Iehova Ena Hereva be Ia Mauri Noho

King Taudia Iharuana Bukana Ena Hereva Badadia

BAIBEL bukana King Taudia Iharuana ena sivarai be King Taudia Ginigunana bukana ena sivarai ia doko gabuna amo ia matamaia. King ibounai 29 ia sivarailaia. King ibounai 12 be not kahana basileiana, Israela amo bona 17 be saut kahana basileiana, Iuda amo. King Taudia Iharuana ese peroveta taudia Elia, Elisaia, bona Isaia edia gaukara ia herevalaia danu. Ena be idia vara nega hegeregerena idia torea lasi, to unai buka lalonai Samaria bona Ierusalema hadikaia sivaraina ia noho danu. King Taudia Iharuana bukana ese lagani 340 lalonai idia vara gaudia ia sivarailaia​​—⁠lagani 920 B.C.E. amo ia lao 580 B.C.E. ai peroveta tauna Ieremia be unai buka ia torea haorea.

Dahaka dainai King Taudia Iharuana be mai anina bada ita dekenai? Iehova bona ena kara ese dahaka ia hadibaia ita dekenai? Unai buka lalonai idia gwauraia king taudia, peroveta taudia, bona ma haida amo dahaka ita dibaia? King Taudia Iharuana bukana amo do ita dibaia gaudia mani ita itaia.

ELISAIA ESE ELIA ENA GABU IA ABIA

(2 King Taudia 1:1–8:⁠29)

Israela ena King Ahasaia be ena ruma dekenai ia moru bona ia gorere. Peroveta tauna Elia ese Ahasaia ia hamaoroa ia be do ia mase. Ahasaia ia mase, bona ena tadina Iorama ese ena terona ia abia. Unai nega ai, Iehosapata be Iuda ena king. Elia be koehirihiri ese ia abia daekau, bona ena durua tauna, Elisaia ese ena gabu ia abia bona peroveta tauna ai ia lao. Unai murinai, Elisaia be lagani 60 lalonai ia karaia hesiai gaukara lalonai hoa karadia momo ia karaia.​​—⁠“Elisaia Ena Hoa Karadia” ena maua itaia.

Moaba taudia edia king be Israela taudia ia tuari henia gwauraia neganai, Iorama, Iehosapata, bona Edoma ena king idia lao ia idia tuari henia totona. Iehosapata ena abidadama dainai idia kwalimu. Gabeai, Suria ena king be palani ia karaia Israela ia tuari henia totona. To, Elisaia ese unai palani ia hadikaia. Suria edia king ia badu bona “tuari taudia momo, hosi bona kariota momo” ia siaia lao Elisaia idia dogoatao totona. (2 King Taudia 6:14) To Elisaia be hoa karadia rua ia karaia bona maino ai unai Suria taudia ia siaia lou. Gabeai, Suria edia King Benehadada ese Samaria ia koua hegege. Unai dainai hitolo bada ia vara, to Elisaia ia peroveta hitolo bada do ia ore.

Gabeai, Elisaia be Damaseko dekenai ia lao. King Benehadada be ia gorere dainai, Hasaele ia siaia Elisaia ia nanadaia totona bema ena gorere do ia ore. Elisaia ia peroveta, king do ia mase bona Hasaele be ena gabu do ia abia. Unai dina murinai, “Hasaele ese dabua badana ta ia abia, ranu dekenai ia hahonua, bona king Benehadada ena vairana dekenai ia doria auka, ela bona king ia mase momokani,” gabeai ia be king ai ia lao. (2 King Taudia 8:15) Iuda ai, Iehosapata ena natuna Iehorama be king ai ia lao, bona gabeai ena natuna Ahasaia ese ena gabu ia abia.​​—⁠“Iuda Bona Israela Edia King Taudia” maua itaia.

