“Oi Sibona be Emu Taunimanima Oi Rakatania Lasi”

1, 2. Dahaka dainai haida ese King Davida badinaia lasi karana idia hahedinaraia?

KING DAVIDA ese badinaia lasi karana dainai idia vara metau o hisihisi ia mamia. Iena lohia negana lalonai metau idauidau idia vara, nega ta ena bese taudia be hehuni dalanai palani idia karaia, ena king dagina idia abia totona. Danu, reana ita laloa haida be ena turana namodia, to idia ese Davida idia samania. Mani Mikala, Davida ena adavana ginigunana ita laloa. Matamanai, “Davida ia lalokau henia,” bona Davida ia durua ena king gaukara idauidau ia karaia totona. To gabeai, “ena kudouna ai Davida ia lalodika henia matamaia,” ia laloa Davida be “kavakava tauna . . . bamona.”​—1 Samuela 18:20; 2 Samuela 6:16, 20.

² Ma tau ta danu be Davida ena sisiba henia tauna, Ahitopela. Taunimanima idia laloa Ahitopela ena sisiba be Iehova sibona ese ia gwauraia herevadia bamona. (2 Samuela 16:23) To gabeai, Davida ese ia abidadama henia turana namona ese Davida ia rakatania bona Davida idia inai henia taudia ia bamoa. Bona daika ese Davida hamorua lalohadaina ia hamatamaia? Abesaloma, Davida ena natuna! Unai koikoi tauna ese “koikoi dalanai Israela taudia edia lalona ia veria noho” ia sibona be King Davida inai henia tauna ai ia lao. Abesaloma ena gwau-edeede karana ia bada ia lao dainai, Davida ia heau be namo, dika ia idia hamasea.​—2 Samuela 15:1-6, 12-17.

 3. Davida be dahaka ia diba momokani?

³ Davida ia badinaia tauna ta ia noho lasi, a? Davida ena metau ibounai lalonai, ia diba Iehova Dirava ese ia rakatania lasi. Davida ese Iehova dekenai ia gwau: “Oi idia badinaia taudia be oi rakatania lasi.” (2 Samuela 22:26) Badinaia karana ena anina be dahaka, bona edena dala ai Iehova be unai kara dekenai haheitalai hereadaena ia hahedinaraia?

4, 5. (a) “Badinaia karana” ena anina be dahaka? (b) Edena dala ai mauri lasi gaudia ena badinaia karana be taunimanima ena badinaia karana amo ia idau?

⁴ Heberu Toretoredia lalonai inai hereva “badinaia karana” be mai lalokau ida ena hebogahisi be gau ta dekenai ia hahedinaraia noho ela bona ena ura unai gauna dekenai ia guguru. Badinaia karana ia hahedinaraia tauna be lalokau tauna. To salamo torea tauna ia gwau: “Hua be guba dekenai ia hedinarai hanaihanai” badina hanuaboi ta ta ai hua be ia hedinarai noho. (Salamo 89:37) Unai dala ai ita gwau diba hua be badinaia karana ia hahedinaraia. To hua ena badinaia karana be taunimanima edia hegeregerena lasi. Dahaka dainai? Badina unai kara be lalokau dainai ia vara—mauri lasi gaudia ese unai kara idia hahedinaraia diba lasi.   

⁵ Baibel lalonai badinaia karana be taunimanima kara namo henia karana. Tau ta ese ma ta ia badinaia neganai, anina be edia huanai hetura karana ia noho. Unai badinaia karana be hanaihanai idia hahedinaraia. Ia be davara ena hurehure bamona lasi, lai ese ia odaia lao mai. To badinaia karana eiava noho hanaihanai lalokauna be ia haheauka bona ia gini goada hekwakwanai ia hanaia totona.   

 6. (a) Taunimanima momo ese badinaia karana idia hahedinaraia, a? Baibel ese edena bamona unai ia hahedinaraia? (b) Edena dala ai badinaia karana ena anina do ita dibaia, bona dahaka dainai?

⁶ Momokani hari inai negai, taunimanima momo ese badinaia karana idia hahedinaraia lasi. Nega momo, turadia haida be sibona edia “hetura karana idia hadikaia.” Bona ita kamonai tau eiava hahine ese ena adavana ia rakatania. (Aonega Herevadia 18:24; Malaki 2:14-16) Kara koikoi be bada herea dainai, ita danu be reana peroveta tauna Mika ena hereva ita laloa, ia gwau: “Abidadama tauna be tanobada amo ia boio.” (Mika 7:2) Ena be nega momo taunimanima ese badinaia karana idia hahedinaraia lasi, to unai be Iehova ena kara badana ta. Badinaia karana ena anina ita dibaia dalana hereadaena be, Iehova ese unai kara—ena lalokau karana ena kahana badana ta—ia hahedinaraia dalana ita tahua.

