‘Do Oi Laloa Namonamo’

“Ita kamonai vadaeni gauna, do ita dogoatao [“laloa namonamo,” “NW”] bona badinaia be namo. Namo lasi ita manokalaia, do ita boio garina.”​—⁠HEBERU 2:⁠1.

 1. Lalona veria gaudia dainai dika ia vara diba dalana oi haheitalaia.

LAGANI ta ta lalonai, United States dekenai, taunimanima 37,000 bamona be motuka aksiden amo idia mase. Diba taudia idia gwau unai mase momo idia koua diba, bema draiva taudia ese edia heau dalana idia laloa namonamo. Dala badinai idia haginia saini idauidau eiava mobael telefon ese draiva taudia haida edia lalona idia veria. Ma haida be idia heau neganai idia aniani. Unai lalona veria gaudia ibounai dainai dika ia vara diba.

2, 3. Paulo ese Heberu Keristani taudia dekenai dahaka sisiba ia henia, bona dahaka dainai ena sisiba be maoro?

² Lagani 2,000 bamona gunanai, motuka idia do karaia lasi neganai, aposetolo Paulo ese Heberu Keristani taudia haida dekenai dika ia havaraia lalona veria gauna ta ia herevalaia. Paulo ia gwau ia toreisi lou Iesu Keriso ena dagi be aneru edia ataiai, badina Dirava ena idibana kahana dekenai ia helai. Bena aposetolo tauna ia gwau: “Dirava ena Natuna ena ladana ia bada momokani dainai, unai hereva momokani, ita kamonai vadaeni gauna, do ita dogoatao [“laloa namonamo,” NW ] bona badinaia be namo. Namo lasi ita manokalaia, do ita boio garina.”​—⁠Heberu 2:⁠1.

³ Dahaka dainai Heberu Keristani taudia ese idia kamonai vadaeni sivaraina, Iesu ena sivarai unai, ‘do idia laloa namonamo’ be namo? Badina Iesu be tanobada ia rakatania negana amo lagani 30 bamona idia lao vadaeni. Edia Biaguna ia noho lasi dainai, Heberu Keristani taudia haida be abidadama momokanina amo idia hure oho matamaia. Iuda tomadiho dalana, edia tomadiho dalana gunana, ese edia lalona ia veria.

Idia Laloa Namonamo be Gau Badana

 4. Reana dahaka dainai Heberu Keristani taudia haida ese Iuda tomadihona idia ura henia lou?

⁴ Reana dahaka dainai Keristani tauna ta ese Iuda tomadihona ia ura henia lou? Taravatu henunai idia badinaia tomadiho dalana dekenai gau momo be idia itaia diba gaudia. Taunimanima ese hahelaga taudia idia itaia bona idia gabua boubou edia bonana idia bonaia. To dala haida ai, Keristani tomadiho be idau. Keristani taudia be mai edia Hahelaga Tauna Badana, Iesu Keriso, to idia lao lagani 30 bamona lalonai tanobada dekenai ia idia itaia lasi. (Heberu 4:14) Idia be mai edia dubu, to iena helaga herea gabuna be guba. (Heberu 9:24) Taravatu henunai kopina utua karana korikorina idia karaia, to Keristani taudia edia kopina utua karana be “kudouna lalonai ia vara gauna.” (Roma 2:29) Unai dainai, Heberu Keristani taudia be reana idia laloa matamaia, Keristani tomadiho be gau korikorina bamona lasi.

 5. Paulo be edena bamona ia hahedinaraia Iesu ia haginia tomadiho dalana ese tomadiho karana Taravatu henunai ia hereaia?

