Iehova Ena Kara be Hanaihanai Ia Maoro

“Lohiabada ena kara ibounai be maoromaoro.”​—⁠SALAMO 145:⁠17.

 1. Ta be oi dekenai lalohadai kererena ia abia neganai, emu hemami be edena bamona bona unai kara amo dahaka ita dibaia?

NEGA ta, ta be oi dekenai lalohadai kererena ia abia, reana emu kara eiava lalohadai ia daradaralaia, herevana oi dekenai idia vara gaudia ibounai ia diba lasi, a? Bema unai bamona ia vara, reana oi lalohisihisi​—⁠bona unai ita lalo-pararalaia diba. Unai kara amo mai anina bada gauna ta ita dibaia diba: Bema sivarai ta ita diba namonamo lasi, aonega karana be hereva ta ita gwauraia haraga lasi.

2, 3. Haida be edena bamona hemami idia abia bema idia davaria Baibel lalonai hereva ibounai ia noho lasi edia henanadai ia haerelaia totona, to Baibel ese Iehova ena kara be edena bamona ia gwauraia?

² Iehova Dirava dekenai lalohadai kererena ita abia lasi totona, unai sivarai amo ita dibaia gauna ita laloatao be gau badana. Dahaka dainai? Badina matamanai toana be Baibel ena sivarai haida ita daradaralaia. Unai sivaraidia​—⁠reana Dirava idia tomadiho henia taudia haida edia kara eiava Dirava ese idaunegai ia karaia hahemaoro karadia​—⁠dekenai hereva ibounai idia noho lasi iseda henanadai idia haerelaia totona. Madi, haida ese unai bamona sivaraidia idia maumauraia, Dirava ena kara ia maoro eiava ia namo idia henanadailaia danu. To, Baibel ese ita ia hadibaia “Lohiabada ena kara ibounai be maoromaoro.” (Salamo 145:17) Iena Hereva ese ita ia hadibaia danu, Iehova be “kara dika ia karaia lasi.” (Iobu 34:12; Salamo 37:28) Vadaeni, ma haida ese ena kara dekenai lalohadai kererena idia abia neganai, ena hemami mani oi laloa!

³ Iehova ena hahemaoro karana ita abia dae be namo ena badina faiv, mani ita itaia. Bena, unai badina ita lalodia noho lalonai, taunimanima ese idia daradaralaia bada Baibel ena sivarai rua, do ita tahua.

Dahaka Dainai Iehova Ena Hahemaoro Karadia Ita Abia Dae?

 4. Dirava ena kara ita laloa neganai, dahaka dainai ita manau? Haheitalai ta gwauraia.

⁴ Gau ginigunana be, Iehova be idia vara gaudia ibounai ia diba bona ita be ita diba lasi dainai, Dirava ena kara ita laloa neganai, ita manau be namo. Haheitalai ta be inai: Mani inai oi laloa, nega daudau lalonai hahemaoro gaukarana ia karaia lalo-maoromaoro diadi tauna, be kota ai ta dekenai hahemaoro herevana ta ia gwauraia. Bema tau ta be sivarai ibounai ia diba lasi eiava taravatu ia lalo-pararalaia namonamo lasi, to unai diadi ena lalohadai ia maumauraia, dahaka do oi laloa unai tauna dekenai? Bema tau ta be sivarai ta ia diba namonamo lasi to ia maumauraia vadaeni, unai be kavakava karana. (Aonega Herevadia 18:13) Oibe, taunimanima ese “tanobada ibounai ena kota biaguna” idia maumauraia be kavakava karana momokani!​—⁠Genese 18:⁠25.

 5. Dirava ese taunimanima haida ia hahemaoro henia ena sivarai be Baibel lalonai ita duahia neganai, dahaka ita laloaboio lasi be namo?

