1, 2. (a) Taunimanima momo ese idia abia lalohadaina be dahaka, to Baibel be dahaka ia hadibaia? (b) Aberahamo be daika ena hetura karana ia moalelaia bona dahaka dainai?

OIEMU hemami be edena bamona bema guba bona tanobada ia Havaraia Tauna ese oi ia gwauraia, “Inai be lauegu turana”? Taunimanima momo idia laloa unai be ia vara diba lasi gauna. Oibe, taunimanima ta be Iehova Dirava ena turana ai ia lao diba, a? Baibel ese ita ia hadibaia ita be momokani Dirava kahirakahira ita lao diba.

² Idaunegai ia noho tauna Aberahamo be unai bamona hetura karana ia moalelaia. Iehova ese unai bese kwarana tauna ia gwauraia lau “egu turana.” (Isaia 41:8) Oibe, Iehova ese Aberahamo ia gwauraia iena turana. Aberahamo be Iehova ena turana ai ia lao badina “Iehova ia abidadama henia.” (Iamesi 2:23) Hari danu, Iehova ese dala ia tahua ia idia hesiai henia taudia ida hetura karana namona ia karaia bona “ena lalokau ia hahedinaraia” totona. (Deuteronomi 10:15) Iena Hereva ese ita ia hagoadaia, ia gwau: “Dirava kahirakahira umui lao, bona ia be umui kahirakahira do ia mai.” (Iamesi 4:8) Unai hereva be boiria herevana bona gwauhamata herevana ta.

 3. Iehova ese ita ia boiria dahaka ita karaia totona, bona unai hereva ida dahaka gwauhamata ia henia?

³ Iehova ese ita ia boiria ia kahirakahira ita lao totona. Ia noho hegaegae bona ia ura bada ita be ena turadia bamona ia abia dae. Danu, ia gwauhamata bema ia kahirakahira ita raka lao, ia danu be unai bamona do ia karaia. Ita kahirakahira do ia mai. Unai kara amo ita be gau hereadaena ta do ita davaria—Iehova ena “turana namodia” ai do ita lao. (Salamo 25:14) Inai hereva, “turana namodia” ese emu turana namona ida hehuni herevadia umui kikilaia karana ia hahedinaraia.

 4. Turana namona be edena bamona oi herevalaia diba, bona edena dala ai Iehova be ia kahirakahira idia lao taudia edia turana ai ia lao?

⁴ Oi be mai emu turana namona ta, ia dekenai emu hehuni gaudia oi hamaoroa diba, a? Unai bamona turana be oi ia laloa bada tauna. Ia dekenai oi tabekau, badina emui hetura lalonai oi ia rakatania lasi. Ia ida emu moale sivaraidia oi kikilaia neganai, emu moale oi habadaia. Mai hebogahisi ida oi ia kamonai dainai, emu lalohisihisi ena metau ia maragi. Ena be ma haida ese emu hemami idia lalo-pararalaia lasi, to ia ese ia lalo-pararalaia. Unai hegeregerena, Dirava kahirakahira oi lao neganai, unai Turana namo hereana do oi davaria, ia ese oi ia laloa bada, ia naria namonamo, bona oi mamia gaudia ibounai ia lalo-pararalaia momokani. (Salamo 103:14; 1 Petero 5:7) Oiemu lalona dekenai idia noho hehuni herevadia be ia dekenai oi gwauraia, badina oi diba ia ese ia idia badinaia taudia ia rakatanidia lasi. (Salamo 18:25) To, Dirava ita tura henia ena hahenamo ita davaria diba badina ia ese dala ia karaia vadaeni.

 5. Iehova ese dahaka ia karaia, ia kahirakahira ita lao totona?

⁵ Bema heduru ita abia lasi, ita kara dika taudia be Dirava kahirakahira ita lao diba lasi. (Salamo 5:4) Aposetolo Paulo ia gwau: “To Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.” (Roma 5:8) Oibe, Iehova be dala ia karaia Iesu ese ena “mauri ia henia, taunimanima momo edia mauri davana karaia totona.” (Mataio 20:28) Unai mauri davalaia boubouna ita abidadama henia karana amo Dirava kahirakahira ita lao diba. Dirava ese “ita ia lalokau henia guna” dainai, ia ita tura henia diba.​—1 Ioane 4:19.

6, 7. (a) Edena bamona ita diba, Iehova be ita amo ia hunia lasi bona ia ita dibaia diba? (b) Iehova ese edena dala ai sibona ia hahedinaraia?

⁶ Iehova ese dala ma ta ia karaia danu: Ita dekenai ia sibona ia hahedinaraia. Ta ita tura henia neganai, iseda hetura karana do ia namo bema iseda turana ita diba momokani bona ena kara namodia ita laloa bada. Unai dainai bema Iehova be ia hehuni bona ia be ita lalo-pararalaia diba lasi Diravana, ia kahirakahira ita lao diba lasi. To, ia be sibona ia hunia lasi, ia ura ia ita dibaia. (Isaia 45:19) Danu, taunimanima ese ia idia dibaia totona ia hahedinaraia gaudia be ibounai dekenai ia hahedinaraia, taunimanima ese idia laloa maragi taudia dekenai danu.​—Mataio 11:25.

⁷ Edena dala ai Iehova be ita dekenai sibona ia hahedinaraia? Ia havaraia gaudia amo ena kara haida hegeregere—ena siahu bada hereana, ena aonega dobuna, bona ena lalokau badana ita dibaia. (Roma 1:20) To ia havaraia gaudia amo Iehova ese sibona ena kara ia hahedinaraia karana ia hadokoa lasi. Iehova be Diba ia Henia Tauna Badana dainai, iena Hereva Baibel amo, sibona ia hahedinaraia.