⁵ Namona be Heberu Keristani taudia ese Keriso ia hamatamaia tomadiho dalana dekenai gau badana ta idia lalo-pararalaia. Unai tomadiho dalana dekenai idia itaia gaudia lasi to abidadama be mai anina bada, bona ia ese peroveta tauna Mose amo idia abia Taravatuna ia hereaia. Paulo ia gwau: “Taunimanima edia tauanina idia helaga lasi neganai, nanigosi bona boromakau tau edia rarana bona boromakau natuna idia gabua ena kahu be hahelagaia tauna ese unai taudia edia latanai ia negea lao. Vadaeni unai murinai edia tauanina be helaga bona goeva Dirava ena vairanai. Inai be momokani. To Keriso ena rarana ese unai bamona kara ia hereaia momokani, ani? Badina be Keriso be goevagoeva momokani, bona kerere ta lasi. Bona Lauma Helaga, noho hanaihanai Laumana, ena siahu dekena amo Keriso ese sibona ena mauri Dirava dekenai ia henia, boubou gauna goevagoeva momokani totona. Unai dainai iena rarana ese iseda lalona do ia hagoevaia anina lasi boubou karadia dekena amo. Vadaeni Mauri Diravana ena hesiai gaukara do ita karaia diba.” (Heberu 9:​13, 14) Oibe, Iesu Keriso ena mauri davalaia boubouna abidadama henia karana amo ia vara gwauatao karana ese dala momo ai, Taravatu henunai idia karaia boubou gaudia amo ia vara gwauatao karana ia hereaia.​—⁠Heberu 7:​26-28.

6, 7. (a) Dahaka dainai Heberu Keristani taudia ese idia kamonai gaudia idia “laloa namonamo” be gau badana? (b) Paulo ese Heberu taudia ia tore henia neganai, Ierusalema ena nega dokona ena lata be edena bamona? (Futnout itaia.)

⁶ To Heberu Keristani taudia ese Iesu ena sivarai dekenai idia kamonai gaudia idia laloa namonamo be mai ena badina ma ta danu. Ia peroveta, Ierusalema do idia hadikaia ore. Iesu ia gwau: “Negana do ia ginidae, oi dekenai idia tuari henia taudia ese tano do idia haboua bada, tuari ena magu do idia karaia, oi do idia koua hagegea, oiemu taudia idia raka murimuri dekenai be dala lasi. Vadaeni idia ese oi do idia hadikaia ore momokani, oiemu taudia danu oiemu magu lalonai be do idia mase ore, bona nadi ta nadi ta latanai do idia noho lasi. Badina be oi hamauria totona, Dirava ese oi dekenai ia vadivadi henia ena nega be oi diba lasi.”​—⁠Luka 19:​43, 44.

⁷ Edena negai unai do ia vara? Iesu ese unai dina bona hora ia gwauraia lasi. To, idia ia hadibaia: “Tuari orea ese Ierusalema do idia koua hagegea do umui itaia, vadaeni do umui diba, iena dokona ia kahirakahira vadaeni. Unai neganai Iudea dekenai idia noho taudia be ororo dekenai do idia heau lao, bona hanua lalonai idia noho taudia be do idia heau murimuri dekenai, bona gunika dekenai idia noho taudia be hanua dekenai do idia raka vareai lasi.” (Luka 21:​20, 21) Iesu ese unai hereva ia gwauraia bena lagani 30 murinai, Ierusalema dekenai idia noho Keristani taudia haida ese karaharaga lalohadaina idia haboioa bona gau idauidau ese edia lalona idia veria. Edia heau dalana idia laloa namonamo lasi bamona. Bema edia laloa dalana idia haidaua lasi, dika do idia davaria. Herevana unai idia laloa eiava lasi, to Ierusalema ena dokona be kahirakahira!a Paulo ena sisiba ese Ierusalema dekenai idia noho bona lauma dalanai idia mahuta Keristani taudia ia hanogaia be namo.

Hari Ita “Laloa Namonamo”

 8. Dahaka dainai Dirava ena Hereva lalonai idia noho hereva momokanidia ita “laloa namonamo” be gau badana?

⁸ Keristani taudia ginigunadia hegeregerena, ita danu ese Dirava ena Hereva lalonai idia noho hereva momokanidia ita “laloa namonamo” be gau badana. Dahaka dainai? Badina dika badana ta do ia vara, bese tamona sibona dekenai lasi, to inai tanobada dikana ibounai ese unai dika do ia davaria. (Apokalupo 11:18; 16:​14, 16) Momokani, Iehova ese unai do ia karaia ena dina bona hora ita diba lasi. (Mataio 24:36) To, hari idia guguru noho Baibel ena peroveta herevadia ese idia hahedinaraia ita be ‘nega dokona’ dekenai ita noho. (2 Timoteo 3:​1-5) Unai dainai, iseda lalona idia veria gaudia ibounai dainai ita naria namonamo be gau badana. Namona be Dirava ena Hereva ita laloa namonamo bona karaharaga lalohadaina ita dogoatao noho. Unai dala tamona sibona ia noho, ‘inai dika ibounai dekena amo do ita heau mauri’ totona.​—⁠Luka 21:⁠36.