⁵ Dirava ena hahemaoro karadia ita abia dae ena badina iharuana be, Dirava be taunimanima amo ia idau, ia be kudouna ia itaia diba. (1 Samuela 16:⁠7) Iena Hereva ia gwau: “Lau Lohiabada ese taunimanima edia kudoudia lau tahua noho, bona edia lalodia danu lau tohoa noho. Taunimanima ta ta edia dala, edia dala lau itaia noho. Bona idia ta ta edia kara anina danu lau tahua noho, idia ta ta dekenai, edia davana korikori do lau henidia totona.” (Ieremia 17:10) Unai dainai, Dirava ese haida ia hahemaoro henia ena sivarai be Baibel lalonai ita duahia neganai, namona be ita laloaboio lasi, Dirava ese gau ibounai ia itaia. Iena Hereva lalonai idia torea lasi gaudia, hegeregere ia hahemaoro henia taudia edia lalohadai bona ura danu, ia itadia.​—⁠1 Sivarai 28:⁠9.

6, 7. (a) Iehova ese edena bamona ia hahedinaraia ena kara maoromaoro taravatudia ia badinaia, ena be unai kara dainai ia lalohisihisi bada diba? (b) Bema Baibel lalonai sivarai ta ita duahia bona unai sivarai dainai Dirava ena kara ita daradaralaia, dahaka ita laloatao be namo?

⁶ Iehova ena hahemaoro karadia ita abia dae ena badina ihatoina be inai: Ia ese ena kara maoromaoro taravatudia ia badinaia, ena be unai kara dainai ia lalohisihisi bada diba. Mani inai haheitalai ita laloa. Kamonai taudia be kara dika bona mase amo ia hamauria totona ena Natuna ia henia karana amo, Iehova ese ena kara maoromaoro taravatudia ia badinaia. (Roma 5:​18, 19) To, Iehova ia itaia ena lalokau Natuna be au dekenai hisihisi ia ania bona ia mase neganai, ia lalohisihisi bada herea. Unai amo dahaka ita dibaia Dirava ena kara dekenai? Baibel be “Iesu Keriso ese ita ia hoia lou” karana ia herevalaia neganai, ia gwau: “Dirava ese inai bamona ia karaia, iena kara maoromaoro hedinaraia totona.” (Roma 3:​24-26) Baibel ta dekenai Roma 3:25 be inai bamona idia hahanaia: “Unai ese ia hahedinaraia Dirava ena kara be hanaihanai ia maoro bona namo.” (New Century Version) Oibe, Iehova ese dala ia karaia mauri davalaia boubouna ia henia karana amo ia hahedinaraia, ia ese “kara maoro bona namo” ia laloa bada.

⁷ Unai dainai, bema Baibel lalonai sivarai ta ita duahia bona unai sivarai dainai Dirava ena kara ita daradaralaia, namona be inai ita laloatao: Iehova ese ena kara maoromaoro taravatudia bona hahemaoro goevana ia badinaia dainai, ena Natuna be mai ena hisihisi bada ida ia mase neganai, unai ia koua lasi. Vadaeni, gau ma haida dekenai ena taravatu do ia utua, a? Hereva momokani be inai, Iehova ese ena kara maoromaoro taravatudia ia makohia diba lasi. Badina momo dainai ita abia dae momokani diba, Iehova ena kara be hanaihanai ia maoro bona namo.​—⁠Iobu 37:⁠23.

 8. Bema taunimanima idia laloa Iehova be hahemaoro goeva bona kara maoromaoro dekenai ia dabu, dahaka dainai unai be hegeregere lasi?

⁸ Iehova ena hahemaoro karadia ita abia dae ena badina namba foa be inai: Iehova ese Ia sibona ena toana hegeregerena taunimanima ia karaia. (Genese 1:27) Unai dainai, taunimanima be Dirava ena kara haida idia abia, hahemaoro goeva bona kara maoromaoro danu. Bema iseda hahemaoro goeva bona kara maoromaoro dainai ita laloa Iehova be unai kara dekenai ia dabu, unai be hegeregere lasi. Bema Baibel ena sivarai ta ita daradaralaia, gau badana be ita laloatao, ita abia hanai kara dika dainai, iseda diba dahaka be ia maoro bona namo dekenai be goevadae lasi. Iehova Dirava, iena toana hegeregerena ita ia karaia Tauna, ena hahemaoro goevana bona ena kara maoromaoro be goevadae. (Deuteronomi 32:⁠4) Bema ta ia laloa taunimanima edia kara maoromaoro ese Dirava ena ia hereaia, unai be lalohadai kavakavana!​—⁠Roma 3:​4, 5; 9:⁠14.

