Iehova Ia Ura Dika ta Oi Davaria Lasi

ARAMAGEDONO tuarina ia vara neganai, Siahu Ibounai Diravana be dala do ia karaia ia lalonamo henia taudia ibounai ese “mauri do idia davaria” totona. (Ioe. 2:​32) To, momokani Iehova be nega ibounai ia ura taunimanima be dika amo ia gimaia. Ia be “mauri ibounai ena badina” dainai, taunimanima edia mauri ia laloa bada bona ia ura ia gimadia.​​—⁠Sal. 36:⁠9.

Idaunegai, Dirava ena hesiai taudia danu be Dirava hegeregerena mauri idia laloa bada. Genese 33:18 ia gwau, Iakobo bona ena ruma bese be edia laolao ena dokonai dika ta idia davaria lasi. Iakobo ia diba Iehova ese do ia gimaia, to danu ia be gau haida ia karaia ia ida idia laolao taudia ia gimaia totona. (Gen. 32:​7, 8; 33:​14, 15) Baibel ena hakaua herevadia oi badinaia neganai, oi sibona bona ma haida be dika do umui davaria lasi. Kingdom Hall haginia gaukara idia karaia taudia, dika idia vara gabudiai heduru idia henia taudia, bona unai bamona gaukara ma haida idia karaia taudia ese unai hakaua herevadia idia badinaia dalana mani ita itaia.

Mose Ena Taravatu ese Ia Gimadia

Mose ena Taravatu ese Israela taudia ia gimaia, dika idia davaria lasi totona. Hegeregere, Israela tauna ta be ruma ta ia haginia neganai, guhi ena isena ai magu maragina ta ia haginia be namo. Taunimanima be nega momo edia ruma ena guhi dekenai idia noho, unai dainai unai magu maragina ese idia do ia gimaia idia moru lasi totona. (1 Sam. 9:​26; Mat. 24:17) Bema Israela tauna be unai taravatu ia badinaia lasi, bona tau ta be ruma ena guhi amo ia moru, Iehova ese kerere ena davana be ruma tauna dekenai do ia henia.​​—⁠Deu. 22:⁠8.

Mose ena Taravatu lalonai animal ese tau ta ia haberoa bona idia panisia dalana ia gwauraia danu. Hegeregere, bema boromakau ta be ena doana amo tau ta ia hamasea, unai boromakau ena biaguna ese boromakau do ia alaia mase, unai amo ma haida do ia hadikaia lasi. Boromakau ena biaguna ese unai vamu do ia ania o hoihoilaia be taravatu, unai dainai bema boromakau ia alaia mase ia be moni bada ia negea unai. To, bema boromakau ese tau ta ia haberoa to biaguna ese unai boromakau ia naria namonamo lasi, dahaka do ia vara? Bema unai boromakau tamona ese tau ma ta ia hamasea, unai boromakau bona iena biaguna do idia hamasea. Unai taravatu ese Israela taudia ia durua edia animal idia naria namonamo totona.​​—⁠Eso. 21:​28, 29.

Taravatu ese tulu gaukaralaia namonamo karana ia herevalaia danu. Israela taudia momo be ira idia gaukaralaia lahi au idia utua totona. Bema aksiden ai au ia utua tauna ese ia gaukaralaia ira ena kwarana be ia kokia bona iena turana ia hamasea, vadaeni au ia utua tauna be heau mauri hanuana ta dekenai do ia heau lao. Unuseniai do ia noho ela bona hahelaga tauna ia mase. Unai ena anina be aksiden amo ena turana ia hamasea tauna be lagani momo lalonai iena ruma bese bona ruma do ia itaia lasi. Oibe, Mose ena Taravatu ese Israela taudia ia hadibaia Iehova ena matanai mauri be helaga. Iehova ena lalohadai ia abia tauna ese mauri ia laloa bada dainai, ena tulu ia naridia bona ia gaukaralaia namonamo.​​—⁠Num. 35:25; Deu. 19:​4-6.

Unai taravatu ibounai ese idia hahedinaraia goevagoeva, Iehova ia ura iena taunimanima be edia ruma lalonai bona murimurinai idia karaia gaukara ibounai idia karaia namonamo, bero idia abia lasi totona. Ena be tau ta be aksiden amo ma ta ia haberoa o hamasea, to Iehova ese do ia hahemaoro henia. Iehova ena lalohadai be ia haidaua lasi. (Mal. 3:⁠6) Hari inai negai danu, Ia ura taunimanima idia naria namonamo, unai amo idia sibona bona ma haida idia haberoa lasi. Iehova tomadiho henia totona, ruma ita haginia neganai unai hereva be mai anina bada.