 8. Dahaka dainai ita gwau diba, Baibel ese Iehova ena lalokau ita dekenai ia hamomokania?

⁸ Iehova ena lalokau ita dekenai ia hamomokania gauna ta be Baibel. Iena Hereva lalonai, ita lalo-pararalaia dalanai Iehova ese sibona ia hahedinaraia—unai ese ia hamomokania ita ia lalokau henia sibona lasi, to ia ura ia ita diba bona ita lalokau henia. Unai buka hereadaena lalonai ita duahia gaudia ese ita ia durua ia kahirakahira ita lao totona. (Salamo 1:1-3) Iehova ese iena Hereva lalonai, sibona ia hahedinaraia daladia namodia haida mani ita itaia.

 9. Baibel lalonai, edena siri haida ese Dirava ena kara idauidau idia herevalaia?

⁹ Baibel ena siri momo ese Dirava ena kara idauidau idia gwauraia hedinarai. Mani haheitalai haida ita itaia. “Iehova be kara maoromaoro ia ura henia.” (Salamo 37:28) Dirava ena “siahu be bada herea.” (Iobu 37:23) Iehova be “ena hereva ia badinaia Diravana.” (Deuteronomi 7:9) “Ia be mai ena aonega.” (Iobu 9:4) Ia be ‘hebogahisi Diravana, ia badu haraga lasi, ena lalokau be bada herea bona nega ibounai ena hereva ia hamomokania.’ (Esodo 34:6) “Iehova e, oi be namo bona oi noho hegaegae dika gwauatao totona.” (Salamo 86:5) Bona karoa ginigunana ese ia hahedinaraia bamona, Iehova ena kara ta ese ena kara ibounai ia hereaia: “Dirava be lalokau.” (1 Ioane 4:8) Iena kara namodia oi lalohadailaia neganai, oi ura inai Dirava hereadaena kahirakahira oi lao, ani?

10, 11. (a) Iehova ese ita ia durua ena kara ita itaia namonamo totona, iena Hereva lalonai dahaka danu ia torea? (b) Edena Baibel sivarai ese ita ia durua Dirava ena siahu ia gaukaralaia dalana ita laloa totona?

¹⁰ Iehova ese ita dekenai ena kara idauidau ia hamaoroa sibona lasi, to ma haida dekenai unai kara ia hahedinaraia daladia be mai lalokau ida ena Hereva lalonai ia torea danu. Unai bamona sivarai ese ita idia durua ena kara idauidau be iseda lalona ena matana amo ita itaia namonamo totona. Unai ese ita ia durua ia kahirakahira ita lao totona. Haheitalai ta mani ita laloa.

¹¹ Baibel ai ita diba Dirava ena “siahu be bada herea.” (Isaia 40:26) To Ia ese Davara Kakakakana dekenai Israela taudia ia hamauria bona lagani 40 lalonai taunimanima lasi gabuna ai idia ia durua ena sivarai ita duahia neganai, Iehova ese ena siahu ia gaukaralaia dalana dekenai ita hoa. Oiemu lalona ena matana amo Iehova ese davara ena hurehure badadia ia hapararaia oi itaia diba. Unai bese—reana 3 milioni​—oi itaia diba, ranu be haba bamona kahana kahana dekenai ia gini bona idia be tano kaukauna dekenai idia raka hanaia. (Esodo 14:21; 15:8) Dirava ese tano gagaena dekenai idia ia naria danu. Ranu be nadi amo ia aru mai. Aniani ta ena toana be uhe kurokurona bamona be tano dekenai ia hedinarai. (Esodo 16:31; Numera 20:11) Unai amo Iehova ese ena siahu ia hahedinaraia sibona lasi, to ia hahedinaraia danu ena siahu be ena taunimanima totona ia gaukaralaia. Iseda guriguri be siahu bada Diravana, “iseda heau mauri gabuna bona goada abia gabuna, metau negadia ai ia noho hegaegae heduru henia totona” tauna dekenai ita gwauraia ese ita ia hagoadaia bada, ani?​—Salamo 46:1.

12. Iehova ita “itaia” bona laloparalaia totona, edena dala ai ia sibona ia gwauraia hedinarai?

¹² Iehova be Lauma Tauna, to gau momo ia karaia vadaeni ita ia durua ia ita diba totona. Ita be taunimanima dainai matana ese ia itaia diba gaudia sibona ita itaia, unai dainai lauma gabuna ita itaia diba lasi. Bema Dirava ese ita lalo-pararalaia lasi dalanai ena lauma toana ia gwauraia hedinarai, inai be hegeregere matakepulu ida ia vara tauna ta dekenai emu toana, hegeregere emu matana ena kala eiava emu kopina dekenai ia noho maka ta, oi gwauraia bamona. To, Iehova be mai ena hebogahisi ida ita ia durua dainai, ita lalopararalaia diba dalanai ia ita “itaia.” Nega haida, laulau herevadia ia gaukaralaia, ita diba vadaeni gaudia ida ia sibona ia hahegeregerea totona. Danu, ia sibona ia herevalaia neganai, ia gwau iena toana be taunimanima edia toana bamona.a

13. Isaia 40:11 ese Iehova be edena bamona ia herevalaia bona dahaka oi mamia?

¹³ Isaia 40:11 ese Iehova ia gwauraia dalana mani oi itaia, ia gwau: “Mamoe naria tauna bamona, ia ese ena mamoe oreana do ia naria. Iena imana amo mamoe natudia do ia haboua, bona iena kemena dekenai idia do ia rosia.” Unai siri ese ia hahedinaraia Iehova be mamoe naria tauna ta bamona, “iena imana” amo mamoe ia rosidia. Unai ese ia hahedinaraia Iehova be ena taunimanima, idia goada momokani lasi taudia, ia gimadia bona ia durudia danu. Iena imana goadana lalonai ita noho namo diba, badina bema ia ita abidadama henia, ita do ia rakatania diba lasi. (Roma 8:38, 39) Mamoe Naria Tauna Badana be mamoe “iena kemena dekenai ia rosia”—unai hereva be mamoe naria tauna ese nega haida ena ataiai dabuana lalonai, ia vara matamata mamoe natuna ia kumia bona ia rosia karana ia hahedinaraia. Unai amo ita diba momokani Iehova ese ita ia laloa bada bona mai lalokau ida ita ia naria. Vaia, unai dainai ita ura ia kahirakahira do ita lao.