7, 8. Dahaka dainai Iehova sibona be badinaia karana ia hahedinaraia goevagoeva?

⁷ Baibel ese Iehova be inai bamona ia gwauraia, “oi sibona be emu taunimanima oi rakatania lasi.” (Apokalupo 15:4) To, unai badinaia karana be Iehova sibona ese ia hahedinaraia, a? Taunimanima bona aneru ese unai badinaia karana idia hahedinaraia danu, a? (Iobu 1:1; Apokalupo 4:8) Bona Iesu Keriso be edena bamona? Ia be Dirava ia “abidadama henia tauna” badana, ani? (Salamo 16:10) To, dahaka dainai Iehova sibona be badinaia karana ia hahedinaraia?

⁸ Gau ginigunana be, ita laloaboio lasi, badinaia karana be lalokau karana. “Dirava be lalokau”—unai be iena kara badana—unai dainai, daika be Iehova hegeregerena badinaia karana ia hahedinaraia goevagoeva diba? (1 Ioane 4:8) Oibe, aneru bona taunimanima be Iehova ena kara idia hahedinaraia diba, to Iehova sibona ese badinaia karana ia hahedinaraia goevagoeva. Ia be “Idaunegai Ia Noho Diravana” dainai, guba bona tanobada ai idia noho taudia ibounai amo, Ia be nega daudau herea lalonai badinaia karana ia hahedinaraia. (Daniela 7:9) Unai dainai, badinaia karana be Iehova ena kara korikorina. Tau ta ia hegeregere lasi unai kara ia hahedinaraia goevagoeva, Iehova ese ia hahedinaraia bamona. Haheitalai haida mani ita itaia.

 9. Edena dala ai “Iehova be ena “kara ibounai lalonai kara momokani ia badinaia”?

⁹ Iehova be ena “kara ibounai lalonai kara momokani ia badinaia.” (Salamo 145:17) Edena dala ai? Salamo 136 ese haere ia henia. Unai karoa ese Iehova ena hahemauri karadia haida ia gwauraia, Israela taudia be hoa dalanai Davara Kakakakana amo Ia ruhaia sivaraina danu ia noho. Unai ane ena siri ta ta ai inai hereva idia noho: “Iena lalokau be ia noho hanaihanai.” Unai ane be rau 289 dekenai, “Oi Laloa Dobu Gaudia” mauana lalonai ia noho. Unai siri oi duahia neganai, do oi hoa badina Iehova ese ena taunimanima dekenai noho hanaihanai lalokauna be dala momo ai ia hahedinaraia. Oibe, Iehova ena kamonai hesiai taudia be heduru totona ia idia boiboi henia neganai, ia kamonai bona nega korikori ai ia durudia, unai amo badinaia karana ia hahedinaraia. (Salamo 34:6) Iehova ena noho hanaihanai lalokauna ena hesiai taudia be do senisi lasi, bema idia be ia idia badinaia noho.

10. Edena dala ai Iehova ese ena taravatu dekenai badinaia karana ia hahedinaraia?

¹⁰ Danu Iehova ese badinaia karana ia hahedinaraia dalana ta be, ena taravatu ia badinaia momokani. Taunimanima haida be edia lalohadai idia haidaua momo, badina edia ura kava bona hemami ese ia hakaudia, to Iehova be unai bamona lasi, ena lalohadai dahaka be maoro bona dahaka be kerere dekenai ia haidaua diba lasi. Lagani tausen momo lalonai, ena lalohadai babalau, kaivakuku tomadiho henia karana, bona ala-ala dekenai be ia idau lasi. Iena peroveta tauna Isaia amo ia gwau: “Lau be do lau idau lasi ela bona umui buruka.” (Isaia 46:4) Unai dainai, Dirava ena Hereva lalonai idia noho hakaua herevadia ita badinaia neganai, ita diba momokani namo do ita davaria.​—Isaia 48:17-19.

