‘Do Umui Goada Bona Umui Boga Auka!’
“Do umui goada noho, badina be lau ese tanobada lau halusia vadaeni.”—IOANE 16:33.
1. Israela taudia edia inai taudia goadadia be Kanana dekenai idia noho dainai, dahaka hagoadaia herevana idia abia?
ISRAELA taudia be Ioridane sinavaina idia hanaia bona Gwauhamata Tanona dekenai idia vareai gwauraia neganai, Mose ese idia ia hamaoroa ia gwau: “Do umui goada, emui lalona do umui ha-aukaia, bona idia dekenai do umui gari henia lasi. Badina be Lohiabada, emui Dirava ese umui dekenai do ia noho.” Bena Mose ese Israela taudia be Kanana tanona lalonai do ia hakaua vareai tauna, Iosua, ia boiria bona ia sisiba henia lou, ia boga-auka totona. (Deuteronomi 31:6, 7) Gabeai, Iehova ese Iosua ia hagoadaia, ia gwau: “Do oi goada, do oi gari lasi. . . . Do oi goada bona do oi boga auka.” (Iosua 1:6, 7, 9) Unai bamona hereva be nega maorona ai ia henia. Israela taudia edia inai taudia goadadia be Ioridane ena kahana ta ai idia noho dainai, Israela taudia idia boga-auka be namo.
2. Hari iseda noho dalana be edena bamona, unai dainai edena kara ita hahedinaraia be namo?
2 Hari, Keristani taudia momokanidia be kahirakahira gwauhamata tanobada matamatana lalonai do idia vareai bona namona be Iosua bamona idia boga-auka be namo. (2 Petero 3:13; Apokalupo 7:14) To, iseda noho dalana be Iosua ena amo ia idau. Iosua be kaia bona io amo ia tuari. Ita be lauma dalanai ita tuari dainai, tuari kaia korikorina do ita gaukaralaia lasi. (Isaia 2:2-4; Efeso 6:11-17) Danu, Iosua be Gwauhamata Tanona lalonai ia do vareai lasi neganai, tuari dikadia momo lalonai ia tuari. To iseda tuari dikana be hari—tanobada matamatana lalonai ita do vareai lasi lalonai—ita karaia noho. Do ita boga-auka negadia haida mani ita itaia.
Dahaka Dainai Ita Hekwarahi?
3. Baibel ese iseda inai tauna badana be edena bamona ia gwauraia?
3 Aposetolo Ioane ia gwau: “Ita diba danu, ita be Dirava ena natuna taudia, bona Satani ese tanobada taudia ibounai ia gunalaia noho.” (1 Ioane 5:19) Unai hereva amo Keristani taudia edia abidadama idia dogoatao totona idia hekwarahi bada ena badina badana ta ia hahedinaraia. Keristani tauna ese kara maoromaoro ia badinaia neganai, dala ta ai Satani Diabolo ia halusia. Unai dainai, Satani be “laiona mai ena boiboi bada bamona” ia loaloa, ia ura kamonai Keristani taudia ia hagaridia bona ia ania ore. (1 Petero 5:8) Momokani, ia ese horoa Keristani taudia bona edia bamodia ia tuari henidia. (Apokalupo 12:17) Unai tuari lalonai, ia ese taunimanima ia gaukaralaia ena ura idia hagugurua totona, ena be unai idia diba eiava lasi. Ita gini goada bona Satani bona ena gaukara taudia ibounai ita koua totona, ita boga-auka be gau badana.
4. Iesu ese dahaka sisiba ia henia, bona Keristani taudia momokanidia ese edena kara idia hahedinaraia?
4 Iesu ia diba Satani bona ena gaukara taudia ese sivarai namona do idia koua goadagoada dainai, Iena murinai idia raka taudia ia sisiba henidia, ia gwau: “Umui emui mase totona hereva do idia atoa, do idia hadikaia umui, do idia alaia mase umui. Lauegu ladana dainai bese ibounai ese umui do idia badu henia.” (Mataio 24:9) Unai hereva be aposetolo taudia edia negai ia momokani, bona hari danu ia momokani. Oibe, histori ibounai lalonai, Iehova ena Witnes taudia haida ese hari inai negai idia davaria dagedage karana be dika herea. To, Keristani taudia momokanidia be unai bamona dagedage idia davaria lalonai idia haheauka. Idia diba ‘taunimanima idia gari henia neganai, dika do idia davaria, inai be tarapu lalonai idia moru bamona,’ bona idia be idia ura lasi unai ia vara idia dekenai.—Aonega Herevadia 29:25.
