“Umui Tanikiu Henia”

“Keriso ena maino nega ibounai do umui abia noho emui kudouna lalonai . . . Bona Dirava do umui tanikiu henia.”​​—⁠KOLOSE 3:⁠15.

 1. Keristani kongregesen bona Satani ese ia biagua tanobadana edia huanai dahaka idau ita itaia?

TANOBADA ibounai lalonai, Iehova ena Witnes taudia edia kongregesen 94,600 lalonai tanikiu karana idia hahedinaraia. Hebou ibounai be Iehova tanikiu henia gurigurina amo ia matamaia bona ia doko. Nega momo inai hereva “tanikiu,” be matamata bona buruka taudia, kamonai matamata taudia bona orea lalonai nega daudau idia noho Witnes taudia be tomadiho totona idia hebou bona mai moale ida idia hebamo neganai, edia uduna amo ita kamonai. (Salamo 133:⁠1) Edia kara be sibona edia ura idia tahua taudia momo amo ia idau momokani, inai taudia be ‘Iehova idia diba lasi, bona sivarai namona idia abia dae lasi’! (2 Tesalonika 1:⁠8) Ita be tanikiu karana ia diba lasi tanobadana ai ita noho. Bona inai tanobada ena dirava​—⁠Satani Diabolo unai, ena kara ita laloa neganai ita hoa lasi, ia ese sibona laloa bada karana ia hahedinaraia badabada, ena hekokoroku bona gwau-edeede karadia be tanobada besena ese ia hahedinaraia noho.​​—⁠Ioane 8:​44; 2 Korinto 4:4; 1 Ioane 5:⁠19.

 2. Dahaka sisiba herevana ita abia be namo, bona dahaka henanadai do ita lalodia?

² Satani ena tanobada ese ita ia hagegea dainai, namona be ita naria namonamo ena kara idauidau ese iseda lalona ia veria garina. Aposetolo taudia edia negai, aposetolo Paulo ese Efeso Keristani taudia ia hadibaia lou, ia gwau: “Inai tanobada ena kara dika dalana umui raka. Umui ese lauma dikadia edia biaguna umui kamonai henia. Inai lauma dika ese Dirava idia kamonai henia lasi taudia edia lalona dekenai harihari ia gaukara noho. Guna ita ibounai be idia bamona ita karaia. Iseda tauanina edia ura dikadia, bona iseda lalona edia ura kava sibona ita karaia. Vadaeni unai bamona ita noho dainai, iseda dika davana korikori be Dirava ena badu, taunimanima oredia ibounai hegeregerena.” (Efeso 2:​2, 3) Hari inai negai, momo dekenai unai be momokani. Edena dala ai tanikiu karana ita hahedinaraia noho diba? Iehova ese dahaka heduru ia henia? Edena dala namodia ai tanikiu karana korikorina ita hahedinaraia diba?

Tanikiu Karana Ita Hahedinaraia Ena Badina Idauidau

 3. Dahaka dainai Iehova ita tanikiu henia?

³ Iehova Dirava, iseda Havaraia Tauna bona Mauri Henia Tauna, ese ita dekenai ia henia harihari gaudia namodia haida ita laloa neganai, ita tanikiu henia. (Iamesi 1:​17) Dina ibounai Iehova ita tanikiu henia ita mauri dainai. (Salamo 36:⁠9) Iehova ese ia karaia gaudia momo ita itaia, hegeregere dina, hua, bona hisiu. Iseda tanobada be mauri durua gaudia amo ia honu, tanobada ia gegea hodahoda be maoro momokani, bona mauri gaudia be sibona idia hagoevaia lou diba. King Davida ia gwau: “Lohiabada e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi. Lau ese oiemu kara, bona oiemu laloa, be taunimanima dekenai lau ura gwauraia, to lau be hegeregere lasi momokani. Badina oiemu kara bona laloa be momo herea, duahia diba lasi.”​​—⁠Salamo 40:⁠5.