9, 10. Dahaka dainai Iehova ese iena kara ena maoro be taunimanima dekenai ia hamomokania eiava ia gwauraia hedinarai be anina lasi?

⁹ Iehova ena hahemaoro karadia ita abia dae ena badina namba faiv be: Iehova be “Ataiai Momokani Diravana, [Ia] ese tanobada [Ia] biagua noho.” (Salamo 83:18) Unai dainai, iena kara ena maoro be taunimanima dekenai ia hamomokania eiava ia gwauraia hedinarai be anina lasi. Ia be Uro Karaia Tauna Badana, bona ita be raro bamona, ia ese uro ai ia halaodia, iena ura dalana hegeregerena ai ita do ia kara henia. (Roma 9:​19-21) Ita be daika, iena imana amo ia karaia uro, ese ena abia hidi eiava ena kara ita henanadailaia totona? Bese kwarana tauna Iobu, be Dirava ese taunimanima ia kara henia dalana ia lalo-pararalaia lasi neganai, Iehova ese Iobu ena lalohadai ia hamaoromaoroa, ia henanadai: “Oi ura lau dekenai kerere, bona maoromaoro lasi do oi gwauraia, oi sibona be maoromaoro do oi gwauraia totona, a?” Iobu ia diba ia be lalo-parara lasi dalanai ia hereva dainai, gabeai ia helalo-kerehai. (Iobu 40:8; 42:⁠6) Namo lasi ita laloa Dirava ia kerere!

¹⁰ Ia hedinarai goevagoeva, badina namodia dainai ita abia dae diba Iehova ena kara be hanaihanai ia maoro. Iehova ena kara dekenai unai ita diba dainai, namona be haida ese reana idia daradaralaia Baibel ena sivarai rua ita tahua. Ginigunana be Dirava ia tomadiho henia tauna ta ena kara, bona ma ta be Dirava ese ia karaia hahemaoro karana.

Dahaka Dainai Lota ese Ena Natuna Kekenidia be Idia Badu Hutuma Dekenai Ia Henia?

11, 12. (a) Dirava ese tanobada tauanina idia abia aneru rua be Sodoma dekenai ia siaia neganai, ia vara gauna mani oi gwauraia. (b) Unai sivarai dainai, taunimanima haida edia lalona dekenai dahaka henanadai idia vara?

¹¹ Dirava ese tanobada tauanina idia abia aneru rua be Sodoma dekenai ia siaia lao neganai, ia vara gauna ena sivarai be Genese karoa 19 ai ita davaria. Lota be unai vadivadi taudia ia noidia iena ruma dekenai idia noho totona. To unai hanuaboi ai, unai hanua ena tatau hutuma be ruma idia hagegea bona idia boiboi, idia ura Lota ese unai tatau rua do ia siaidia raka-lasi, idia sihari henidia totona. Lota be idia danu ia herevahereva toho, to ena hereva idia kamonai lasi. Lota ia ura ena vadivadi taudia ia gimaia dainai, ia gwau: “Lauegu turadia e, umui dekenai lau noinoi, inai kara dika umui karaia lasi. Umui itaia, lauegu natuna kekeni rua idia noho, idia be sihari do diba lasi. Mani, umui dekenai do lau hakaudia, bona idia dekenai umui karaia, emui ura hegeregerena. To inai tatau rua be do umui hadikaia lasi, badina idia be lauegu ruma ena vadivadi taudia bona lau naridia be gau badana.” Unai hutuma idia kamonai lasi, bona kahirakahira iduara idia makohia. Gabeai, aneru rua ese unai kavakava tatau hutuma edia matadia idia hakepuludia.​—⁠Genese 19:​1-11.