9, 10. (a) Edena dala ai ita hahedinaraia, lauma gaudia ita laloa namonamo? (b) Edena dala ai Dirava ena hereva be ‘iseda raka dalana ia hadiaria’ bona ‘ita ia hakaua lamepa bamona’?

⁹ Inai mai anina bada negana lalonai, edena bamona ita hahedinaraia lauma gaudia ita “laloa namonamo”? Dala ta be Keristani heboudia bona hebouhebou badadia dekenai ita lao hanaihanai. Danu, namona be Baibel ita stadilaia goadagoada, unai amo ena Torea Tauna, Iehova, kahirakahira ita lao diba. (Iamesi 4:⁠8) Bema sibona eda stadi bona hebou idauidau amo Iehova ita dibaia, ita be Dirava ia hereva henia salamo torea tauna bamona, ia gwau: “Oiemu hereva be lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.”​—⁠Salamo 119:105.

¹⁰ Baibel ese ita dekenai Dirava ena ura vaira negana totona ia gwauraia neganai, ia be “diari” bamona. Ia be ita ia hakaua “lamepa” bamona danu. Eiava ita gwau diba, mauri ena hahetoho idauidau lalonai raka dalana ita davaria totona, ita ia durua. Unai dainai, hadibaia herevadia kamonai totona iseda tadikaka ida ita hebou neganai bona ita sibona ese Dirava ena Hereva ita duahia neganai, “laloa namonamo” karana be gau badana. Ita abia diba ese ita do ia durua, mai aonega ida abia hidi idauidau ita karaia bena ita abia-hidi gaudia ese iseda namo idia habadaia bona Iehova idia hamoalea. (Aonega Herevadia 27:11; Isaia 48:17) Hebou lalodiai bona sibona eda stadi lalonai, Dirava ese ia henia lauma gaudia amo namo bada ita abia totona, ita laloa namonamo negana ena lata be edena bamona ita halataia diba?

Hebou Lalodiai Lalona Biagua Karana Habadaia Daladia

11. Dahaka dainai Keristani heboudia dekenai hereva ita laloa namonamo be nega haida ia auka?

¹¹ Nega haida, Keristani heboudia dekenai hereva ita laloa namonamo be auka. Reana beibi ta ia tai eiava ia mai leiti tauna ta ese helai gabuna ia tahua, bena unai ese eda lalona idia veria haraga. Reana dina ibounai ita gaukara dainai, ita hesiku. Reana platfom amo ia hereva tauna ena hereva dalana ese eda lalona ia veria lasi, bena karaharaga gau ma haida ita laloa matamaia​—⁠reana ita mahuta! To idia herevalaia gaudia be mai anina bada dainai, kongregesen heboudia dekenai lalona biagua karana ita habadaia be gau badana. To edena dala ai unai ita karaia diba?

12. Dahaka ese ita ia durua, hebou dekenai hereva ita laloa namonamo totona?

¹² Nega momo, bema ita hegaegae namonamo, hebou dekenai hereva ita laloa namonamo be auka lasi. Unai dainai, hebou dekenai do idia herevalaia gaudia ita laloa guna totona, nega ita atoa be namo, ani? Dina ta ta ai, miniti haida sibona lalonai pura ena Baibel duahiduahi ena kahana ta ita duahia bona lalohadailaia karana amo, ena karoa iboudiai ita haorea diba. Bema palani ita karaia, Kongregesen Buka Stadi bona Gima Kohorona Stadi gaudia ita hegaegaelaia totona, nega ita davaria diba danu. Herevana edena bamona sediual ita karaia, to gau ta ia momokani: Hegaegae karana ese ita do ia durua, kongregesen heboudia dekenai idia herevalaia gaudia ita laloa namonamo totona.

13. Hebou lalodiai idia herevalaia gaudia ita laloa totona, dahaka ese ita ia durua?

¹³ Ita hegaegae namonamo be gau badana, to danu, haida idia davaria platfom kahirakahira idia helai neganai, program do idia laloa namonamo. Hereva henia tauna ita itaia, siri idia duahia neganai iseda Baibel ai ita badinaia, bona hereva haida ita torea, be dala ma haida gau idauidau ese eda lalona idia veria lasi totona. To lalona biagua daladia ibounai ia hereaia gauna ta be iseda kudouna ita hegaegaelaia. Ita hebou ena badina ita lalo-pararalaia be gau badana. Iseda tadikaka ida ita hebou ena badina badana be Iehova ita tomadiho henia hebou. (Salamo 26:12; Luka 2:​36, 37) Hebou idauidau be lauma aniani ita abia dalana badana. (Mataio 24:​45-47) Danu, hebou ese dala idia kehoa, ‘ta ta ita durua bona lalokau dekena amo kara namodia ita karaia’ totona.​—⁠Heberu 10:​24, 25.