Konstraksen Gaukara Dekenai Naria Namonamo

Kingdom Hall, Assembly Hall, bona brens opesi haginia bona hanamoa gaukara ita karaia be hahenamo badana. Bona dika idia davaria taudia dekenai heduru ita henia gaukarana ita karaia danu be hahenamo ta. Nega ibounai, mai aonega ida eda gaukara ita karaia namonamo, badina bema ita naria namonamo lasi, gaukara maragina ta dekenai ita bona ma haida be bero ita abia diba. (Had. 10:⁠9) Oibe, hanaihanai gaukara lalonai ita naria namonamo be gau badana, unai amo bero do ita abia lasi.

Baibel ia gwau: “Eregabe taudia edia hairaina be edia goada. To buruka taudia edia hairaina be edia huina kurokuro.” (Aon. 20:29) Matamata taudia be mai edia goada gaukara metaudia idia karaia totona. To, burukadia be konstraksen gaukara idauidau idia diba momo, unai dainai tulu idauidau idia gaukaralaia diba bona idia karaia gaudia edia toana be namo herea. Unai burukadia be idia matamata neganai, edia goada idia gaukaralaia gaukara metaudia idia karaia totona. Bema oi be volantia matamata ta, namona be burukadia edia gaukara dalana oi itaia, bona edia hadibaia dalana oi badinaia. Bema oi ura diba oi abia, konstraksen gaukara idia diba momo tadikaka ese oi dekenai gau momo idia hadibaia diba. Hegeregere, bero ia havaraia diba gaukara kohu oi gaukaralaia namonamo, bona metau gaudia huaia dalana maorona be oi dekenai idia hadibaia. Unai amo mai moale ida emu gaukara do oi karaia namonamo bona bero ta do oi abia lasi.

Konstraksen gabunai idia gaukara taudia be hanaihanai idia naria namonamo be gau badana. Badina gaukara gabunai gau momo idia idau haraga. Hegeregere, guna kahana ta ai tano ia noho to hari unai gabu be guri ta ia noho. O gaukara taudia ma haida be vadavada, o reirei ta, o peni ena tini idia kokia. Bema oi itaia namonamo lasi, bero oi abia diba. Gavamani edia taravatu ia gwau gaukara taudia be bero idia abia lasi totona, sibona idia gimaia gaukara kohu idia gaukaralaia be namo. Konstraksen gabunai matana naria galasi, kwara gauna, bona gaukara tamaka be oi do idia gimaia bero oi abia lasi totona. Unai gaudia oi naria namonamo bona oi gaukaralaia neganai, oi idia gimaia diba.

Ena be tulu momo edia toana be oi gaukaralaia haraga diba, to oi gaukaralaia namonamo totona, gaukaralaia dalana oi diba be namo. Bema tulu gaukaralaia dalana oi diba namonamo lasi, gaukara naria tadikaka oi hadibaia be namo. Ia ese oi do ia durua tulu gaukaralaia namonamo dalana oi diba totona. Namona be oi manau, bona iena hereva oi abia dae. Oibe, unai be mai anina bada konstraksen gabunai oi bona ma haida ese bero umui abia lasi totona.​​—⁠Aon. 11:⁠2.

Konstraksen gabunai momo be idia moru bona bero idia abia. Vadavada o idia haginia patapata dekenai oi do daekau lasi neganai, namona be oi sekea bema idia gini namonamo eiava. Bema oi be idia haginia patapata o guhi latanai oi gaukara, oi moru lasi totona, emu gabana dekenai beleta gauna oi kwatua be namo. Bema guhi ataiai o unai bamona atai gabudia ai gaukara totona oi daradara, mani gaukara naria tadikaka oi hereva henia.a

Tanobada hegegemadai Iehova ena hesiai taudia edia namba ia bada daekau noho dainai, tomadiho momokani totona Kingdom Hall bona ruma ma haida haginia gaukarana ia bada danu. Kingdom Hall konstraksen o unai bamona gaukara ma haida idia naria tadikaka edia maduna be, idia henunai idia gaukara Iehova ena mamoe do idia naria, bero idia abia lasi totona. (Isa. 32:​1, 2) Bema oi be konstraksen gaukara ta ai emu tadikaka bona taihu oi naria, namona be edia namo oi laloa bada. Namona be gaukara gabuna ia goeva bona kohu be gabu idauidau ai idia atoa kava lasi. Namona be edia gaukara dalana idia naria namonamo lasi taudia dekenai, mai manau ida oi hadibaia bero idia abia lasi totona, idia naria namonamo be gau badana. Natudia o gaukara idia diba lasi taudia dekenai gwaumaoro oi henia lasi konstraksen gabunai idia vareai totona. Gaukara taudia ese do idia abia bero oi laloa guna, bona idia oi hadibaia idia naria namonamo totona. Laloatao, iseda ura badana be eda gaukara do ita haorea bona ita ta be bero ta do ita abia lasi.

