Iehova Ena Hereva be Ia Mauri Noho

Nehemia Bukana Ena Hereva Badadia

ESERA bukana ena dokona kahanai ia sivarailaia gaudia idia vara negana amo, lagani 12 idia ore vadaeni. Idia gwauraia “Ierusalema haginia lou herevana” be kahirakahira ia guguru​​—pura 70 be unai negai do ia matamaia ela bona Mesia do ia ginidae. (Daniela 9:​24-27) Nehemia bukana be Dirava ena taunimanima ese Ierusalema ena magu idia haginia lou negana ia sivarailaia. Unai be lagani 12 bamona​—456 B.C.E. amo ela bona 443 B.C.E. bamona murinai​—idia vara gaudia ia sivarailaia.

Unai buka be Gavana Nehemia ese ia torea. Bona ia hahedinaraia namo herea, edena dala ai tomadiho momokani idia hanamoa lou diba bema idia gaukara goadagoada bona Iehova Dirava dekenai idia tabekau. Ia hahedinaraia danu, Iehova be ena ura ia hagugurua totona kara ta ia karaia diba. Gunalaia tauna mai ena goada bona gari lasi ena sivarai ia gwauraia danu. Nehemia ena buka ese tomadiho momokani idia badinaia taudia ibounai dekenai gau haida ia hadibaia, “badina be Dirava ena hereva be ia mauri noho, bona ia be mai ena siahu.”​​—Heberu 4:​12.

‘MAGU HAGINIA LOU GAUKARA IDIA HAOREA’

(Nehemia 1:1–​6:​19)

Nehemia be Susa hanua badana dekenai ia noho, bona King Aratasaseta Longimanus ena uaina bubua gaukarana ia karaia. “Iuda tano idia do noho taudia be idia hekwarahi bada noho, bona idau bese taudia edia vairanai idia hemarai noho. Ierusalema ena magu be ia dika noho, bona magu ena iduara bona ikoukou be lahi ese ia araia ore vadaeni.” Nehemia be unai ia kamonai neganai, ia lalohisihisi bada. Bona heduru totona Dirava dekenai ia guriguri. (Nehemia 1:​3, 4) Unai negai, king ia itaia Nehemia be ia lalohisihisi, unai dainai Nehemia ia hamaoroa Ierusalema dekenai ia lao diba.

Nehemia be Ierusalema dekenai ia ginidae murinai, hanuaboi ai ia ese Ierusalema ena magu ia sekea bona Iuda taudia dekenai magu haginia lou ena palani ia gwauraia. Haginia gaukara idia hamatamaia. Unai negai danu ma haida be idia ura unai gaukara idia koua. To, gari lasi gunalaia tauna Nehemia henunai, “magu haginia lou gaukara . . . idia haorea.”​​—Nehemia 6:​15.

Baibel Henanadaidia Edia Haere:

4:​17, 18​​—Edena bamona tau ta be ena imana tamona amo haginia gaukara ia karaia diba? Kohu huaia taudia dekenai unai be ia auka lasi. Bema idia huaia gauna be edia kwarana eiava pagana dekenai idia atoa, imana tamona amo do idia dogoatao namonamo diba, bona “imana ta dekenai tuari gaudia idia dogoatao” diba. To, edia imana rua idia gaukaralaia taudia be “edia gabana dekenai tuari kaia idia kwatua.” Unai dainai edia inai taudia idia mai neganai, idia hegaegae idia tuari henidia totona.

5:7​​—Edena dala ai Nehemia ese ‘taunimanima edia gunalaia taudia bona lohia taudia ia gwau henia’? Unai taudia be Iuda varavara taudia amo atoa kau moni idia abia, bona Mose ena Taravatu idia utua. (Levitiko 25:36; Deuteronomi 23:19) To, heniatorehai taudia ese hua ta ta lalonai atoa kau moni bada herea idia gwauraia. Bema atoa kau moni ena karoa 100 be hua ta ta idia henia, unai be hegeregere lagani ta ta ai moni 12 pesen idia henia. (Nehemia 5:11) Unai be kara dikana momokani, badina taunimanima be takisi moni bada idia henia bona aniani dekenai idia dabu. Nehemia be Dirava ena Taravatu ia gaukaralaia taga taudia ia sisiba henia bona edia kerere ia hahedinaraia totona.

