taunimanima amo idia mai bona idia dekenai diba bada idia henia to mauri hanaihanai idia henia lasi. Unai dainai, Genese bukana ese Nefilim taudia edia sivarai ia gwauraia karana dainai unai gori idia matamaia ena badina ita lalo-pararalaia.