Lalokau Karana

Tomadiho momokani totona Kingdom Hall bona ruma ma haida haginia gaukara idia karaia taudia be bero idia abia diba. Unai dainai, unai bamona konstraksen gaukara idia karaia taudia idia naria namonamo be gau badana. Baibel ena hakaua herevadia oi badinaia, idia gwauraia dalanai emu gaukara oi karaia bona oi laloa maoromaoro neganai, oi bona emu gaukara turadia be bero ta do umui abia lasi.

Bero ita abia lasi totona ita naria namonamo ena badina badana be dahaka? Lalokau. Oibe, Iehova lalokau henia karana ese ita ia durua ita bona ma haida edia mauri ita laloa bada totona, Ia ese ita ia laloa bada hegeregerena. Bona taunimanima lalokau henia karana ese ita ia durua idia ita haberoa karana ta ita karaia lasi totona. (Mat. 22:​37-​39) Unai dainai, iseda haginia gaukara dekenai idia gaukara taudia ibounai do ita naria namonamo, unai amo dika ta do idia davaria lasi.

[Footnote]

[Box/Picture on page 30]

Vadavada Gaukaralaia Dalana Maorona

Vanegai lagani ta ai, United States dekenai gaukara taudia 160,000 mai kahana be vadavada amo idia moru bona bero idia abia. Danu, taunimanima 150 ma haida be idia moru bona idia mase. Herevana oi be edeseniai oi noho bona oi gaukara, to inai hakaua hereva haida ese oi do idia durua vadavada amo oi moru lasi totona.

◇ Bema vadavada ia mareremarere momo o ia dika oi gaukaralaia lasi, bona oi hanamoa toho lasi. Oi negea be namo.

◇ Vadavada be idauidau bona idia huaia metau be idauidau. Namona be emu tauanina ena metau bona emu tulu edia metau ese oi ura gaukaralaia vadavada ia huaia diba metauna ia hanaia lasi.

◇ Tano ia palaka bona ia auka gabunai emu vadavada do oi haginia. Vadavada be ia goada lasi gabuna eiava ia marere momo patapata, o baketi bona boksi latanai oi haginia lasi.

◇ Namona be dala maorona ai vadavada amo oi daekau bona oi diho.

◇ Vadavada ena atai kahana dekenai oi gini o helai lasi.

◇ Bema vadavada oi gaukaralaia guhi dekenai oi daekau bona diho totona, namona be unai vadavada ena lata ese guhi do ia hanaia mita toi bamona. Vadavada ena aena be varo ta amo oi kwatua o aena badinai reirei ta oi kokoa ia marere lasi totona. Bema unai bamona oi karaia diba lasi, ta oi hadibaia vadavada ia dogoatao bona oi daekau. Vadavada ena atai kahana oi kwatua namonamo ia marere lasi totona.

◇ Namo lasi vadavada dekenai timba ma haida oi atoa patapata oi karaia bona latanai oi gini gaukara ma haida oi karaia totona.

◇ Vadavada ena ataiai kahanai oi gini bona oi gaukara lalonai, bema emu imana o aena oi toia roro vadavada ia hamarerea diba. Unai bamona do oi karaia lasi, badina oi moru garina. Oi gaukara gabuna kahirakahira ai vadavada oi atoa be namo.

◇ Bema iduara ena vairanai vadavada oi atoa bona oi gaukara, namona be iduara dekenai saini ta oi atoa bona iduara oi lokaia. Bema iduara oi lokaia diba lasi, vadaeni ta ia gini diba bona iduara kahirakahira ai idia raka lao taudia do ia hadibaia.

◇ Tau tamona be vadavada dekenai ia gini diba, to bema vadavada idia karaia taunimanima rua be nega tamona ai idia gaukaralaia diba, vadaeni gaukara taudia rua idia gini diba.b

[Footnote]

[Picture on page 29]

Mose ena Taravatu ai, ta be ruma ia haginia neganai, guhi ena isena ai magu maragina ta do ia haginia