 4. Iseda kongregesen lalonai hebamo karana ita moalelaia dainai, dahaka dainai Iehova ita tanikiu henia be namo?

⁴ Ena be Iehova ena hesiai taudia be paradaiso korikorina dekenai idia noho lasi, to hari inai negai lauma paradaisona lalonai idia noho dainai idia moale. Iseda Kingdom Hall bona distrik bona sekit hebouhebou dekenai, ita itaia iseda tadikaka ese Dirava ena lauma ena huahua idia hahedinaraia. Momokani, Witnes taudia haida ese tomadiho idia diba sisina eiava idia diba lasi taudia idia haroro henia neganai, Paulo ese ia torea revarevana Galatia taudia dekenai idia herevalaia. “Tauanina ena kara” idauidau idia herevalaia guna, bena kamonai taudia ese idia itaia gaudia idia henanadailaia. (Galatia 5:19-23) Momo do idia abia dae unai kara idauidau be hari idia vara noho. Dirava ena lauma ena huahua ese ia havaraia kara namodia idia itaia bona Witnes taudia ese idia boiria Kingdom Hall dekenai idia mai unai kara idia itaia totona neganai, momo be maoromaoro idia gwau: “Momokani Dirava be umui emui huanai ia noho.” (1 Korinto 14:25) Bona unai kara namodia be Kingdom Hall sibona dekenai ita davaria lasi. Herevana edeseniai oi lao, Iehova ena Witnes taudia​—⁠edia namba be milioni 6 ia hanaia​—⁠idia danu oi hebou neganai, unai bamona moale karana tamona do oi itaia. Momokani, unai bamona hebamo karana be badina ta Iehova ita tanikiu henia totona, badina unai ia vara totona ia ese ena lauma helaga ia henia.​​—⁠Sepanaia 3:⁠9; Efeso 3:​20, 21.

5, 6. Edena dala ai Dirava ena harihari gauna hereadaena dainai tanikiu karana ita hahedinaraia diba?

⁵ Iehova ese ita dekenai ia henia harihari gauna goevadaena bona hereadaena be iena Natuna, Iesu, amo mauri davalaia boubouna Ia henia. Aposetolo Ioane ia gwau: “Dirava ese unai bamona ita ia lalokau henia dainai, namona be ita ta ta dekenai do ita lalokau henia, ani?” (1 Ioane 4:11) Oibe, mauri davalaia boubouna dainai iseda lalokau Iehova dekenai ita hahedinaraia bona ita tanikiu henia, to unai sibona lasi, namona be iseda mauri dalana amo ita hahedinaraia ma haida ita lalokau henia.​​—⁠Mataio 22:​37-​39.

⁶ Iehova ese idaunegai Israela ia kara henia dalana ita laloa karana amo, tanikiu hahedinaraia karana dekenai gau momo do ita dibaia. Iehova ese Mose amo Israela taudia dekenai ia henia Taravatu amo, idia dekenai gau momo ia hadibaia. ‘Taravatu dekenai hereva momokani bona aonega’ idia noho, unai amo gau momo ita dibaia diba, bona unai ese ita do ia durua Paulo ena sisiba ita badinaia totona, ia gwau: “Dirava do umui tanikiu henia.”​​—⁠Roma 2:​20; Kolose 3:⁠15.

Mose Ena Taravatu amo Gau Toi Ita Dibaia

 7. Edena dala ai Israela taudia ese kohu karoa 10 amo karoa ta idia henia karana amo Iehova dekenai edia tanikiu karana idia hahedinaraia?

⁷ Mose ena taravatu lalonai, Iehova ese dala toi ia hahedinaraia, unai amo Israela taudia ese ena namo bada dainai edia tanikiu karana idia hahedinaraia diba. Ginigunana be edia kohu ena karoa 10 amo karoa ta idia henia karana. Uma aniani ena karoa 10 amo karoa ta bona “boromakau orea bona mamoe orea danu edia karoa namba 10” be “helaga, Lohiabada ena.” (Levitiko 27:​30-​32) Israela taudia ese idia badinaia neganai, Iehova ese idia ia hanamoa bada. “Umui ese emui kohu bona moni ibounai do umui haria kahana 10, bona unai kahana 10 dekena amo kahana ta do umui mailaia, egu Dubu Helaga dekenai do umui atoa. Unai neganai egu gaukara taudia be mai edia aniani. Lau do umui tohoa karaia. Unai kahana ta lau dekenai do umui henia, vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.”​​—⁠Malaki 3:⁠10.