6:5​​—Hehuni revareva idia koua be namo, to dahaka dainai Sanubalata ese Nehemia dekenai “revareva ta, koua lasi gauna” ia siaia? Reana, Sanubalata ia ura unai samania koikoi hereva be taunimanima ibounai idia diba, unai dainai ena revareva be ia koua lasi. Reana, unai revareva ese Nehemia ia habadua momokani diba, unai amo haginia gaukara ia rakatania bona do ia tuari. Eiava Sanubalata ia laloa unai revareva ena hereva be Iuda taudia ese idia kamonai neganai, do idia gari bona haginia gaukara do idia rakatania. To, Nehemia be ia badu lasi bona Dirava ese ia henia gaukara ia karaia noho.

Ita Dibaia Gaudia:

1:4; 2:4; 4:​4, 5. Hekwakwanai badana ita davaria eiava mai anina bada abia hidi ta ita karaia neganai, namona be ‘guriguri ita goadalaia’ bona Baibel lalonai idia noho hakaua herevadia ita badinaia.​​—Roma 12:12.

1:11–​2:8; 4:​4, 5, 15, 16; 6:​16. Iehova ena hesiai taudia ese mai momokani ida idia gwauraia guriguri be Ia ese ia kamonai henia.​​—Salamo 86:​6, 7.

1:4; 4:​19, 20; 6:​3, 15. Nehemia be hebogahisi tauna, bona ia be haheitalai namona badina gaukara ia karaia haraga bona kara maoromaoro dalana ia badinaia.

1:11–​2:3. Nehemia ia moalelaia gauna be king ena kapusi naria gaukarana lasi, to tomadiho momokani abia isi karana. Namona be ita dekenai Iehova tomadiho henia karana be gau badana bona moale ia havaraia gauna, ani?

2:​4-8. Iehova ese Aratasaseta ia gaukaralaia Nehemia dekenai gwaumaoro ia henia totona, unai amo Nehemia be Ierusalema dekenai ia lao bona ena magu ia haginia lou diba. Aonega Herevadia 21:1 ia gwau: “Lohiabada ese king ena lalona ia biagua noho, Lohiabada ese ia hakaua noho, ia ese sinavai ena ranu ia haheaua noho hegeregerena.”

3:​5, 27. Namo lasi ita laloa tomadiho momokani lalonai konstraksen gaukara do ita karaia goadagoada lasi, Tekoa taudia edia “lohia taudia” ese idia karaia bamona. To, namona be Tekoa ena hanua taudia edia kara ita tohotohoa, unai taudia be idia gaukara goadagoada bona edia gaukara idia habadaia.

3:​10, 23, 28-​30. Haida be Basileia harorolaia taudia be momo lasi gabudia dekenai idia lao, to ita momo be iseda noho gabudia ai tomadiho momokani ita durua diba. Unai bamona ita karaia diba bema Kingdom Hall haginia gaukara lalonai ita vareai bona dika idia davaria taudia dekenai heduru ita henia diba, to mai anina bada gauna be Basileia harorolaia gaukarana do ita karaia.

4:​14. Dagedage ita davaria neganai, iseda gari mamina ita hamaragia diba bema “siahu bada” Diravana ita laloa.

5:​14-​19. Gavana Nehemia ese haheitalai namo hereana ia hahedinaraia elda taudia ese idia tohotohoa totona, ia ese manau, sibona ena ura dadaraia karana, bona aonega ia hahedinaraia. Dirava ena taravatu ia badinaia, sibona ena namo ia laloa lasi bona ma haida ia biagua auka lasi. To, idia lalomanoka bona ogogami taudia ia laloa bada. Nehemia be ena hariharibada karana amo Dirava ena hesiai taudia ibounai dekenai haheitalai namona ia hahedinaraia.