14. Dahaka dainai ita gwau diba, Iehova ese Iesu amo ia sibona ena kara ia hahedinaraia goevagoeva?

¹⁴ Iena Hereva lalonai, Iehova ese sibona ena kara be ena lalokau Natuna, Iesu amo ia hahedinaraia goevagoeva. Taunimanima ta lasi to Iesu sibona ese Dirava ena lalohadai bona hemami, eiava Iehova ia gwauraia hedinarai goevagoeva diba. Unai be maoro badina Iehova ese lauma taudia ma haida bona guba bona tanobada ia do havaraia lasi neganai, unai vara guna Natuna be ena Tamana ida ia noho vadaeni. (Kolose 1:15) Iesu be Iehova ia diba namonamo. Unai dainai ia gwau diba: “Ta ese Natuna ia diba lasi to Tamana sibona, bona ta ese Tamana ia diba lasi to Natuna sibona, bona Natuna ia ura tauna dekenai Tamana do ia hahedinaraia.” (Luka 10:22) Iesu be tanobada dekenai taunimanima ta bamona ia noho neganai, ia ese mai anina bada daladia rua ai ena Tamana ia hahedinaraia.

15, 16. Edena dala rua ai Iesu ese ena Tamana ia hahedinaraia?

¹⁵ Gau ginigunana be inai, Iesu ena hadibaia herevadia ese ita ia durua ena Tamana ita diba totona. Iesu be Iehova ia herevalaia dalana ese iseda kudouna ia veria. Hegeregere, Iesu ese hebogahisi Diravana be helalo-kerehai taudia ia abia dae lou karana ia herevalaia neganai, Iesu ese Iehova be ena natuna ena kara dika ia gwauatao tamana ta ida ia hahegeregerea. Ia itaia ena boio natuna ia giroa lou neganai, ia hebogahisi bada bona ia dekenai ia heau lao bona ia rosia bona ia kisi henia. (Luka 15:11-24) Iesu ese ia hahedinaraia danu, Iehova be kudou-maoro taudia ia “veria mai” Diravana, badina idia ta ta ia lalokau henidia. (Ioane 6:44) Ia diba danu bema manu maragina be tano dekenai ia moru. Iesu ia gwau: “Umui gari lasi, umui ese unai manu maragidia ibounai umui hereaia.” (Mataio 10:29, 31) Oibe, ita ura momokani ita ia laloa bada Diravana kahirakahira ita lao.

¹⁶ Gau iharuana be inai, Iesu ena haheitalai ese ia hahedinaraia Iehova be edena bamona Diravana. Iesu ese ena Tamana ena kara ia hahedinaraia goevagoeva dainai, ia gwau diba: “Lau ia itaia tauna be Tamana danu ia itaia vadaeni.” (Ioane 14:9) Unai dainai, Evanelia Bukadia lalonai Iesu ena sivarai—ia hahedinaraia hemami bona ma haida ia kara henidia dalana—ita duahia neganai, ita be hegeregere ena Tamana ena toana ita itaia bamona. Iehova ese unai dala sibona amo ena kara be ita dekenai ia hahedinaraia goevagoeva. Dahaka dainai?

17. Ita ia durua ena kara ita lalo-pararalaia namonamo totona, Iehova be dahaka ia karaia. Haheitalai gwauraia.

¹⁷ Haheitalai ta be inai: Mani oi laloa, oi ura ta dekenai hebogahisi ena anina oi gwauraia hedinarai. Reana, hereva amo ena anina oi gwauraia. To bema hebogahisi karana ta ia karaia noho tauna ta oi poinia bona oi gwau, “Unai be hebogahisi karana ena haheitalai ta,” unai neganai inai hereva, “hebogahisi,” ena anina ia habadaia bona unai tau ese ia lalo-pararalaia haraga diba. Iehova ese unai bamona kara ta ia karaia vadaeni, ita ia durua iena kara ita lalo-pararalaia namonamo totona. Iehova be hereva amo ia gwauraia hedinarai sibona lasi, to ita dekenai ena Natuna ia siaia ena kara ia haheitalaia danu. Iesu dekena amo Dirava ena kara ita itaia diba. Evanelia Bukadia ese Iesu ena kara idia gwauraia hedinarai neganai, unai be hegeregere Iehova ia hereva noho: “Lau be unai bamona.” Lauma helaga amo idia torea bukana ese Iesu ena kara tanobada dekenai be edena bamona ia gwauraia?