 8. Edena dala ai ta ena ura hegeregerena ia henia harihari gaudia be karoa 10 amo karoa ta henia karana amo ia idau?

⁸ Gau iharuana be, kohu 10 amo karoa ta idia henia sibona lasi, to Iehova ese dala ia karaia danu Israela taudia ese edia ura hegeregerena harihari gaudia idia henia totona. Mose ia hadibaia Israela taudia do ia hamaoroa, ia gwau: “Umui do lau henia tano dekenai umui ginidae neganai, inai taravatu do umui badinaia: Unai tano dekenai anina do umui ania hamatamaia neganai, aniani haida be harihari gauna Lohiabada dekenai do umui henia.” Bona edia uru ibounai lalonai ‘bema paraoa idia gabua, beredi ginigunana, uiti anina ginigunana dekena amo be Lohiabada ena vairanai do idia atoa, ia be harihari gauna, Lohiabada ena.’ Laloatao, edia aniani ginigunana amo hida do idia henia be Taravatu ese ia gwauraia lasi. (Numera 15:​18-21) To Israela taudia ese edia tanikiu karana hahedinaraia totona harihari gaudia idia henia neganai, idia diba Iehova ese idia do ia hanamoa. Esekiela ese ena matahanai amo ia itaia dubuna dekenai, unai bamona idia karaia danu. Ia gwau: “Uma gaudia, idia vara guna gaudia idauidau ibounai bona emui harihari gaudia idauidau ibounai, be hahelagaia taudia do idia abia, edia. Bona umui ese beredi umui gabua neganai ibounai, umui ese emui beredi ginigunana danu be hahelagaia taudia dekenai do umui henia. Unai bamona umui karaia neganai, lau Dirava ese emui ruma ta ta do lau hanamoa.”—⁠Esekiela 44:⁠30.

 9. Uma dekenai aniani orena rakatania karana amo, Iehova ese dahaka ia hadibaia?

⁹ Gau ihatoina be, Iehova ese dala ia karaia Israela taudia be edia uma dekenai aniani orena do idia rakatania, ogogami taudia totona. Dirava ese idia ia hadibaia ia gwau: “Umui emui uma ena anina umui utua neganai, do umui utua lao lasi ela bona uma ena hetoa korikori dekenai. Bona tano dekenai idia moru kava uma anina gaudia do umui gogoa lasi. Umui emui vain ena anina danu do umui gogoa ore momokani lasi. Kaia ia misi gaudia, bona tano dekenai idia moru gaudia do umui gogoa lasi. Umui rakatania, badina idia be ogogami taudia, bona idau bese taudia edia. Lau inai Lohiabada, emui Dirava.” (Levitiko 19:​9, 10) Unai kara dekenai danu, hida do idia henia be Taravatu ese ia gwauraia lasi. Unai be Israela taudia ta ta sibona edia ura hegeregerena, hida do idia rakatania ogogami taudia totona. Aonega King Solomona ia gwau: “Bema ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.” (Aonega Herevadia 19:17) Unai amo Iehova ese gau lasi taudia hebogahisi henia bona laloa bada karana ia hadibaia.

10. Israela taudia ese tanikiu karana idia hahedinaraia lasi neganai, dahaka dika idia davaria?

¹⁰ Israela taudia ese Iehova idia kamonai henia bona kohu ena karoa 10 ena karoa ta idia mailaia, edia ura hegeregerena harihari gaudia idia henia, bona ogogami taudia totona aniani oredia idia rakatania neganai, Iehova ese idia ia hanamoa. To, Israela taudia ese tanikiu karana idia hahedinaraia lasi neganai, Iehova ese ia hanamodia lasi. Unai dainai dika idia davaria bona gabeai igui hesiai taudia bamona tano idauna dekenai idia abidia lao. (2 Sivarai 36:​17-​21) Unai amo dahaka ita dibaia?

Tanikiu Karana Ita Hahedinaraia

11. Edena dala badana ai Iehova dekenai iseda tanikiu karana ita hahedinaraia diba?

¹¹ Iehova ita hanamoa bona tanikiu henia diba dalana badana be “boubou gauna” ita henia danu. Momokani, ita be Keristani taudia Mose ena Taravatu henunai ita noho lasi dainai, animal bona uma aniani be boubou gauna bamona do ita henia lasi. (Kolose 2:​14) To, aposetolo Paulo ese Heberu Keristani taudia ia hagoadaia, ia gwau: “Namona be Dirava do ita hanamoa, Iesu ena ladana dainai. Bona inai hanamoa Dirava dekenai do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.” (Heberu 13:15) Iseda diba bona kohu ita gaukaralaia Iehova ita hanamoa totona, herevana unai be haroro gaukara ai eiava iseda Keristani tadikaka edia “hebou badana” lalonai, unai dala amo iseda lalokau Guba Tamana Iehova Dirava dekenai mai kudouna ibounai ida tanikiu karana ita hahedinaraia diba. (Salamo 26:12) Unai bamona ita karaia neganai, Israela taudia ese edia tanikiu karana Iehova dekenai idia hahedinaraia dalana amo dahaka ita dibaia diba?