11. Haheitalai haida amo oi hahedinaraia, Iehova ese ena gwauhamata ia badinaia.

¹¹ Iehova be ena gwauhamata herevadia ia hagugurua karana amo, badinaia karana ia hahedinaraia danu. Gau ta ia perovetalaia neganai, ia vara momokani. Unai dainai Iehova ia gwau: “Egu uduna amo ia raka-lasi herevana be . . . lau dekenai do ia giroa kava lasi, to egu ura hegeregerena anina do ia havaraia, bona egu hereva hegeregerena do idia vara bona egu hereva do ia guguru.” (Isaia 55:11) Iehova be ena hereva hegeregerena ia kara dainai, ena taunimanima dekenai badinaia karana ia hahedinaraia. Do ia karaia lasi gauna ta amo ena taunimanima ia koidia lasi bena idia naria kava. Unai kara dekenai Iehova be goevadae momokani dainai ena hesiai tauna Iosua ia gwau diba: “Iehova ese Israela taudia dekenai ia karaia gwauhamata namodia ibounai amo, ta ia moru lasi. Oibe, unai gwauhamata ibounai idia guguru.” (Iosua 21:45) Vadaeni, ita diba momokani, do ita lalohisihisi lasi badina Iehova ese ena gwauhamata do ia hagugurua.​—Isaia 49:23; Roma 5:5.

12, 13. Edena dala ai Iehova ena lalokau be ia noho hanaihanai?

¹² Ita herevalaia bamona, Baibel ese ita ia hadibaia Iehova ena “lalokau be ia noho hanaihanai.” (Salamo 136:1) Edena dala ai? Gau ta be inai, Iehova be kara dika ia gwauatao momokani tauna. Karoa 26 dekenai ita herevalaia bamona, Iehova ese ta ena kara dika gunana ia gwauatao murinai, do ia laloaboio momokani. “Taunimanima ibounai be idia kara dika vadaeni bona Dirava ena hairai idia reaia” dainai, Iehova ena noho hanaihanai lalokauna ita laloa bada be gau badana.​—Roma 3:23.

¹³ To danu, dala ma ta ai Iehova ena lalokau be ia noho hanaihanai. Iena Hereva ia gwau kara maoromaoro taudia be “sinavai badinai idia hadoa au bamona, unai au be ena nega ai huahua ia havaraia, bona ena raurau idia kakoro lasi. Bona unai tauna be ia karaia gaudia ibounai lalonai do ia kwalimu.” (Salamo 1:3) Ena raurau idia kakoro lasi au namo hereana ta mani oi laloa! Unai hegeregerena, bema Dirava ena Hereva ita moalelaia, iseda mauri do ia daudau, maino ai do ita noho, bona ita karaia gaudia ese anina namona do idia havaraia. Iehova ese ia idia badinaia hesiai taudia dekenai ia henia hahenamo be do idia noho hanaihanai. Momokani, Iehova ese do ia mailaia tanobada matamatana lalonai, kamonai taudia be iena noho hanaihanai lalokauna do idia moalelaia ela bona hanaihanai.​—Apokalupo 21:3, 4.

14. Iehova be edena dala ai ia hahedinaraia ia idia abidadama henia taudia edia kara ia laloa bada?

¹⁴ Iehova ese hanaihanai badinaia karana ia hahedinaraia. Iehova ena kara ia haidaua diba lasi dainai, ena kamonai hesiai taudia dekenai ia hahedinaraia badinaia karana be ia hamaragia lasi. Salamo torea tauna ia gwau: “Guna lau be mero matamata, hari lau buruka vadaeni, to nega ta lau itaia lasi kara maoromaoro tauna ta be Dirava ese ia rakatania Iena natudia danu be aniani idia tahua lasi. Iehova be kara maoromaoro ia ura henia, Bona ia idia badinaia taudia do ia rakatania lasi.” (Salamo 37:25, 28) Oibe, Iehova be Havaraia Tauna dainai, ia ita tomadiho henia be maoro. (Apokalupo 4:11) To Iehova be badinaia karana ia hahedinaraia Diravana dainai, iseda abidadama karadia ia laloa bada.​—Malaki 3:16, 17.