Baibel Henanadaidia Edia Haere:

2:9​​—⁠Dahaka dainai Elisaia be Elia dekenai ia noinoi ‘ia dekenai ia noho siahu do ia habadaia nega rua, bona ia dekenai ia henia’? Elisaia be Israela ena peroveta tauna ena maduna ia huaia totona, Elia ese ia hahedinaraia goada bona gari lasi toana ia hahedinaraia be namo. Elisaia be unai ia diba dainai, ia ese Elia ia noia ia dekenai ia noho siahu be nega rua amo do ia habadaia bona Elisaia dekenai do ia henia. Elisaia be Elia ese ia abia hidi ena gabu ia abia totona, bona lagani 6 lalonai ia ese Elia ia bamoa. Unai dainai Elisaia dekenai Elia be lauma dalanai ena tamana bamona; Elisaia be hegeregere lauma dalanai Elia ena vara guna natuna bamona. (1 King Taudia 19:​19-21; 2 King Taudia 2:12) Unai dainai, vara guna natuna ese ena tamana ena ahuna ena kahana rua ia abia hegeregerena, Elisaia be lauma ahuna ena kahana rua totona ia noinoi bona Elia amo ia abia.

2:11​​—⁠“Elia be koehirihiri ese ia abia daekau” edena “guba” dekenai? Unai be guba ena gabu ta lasi eiava Dirava bona ena lauma idia noho lauma gabuna lasi. (Deuteronomi 4:19; Salamo 11:4; Mataio 6:9; 18:10) Elia be tanobada kahirakahira ia noho “guba” dekenai ia daekau. (Salamo 78:26; Mataio 6:26) Lahi kariotana be tanobada ena hodahoda lalonai ia heau, bona Elia be tanobada ena kahana ta amo ia abia lao kahana ta dekenai, bona unuseniai ia noho. Badina lagani haida murinai Elia ese Iuda ena king Iehorama dekenai revareva ta ia torea.​​—⁠2 Sivarai 21:​1, 12-15.

5:​15, 16​​—⁠Dahaka dainai Elisaia ese Namana ena harihari gauna ia abia lasi? Elisaia ese unai harihari gauna ia abia lasi badina ia diba Namana be hoa dalanai ia namo lou be Iehova ena siahu amo ia karaia, ena siahu amo lasi. Ia laloa, namo lasi Dirava ese ia dekenai ia henia gaukara dainai davana ia abia. Hari, tomadiho momokani taudia be gau ta idia abia totona Iehova idia hesiai henia lasi. Idia be Iesu ena hagoadaia herevana idia badinaia: “Umui abia vadaeni, davana lasi. Unai dainai gau momo do umui henia, davana lasi.”​​—⁠Mataio 10:⁠8.

5:​18, 19​​—⁠Namana be tomadiho karana ta ia karaia dainai, ia be dika gwauatao totona ia noinoi, a? Ia hedinarai Suria ena king be ia buruka bona ia manoka bona Namana dekenai ia tabekau be namo. King be Rimona tomadiho henia totona ia igo diho neganai, Namana danu ia igo diho. To, Namana be ia igo diho king ena tauanina ia durua totona, to ia tomadiho henia totona lasi. Namana be unai gaukara ia karaia dainai, Iehova ia noia ia do ia gwauatao totona. Elisaia ese Namana ena hereva ia abia dae dainai, Elia ese ia hamaoroa: ‘Mai maino danu oi lao.’

Ita Dibaia Gaudia:

1:​13, 14. Ita itaia gaudia amo diba ita abia bona ita manau ese ma haida ia hamauria diba.

2:​2, 4, 6. Ena be Elisaia be Elia ia bamoa reana lagani 6 lalonai, to Elisaia ia ura lasi Elia ese ia do ia rakatania. Badinaia karana bona hetura karana dekenai haheitalai namona ia hahedinaraia!​​—⁠Aonega Herevadia 18:⁠24.

2:​23, 24. Natudia maragidia ese Elisaia idia kirikirilaia ena badina badana be ia ese Elia ena dabua ia karaia, bona ena kwarana be kebere. Idia diba Elisaia be Iehova ena gwaukau tauna bona idia ura lasi edia gabu dekenai do ia noho. Ia idia hamaoroa ia “daekau lao,” anina be Betele dekenai do ia lao noho eiava Elia dekenai ia vara gauna be ia dekenai do ia vara. Unai natudia be edia tama sina edia dagedage karana idia hahedinaraia. Unai dainai gau badana be tama sina ese edia natudia idia hadibaia Dirava ena gwaukau taudia idia matauraia totona!

3:​14, 18, 24. Iehova ena hereva ibounai be hanaihanai idia momokani.