12. Iseda Keristani maduna ita laloa neganai, kohu karoa 10 amo karoa ta henia karana amo dahaka ita dibaia?

¹² Gau ginigunana be, ita herevalaia vadaeni hegeregerena, kohu ena karoa 10 amo karoa ta henia karana be Israela taudia ese edia ura hegeregerena do idia karaia eiava karaia gauna lasi; inai be maduna ta, idia ta ta ibounai totona. Ita be Keristani taudia dainai, iseda maduna be ita haroro bona Keristani hebou do ita lao henia. Unai gaudia ita karaia be gau badana. Iesu ese ena peroveta hereva badana lalonai nega dokona ia herevalaia neganai, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14; 28:​19, 20) Aposetolo Paulo be Dirava ena lauma ese ia hasiahua bona Keristani hebou ia herevalaia neganai, ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Heberu 10:​24, 25) Iehova dekenai iseda tanikiu karana ita hahedinaraia bema mai moale ida haroro bona hadibaia gaukarana ita karaia, hanaihanai iseda kongregesen hebou dekenai iseda tadikaka ida ita hebamo, bona unai gaukara ita laloa ia be ita karaia diba gaukara namona ta.

13. Harihari gaudia henia karana bona uma aniani orena rakatania karana amo dahaka ita dibaia?

¹³ Ma danu, Israela taudia ese edia tanikiu karana idia hahedinaraia daladia rua​​—⁠harihari gaudia henia karana bona uma dekenai aniani orena rakatania karana​​—⁠ita laloa karana amo namo ita davaria diba. Kohu ena karoa 10 amo karoa ta henia karana dekenai hida do idia henia be Taravatu ese ia gwauraia, to harihari gaudia henia karana bona uma dekenai aniani orena rakatania karana dekenai hida do idia henia be Taravatu ese ia gwauraia lasi. Unai ese dala ia kehoa Iehova ena hesiai taudia be edia kudouna amo edia tanikiu karana ena bada idia hahedinaraia totona. Unai hegeregerena, ena be haroro gaukara bona Keristani hebou lao henia karana be Iehova ena hesiai taudia ibounai edia maduna badana, to unai ita karaia mai kudouna ibounai bona mai eda ura bada ida, a? Ita laloa unai gaukara ese dala ia kehoa iseda tanikiu karana ita hahedinaraia totona, Iehova ese ita totona ia karaia vadaeni gaudia ibounai dainai, a? Iseda noho dalana hegeregerena inai hesiai gaukara lalonai ita gaukara goada noho, a? Eiava ita laloa idia be maduna sibona dainai ita karaia sibona, a? Oibe, unai henanadai be ita ta ta ese ita haerelaidia be namo. Aposetolo Paulo be inai bamona ia gwau: “Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, unai tau do ia gwauraia kerere totona, unai be namo lasi.”​​—⁠Galatia 6:⁠4.

14. Iseda hesiai gaukara Iehova dekenai ita karaia neganai, Iehova be ita amo dahaka ia ura?

¹⁴ Iehova Dirava be iseda noho dalana ia diba namonamo. Iseda goada ena hetoana ia diba. Iena hesiai taudia ese mai edia ura ida idia henia boubou gaudia ia laloa bada, herevana idia bada eiava maragi. Ia diba ita ibounai ita henia gaudia be tamona lasi, bona unai bamona do ita karaia diba lasi. Paulo ese kohu henia karana ia herevalaia neganai, Korinto Keristani taudia ia hamaoroa: “Bema tau ta ia ura dikadika harihari gauna do ia henia, Dirava ese inai kara do ia ura henia. Dirava ia diba unai tau ena kohu be hida, bona ia laloa karaia, unai tau ena harihari gauna be iena kohu hegeregerena o lasi. Bema tau ta madi be kohu lasi neganai, Dirava ese unai tau ena henia kara do ia laloa momo lasi.” (2 Korinto 8:12) Unai hakaua hereva be mai anina Dirava dekenai bona ita karaia hesiai gaukarana dekenai. Iehova ese iseda hesiai gaukara ia abia dae be iseda gaukara ena bada dainai lasi, to ita karaia dalana​​—⁠mai eda moale bona kudouna ibounai ida.​​—⁠Salamo 100:​1-5; Kolose 3:​23.

Painia Urana Habadaia Bona Dogoatao noho

15, 16. (a) Edena dala ai painia gaukara dekenai tanikiu karana be mai anina bada? (b) Painia gaukara idia karaia diba lasi taudia ese edena dala ai painia urana idia hahedinaraia diba?