5, 6. (a) Dahaka gaudia haida dainai boga-auka ita hahedinaraia be namo? (b) Kamonai Keristani taudia be edia boga-auka idia tohoa gaudia idia davaria neganai, edena bamona idia kara?
5 Dagedage sibona ita davaria lasi, to hekwarahi idia havaraia gaudia ma haida danu ita davaria, bona unai dainai ita boga-auka be namo. Pablisa haida be idia diba lasi taudia dekenai sivarai namona idia herevalaia be hekwarahi gauna ta. Sikuli natudia haida be edia tano eiava pepe badinaia goada gwauhamatana idia gwauraia totona idia boiria neganai, unai ese edia boga-auka karana ia tohoa. Unai bamona gwauhamata hereva be tomadiho herevadia dainai, Keristani natudia ese mai edia gari lasi ida edia lalona idia hadaia Dirava hamoalea dalana idia badinaia totona, bona edia haheitalai namona ese iseda lalona ia hamoalea.
6 Ita idia inai henia taudia ese nius halasia oreadia idia gaukaralaia Dirava ena hesiai taudia idia gwauraia dika, eiava tomadiho momokanina koua totona “taravatu idia atoa” neganai, boga-auka ita hahedinaraia danu be namo. (Salamo 94:20) Hegeregere, niuspepa, reidio, eiava televisen ai Iehova ena Witnes taudia dekenai hereva gagevadia eiava hereva koikoidia idia gwauraia neganai, unai gaudia be edena bamona ita laloa be namo? Ita hoa be namo, a? Lasi. Ita diba unai bamona gaudia do idia vara. (Salamo 109:2) Bona taunimanima haida ese unai idia halasia hereva koikoidia bona gagevadia idia abia dae neganai ita hoa lasi, badina “mai ena lalona kehoa lasi tauna ese, hereva ibounai ia hamomokania noho.” (Aonega Herevadia 14:15) To, Dirava idia badinaia Keristani taudia idia ura lasi edia tadikaka hadikaia herevadia idia abia dae kava, bona danu idia ura lasi niusi halasia oreadia ese idia halasia sivarai koikoidia dainai Keristani heboudia idia reaia, haroro gaukara idia hamaragia, eiava edia abidadama dekenai idia manoka. To, edia ‘kara dekena amo idia hahedinaraia idia be Dirava ena hesiai taudia,’ herevana ‘haida ese idia hanamoa, haida ese idia hahemaraia, haida idia gwau edia kara be dika, bona haida idia gwau idia be kara namo taudia.’ Bona herevana “haida [dagedage taudia] idia gwau [idia] be koikoi taudia, to hereva momokani [idia] gwauraia.”—2 Korinto 6:4, 8.
7. Ita sibona dekenai edena henanadai ita henia diba?
7 Paulo be Timoteo ia tore henia, ia gwau: “Dirava ese gari laumana ita dekenai ia henia lasi, to siahu. . . . Unai dainai, iseda Lohiabada ena sivarai do oi gwauraia hedinarai, do oi hemarai lasi.” (2 Timoteo 1:7, 8; Mareko 8:38) Unai hereva ita duahia dainai, ita sibona ita nanadaia diba: ‘Lauegu abidadama dainai lau hemarai, eiava lau gari lasi, a? Lauegu gaukara gabuna (eiava lau lao henia sikulina) dekenai idia noho taudia lau hadibaia lau be Iehova ena Witnes tauna ta, eiava hereva momokani lau hunia toho? Lau hemarai badina lau be ma haida amo lau idau, eiava lau moale badina egu hetura karana Iehova ida dainai idia amo lau idau?’ Bema ta be sivarai namona harorolaia karana dekenai eiava, taunimanima amo ia idau karana dekenai ia gari, namona be ia ese Iehova ena sisiba herevadia Iosua dekenai ia laloa: “Do oi goada bona do oi boga auka.” Namona be ita laloaboio lasi, iseda gaukara hebou taudia eiava iseda sikuli turadia edia lalohadai be gau badana lasi, to mai anina bada gauna be Iehova bona Iesu Keriso edia lalohadai.—Galatia 1:10.