14. Edena dala ai hebou do ia namo?

¹⁴ Haida idia laloa hereva henia taudia edia hadibaia dalana hegeregerena hebou do ia namo eiava. Bema hereva henia taudia ese hereva idia henia namonamo, reana ita gwau hebou be namo. To bema idia hadibaia namonamo lasi, reana iseda lalohadai be idau. Momokani, namona be program lalonai kahana idia karaia taudia idia hekwarahi, idia hadibaia namonamo bona kamonai taudia edia kudouna idia hamarerea totona. (1 Timoteo 4:16) To, namo lasi ita kamonai taudia ese hereva henia taudia ita maumauraia haraga. Ena be kahana idia karaia taudia edia hadibaia dalana be mai anina bada, to unai sibona dainai hebou ia namo lasi. Reana oi abia dae, hereva henia tauna ese hereva ia henia dalana be mai anina bada lasi, to ita kamonai dalana be mai anina bada, ani? Hebou dekenai ita lao bona hereva ita laloa namonamo neganai, Dirava ena ura hegeregerena ia ita tomadiho henia. Unai dala ai hebou do ia namo. Bema ita ura bada Dirava ita diba, hebou amo namo do ita abia, herevana hereva idia henia namonamo eiava lasi. (Aonega Herevadia 2:​1-5) Unai dainai, namona be iseda hebou lalodiai hereva ita “laloa namonamo.”

Sibona Emu Stadi amo Namo Bada Oi Abia

15. Edena dala ai stadi bona laloa dobu karadia ese ita idia durua diba?

¹⁵ Sibona eda stadi bona laloa dobu negadia lalonai bema ita “laloa namonamo,” namo bada do ita abia. Baibel bona Keristani bukadia ita duahia bona edia hereva ita lalohadailaia neganai, Dirava ena Hereva lalonai idia noho hereva momokanidia be iseda kudouna lalonai ita atoa. Unai ese iseda laloa dalana bona iseda kara do ia hanamoa bada. Momokani, ita do ia durua, Iehova ena ura ita karaia neganai moale do ita davaria. (Salamo 1:2; 40:⁠8) Unai dainai, namona be iseda lalona biagua karana ita habadaia, stadi neganai ita ia durua totona. Lalona veria gaudia be momo! Gau maragidia​—⁠telefon eiava regerege ma ta​—⁠ese eda lalona idia veria haraga. Eiava, reana ita ese gau tamona ita laloa daudau be auka. Reana ita ura lauma aniani amo sibona ita ubua, to karaharaga gau idauidau ita laloa matamaia. Dirava ena Hereva ita stadilaia neganai, edena dala ai ita “laloa namonamo” diba?

16. (a) Dahaka dainai sibona eda stadi totona nega ita atoa be gau badana? (b) Edena dala ai oi ese Dirava ena Hereva stadilaia totona nega oi atoa?

¹⁶ Namona be sediual ita karaia bona stadi negana bona gabuna namodia ita abia hidi. Ita momo ese ita sibona totona nega ita davaria be auka. Reana mamina ita abia, dina ta ta gaudia ese eda lalona idia veria, sinavai ese au maragimaragi ia abia lao bamona. To, namona be unai kara ita koua, bona stadi totona nega ita tahua. Namo lasi, ita naria ela bona stadi totona dala ia kehoa kava. To, namona be eda mauri ita biagua bona stadi totona nega ita atoa. (Efeso 5:​15, 16) Haida ese daba dekenai nega sisina idia abia, badina unai neganai lalona veria gaudia be momo lasi. Ma haida idia davaria idia dekenai adorahi be nega namona. Hereva badana be inai, Dirava bona iena Natuna dekenai diba maoromaoro ita abia karana do ita reaia lasi. (Ioane 17:⁠3) Unai dainai, namona be sibona eda stadi totona nega ita atoa bena eda sediual ita badinaia.