18. Iesu ese edena dala ai siahu, hahemaoro goeva, bona aonega ia hahedinaraia?

¹⁸ Iesu ese Dirava ena kara badadia foa be dala hereadaena ai ia hahedinaraia. Ia be mai ena siahu, gorere, hitolo, bona mase dekenai danu. To, Iesu be sibodia idia laloa bada bona siahu idia gaukaralaia kerere taudia bamona lasi, sibona ena namo eiava ma haida hahisia totona, hoa karadia ia karaia diba siahuna ia gaukaralaia lasi. (Mataio 4:2-4) Hahemaoro goeva ia ura henia. Kara gageva hoihoi taudia ese taunimanima idia koia karana ia itaia neganai, kara maoromaoro dalanai ia badu. (Mataio 21:12, 13) Ogogami bona hisihisi taudia ibounai ia kara henidia maka tamona dekenai, unai bamona taudia ia durua “goada matamata” idia davaria totona. (Mataio 11:4, 5, 28-30) Iesu ena hadibaia herevadia ese aonega bada ia hahedinaraia, iena aonega ese “Solomona ia hereaia.” (Mataio 12:42) To Iesu ese ena aonega ia hekokorokulaia lasi. Iena hereva ese hanua taudia edia lalona ia hamarerea, badina ia hadibaia herevadia be idia hedinarai goevagoeva bona idia badinaia diba.

19, 20. (a) Edena dala ai Iesu ese lalokau karana ia hahedinaraia namonamo? (b) Iesu ena haheitalai ita duahia bona lalohadailaia neganai, dahaka ita laloatao be namo?

¹⁹ Iesu ese lalokau karana ia hahedinaraia namo herea. Iena hesiai gaukara lalonai, lalokau ena kahana idauidau momo, hegeregere ma haida edia hemami laloa bona hebogahisi karadia ia hahedinaraia. Nega ibounai ia itaia taunimanima idia hisihisi neganai, ia hebogahisi. Iesu ese taunimanima edia hemami ia mamia dainai, idia ia hebogahisi henia loulou. (Mataio 14:14) Ena be Iesu ese gorere taudia ia hanamoa bona hitolo taudia ia ubua, to mai anina bada dalana ma ta ai hebogahisi ia hahedinaraia. Ma haida ia durua Dirava ena Basileia ena hereva momokani do idia diba, abia dae, bona ura henia. Unai Basileia ese taunimanima ibounai dekenai noho hanaihanai hahenamo do ia mailaia. (Mareko 6:34; Luka 4:43) To gau badana be inai, Iesu ese sibona ena ura dadaraia lalokauna ia hahedinaraia, mai ena ura ida ena mauri be ma haida totona ia atoa diho.​—Ioane 15:13.

²⁰ Unai dainai, mauri lagani bona mauri daladia idauidau taudia ibounai be inai lalokau bada bona hebogahisi tauna idia ura henia be ita hoalaia lasi, ani? (Mareko 10:13-16) To, Iesu ena haheitalai ita duahia bona ita lalohadailaia neganai, namona be hanaihanai ita laloatao, inai Natuna dekenai ena Tamana ena kara ita itaia goevagoeva.​—Heberu 1:3.

21, 22. Iehova ita tahua ena anina be dahaka, bona inai stadi bukana lalonai dahaka ia noho, unai ita karaia totona?

²¹ Iehova be ena Hereva lalonai sibona ia hahedinaraia goevagoeva dainai, ita diba momokani Ia ura ia kahirakahira ita lao. To danu, ia ida hetura karana namona ita tahua totona, ita ia doria lasi. Unai be ita ta ta sibona eda maduna, Iehova ita tahua ia ‘ita davaria diba negana ai.’ (Isaia 55:6) Iehova ita tahua ena anina be ena kara bona dala idauidau, Baibel ese ia hahedinaraia hegeregerena do ita dibaia. Hari oi duahia noho stadi bukana idia karaia unai dala dekenai oi do ia durua totona.

²² Do oi itaia inai buka be kahana foa dekenai idia haria, idia ta ta be Iehova ena kara badadia ta ta idia herevalaia: siahu, hahemaoro goeva, aonega bona lalokau. Kahana ta ta ena matamanai, do ia herevalaia karana be hereva kwadogina amo ia gwauraia hedinarai. Bena murina karoadia lalonai, Iehova ese dala idauidau ai unai kara ia hahedinaraia dalana ia herevalaia. Unai kahana ta ta lalonai karoa ta be Iesu ese unai kara ia hahedinaraia dalana bona karoa ma ta be iseda mauri lalonai unai kara ita hahedinaraia dalana, ia herevalaia.

23, 24. (a) Inai maua, “Oi Laloa Dobu Gaudia” mani oi gwauraia hedinarai. (b) Laloa dobu karana ese edena dala ai ita ia durua diba, Dirava kahirakahira ita lao totona?

²³ Inai karoa lalonai gau matamatana ta ia noho, ia be maua ta ladana “Oi Laloa Dobu Gaudia.” Hegeregere, rau 24 dekenai ia noho mauana oi itaia. Idia noho siri bona henanadai be inai karoa ena riviu totona idia karaia lasi. To, edia badina be oi idia durua inai karoa lalonai ita herevalaia mai anina bada gaudia haida oi lalohadailaia totona. Edena dala ai inai maua oi gaukaralaia namonamo diba? Idia gwauraia siri ta ta oi kehoa bona oi duahidia namonamo. Bena siri ta ta badinai idia noho henanadai oi itaia. Edia haere oi lalohadailaia. Reana buka ma haida dekenai gau haida oi tahua. Oi sibona dekenai henanadai ma haida oi henia: ‘Inai hereva amo lau dibaia, Iehova be edena bamona Diravana? Unai ese egu mauri be edena bamona ia haidaua? Edena bamona lau gaukaralaia diba ma haida lau durua totona?’

²⁴ Unai bamona laloa dobu karana ese ita ia durua Iehova kahirakahira ita lao totona. Edena dala ai? Baibel ese laloa dobu karana be kudouna ida ia gwauraia hebou. (Salamo 19:14) Iseda diba Dirava dekenai be mai moale ida ita laloa neganai, unai diba be iseda kudouna ese ia laulaulaia lalona ai ia vareai, bona unuseniai iseda lalohadai ia haidaua, iseda ura ia habadaia, bona ita ia doria kara ta ita karaia totona. Iseda lalokau Dirava totona ia bada bona unai lalokau ese ita ia veria bona ita ura ia ita hamoalea, iseda Turana namo hereana ta bamona. (1 Ioane 5:3) Unai bamona hetura karana ita davaria totona, namona be Iehova ena kara bona dala idauidau ita diba. To, guna namona be Iehova ena kara ta—ena helaga karana—ita herevalaia, ia be badina badana ta Iehova kahirakahira ita lao totona.