¹² Unai sivarai dainai haida idia daradara. Idia henanadai: ‘Dahaka dainai Lota ese unai vadivadi taudia gimaia totona ena natuna kekenidia be unai matabodaga tatau dekenai ia henia? Ia gari dainai unai kara kererena ia karaia, a? Unai sivarai dainai, dahaka dainai Dirava ese Petero ia hasiahua bena Lota ia gwauraia “kara maoromaoro tauna”? Lota be Dirava amo gwaumaoro ia abia bena unai bamona ia kara, a? (2 Petero 2:​7, 8) Namona be unai sivarai ita laloa namonamo, unai amo lalohadai kererena do ita abia lasi.

13, 14. (a) Baibel ese Lota ena sivarai ia gwauraia dalana dekenai, dahaka ita laloatao be gau badana? (b) Dahaka ese ia hahedinaraia Lota be ia gari lasi?

¹³ Gau badana be inai ita laloatao, Baibel ese Lota ena kara ia abia dae eiava ia gwauraia dika lasi, to ia vara gauna ena sivarai sibona ia gwauraia. Danu, Lota be dahaka ia laloa eiava dahaka ese ena lalona ia veria unai bamona ia karaia totona be Baibel ese ia hahedinaraia lasi. Lota be “kara maoromaoro taudia” ida ia toreisi lou neganai, reana sivarai ibounai do ia gwauraia hedinarai.​—⁠Kara 24:⁠15.

¹⁴ Lota be ia gari lasi. Ia dekenai unai be hekwakwanai badana. Lota ia gwau unai tatau be ena “ruma” ena vadivadi taudia neganai, ia hahedinaraia ia ura idia ia gimaia bona ia naria. To unai be auka. Histori ia torea Iuda tauna ia gwau, Sodoma taudia be “tatau idia kara namo henidia lasi bona Dirava idia matauraia lasi. . . . Idau taudia idia inai henia bona idia ta ta idia sihari henia.” To, Lota be gari dainai unai badu hutuma amo ia komu lasi. To ia raka-lasi bona idia ia hereva henia. Danu, ia raka-lasi bena “iduara ia koua ia murinai.”​—⁠Genese 19:⁠6.

15. Dahaka dainai ita gwau diba Lota be mai abidadama ida ia kara?

¹⁵ Haida be reana do idia henanadai, ‘to dahaka dainai Lota ese unai tatau hutuma dekenai ena natuna kekenidia ia henia?’ Namo lasi ita laloa Lota ena lalohadai ia dika, to ena kara ena badina haida ita tahua be namo, ani? Gau ginigunana be, reana Lota be mai abidadama ida ia kara. Edena dala ai? Momokani, Lota be Iehova ese ena vavana Aberahamo ena adavana Sara, ia gimaia sivaraina ia diba. Ita laloa diba Sara be hairai hahinena dainai, Aberahamo ese Sara ia noia ia do ia gwauraia ena tadikaka, dika ma haida ese ia idia abia totona Aberahamo do idia hamasea garina.a Unai murinai, Farao ena ruma dekenai Sara idia abia lao. To, Iehova ese kara ta ia karaia, unai amo Farao ia koua bena Sara ia hadikaia lasi. (Genese 12:​11-20) Lota ia diba momokani Iehova ese unai bamona dala ai ena natuna kekenidia do ia gimaia. Oibe, Iehova ese ena aneru amo kara ta ia karaia bona unai hahine matamatadia be dika idia davaria lasi.

16, 17. (a) Lota ia ura edena dala ai Sodoma tatau ia hahoaia eiava ia hadaradaraia toho? (b) Herevana Lota ena lalohadai be dahaka, to dahaka ita diba momokani?