Boga-Auka Ita Habadaia Dalana
8, 9. (a) Nega ta, Keristani taudia ginigunadia be edena dala ai edia boga-auka tohoa karana ta idia davaria? (b) Petero bona Ioane ese hagaria herevadia idia davaria neganai edena bamona idia kara, bona idia bona edia tadikaka ese dahaka idia mamia?
8 Edena dala ai boga-auka karana ita habadaia diba, bena unai amo inai nega aukadia ai iseda Dirava badinaia karana ita dogoatao noho diba? Keristani taudia ginigunadia ese edena dala ai boga-auka karana idia habadaia? Hahelaga taudia badadia bona Ierusalema dekenai idia noho tatau badadia ese Petero bona Ioane idia hamaoroa Iesu ena ladana dekenai idia haroro lasi neganai, idia karaia gauna mani ita laloa. Hahediba taudia idia ura lasi edia haroro gaukara idia hadokoa bona idia hagaridia bena idia ruhadia. Unai murinai, tadikaka ida idia hedavari lou, bona idia ibounai idia guriguri hebou, idia gwau: “Lohiabada e, edia hagaria hereva harihari do oi laloa, bona oiemu hesiai taudia dekenai goada oi henia, vadaeni ai ese oiemu hereva do ai gwauraia, gari lasi.” (Kara 4:13-29) Iehova ese edia guriguri ia kamonai bona lauma helaga amo idia ia hagoadaia, bona Iuda gunalaia taudia ese gabeai idia hamomokania bamona, hahediba taudia be edia hadibaia hereva amo ‘Ierusalema ibounai idia hahonua.’—Kara 5:28.
9 Namona be unai nega ai ia vara gauna ita laloa. Iuda gunalaia taudia ese hahediba taudia idia hagaridia neganai, idia ese edia haroro gaukara idia hadokoa lasi. To, hahediba taudia be boga-auka totona idia guriguri, do idia haroro noho totona. Bena edia guriguri hegeregerena idia kara, bona Iehova ese ena lauma helaga amo idia ia hagoadaia. Edia sivarai ese ia hahedinaraia, Keristani taudia ese dagedage idia davaria neganai, Paulo ese lagani haida murinai ia torea herevana be idia dekenai ia momokani diba. Paulo ia gwau: “Keriso ese lau ia hasiahua, vadaeni gau ibounai lau goadalaia diba.”—Filipi 4:13.
10. Ieremia ena haheitalai ese edena dala ai idia hemarai taudia ia durua diba?
10 To, bema ta be hemarai momo tauna, dagedage negana ai mai gari lasi ida Iehova ia hesiai henia diba, a? Oibe! Iehova ese Ieremia ia abia hidi peroveta tauna ai do ia lao neganai, Ieremia ena kara mani oi laloa. Unai tau matamatana ia gwau: “Lau be mero sibona.” Ia mamia ia be hegeregere lasi. To, Iehova ese ia hagoadaia ia gwau: “Do oi hereva lasi, ‘Lau be mero sibona,’ badina be lau ese taunimanima dekenai oi do lau siaia, bona oi be idia dekenai do oi lao. Bona oi dekenai lau henia hereva ibounai be idia dekenai do oi hamaoroa. Idia dekenai do oi gari lasi, badina lau be oi dekenai do lau noho, bona lau ese oi do lau naria.” (Ieremia 1:6-10) Ieremia ese Iehova ia abidadama henia, unai dainai haroro gaukara totona ia daradara noho lasi bona Israela lalonai boga-auka witnes tauna ta ai ia lao.