3:22. Daba ai ia daekau dina ena diari dainai ranu ena toana be rara bamona, reana idia geia matamata koupa ena tano be kakakaka dainai. Iehova be ia havaraia gaudia ia gaukaralaia diba ena ura ia hagugurua totona.

4:​8-11. Suneme hahine ta ia diba Elisaia be “Dirava ena tau helagana ta” dainai, ena ruma dekenai ia abia dae. Namona be Iehova idia tomadiho henia abidadama taudia dekenai unai bamona heabidae karana ita hahedinaraia.

5:⁠3. Israela kekeni maragina ia diba momokani Dirava ese hoa karadia ia karaia diba. Mai gari lasi ida ena abidadama ia herevalaia. Umui matamata taudia be emui abidadama Dirava ena gwauhamata dekenai umui hagoadaia, bona mai gari lasi ida hereva momokani be tisa bona stiuden taudia dekenai umui hadibaia, a?

5:​9-19. Namana ena haheitalai ese ia hahedinaraia, hekokoroku tauna be manau tauna ai ia lao diba, ani?​​—⁠1 Petero 5:⁠5.

5:​20-27. Koikoi karana dainai dika badana oi davaria diba! Mauri daladia rua badinaia karana ese ia havaraia lalohisihisi bona dika ita laloa neganai, unai ese ita ia durua diba ita koikoi lasi totona.

ISRAELA BONA IUDA TAUDIA BE IGUI TAUDIA BAMONA IDIA ABIA LAO

(2 King Taudia 9:1–25:⁠30)

Iehu be Israela ena king ai ia lao. Karaharaga ia ese Ahaba ena ruma taudia ia hamasedia. Iehu ese ‘Bala tomadiho henia karana be Israela amo ia haorea.’ (2 King Taudia 10:28) Ahasaia ena sinana, Atalaia ia kamonai ena natuna be Iehu ese ia hamasea neganai, oda ia henia Iuda ‘ena bese taudia ibounai idia alaia mase totona’ bona terona ia abia. (2 King Taudia 11:⁠1) To Ahasaia ena beibi merona, Ioasa sibona idia hamauria, bona lagani 6 lalonai hehuni ai ia noho murinai, king ai idia halaoa. Ioasa be hahelaga tauna Iehoiada ese ia hadibaia dainai, Iehova ena vairanai kara maoromaoro ia karaia noho.

Iehu murinai, Israela idia lohiaia king ibounai be Iehova vairanai idia kara maoromaoro lasi. Iehu ena tubuna natuna mero ena lohia negana ai Elisaia ia mase. Iuda ena king namba 4 Ioasa murinai be Ahasa, bona ia be ‘ia kara maoromaoro lasi iena Dirava Iehova vairanai.’ (2 King Taudia 16:​1, 2) To, ena natuna Hesekaia be king neganai, “Lohiabada ia badinaia namonamo.” (2 King Taudia 17:20; 18:⁠6) Lagani 740 B.C.E. ai, Hesekaia be Iuda ena king bona Hosea be Israela ia lohiaia neganai, Asuria ena King Salamanesa “ese Samaria ia abia, bona Israela taudia be Asuria dekenai ia abia lao.” (2 King Taudia 17:⁠6) Gabeai, idau bese taudia be Israela dekenai idia mai, bona Samaria tomadihona idia hamatamaia.

Hesekaia murinai Iuda ai idia lohia king 7 amo, Iosaia sibona ese tomadiho koikoi ia kokia. Dokonai, lagani 607 B.C.E. ai, Babulonia taudia ese Ierusalema idia abia bona ‘Iuda taudia be edia tano amo idia abia lao.’​​—⁠2 King Taudia 25:⁠21.

Baibel Henanadaidia Edia Haere:

13:​20, 21​​—⁠Unai hoa karana ese ia hahedinaraia helaga taudia edia turia ita tomadiho henia diba, a? Lasi. Baibel ese ia hahedinaraia lasi Elisaia ena turia be idia tomadiho henia. Dirava ena siahu dainai unai hoa gauna ia vara, Elisaia ia mauri noho lalonai ia karaia hoa karadia ibounai bamona.