¹⁵ Iehova dekenai iseda tanikiu karana ita hahedinaraia dalana namona ta be ful-taim hesiai gaukara lalonai ita vareai. Gwauhamata hesiai taudia momo edia lalokau Iehova dekenai bona iena hebogahisi karana idia laloa bada ese idia ia hagoadaia, edia mauri dekenai gau momo idia haidaua, unai amo Iehova idia hesiai henia diba. Haida be regula painia idia karaia, hua ta ta hora 70 lalonai sivarai namona idia harorolaia bona hereva momokani taunimanima dekenai idia hadibaia. Ma haida edia noho dalana ia hegeregere lasi dainai, nega ta ta lalonai heduru painia idia karaia, hua ta lalonai hora 50 idia karaia totona.

¹⁶ To regula eiava heduru painia idia karaia diba lasi Iehova ena hesiai taudia momo be edena bamona? Painia urana idia habadaia bona dogoatao karana amo edia tanikiu karana idia hahedinaraia diba. Edena dala ai? Idia painia diba taudia idia hagoadaia, edia natudia idia hagoadaia ful-taim hesiai gaukara ena ura idia abia totona, bona edia noho dalana hegeregerena haroro gaukara idia karaia. Iehova ese ita totona ia karaia vadaeni, ia karaia noho, bona do ia karaia gaudia ibounai laloa bada karana ese iseda ura ia habadaia haroro gaukara ita karaia goadagoada totona.

Iseda “Dava Bada Kohudia” amo Tanikiu Karana Ita Hahedinaraia

17, 18. (a) Edena dala ai iseda “dava bada kohudia” amo tanikiu karana ita hahedinaraia diba? (b) Vabu ena harihari gauna dekenai Iesu be dahaka ia gwau, bona dahaka dainai?

¹⁷ Aonega Herevadia 3:9 ia gwau: “Oiemu uma ena anina namodia, [bona dava bada kohudia, NW ] be Lohiabada dekenai do oi henia, oiemu matauraia karana Lohiabada dekenai be unai.” Iehova ena hesiai taudia be karoa 10 amo karoa ta idia henia be anina lasi. To, Paulo ese Korinto kongregesen ia tore henia, ia gwau: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 9:⁠7) Danu iseda tanikiu karana hahedinaraia dalana ta be, kontribusen monina ita henia tanobada ibounai Basileia harorolaia gaukarana durua totona. Mai eda kudouna ibounai ida iseda laloa bada karana ese ita ia hagoadaia unai kara ita karaia hanaihanai totona, reana wiki ta ta ai moni sisina ita atoa, Keristani taudia ginigunadia ese idia karaia bamona.​​—⁠1 Korinto 16:​1, 2.

¹⁸ Ita henia moni ena bada ese iseda tanikiu Iehova dekenai ia hahedinaraia lasi. To, iseda ura ese unai ia hahedinaraia. Iesu ese unai ia itaia dubu ena moni udaia mauana lalonai edia harihari gaudia idia udaia taudia dekenai. Iesu ese vabu ogogamina ta ia itaia “moni maragimaragi ia udaia” neganai, ia gwau: “Momokani umui lau hamaoroa, inai vabu mai ogogami danu ia udaia moni ese idia ibounai edia moni ia hanaia. Badina be idia ese edia moni bada herea dekena amo sisina sibona boubou maua dekenai idia udaia, to inai vabu be mai ogogami danu, to ia ese iena moni ibounai, iena mauri dekenai durua gauna ia udaia.”​​—⁠Luka 21:​1-4.

19. Dahaka dainai iseda tanikiu ita hahedinaraia daladia ita laloa lou be namo?

¹⁹ Namona be inai stadi, edena dala ai tanikiu karana ita hahedinaraia diba ese ita ia hagoadaia iseda tanikiu karana ita hahedinaraia daladia ita laloa lou totona. Iseda hanamoa Iehova dekenai ita habadaia diba, bona iseda kohu amo tanobada ibounai gaukarana ita durua diba, a? Iseda goada hegeregerena gaukara ita karaia, ita diba momokani iseda lalokau Tamana, Iehova, do ia moale bada badina tanikiu karana ita hahedinaraia.

Oi Laloatao, A?

• Dahaka badina idauidau dainai Iehova ita tanikiu henia be namo?

• Karoa 10 amo karoa ta henia karana, harihari gaudia, bona uma dekenai aniani orena rakatania karana amo dahaka ita dibaia?

• Painia urana be edena dala ai ita habadaia diba?

• Edena dala ai iseda “dava bada kohudia” ita gaukaralaia diba Iehova ita tanikiu henia totona?

[Pictures on page 27]

“Gau namodia ibounai, bona harihari gaudia namodia momokani ibounai, be Dirava dekena amo idia diho mai”

[Pictures on page 28]

Inai laulau ese ia hahedinaraia hegeregerena, taravatu amo dahaka gau toi ita dibaia?

[Pictures on page 30]

Dahaka boubou gaudia ita karaia diba?