1, 2. (a) Taunimanima momo ese idia abia lalohadaina be dahaka, to Baibel be dahaka ia hadibaia? (b) Aberahamo be daika ena hetura karana ia moalelaia bona dahaka dainai?

OIEMU hemami be edena bamona bema guba bona tanobada ia Havaraia Tauna ese oi ia gwauraia, “Inai be lauegu turana”? Taunimanima momo idia laloa unai be ia vara diba lasi gauna. Oibe, taunimanima ta be Iehova Dirava ena turana ai ia lao diba, a? Baibel ese ita ia hadibaia ita be momokani Dirava kahirakahira ita lao diba.

² Idaunegai ia noho tauna Aberahamo be unai bamona hetura karana ia moalelaia. Iehova ese unai bese kwarana tauna ia gwauraia lau “egu turana.” (Isaia 41:8) Oibe, Iehova ese Aberahamo ia gwauraia iena turana. Aberahamo be Iehova ena turana ai ia lao badina “Iehova ia abidadama henia.” (Iamesi 2:23) Hari danu, Iehova ese dala ia tahua ia idia hesiai henia taudia ida hetura karana namona ia karaia bona “ena lalokau ia hahedinaraia” totona. (Deuteronomi 10:15) Iena Hereva ese ita ia hagoadaia, ia gwau: “Dirava kahirakahira umui lao, bona ia be umui kahirakahira do ia mai.” (Iamesi 4:8) Unai hereva be boiria herevana bona gwauhamata herevana ta.

 3. Iehova ese ita ia boiria dahaka ita karaia totona, bona unai hereva ida dahaka gwauhamata ia henia?

³ Iehova ese ita ia boiria ia kahirakahira ita lao totona. Ia noho hegaegae bona ia ura bada ita be ena turadia bamona ia abia dae. Danu, ia gwauhamata bema ia kahirakahira ita raka lao, ia danu be unai bamona do ia karaia. Ita kahirakahira do ia mai. Unai kara amo ita be gau hereadaena ta do ita davaria—Iehova ena “turana namodia” ai do ita lao. (Salamo 25:14) Inai hereva, “turana namodia” ese emu turana namona ida hehuni herevadia umui kikilaia karana ia hahedinaraia.

 4. Turana namona be edena bamona oi herevalaia diba, bona edena dala ai Iehova be ia kahirakahira idia lao taudia edia turana ai ia lao?

⁴ Oi be mai emu turana namona ta, ia dekenai emu hehuni gaudia oi hamaoroa diba, a? Unai bamona turana be oi ia laloa bada tauna. Ia dekenai oi tabekau, badina emui hetura lalonai oi ia rakatania lasi. Ia ida emu moale sivaraidia oi kikilaia neganai, emu moale oi habadaia. Mai hebogahisi ida oi ia kamonai dainai, emu lalohisihisi ena metau ia maragi. Ena be ma haida ese emu hemami idia lalo-pararalaia lasi, to ia ese ia lalo-pararalaia. Unai hegeregerena, Dirava kahirakahira oi lao neganai, unai Turana namo hereana do oi davaria, ia ese oi ia laloa bada, ia naria namonamo, bona oi mamia gaudia ibounai ia lalo-pararalaia momokani. (Salamo 103:14; 1 Petero 5:7) Oiemu lalona dekenai idia noho hehuni herevadia be ia dekenai oi gwauraia, badina oi diba ia ese ia idia badinaia taudia ia rakatanidia lasi. (Salamo 18:25) To, Dirava ita tura henia ena hahenamo ita davaria diba badina ia ese dala ia karaia vadaeni.

 5. Iehova ese dahaka ia karaia, ia kahirakahira ita lao totona?

⁵ Bema heduru ita abia lasi, ita kara dika taudia be Dirava kahirakahira ita lao diba lasi. (Salamo 5:4) Aposetolo Paulo ia gwau: “To Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.” (Roma 5:8) Oibe, Iehova be dala ia karaia Iesu ese ena “mauri ia henia, taunimanima momo edia mauri davana karaia totona.” (Mataio 20:28) Unai mauri davalaia boubouna ita abidadama henia karana amo Dirava kahirakahira ita lao diba. Dirava ese “ita ia lalokau henia guna” dainai, ia ita tura henia diba.​—1 Ioane 4:19.

6, 7. (a) Edena bamona ita diba, Iehova be ita amo ia hunia lasi bona ia ita dibaia diba? (b) Iehova ese edena dala ai sibona ia hahedinaraia?

⁶ Iehova ese dala ma ta ia karaia danu: Ita dekenai ia sibona ia hahedinaraia. Ta ita tura henia neganai, iseda hetura karana do ia namo bema iseda turana ita diba momokani bona ena kara namodia ita laloa bada. Unai dainai bema Iehova be ia hehuni bona ia be ita lalo-pararalaia diba lasi Diravana, ia kahirakahira ita lao diba lasi. To, ia be sibona ia hunia lasi, ia ura ia ita dibaia. (Isaia 45:19) Danu, taunimanima ese ia idia dibaia totona ia hahedinaraia gaudia be ibounai dekenai ia hahedinaraia, taunimanima ese idia laloa maragi taudia dekenai danu.​—Mataio 11:25.