11. Hari, dahaka ese Keristani taudia ia durua Ieremia bamona idia kara totona?
11 Hari, horoa Keristani taudia edia gaukara be Ieremia ena bamona, bona “mamoe idaudia” taudia ‘hutuma bada herea’ ese idia durua Iehova ena ura idia harorolaia totona, ena be taunimanima idia ura lasi idia kamonai, idia hevaseha bona idia dagedage henidia. (Apokalupo 7:9; Ioane 10:16) Iehova ena hereva Ieremia dekenai ese idia ia hagoadaia: “Do oi gari lasi.” Idia laloaboio lasi inai gaukara be Dirava amo idia abia bona unai dainai iena sivarai idia harorolaia noho.—2 Korinto 2:17.
Boga-Auka Idia Hahedinaraia Taudia Edia Haheitalai Ita Tohotohoa
12. Boga-auka karana dekenai Iesu ese edena bamona haheitalai namo hereana ia hahedinaraia, bona edena bamona iena murinai idia raka taudia ia hagoadaia?
12 Boga-auka karana do ita habadaia bema boga-auka idia hahedinaraia taudia ma haida, hegeregere Ieremia, edia haheitalai ita tohotohoa. (Salamo 77:12) Hegeregere, Iesu ena haroro gaukara ita laloa neganai, ita itaia Satani ese ia tohoa bona Iuda gunalaia taudia ese ia idia dagedage henia neganai, iena boga-auka karana ita laloa bada. (Luka 4:1-13; 20:19-47) Iehova ese Iesu dekenai ia henia goada dainai ia gini goada, bona kahirakahira ia mase neganai, iena hahediba taudia dekenai ia gwau: “Tanobada dekenai umui be hisihisi do umui abia. To, do umui goada [“boga-auka,” NW ] noho, badina be lau ese tanobada lau halusia vadaeni.” (Ioane 16:33; 17:16) Bema Iesu ena murinai idia raka taudia ese ena haheitalai idia tohotohoa, idia danu do idia kwalimu. (1 Ioane 2:6; Apokalupo 2:7, 11, 17, 26) To idia boga-auka be namo.
13. Paulo ese Filipi taudia dekenai edena hagoadaia herevana ia henia?
13 Iesu ia mase bena lagani haida idia ore murinai, Paulo bona Sila be Filipi dekenai dibura rumana lalonai idia negea. Gabeai, Paulo ese Filipi kongregesen taudia ia hagoadaia, ia gwau: “Umui gini goada noho. Bona do lau diba, mai emui laloa tamona bona ura tamona, Sivarai Namona abidadama henia totona do umui tuari hebou noho. Bona Sivarai Namona ena tuari lalonai do umui gini goada, umui idia tuari henia taudia do umui gari henia lasi.” Paulo ese unai kara dekenai idia ia hagoadaia totona, ia gwau: “[Unai dagedage taudia ese] emui gari lasi idia itaia neganai, do idia diba momokani idia kwalimu diba lasi. Badina be Dirava ese hamauria umui dekenai do ia henia. Dirava ese iena hariharibada umui dekenai ia henia, Keriso dekenai do umui abidadama henia totona. To inai sibona lasi. Dirava ese danu hariharibada umui dekenai ia henia, Keriso dainai do umui hisihisi totona.”—Filipi 1:27-29.
14. Paulo ena boga-auka karana dainai Roma dekenai dahaka ia vara?
14 Paulo ese Filipi kongregesen ia tore henia neganai, ia be Roma dekenai dibura rumana ai idia atoa lou. To, ma haida dekenai ia haroro noho mai gari lasi ida. Unai amo dahaka ia vara? Ia gwau: “Kaisara ena ruma idia gimaia tuari taudia ibounai, bona iniseni idia noho taudia ibounai danu idia diba vadaeni, Keriso ena hesiai gaukara dainai lau be dibura ruma dekenai lau noho. Bona Keristani varavara taudia momo ese lau idia laloa, Keriso dainai dibura lalonai lau noho. Vadaeni inai idia laloa noho dainai, edia lalona ese goada idia davaria. Edia gari idia laloa lasi, bona Sivarai Namona idia harorolaia goada noho.”—Filipi 1:13, 14.