17. Laloa dobu karana be dahaka, bona edena dala ai ita ia durua?

¹⁷ Laloa dobu karana​—⁠stadi amo ita dibaia gaudia ita lalohadailaia karana​—⁠be mai anina bada. Laloa dobu karana amo, Dirava ena lalohadai be idia printaia pepana amo ita abia bona iseda kudouna lalonai ita atoa. Laloa dobu karana ese ita ia durua, Baibel ena sisiba badinaia dalana ita itaia totona, bena ‘Dirava ena hereva do ita kamonai kava lasi, to ita badinaia danu.’ (Iamesi 1:​22-25) Laloa dobu karana ese ita ia durua danu, Iehova kahirakahira ita lao totona, badina unai ita karaia lalonai Iena kara bona ita stadilaia gaudia ese unai kara idia hahedinaraia daladia ita lalohadailaia.

18. Laloa dobu karana amo namo bada ita abia totona, dahaka be gau badana?

¹⁸ Stadi bona laloa dobu karana amo namo bada ita abia totona, gau idauidau ese eda lalona idia veria lasi be namo. Ita laloa dobu lalonai diba matamata ita abia totona, dina ta ta gaudia ese iseda lalona idia veria karana ita koua be gau badana. Unai totona nega ita abia bona ita sibona ita noho be namo, to Dirava ena Hereva dekenai ia noho lauma aniani bona hereva momokani ena ranu amo sibona ita ubua karana ese eda lalona ia hagoadaia!

19. (a) Dahaka ese haida ia durua, sibona edia stadi lalonai lalona biagua karana idia habadaia totona? (b) Stadi be edena bamona ita laloa be namo, bona unai mai anina bada gaukarana amo dahaka namo ita abia diba?

¹⁹ Bema nega daudau lalonai gau ta ita laloa be auka bona nega sisina sibona ita stadi murinai, gau ma haida ita laloa matamaia be edena bamona? Haida idia davaria stadi lalonai lalona biagua karana idia habadaia diba, bema matamanai edia stadi negadia idia kwadogi bena sisina sisina idia halataia. Iseda tahua gauna be stadi dekenai nega sisina bada ita atoa, ita ura lasi ita karaia haraga. Ita stadilaia gauna dekenai laloa bada karana ita habadaia be namo. Bona hesiai tauna mai ena kamonai bona kara maoromaoro oreana ese ia halasia bukadia amo diba ma haida ita tahua diba. “Dirava ena laloa dobu gaudia” ita tahua be mai ena namo bada. (1 Korinto 2:10) Unai bamona ita karaia neganai, iseda diba Dirava dekenai ita habadaia bona eda lalona ita hadibaia loulou. (Heberu 5:14) Bema Dirava ena Hereva ita stadilaia namonamo, do ita hegeregere ‘ma haida dekenai unai hereva do ita gwauraia.’​—⁠2 Timoteo 2:⁠2.

20. Edena dala ai hetura karana namona Iehova Dirava ida ita abia bona dogoatao diba?

²⁰ Keristani heboudia dekenai ita lao bona sibona eda stadi ita karaia ese ita idia durua, hetura karana namona Iehova ida ita abia bona dogoatao totona. Ia hedinarai, Dirava ia hereva henia salamo torea tauna ena lalohadai be unai bamona, ia gwau: “Lohiabada e, oiemu taravatu lau ura henia. Dina ena hora ibounai lalonai, oiemu taravatu lau laloa noho.” (Salamo 119:97) Unai dainai, namona be hebou bona hebouhebou badadia dekenai do ita lao hanaihanai. Bona namona be Baibel stadi bona laloa dobu karana totona nega ita atoa. Unai dala ai Dirava ena Hereva ita “laloa namonamo” karana amo namo bada do ita abia.

[Footnote]

Oi Laloatao, A?

• Dahaka dainai Heberu Keristani taudia haida be abidadama momokanina amo idia hure oho?

• Edena dala ai Keristani heboudia dekenai hereva do ita laloa namonamo diba?

• Dahaka ese ita do ia durua, sibona eda Baibel stadi bona laloa dobu karana amo namo ita abia totona?

[Picture on page 5]

Ierusalema ena dokona be kahirakahira dainai Heberu Keristani taudia idia laloa namonamo be gau badana

[Picture on page 7]

Tama sina ese edia natudia idia durua diba Keristani heboudia amo namo idia abia totona