⁷ Edena dala ai Iehova be ita dekenai sibona ia hahedinaraia? Ia havaraia gaudia amo ena kara haida hegeregere—ena siahu bada hereana, ena aonega dobuna, bona ena lalokau badana ita dibaia. (Roma 1:20) To ia havaraia gaudia amo Iehova ese sibona ena kara ia hahedinaraia karana ia hadokoa lasi. Iehova be Diba ia Henia Tauna Badana dainai, iena Hereva Baibel amo, sibona ia hahedinaraia.

 8. Dahaka dainai ita gwau diba, Baibel ese Iehova ena lalokau ita dekenai ia hamomokania?

⁸ Iehova ena lalokau ita dekenai ia hamomokania gauna ta be Baibel. Iena Hereva lalonai, ita lalo-pararalaia dalanai Iehova ese sibona ia hahedinaraia—unai ese ia hamomokania ita ia lalokau henia sibona lasi, to ia ura ia ita diba bona ita lalokau henia. Unai buka hereadaena lalonai ita duahia gaudia ese ita ia durua ia kahirakahira ita lao totona. (Salamo 1:1-3) Iehova ese iena Hereva lalonai, sibona ia hahedinaraia daladia namodia haida mani ita itaia.

 9. Baibel lalonai, edena siri haida ese Dirava ena kara idauidau idia herevalaia?

⁹ Baibel ena siri momo ese Dirava ena kara idauidau idia gwauraia hedinarai. Mani haheitalai haida ita itaia. “Iehova be kara maoromaoro ia ura henia.” (Salamo 37:28) Dirava ena “siahu be bada herea.” (Iobu 37:23) Iehova be “ena hereva ia badinaia Diravana.” (Deuteronomi 7:9) “Ia be mai ena aonega.” (Iobu 9:4) Ia be ‘hebogahisi Diravana, ia badu haraga lasi, ena lalokau be bada herea bona nega ibounai ena hereva ia hamomokania.’ (Esodo 34:6) “Iehova e, oi be namo bona oi noho hegaegae dika gwauatao totona.” (Salamo 86:5) Bona karoa ginigunana ese ia hahedinaraia bamona, Iehova ena kara ta ese ena kara ibounai ia hereaia: “Dirava be lalokau.” (1 Ioane 4:8) Iena kara namodia oi lalohadailaia neganai, oi ura inai Dirava hereadaena kahirakahira oi lao, ani?

10, 11. (a) Iehova ese ita ia durua ena kara ita itaia namonamo totona, iena Hereva lalonai dahaka danu ia torea? (b) Edena Baibel sivarai ese ita ia durua Dirava ena siahu ia gaukaralaia dalana ita laloa totona?

¹⁰ Iehova ese ita dekenai ena kara idauidau ia hamaoroa sibona lasi, to ma haida dekenai unai kara ia hahedinaraia daladia be mai lalokau ida ena Hereva lalonai ia torea danu. Unai bamona sivarai ese ita idia durua ena kara idauidau be iseda lalona ena matana amo ita itaia namonamo totona. Unai ese ita ia durua ia kahirakahira ita lao totona. Haheitalai ta mani ita laloa.

¹¹ Baibel ai ita diba Dirava ena “siahu be bada herea.” (Isaia 40:26) To Ia ese Davara Kakakakana dekenai Israela taudia ia hamauria bona lagani 40 lalonai taunimanima lasi gabuna ai idia ia durua ena sivarai ita duahia neganai, Iehova ese ena siahu ia gaukaralaia dalana dekenai ita hoa. Oiemu lalona ena matana amo Iehova ese davara ena hurehure badadia ia hapararaia oi itaia diba. Unai bese—reana 3 milioni​—oi itaia diba, ranu be haba bamona kahana kahana dekenai ia gini bona idia be tano kaukauna dekenai idia raka hanaia. (Esodo 14:21; 15:8) Dirava ese tano gagaena dekenai idia ia naria danu. Ranu be nadi amo ia aru mai. Aniani ta ena toana be uhe kurokurona bamona be tano dekenai ia hedinarai. (Esodo 16:31; Numera 20:11) Unai amo Iehova ese ena siahu ia hahedinaraia sibona lasi, to ia hahedinaraia danu ena siahu be ena taunimanima totona ia gaukaralaia. Iseda guriguri be siahu bada Diravana, “iseda heau mauri gabuna bona goada abia gabuna, metau negadia ai ia noho hegaegae heduru henia totona” tauna dekenai ita gwauraia ese ita ia hagoadaia bada, ani?​—Salamo 46:1.

12. Iehova ita “itaia” bona laloparalaia totona, edena dala ai ia sibona ia gwauraia hedinarai?

¹² Iehova be Lauma Tauna, to gau momo ia karaia vadaeni ita ia durua ia ita diba totona. Ita be taunimanima dainai matana ese ia itaia diba gaudia sibona ita itaia, unai dainai lauma gabuna ita itaia diba lasi. Bema Dirava ese ita lalo-pararalaia lasi dalanai ena lauma toana ia gwauraia hedinarai, inai be hegeregere matakepulu ida ia vara tauna ta dekenai emu toana, hegeregere emu matana ena kala eiava emu kopina dekenai ia noho maka ta, oi gwauraia bamona. To, Iehova be mai ena hebogahisi ida ita ia durua dainai, ita lalopararalaia diba dalanai ia ita “itaia.” Nega haida, laulau herevadia ia gaukaralaia, ita diba vadaeni gaudia ida ia sibona ia hahegeregerea totona. Danu, ia sibona ia herevalaia neganai, ia gwau iena toana be taunimanima edia toana bamona.a