¹⁶ Dala ma ta mani ita laloa. Reana Lota ia ura danu unai tatau ia hahoaia eiava ia hadaradaraia toho. Sodoma hanua tatau edia kara be tatau idia sihari henia dainai, reana Lota ia laloa unai tatau ese ena natuna kekenidia do idia ura henia lasi. (Iuda 7) Ma danu, unai hahine matamatadia be unai hanua ena tatau rua dekenai idia maoheni vadaeni, unai dainai Lota ena ravana ai do idia lao tatau edia varavara, turadia, eiava bisinesi turadia be reana unai hutuma lalonai idia noho. (Genese 19:14) Lota ia laloa unai bamona hetura karana dainai, unai hutuma lalonai idia noho tatau haida be reana ena natuna kekenidia totona do idia hereva. Unai dainai bema unai hutuma idia parara, dika do idia havaraia lasi.b

¹⁷ Herevana Lota ena lalohadai bona ura be dahaka, inai ita diba momokani: Iehova ena kara be hanaihanai ia maoro dainai, badina namona dainai Lota ia gwauraia “kara maoromaoro tauna.” Bona unai kavakava Sodoma tatau edia kara ita laloa neganai, Iehova ese unai kara dika hanua taudia ia hadikaia ore ena maoro ita daradaralaia be namo, a?​—⁠Genese 19:​23-25.

Dahaka Dainai Iehova ese Usa Ia Alaia Mase?

18. (a) Davida ia ura Ierusalema dekenai Maua ia abia lao gwauraia neganai, dahaka ia vara? (b) Unai sivarai dainai dahaka henanadai idia vara?

¹⁸ Taunimanima haida ese idia daradaralaia sivaraina ta be, Davida ia ura Taravatu Mauana be Ierusalema dekenai ia abia lao ena sivarai. Maua be treila dekenai idia atoa bona Usa bona ena tadikaka ese idia hakaua. Baibel ia gwau: “Idia be Nakono ena uiti kwadia gabuna dekenai idia ginidae. Vadaeni boromakau, treila idia veria gaudia, idia hekwakwanai, bona Usa ese iena imana be Taravatu Maua latanai ia atoa, Maua ia dogoatao. Nega tamona Lohiabada Dirava ese ia badu Usa dekenai, badina Usa ese Taravatu Maua ia matauraia lasi dainai. Vadaeni Lohiabada ese Usa ia alaia mase, unai gabu dekenai, Taravatu Maua ena badibadinai.” Hua haida murinai, Dirava ese ia gwauraia dalana hegeregerena, Kohata Levi taudia ese edia pagana dekenai Maua idia huaia lao neganai, dika ta ia vara lasi. (2 Samuela 6:​6, 7; Numera 4:15; 7:9; 1 Sivarai 15:​1-14) Reana haida idia henanadai: ‘Dahaka dainai Iehova ia badu? Usa be ia ura Maua ia gimaia sibona.’ Lalohadai kerere ita abia lasi totona, namona be heduru hereva haida ita tahua.

19. Dahaka dainai Iehova ia kerere diba lasi?

¹⁹ Gau badana be ita laloatao, Iehova be ia kerere diba lasi. (Iobu 34:10) Unai bamona ia karaia be lalokau karana lasi, bona Baibel ibounai ena hereva ita stadilaia karana amo ita diba, “Dirava be lalokau.” (1 Ioane 4:⁠8) Ma danu, Baibel ia gwau “[Dirava ena] basileia be kara maoromaoro bona kota maorona, dekenai ia gini noho.” (Salamo 89:14) Unai dainai Iehova be edena bamona unai kerere ia karaia diba? Bema unai bamona ia karaia, anina be ena lohia siahuna ena badina korikorina ia hamanokaia unai.

20. Dahaka badina idauidau dainai Usa be Maua ena taravatu ia diba vadaeni be namo?

²⁰ Laloaboio lasi, Usa be taravatu ia diba. Unai Maua ese Iehova ena noho ia laulaulaia. Taravatu ia gwau, gwaumaoro ia abia lasi tauna ese unai maua do ia dogoatao lasi, ia hahedinaraia goevagoeva unai taravatu idia makohia taudia be do idia mase. (Numera 4:​18-20; 7:89) Unai dainai, unai maua helagana be gabu ma ta dekenai idia abia lao ena gaukara be mai anina bada gaukarana. Usa be Levi tauna ta (to hahelaga tauna ta lasi), unai dainai Taravatu ia diba be namo. Danu, lagani haida gunanai Maua be ena tamana ena ruma dekenai idia abia lao, unuseniai idia naria totona. (1 Samuela 6:20–7:⁠1) Unuseniai lagani 70 bona ma haida ia noho, ela bona Davida ese dala ia karaia gabu ma ta dekenai ia abia lao totona. Unai dainai Usa ia maragi negana amo, unai Maua ena taravatu ia diba vadaeni.