15. Mai boga-auka ida ita gini goada totona, abidadama idia hahedinaraia taudia edia haheitalai namodia be edeseniai ita davaria diba?
15 Paulo ena haheitalai ese ita ia hagoadaia. Lohia taudia aukadia eiava dubu gunalaia taudia ese idia lohiaia tanodia lalonai, dagedage karana idia haheaukalaia Keristani taudia edia haheitalai namona danu ese ita idia hagoadaia. Unai taudia haida edia sivarai be Gima Kohorona bona Awake! magasin bona Yearbooks of Jehovah’s Witnesses lalonai idia noho. Unai sivarai oi duahidia neganai, namona be oi laloatao unai buka ese ia sivarailaia taudia be ita bamona; to hekwakwanai badadia momokani idia davaria neganai, Iehova ese idia dekenai siahu bada ia henia bona idia haheauka. Ita diba danu nega aukadia ita davaria neganai, Iehova ese ita dekenai unai bamona siahu bada do ia henia danu.
Iseda Boga-Auka Karana ese Iehova Ia Hamoalea Bona Hanamoa
16, 17. Hari inai negai, edena dala ai boga-auka karana ita hahedinaraia diba?
16 Bema tau ta be hereva momokani bona kara maoromaoro totona ia gini goada, unai be boga-auka karana. Bema ta be unai bamona ia karaia ena be ena lalona dekenai ia gari, unai be boga-auka bada karana. Momokani, Keristani tauna ta ia boga-auka diba bema ia ura momokani Iehova ena ura ia karaia, bema ia ura kamonai karana ia hahedinaraia noho, bema hanaihanai Iehova dekenai ia tabekau, bona bema hanaihanai ia laloatao Iehova ese guna ia bamona taudia momo ia hagoadaia vadaeni. Danu, ita lalo-parara iseda boga-auka karana ese Iehova ia hamoalea bona hanamoa neganai, iseda lalona ita hagoadaia momokani do ita manoka lasi totona. Namona be ita hegaegae, hevaseha eiava dagedage karana ita haheaukalaia totona, badina ia ita lalokau henia bada.—1 Ioane 2:5; 4:18.
17 Namona be ita laloaboio lasi ita be iseda abidadama dainai hisihisi ita davaria noho, to ita gwau lasi unai ita davaria badina kerere ta ita karaia. (1 Petero 3:17) Hisihisi ita davaria badina Iehova ena lohia siahuna ita abia isi, kara namona ita karaia, bona ita be tanobada ena lasi. Unai kara dekenai aposetolo Petero ia gwau: “Bema umui kara namo, vadaeni hisihisi umui abia neganai, Dirava ena vairanai umui be namo.” Petero ia gwau danu: “Dirava ena ura dainai hisihisi idia abia taudia ese kara namodia sibona do idia karaia be namo. Ma danu, edia lauma be Dirava ena imana dekenai do idia atoa. Badina be ia ese ita ia karaia, bona ita abidadama henia diba, iena gwauhamata do ia badinaia momokani.” (1 Petero 2:20; 4:19) Oibe, iseda abidadama ese iseda lalokau Diravana, Iehova, ia hanamoa. Unai badina mai siahuna dainai ita boga-auka be namo!
Siahu Taudia Vairanai Ita Hereva Negadiai
18, 19. Diadi tauna ta vairanai ita boga-auka neganai, ita be ia dekenai dahaka hereva ita gwauraia bamona?