15. Iehova be Israela taudia dekenai Iena badinaia karana ia hahedinaraia dalana mani oi gwauraia hedinarai.

¹⁵ Iehova ena noho hanaihanai lalokauna dainai, ena taunimanima be metau idia davaria neganai, hanaihanai idia ia durua. Salamo torea tauna ia gwau: “Ia be ia idia badinaia taudia edia mauri ia gimaia, Ia ese kara dika tauna ena imana amo idia ia hamauria.” (Salamo 97:10) Mani Israela taudia ia kara henia dalana ita laloa. Iehova ese hoa dalanai Israela taudia be Davara Kakakakana amo ia hamauridia murinai, ane amo Iehova dekenai idia gwau: “Emu lalokau lalonai, oi ese oi hoia lou taudia oi hakaua.” (Esodo 15:13) Iehova ese Davara Kakakakana dekenai Israela taudia ia hamauria karana ese ena noho hanaihanai lalokauna ia hahedinaraia. Unai dainai Mose ese Israela taudia ia hamaoroa: “Umui be bese badana dainai Iehova ese umui ia lalokau henia bona ia abia hidi, a? Lasi, bese ibounai amo umui be maragi herea. To, Iehova ese umui ia lalokau henia bona emui sene taudia dekenai ia karaia gwauhamata ia badinaia dainai, Iehova ese ena imana goadana amo umui ia ruhaia, ia ese umui be umui ia guia tanona amo ia hakaua raka-lasi, oibe, Aigupito ena king Farao ena siahu amo.”​—Deuteronomi 7:7, 8.

16, 17. (a) Israela taudia be edena dala ai Iehova ena kara idia laloa bada lasi, to Iehova ese edena bamona idia dekenai hebogahisi ia hahedinaraia? (b) Israela taudia momo be dahaka idia karaia dainai “hanamoa dalana be lasi,” bona unai sivarai amo dahaka ita dibaia?

¹⁶ Oibe, Israela besena be Iehova ena noho hanaihanai lalokauna idia laloa bada lasi, badina Iehova ese idia ia hamauria murinai, “Ataiai Momokani Diravana idia gwau-edeede henia noho, idia be ia [Iehova] dekenai idia kara dika loulou.” (Salamo 78:17) Lagani handred momo lalonai, Iehova idia gwau-edeede henia loulou, idia rakatania bona dirava koikoidia idia tomadiho henia bona tomadiho koikoi edia kara idia badinaia, unai ese idia ia hamiroa. To, Iehova ese ena gwauhamata ia makohia lasi. To, peroveta tauna Ieremia amo, Iehova ese ena taunimanima ia noia, ia gwau: “Gwau-edeede Israela e, umui giroa mai. Lau ese mai badu ida umui do lau kara henia noho lasi, badina lau be hebogahisi Diravana, do lau badu hanaihanai lasi.” (Ieremia 3:12) To, Karoa 25 ena hereva bamona, Israela taudia momo idia ura lasi edia kara idia haidaua. Oibe, “idia ese Dirava momokanina ena gwaukau taudia idia kirikirilaia noho, bona ena hereva idia abia dae lasi bona ena peroveta taudia idia hevasehalaia.” Unai dainai dahaka ia vara? Dokonai, “Iehova ena badu be ena taunimanima latanai ia diho.”​—2 Sivarai 36:15, 16.

¹⁷ Unai amo dahaka ita dibaia? Ena be Iehova ese badinaia karana ia hahedinaraia, ta ese ia do ia koia lasi bona gau ibounai ia abia dae kava lasi. Momokani, Iehova ena “lalokau be bada herea” bona bema badina namona ia itaia neganai, mai moale ida hebogahisi ia hahedinaraia. To dahaka ia vara bema kerere ia karaia tauna ia ura lasi ena kara ia haidaua? Unai bamona ia vara neganai, Iehova ese ena kara maoromaoro taravatudia ia badinaia bona kerere taudia ia kota henia. Mose ia hamaoroa bamona: Iehova be ‘kerere tauna do ia panisia momokani.’​—Esodo 34:6, 7.

18, 19. (a) Iehova ese kara dika taudia do ia panisidia karana ese edena bamona ena badinaia karana ia hahedinaraia? (b) Iehova ese ena hesiai taudia, dagedage bona mase idia davaria taudia dekenai, edena bamona badinaia karana do ia hahedinaraia?