13. Isaia 40:11 ese Iehova be edena bamona ia herevalaia bona dahaka oi mamia?

¹³ Isaia 40:11 ese Iehova ia gwauraia dalana mani oi itaia, ia gwau: “Mamoe naria tauna bamona, ia ese ena mamoe oreana do ia naria. Iena imana amo mamoe natudia do ia haboua, bona iena kemena dekenai idia do ia rosia.” Unai siri ese ia hahedinaraia Iehova be mamoe naria tauna ta bamona, “iena imana” amo mamoe ia rosidia. Unai ese ia hahedinaraia Iehova be ena taunimanima, idia goada momokani lasi taudia, ia gimadia bona ia durudia danu. Iena imana goadana lalonai ita noho namo diba, badina bema ia ita abidadama henia, ita do ia rakatania diba lasi. (Roma 8:38, 39) Mamoe Naria Tauna Badana be mamoe “iena kemena dekenai ia rosia”—unai hereva be mamoe naria tauna ese nega haida ena ataiai dabuana lalonai, ia vara matamata mamoe natuna ia kumia bona ia rosia karana ia hahedinaraia. Unai amo ita diba momokani Iehova ese ita ia laloa bada bona mai lalokau ida ita ia naria. Vaia, unai dainai ita ura ia kahirakahira do ita lao.

14. Dahaka dainai ita gwau diba, Iehova ese Iesu amo ia sibona ena kara ia hahedinaraia goevagoeva?

¹⁴ Iena Hereva lalonai, Iehova ese sibona ena kara be ena lalokau Natuna, Iesu amo ia hahedinaraia goevagoeva. Taunimanima ta lasi to Iesu sibona ese Dirava ena lalohadai bona hemami, eiava Iehova ia gwauraia hedinarai goevagoeva diba. Unai be maoro badina Iehova ese lauma taudia ma haida bona guba bona tanobada ia do havaraia lasi neganai, unai vara guna Natuna be ena Tamana ida ia noho vadaeni. (Kolose 1:15) Iesu be Iehova ia diba namonamo. Unai dainai ia gwau diba: “Ta ese Natuna ia diba lasi to Tamana sibona, bona ta ese Tamana ia diba lasi to Natuna sibona, bona Natuna ia ura tauna dekenai Tamana do ia hahedinaraia.” (Luka 10:22) Iesu be tanobada dekenai taunimanima ta bamona ia noho neganai, ia ese mai anina bada daladia rua ai ena Tamana ia hahedinaraia.

15, 16. Edena dala rua ai Iesu ese ena Tamana ia hahedinaraia?

¹⁵ Gau ginigunana be inai, Iesu ena hadibaia herevadia ese ita ia durua ena Tamana ita diba totona. Iesu be Iehova ia herevalaia dalana ese iseda kudouna ia veria. Hegeregere, Iesu ese hebogahisi Diravana be helalo-kerehai taudia ia abia dae lou karana ia herevalaia neganai, Iesu ese Iehova be ena natuna ena kara dika ia gwauatao tamana ta ida ia hahegeregerea. Ia itaia ena boio natuna ia giroa lou neganai, ia hebogahisi bada bona ia dekenai ia heau lao bona ia rosia bona ia kisi henia. (Luka 15:11-24) Iesu ese ia hahedinaraia danu, Iehova be kudou-maoro taudia ia “veria mai” Diravana, badina idia ta ta ia lalokau henidia. (Ioane 6:44) Ia diba danu bema manu maragina be tano dekenai ia moru. Iesu ia gwau: “Umui gari lasi, umui ese unai manu maragidia ibounai umui hereaia.” (Mataio 10:29, 31) Oibe, ita ura momokani ita ia laloa bada Diravana kahirakahira ita lao.

¹⁶ Gau iharuana be inai, Iesu ena haheitalai ese ia hahedinaraia Iehova be edena bamona Diravana. Iesu ese ena Tamana ena kara ia hahedinaraia goevagoeva dainai, ia gwau diba: “Lau ia itaia tauna be Tamana danu ia itaia vadaeni.” (Ioane 14:9) Unai dainai, Evanelia Bukadia lalonai Iesu ena sivarai—ia hahedinaraia hemami bona ma haida ia kara henidia dalana—ita duahia neganai, ita be hegeregere ena Tamana ena toana ita itaia bamona. Iehova ese unai dala sibona amo ena kara be ita dekenai ia hahedinaraia goevagoeva. Dahaka dainai?

17. Ita ia durua ena kara ita lalo-pararalaia namonamo totona, Iehova be dahaka ia karaia. Haheitalai gwauraia.

¹⁷ Haheitalai ta be inai: Mani oi laloa, oi ura ta dekenai hebogahisi ena anina oi gwauraia hedinarai. Reana, hereva amo ena anina oi gwauraia. To bema hebogahisi karana ta ia karaia noho tauna ta oi poinia bona oi gwau, “Unai be hebogahisi karana ena haheitalai ta,” unai neganai inai hereva, “hebogahisi,” ena anina ia habadaia bona unai tau ese ia lalo-pararalaia haraga diba. Iehova ese unai bamona kara ta ia karaia vadaeni, ita ia durua iena kara ita lalo-pararalaia namonamo totona. Iehova be hereva amo ia gwauraia hedinarai sibona lasi, to ita dekenai ena Natuna ia siaia ena kara ia haheitalaia danu. Iesu dekena amo Dirava ena kara ita itaia diba. Evanelia Bukadia ese Iesu ena kara idia gwauraia hedinarai neganai, unai be hegeregere Iehova ia hereva noho: “Lau be unai bamona.” Lauma helaga amo idia torea bukana ese Iesu ena kara tanobada dekenai be edena bamona ia gwauraia?