15:​1-6​​—⁠Dahaka dainai Iehova ese Usaia dekenai lepera gorerena ia henia? “[Usaia] ia goada neganai, iena hekokoroku ia vara. . . . Badina be Lohiabada, iena Dirava dekenai ia koikoi, ia be Lohiabada ena Dubu lalonai ia vareai kava, muramura patana ena latanai muramura mai bonana do ia gabua totona.” Hahelaga taudia be “Usaia idia koua” bona ia idia hamaoroa ‘Dubu Helaga amo ia raka lasi,’ to ia be hahelaga taudia dekenai ia badu dainai lepera gorerena ia abia.​​—⁠2 Sivarai 26:​16-20.

18:​19-21, 25​​—⁠Hesekaia be Aigupito taudia ida ia turana karaia, a? Lasi. Rabesake ena samania hereva bona ia gwau Iehova ese ‘ia dekenai maoro ia henia’ be koikoi. Abidadama tauna King Hesekaia be Iehova dekenai ia tabekau.

Ita Dibaia Gaudia:

9:​7, 26. Ahaba ena ruma taudia ese idia abia hahemaoro metauna ese ia hahedinaraia, tomadiho koikoi bona kerere lasi taudia edia rara bubua kava karana be Iehova ese ia inai henia.

9:20. Idia gwau Iehu be mai badu ida kariota ia taria ese ia hahedinaraia ia ura bada ia abia gaukarana ia hagugurua. Ma haida idia itaia oi be Basileia harorolaia goadagoada tauna ta, a?​​—⁠2 Timoteo 4:⁠2.

9:​36, 37; 10:17; 13:​18, 19, 25; 14:25; 19:​20, 32-36; 20:​16, 17; 24:13. Ita diba momokani ‘Iehova ia gwauraia hereva, be ia siaia totona gaukara do ia karaia momokani.’​​—⁠Isaia 55:​10, 11.

10:15. Iehonadaba be Iehu ese ia boiria kariota dekenai ia guia totona neganai, mai kudouna ibounai ida ia abia dae, unai hegeregerena “hutuma bada” ese hari inai negai Iehu bamona tauna Iesu Keriso, bona ia murinai idia raka horoa taudia idia durua mai ura bada ida.​​—⁠Apokalupo 7:​9, NW.

10:​30, 31. Ena be Iehu be kerere haida ia karaia, to Iehova ia moale ia karaia gaudia dekenai. Momokani, “Dirava ena kara be gageva lasi, ia be maoromaoro momokani. Unai dainai ia ese emui kara namodia do ia laloaboio lasi.”​​—⁠Heberu 6:⁠10.

13:​14-19. Iehu ena tubuna merona Iehoasa be diba amo tano be mai goada ida ia botaia lasi, bona nega toi sibona ia botaia dainai, ia ese Suria taudia ia halusidia momokani lasi. Iehova ia ura ita ese ena hesiai gaukara be mai kudouna ibounai ida bona mai ura bada ida ita karaia.

20:​2-6. Iehova be ‘guriguri ia kamonai’ tauna.​​—⁠Salamo 65:⁠2.

24:​3, 4. Manase be rara dekenai ia kerere dainai, Iehova ese Iuda ena “rara habubua kava ena dika ia gwauatao lasi.” Dirava ese kerere lasi tauna ena rara ia matauraia. Ita diba momokani Iehova ese kerere lasi taudia edia rara idia bubua kava taudia do ia haorea momokani.​​—⁠Salamo 37:​9-11; 145:⁠20.

Ita Dekenai mai Anina Bada

King Taudia Iharuana ena buka ese ia hahedinaraia Iehova be ena gwauhamata ia Hagugurua Tauna. Unai basileia rua, ginigunana be Israela bona gabeai Iuda, idia abia lao neganai, Deuteronomi 28:15–29:28 ese ia perovetalaia hahemaoro herevana ia guguru dalana ita itaia. King Taudia Iharuana ese ia hahedinaraia Elisaia be Iehova ena ladana bona tomadiho momokani ia laloa bada. Hesekaia bona Iosaia be manau king taudia bona Dirava ena taravatu idia matauraia.

King Taudia Iharuana ai idia herevalaia king taudia, peroveta taudia, bona ma haida edia kara ita laloa neganai, ita diba dahaka ita karaia be namo bona dahaka ita karaia lasi be namo, ani? (Roma 15:4; 1 Korinto 10:11) Oibe, “Dirava ena hereva be ia mauri noho, bona ia be mai ena siahu.”​​—⁠Heberu 4:⁠12.