“EGU DIRAVA E, INAI LAUEGU KARA IBOUNAI DO OI LALOATAO, BONA IDIA DAINAI MANI LAU DO OI HANAMOA”

(Nehemia 7:1–​13:31)

Ierusalema ena magu idia haginia haorea murinai, Nehemia ese magu iduara ia haginia bona dala ia karaia unai hanua badana idia gimaia totona. Ia ese Israela besedia ta ta edia lista ia torea. Taunimanima “ibounai Ierusalema dekenai idia haboua, Ranu ena Ikoukou ena ariara lalonai,” vadaeni Esera ese Mose ena Taravatu ia duahia, bona Nehemia bona Levi taudia be taunimanima dekenai Taravatu idia hadibaia. (Nehemia 8:1) Au Raurau Ruma Maragidia Aria idia dibaia neganai, mai moale ida unai aria idia karaia matamaia.

Gabeai hebou ma ta idia karaia, unai neganai “Israela taudia” be edia kara dika idia gwauraia hedinarai. Levi taudia be Dirava ese Israela taudia ia kara henia dalana idia laloa lou bona taunimanima ibounai idia gwauhamata ‘Dirava ena Taravatu do idia badinaia.’ (Nehemia 9:​1, 2; 10:29) Ierusalema hanua dekenai taunimanima momo idia noho lasi dainai, gadara ta amo hanua murimuri dekenai idia noho taudia 10 10 amo ta ta idia abia hidi hanua lalonai idia vareai totona. Gabeai, magu idia hahelagaia neganai idia moale bada dainai, “Ierusalema dekenai idia moale ena regena bada be daudau gabudia noho taudia ese idia kamonai.” (Nehemia 12:43) Nehemia be lagani 12 lalonai Ierusalema dekenai ia noho murinai, Aratasaseta ena hesiai gaukara karaia totona ia giroa lou. Unai negai Iuda taudia be idia kara dika. Nehemia be Ierusalema dekenai ia giroa lou neganai, ia ese unai hekwakwanai ia hamaoromaoroa. Mai manau ida ia noinoi: “Egu Dirava e, inai lauegu kara ibounai do oi laloatao, bona idia dainai mani lau do oi hanamoa.”​​—Nehemia 13:31.

Baibel Henanadaidia Edia Haere:

7:​6-​67​​—Dahaka dainai Nehemia ena lista dekenai, Serubabele ida Ierusalema dekenai idia giroa lou taudia edia namba be Esera ena namba amo ia idau? (Esera 2:​1-​65) Unai namba idia idau badina Esera bona Nehemia be buka idauidau amo edia sivarai idia abia. Hegeregere, idia ura idia giroa lou dainai edia ladana idia henia taudia edia namba be idia giroa lou taudia edia namba amo ia idau. Danu unai sivarai rua idia idau badina Iuda taudia haida be edia bese edia lista idia diba lasi, to gabeai idia dibaia neganai, edia ladadia idia torea. To unai sivarai rua be gau tamona dekenai idia hegeregere: Idia giroa lou taudia edia namba be 42,360, to hesiai taudia bona ane taudia be idia duahia lasi.

10:34​​—Dahaka dainai taunimanima be boubou patana totona lahi au idia henia be namo? Mose ena Taravatu ia gwau lasi au be boubou gauna bamona do idia henia. Unai be edia ura hegeregerena do idia henia. Au momo idia abia be namo, unai amo boubou pata latanai boubou gaudia idia gabua diba. To Netinim taudia, dubu dekenai idia gaukara Israela lasi igui hesiai taudia be momo lasi. Unai dainai, gadara ta amo haida idia abia hidi au idia mailaia totona.