¹⁸ Dirava ese kara dika taudia ia panisidia karana ese ena badinaia karana ia hahedinaraia danu. Edena dala ai? Apokalupo bukana lalonai Iehova ese aneru 7 dekenai ia henia oda herevana ta ese unai ia hahedinaraia: “Umui lao bona Dirava ena badu ena disi 7 be tanobada dekenai umui bubua.” Aneru ihatoina ena disi be “sinavai bona idia lohilohi ranu lalonai ia bubua” neganai, rara ai ia lao. Bena unai aneru be Iehova dekenai ia gwau: “Dirava e, oi be harihari oi noho, gunaguna oi noho, oi be emu taunimanima oi rakatania lasi Diravana, bona oiemu kara be maoromaoro, unai dainai oi ese unai hahemaoro herevadia oi henia, badina idia ese helaga taudia bona peroveta taudia edia rara idia bubua, bona oi ese idia dekenai rara oi henia, idia inua totona, idia dekenai unai ia vara be maoro.”​—Apokalupo 16:1-6.

¹⁹ Mani oi itaia, aneru ese unai kota herevana ia gwauraia neganai, Iehova dekenai ia gwau, oi be emu taunimanima “oi rakatania lasi Diravana.” Dahaka dainai? Badina Iehova ese kara dika taudia ia haorea karana amo, ena hesiai taudia, idia momo be idia dagedage henia bona idia hamasedia taudia dekenai badinaia karana ia hahedinaraia. Iehova ese unai bamona taudia ia laloatao. Ia ura dikadika unai kamonai mase taudia ia itaia lou, bona Baibel ese ia hahedinaraia ia ura unai taudia dekenai toreisi lou ahuna namona do ia henia. (Iobu 14:14, 15) Herevana idia mase vadaeni, to Iehova ese idia ia laloatao. Ia dekenai “idia ibounai be idia mauri noho.” (Luka 20:37, 38) Iehova ia ura ia laloatao taudia do ia hamauridia lou karana ese iena badinaia karana ia hamomokania.

20. “Ia hebogahisi henia urodia,” be daidia, bona Iehova ese edena dala ai idia dekenai badinaia karana ia hahedinaraia?

²⁰ Idaunega amo ema bona hari, Iehova ese dala hereadaena ai ena kamonai taudia dekenai badinaia karana ia hahedinaraia. Oibe, lagani tausen momo lalonai, Iehova ese “dika do idia davaria gaudia dekenai ia haheauka.” Dahaka dainai? Badina “unai bamona ia karaia, ia hebogahisi henia urodia dekenai iena hairai bada ia hahedinaraia totona, unai uro be guna ia hegaegaelaia hairai do idia abia.” (Roma 9:22, 23) “Ia hebogahisi henia urodia,” kudou-maoro taudia unai, be lauma helaga ese ia horoa taudia, idia be Keriso ida ena Basileia lalonai do idia lohia hebou. (Mataio 19:28) Unai taudia totona hahemauri dalana ia kehoa karana amo, Iehova be Aberahamo dekenai badinaia karana ia hahedinaraia, badina Aberahamo dekenai inai gwauhamata ia karaia, ia gwau: “Emu natuna amo tanobada ena bese ibounai be hahenamo do idia abia, badina oi ese lau oi kamonai henia.”​—Genese 22:18.

21. (a) Edena dala ai Iehova ese “hisihisi badana” amo idia hanaia mai “hutuma bada” taudia dekenai badinaia karana ia hahedinaraia? (b) Iehova ena badinaia karana ese oi ia hagoadaia dahaka oi karaia totona?

²¹ Iehova ese “hutuma bada” taudia dekenai badinaia karana ia hahedinaraia danu, idia be “hisihisi badana” amo idia hanaia mai taudia, bona tanobada paradaisona lalonai do idia noho ela bona hanaihanai. (Apokalupo 7:9, 10, 14) Ena be ena hesiai taudia be idia goevadae lasi, to Iehova ese idia dekenai tanobada paradaisona ai mauri hanaihanai idia abia dalana ia kehoa. Edena dala ai unai ia karaia? Mauri davalaia boubouna amo—Iehova ese badinaia karana hereadaena ia hahedinaraia. (Ioane 3:16; Roma 5:8) Kara maoromaoro idia ura henia taudia be Iehova ena badinaia karana dainai ia kahirakahira idia lao. (Ieremia 31:3) Iehova ena badinaia karana oi dibaia dainai unai ese oi ia durua ia kahirakahira oi lao, bona oi mamia unai badinaia karana do ia hahedinaraia noho, ani? Ita ura Dirava kahirakahira ita lao, badina ita ia lalokau henia, bona unai ese ita ia hagoadaia ia ita hesiai henia bona ia dekenai badinaia karana ita hahedinaraia.