[Box/Picture on page 30]

ELISAIA ENA HOA KARADIA

 1. Ioridane ena sinavai ranu ia hapararaia.​​—⁠2 King Taudia 2:⁠14

 2. Ieriko hanua ena ranu dikana be ranu namona ai ia halaoa.​​—⁠2 King Taudia 2:​19-22

 3. Kamonai lasi natu maragidia be bea ese idia aladia mase.​—⁠2 King Taudia 2:​23, 24

 4. Tuari taudia dekenai ranu ia henia.​​—⁠2 King Taudia 3:​16-26

 5. Vabu ta be oela namona ia abia.​​—⁠2 King Taudia 4:​1-7

 6. Gabani Sulama hahinena be natuna ta ia havaraia.​​—⁠2 King Taudia 4:​8-17

 7. Natuna maragina be mase amo ia hatorea isi lou.​​—⁠2 King Taudia 4:​18-37

 8. Vasiahu mai ena poisini be vasiahu namona ai ia lao.​​—⁠2 King Taudia 4:⁠38-41

 9. Tatau 100 be beredi 20 amo ia ubua.​​—⁠2 King Taudia 4:⁠42-44

10. Namana ena lepera gorerena ia hanamoa.​​—⁠2 King Taudia 5:​1-14

11. Gehasi be Namana ena lepera ia abia.​​—⁠2 King Taudia 5:​24-27

12. Auri ira kwarana ia hure daekau.​​—⁠2 King Taudia 6:​5-7

13. Hesiai tauna ese aneru edia kariota momo ia itaia.​​—⁠2 King Taudia 6:​15-17

14. Suria ena tuari taudia edia matana ia hakepulua.​​—⁠2 King Taudia 6:⁠18

15. Suria edia tuari taudia edia matana ia kehoa lou.​​—⁠2 King Taudia 6:​19-23

16. Mase tauna be ia mauri lou.​​—⁠2 King Taudia 13:​20, 21

[Chart/Pictures on page 31]

IUDA BONA ISRAELA EDIA KING TAUDIA

Saulo/Davida/Solomona: 1117/1077/1037 B.C.E.a

IUDA ENA BASILEIA LAGANI (B.C.E.) ISRAELA ENA BASILEIA

Rehoboama ․․․․․․ 997 ․․․․․․ Ieroboama

Abaisa/Asa ․․․․ 980/978 ․․․․

․․ 976/975/952 ․․ Nadaba/Basa/Elaha

․․ 951/951/951 ․․ Simiri/Omeri/Tibini

․․․․․․ 940 ․․․․․․ Ahaba

Iehosapata ․․․․․․ 937 ․․․․․․

․․․․ 920/917 ․․․․ Ahasaia/Iorama

Iehorama ․․․․․․ 913 ․․․․․․

Ahasaia ․․․․․․ 906 ․․․․․․

(Atalaia) ․․․․․․ 905 ․․․․․․ Iehu

Ioasa ․․․․․․ 898 ․․․․․․

․․․․ 876/859 ․․․․ Iehoahasa/Iehoasa

Amasaia ․․․․․․ 858 ․․․․․․

․․․․․․ 844 ․․․․․․ Ieroboama Iharuana

Asaraia (Usaia) ․․․․․․ 829 ․․․․․․

․․ 803/791/791 ․․ Sekaraia/Salumu/Menahemo

․․․․ 780/778 ․․․․ Pekahaia/Peka

Iotama/Ahasa ․․․․ 777/762 ․․․․

․․․․․․ 758 ․․․․․․ Hosea

Hesekaia ․․․․․․ 746 ․․․․․․

․․․․․․ 740 ․․․․․․ Samaria idia abia

Manase/Amona/Iosaia ․․ 716/661/659 ․․

Iehoahasa/Iehoiakimi ․․․․ 628/628 ․․․․

Iehoiakini/Sedekaia ․․․․ 618/617 ․․․․

[Footnote]

[Picture on page 28, 29]

Namana ia manau bona Iehova ena siahu amo ena gorere ia namo lou

[Picture on page 28, 29]

Elia be “koehirihiri ese ia abia daekau” neganai, dahaka ia vara?