18 Iesu ese ia murinai idia raka taudia ia hamaoroa dagedage do idia davaria neganai, ia gwau danu: “[Taunimanima] ese kaunsolo edia vairana dekenai do idia hakaua umui, bona idia edia dubu lalonai do idia botaia umui. Lohia bona king edia vairana dekenai do idia hakaua umui, lau dainai. Inai dala dekenai umui ese lau do umui gwauraia hedinarai idia dekenai, bona bese idauidau ibounai dekenai.” (Mataio 10:17, 18) Samania koikoi herevadia dainai diadi tauna eiava lohia tauna ta vairanai ita gini neganai, ita boga-auka be namo. To, unai bamona negadiai mai gari lasi ida unai taudia dekenai ita haroro neganai, unai nega aukana ita gaukaralaia mai anina bada gauna ta ita hagugurua totona. Unai be ita idia hahemaoro henia taudia dekenai Iehova ena hereva, Salamo ena karoa iharuana dekenai, ita gwauraia bamona: “King taudia e, inai sisiba do umui kamonai: Tanobada ena lohia taudia e, do umui diba. Lohiabada do umui tomadiho henia, mai emui gari danu, Mai heudeheude danu Lohiabada do umui hanamoa.” (Salamo 2:10, 11) Nega momo, Iehova ena Witnes taudia be kota dekenai idia samanidia koikoi neganai, diadi taudia ese tomadiho abia hidi ena maoro idia koua lasi, bona unai ita laloa bada. To, diadi taudia haida ese ita idia inai henia taudia edia lalohadai idia abia dae. Unai bamona diadi taudia dekenai, Baibel ia gwau: “Sisiba do umui kamonai.”
19 Namona be diadi taudia idia diba Iehova Dirava ena taravatu ese taravatu ibounai ia hereaia. Namona be idia laloatao taunimanima ibounai, diadi taudia danu, be Iehova Dirava bona Iesu Keriso ese do idia hahemaoro henidia. (Roma 14:10) Herevana tanobada ena diadi taudia ese ita do idia hahemaoro henia eiava lasi, to badina momo dainai do ita boga-auka badina Iehova ese ita ia durua. Baibel ia gwau: “Ia dekenai idia abidadama taudia be idia moale, ia ese ia naridia dainai.”—Salamo 2:12.
20. Dahaka dainai ita moale diba bema dagedage ita davaria eiava taunimanima ese iseda ladana idia hadikaia?
20 Iesu ena Haroro Hereva Badana lalonai, ia gwau: “Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo. Umui moale bada momokani, badina emui davana guba dekenai ia bada, badina be unai bamona danu, peroveta taudia gunadia be taunimanima ese idia dagedage henia.” (Mataio 5:11, 12) Momokani, dagedage karana be moale gauna lasi, to bema dagedage negadiai ita gini goada, niusi halasia oreadia ese iseda ladana hadikaia herevadia idia halasia neganai danu, unai be moale gauna. Unai ena anina be Iehova ita hamoalea bona ia ese ita dekenai davana namona do ia henia. Iseda boga-auka karana ese ia hahedinaraia, ita be mai iseda abidadama momokanina bona ita diba momokani Dirava ena lalo-namo ita abia. Momokani, ia hahedinaraia ita ese Iehova ita abidadama henia momokani. Unai bamona abidadama be mai anina bada Keristani tauna dekenai, hereva gabena ese unai do ia hahedinaraia.
Dahaka Oi Dibaia?
• Hari, dahaka gaudia dainai boga-auka ita hahedinaraia be namo?
• Edena dala ai boga-auka karana ita hahedinaraia diba?
• Daidia ese boga-auka karana dekenai haheitalai namona idia hahedinaraia?
• Dahaka dainai ita ura mai boga-auka ida ita kara?
[Pictures on page 19]
Simone Arnold (hari Liebster) Germany ai, Widdas Madona Malawi ai, bona Lydia bona Oleksii Kurdas Ukraine dekenai ese Iehova amo idia abia boga-auka karana idia hahedinaraia bona Satani idia dadaraia
[Pictures on page 20]
Sivarai namona dainai ita hemarai lasi
[Picture on page 21]
Paulo ena boga-auka karana dibura lalonai ese sivarai namona ia durua bada
[Picture on page 22]
Bema mai boga-auka ida diadi tauna dekenai iseda abidadama Baibel amo ita gwauraia hedinarai, idia dekenai mai anina bada herevana ta ita gwauraia noho