21. Usa dekenai ia vara sivaraina amo, dahaka dainai ita laloatao be gau badana Iehova ese kudouna ia itaia?

²¹ Guna ita herevalaia bamona, Iehova be taunimanima edia kudouna ia itaia diba. Ena Hereva ese Usa ena kara ia gwauraia ‘hemataurai lasi’ karana dainai, reana Usa ese sibona ena namo ia tahua bona Iehova ese unai ia itaia, to Baibel ese unai ia hahedinaraia lasi. Usa be reana hekokoroku tauna dainai, nega momo taravatu ese ia koua gaudia danu ia karaia, a? (Aonega Herevadia 11:⁠2) Iena ruma bese ese idia naria Maua be taunimanima vairanai idia abia lao dainai, ia laloa ia be tau badana, a? (Aonega Herevadia 8:13) Usa ia abidadama lasi momokani, namona be ia diba Iehova be ia hegeregere maua helagana​—⁠Iena noho ia laulaulaia gauna​—⁠ia atoa namonamo totona, ani? Herevana dahaka ia vara, ita diba Iehova ese kara maorona ia karaia. Toana be Usa ena kudouna dekenai gau ta ia itaia, unai dainai maoromaoro Usa ia hamasea.​—⁠Aonega Herevadia 21:⁠2.

Ita Abidadama Ena Badina Maorona

22. Nega haida Iehova ena Hereva lalonai sivarai ena kahana haida idia torea lasi, unai ese edena dala ai Iehova ena aonega ia hahedinaraia?

²² Nega haida Iehova ena Hereva lalonai sivarai ena kahana haida idia torea lasi, unai ese ena aonega bada herea ia hahedinaraia. Unai amo Iehova ese dala ia kehoa ia ura unai amo ita hahedinaraia ia ita abidadama henia. Ita herevalaia vadaeni gaudia amo, ia hedinarai goevagoeva badina namodia dainai Iehova ena hahemaoro karadia ita abia dae be namo, ani? Oibe, Dirava ena Hereva be mai iseda momokani ida bona mai laloa kehoa ida ita stadilaia neganai, Iehova dekenai iseda diba ita habadaia, bona unai dainai ita diba momokani Iehova ena kara be hanaihanai ia maoro. Unai dainai, bema Baibel ena sivarai haida ita daradaralaia bona edia haere ita davaria haraga lasi, namona be ita abia dae momokani Iehova be kara maorona ia karaia.

23. Iehova ese vaira negana ai do ia karaia karadia dainai, dahaka ita diba momokani?

²³ Namona be Iehova ese vaira negana ai do ia karaia karadia ita abidadama henia danu. Unai dainai, hisihisi badana ai kota karaia totona ia mai neganai, namona be ita diba momokani ia ese “kara maoromaoro bona kara dika taudia danu nega tamona do [ia] alaia ore” lasi. (Genese 18:23) Ia ese kara maoromaoro bona hahemaoro goeva ia ura henia dainai, unai bamona do ia karaia lasi. Namona be ita diba momokani, ia mai noho tanobada matamatana lalonai, iseda dabu gaudia ibounai be dala hereadaena ai do ia henia.​—⁠Salamo 145:⁠16.

[Footnotes]

Oi Laloatao, A?

• Dahaka badina idauidau dainai Iehova ena hahemaoro karadia ita abia dae be namo?

• Dahaka ese ita ia durua, bena Lota ese ena natuna kekenidia be idia badu hutuma dekenai ia henia karana dekenai, lalohadai kererena ita abia lasi?

• Dahaka gau haida ese ita idia durua bena Iehova ese Usa ia hamasea ena badina ita lalo-pararalaia?

• Iehova ese vaira negana ai do ia karaia karadia dekenai, dahaka ita diba momokani?