13:6​​—Nehemia be Ierusalema ia rakatania bona Babulonia dekenai lagani hida ia noho? Baibel be ia gwau sibona “dina haida idia lao murinai,” Nehemia be king ia noia bema gaukara amo ia laga-ani bona Ierusalema dekenai do ia giroa lou. Unai dainai, ita gwau diba lasi lagani hida ia noho Babulonia dekenai. To, Nehemia be Ierusalema dekenai ia giroa lou neganai, ia davaria hahelaga taudia edia gaukara idia durua lasi bona Sabati taravatu be idia badinaia lasi. Momo be idau bese hahine idia adavadia, bona edia natudia be Iuda gado idia diba lasi. Nehemia be reana nega daudau Ierusalema ia rakatania, badina kara dika be bada herea.

13:​25, 28​​—Nehemia ese idia kara dika Iuda taudia ia gwau henidia sibona lasi, to gau haida ia karaia danu unai kerere ia hamaoromaoroa totona? Nehemia ese idia ia gwau henia, bona Dirava ena Hereva lalonai idia noho hahemaoro herevadia be idia dekenai ia gwauraia. Haida ia botaia bona reana ia hahemaoro henidia. Ia badu dainai, ia ese edia ‘huina ia veria.’ Ia ese Hahelagaia Tauna Badana Eliasibi ena tubuna ia lulua, badina Sanubalata ena natuna kekeni ia adavaia.

Ita Dibaia Gaudia:

8:8. Ita be Dirava ena Hereva ita hadibaia taudia dainai, Baibel ena anina ita gwauraia hedinarai namonamo, bona badinaia dalana ita gwauraia hedinarai goevagoeva be namo.

8:​10. ‘Iehova dainai ita moale’ anina be Dirava ena Hereva ita lalopararalaia, sibona eda mauri lalonai ita badinaia, bona tiokratik dalana badinaia karana amo ia vara. Unai dainai, Baibel ita stadilaia namonamo, Keristani heboudia dekenai ita lao hanaihanai, bona Basileia harorolaia bona hahediba taudia halaoa gaukarana ita karaia goadagoada be namo!

11:2. Tau ta ese ena bese ena kohu ia rakatania bona Ierusalema dekenai ia lao neganai, ena laolao ena davana be sibona do ia karaia bona reana dika ia davaria diba. Unai bamona idia karaia taudia be sibona edia ura idia dadaraia. Ita danu be unai bamona ita karaia diba, bema hebouhebou gabudia ai bona gabu ma haida dekenai volantia gaukara ita karaia.

12:​31, 38, 40-​42. Ane abia karana be dala namona Iehova ita hanamoa bona Ia ita tanikiu henia totona. Keristani hebou dekenai mai kudouna ibounai ida ane ita abia be gau badana.

13:​4-​31. Kohu momo tahua karana, kara gageva, bona hereva momokani negea karana dekenai ita naria namonamo, namo lasi iseda mauri idia hadikaia.

13:22. Nehemia ia diba ena kara be Dirava ena vairanai do ia gwauraia hedinarai. Namona be ita diba eda kara be Dirava vairanai do ita gwauraia hedinarai danu.

Iehova Ena Hahenamo Ita Abia be Namo!

Salamo torea tauna ia gwau: “Bema Lohiabada ese ruma ia haginia lasi neganai, unai ruma idia haginia taudia idia hekwarahi kava noho.” (Salamo 127:1) Nehemia buka ese unai hereva momokanina ena anina ia hahedinaraia namo herea!

Ita dibaia gauna be inai. Bema ita ura ita karaia gaudia dekenai ita kwalimu, Iehova ena lalonamo ita abia be gau badana. Bema tomadiho momokani be iseda mauri lalonai ita atoa guna, Iehova ese ita do ia hanamoa, ani? Nehemia bamona, namona be Iehova tomadiho henia bona Iena ura ita habadaia karana ita laloa bada.

[Picture on page 3]

“Lohiabada ese king ena lalona ia biagua noho, Lohiabada ese ia hakaua noho, ia ese sinavai ena ranu ia haheaua noho hegeregerena”

[Pictures on page 4, 5]

Oi diba edena bamona Dirava ena Hereva ena anina oi hahedinaraia diba, a?