18. Iesu ese edena dala ai siahu, hahemaoro goeva, bona aonega ia hahedinaraia?

¹⁸ Iesu ese Dirava ena kara badadia foa be dala hereadaena ai ia hahedinaraia. Ia be mai ena siahu, gorere, hitolo, bona mase dekenai danu. To, Iesu be sibodia idia laloa bada bona siahu idia gaukaralaia kerere taudia bamona lasi, sibona ena namo eiava ma haida hahisia totona, hoa karadia ia karaia diba siahuna ia gaukaralaia lasi. (Mataio 4:2-4) Hahemaoro goeva ia ura henia. Kara gageva hoihoi taudia ese taunimanima idia koia karana ia itaia neganai, kara maoromaoro dalanai ia badu. (Mataio 21:12, 13) Ogogami bona hisihisi taudia ibounai ia kara henidia maka tamona dekenai, unai bamona taudia ia durua “goada matamata” idia davaria totona. (Mataio 11:4, 5, 28-30) Iesu ena hadibaia herevadia ese aonega bada ia hahedinaraia, iena aonega ese “Solomona ia hereaia.” (Mataio 12:42) To Iesu ese ena aonega ia hekokorokulaia lasi. Iena hereva ese hanua taudia edia lalona ia hamarerea, badina ia hadibaia herevadia be idia hedinarai goevagoeva bona idia badinaia diba.

19, 20. (a) Edena dala ai Iesu ese lalokau karana ia hahedinaraia namonamo? (b) Iesu ena haheitalai ita duahia bona lalohadailaia neganai, dahaka ita laloatao be namo?

¹⁹ Iesu ese lalokau karana ia hahedinaraia namo herea. Iena hesiai gaukara lalonai, lalokau ena kahana idauidau momo, hegeregere ma haida edia hemami laloa bona hebogahisi karadia ia hahedinaraia. Nega ibounai ia itaia taunimanima idia hisihisi neganai, ia hebogahisi. Iesu ese taunimanima edia hemami ia mamia dainai, idia ia hebogahisi henia loulou. (Mataio 14:14) Ena be Iesu ese gorere taudia ia hanamoa bona hitolo taudia ia ubua, to mai anina bada dalana ma ta ai hebogahisi ia hahedinaraia. Ma haida ia durua Dirava ena Basileia ena hereva momokani do idia diba, abia dae, bona ura henia. Unai Basileia ese taunimanima ibounai dekenai noho hanaihanai hahenamo do ia mailaia. (Mareko 6:34; Luka 4:43) To gau badana be inai, Iesu ese sibona ena ura dadaraia lalokauna ia hahedinaraia, mai ena ura ida ena mauri be ma haida totona ia atoa diho.​—Ioane 15:13.

²⁰ Unai dainai, mauri lagani bona mauri daladia idauidau taudia ibounai be inai lalokau bada bona hebogahisi tauna idia ura henia be ita hoalaia lasi, ani? (Mareko 10:13-16) To, Iesu ena haheitalai ita duahia bona ita lalohadailaia neganai, namona be hanaihanai ita laloatao, inai Natuna dekenai ena Tamana ena kara ita itaia goevagoeva.​—Heberu 1:3.

21, 22. Iehova ita tahua ena anina be dahaka, bona inai stadi bukana lalonai dahaka ia noho, unai ita karaia totona?

²¹ Iehova be ena Hereva lalonai sibona ia hahedinaraia goevagoeva dainai, ita diba momokani Ia ura ia kahirakahira ita lao. To danu, ia ida hetura karana namona ita tahua totona, ita ia doria lasi. Unai be ita ta ta sibona eda maduna, Iehova ita tahua ia ‘ita davaria diba negana ai.’ (Isaia 55:6) Iehova ita tahua ena anina be ena kara bona dala idauidau, Baibel ese ia hahedinaraia hegeregerena do ita dibaia. Hari oi duahia noho stadi bukana idia karaia unai dala dekenai oi do ia durua totona.

²² Do oi itaia inai buka be kahana foa dekenai idia haria, idia ta ta be Iehova ena kara badadia ta ta idia herevalaia: siahu, hahemaoro goeva, aonega bona lalokau. Kahana ta ta ena matamanai, do ia herevalaia karana be hereva kwadogina amo ia gwauraia hedinarai. Bena murina karoadia lalonai, Iehova ese dala idauidau ai unai kara ia hahedinaraia dalana ia herevalaia. Unai kahana ta ta lalonai karoa ta be Iesu ese unai kara ia hahedinaraia dalana bona karoa ma ta be iseda mauri lalonai unai kara ita hahedinaraia dalana, ia herevalaia.

23, 24. (a) Inai maua, “Oi Laloa Dobu Gaudia” mani oi gwauraia hedinarai. (b) Laloa dobu karana ese edena dala ai ita ia durua diba, Dirava kahirakahira ita lao totona?

²³ Inai karoa lalonai gau matamatana ta ia noho, ia be maua ta ladana “Oi Laloa Dobu Gaudia.” Hegeregere, rau 24 dekenai ia noho mauana oi itaia. Idia noho siri bona henanadai be inai karoa ena riviu totona idia karaia lasi. To, edia badina be oi idia durua inai karoa lalonai ita herevalaia mai anina bada gaudia haida oi lalohadailaia totona. Edena dala ai inai maua oi gaukaralaia namonamo diba? Idia gwauraia siri ta ta oi kehoa bona oi duahidia namonamo. Bena siri ta ta badinai idia noho henanadai oi itaia. Edia haere oi lalohadailaia. Reana buka ma haida dekenai gau haida oi tahua. Oi sibona dekenai henanadai ma haida oi henia: ‘Inai hereva amo lau dibaia, Iehova be edena bamona Diravana? Unai ese egu mauri be edena bamona ia haidaua? Edena bamona lau gaukaralaia diba ma haida lau durua totona?’

²⁴ Unai bamona laloa dobu karana ese ita ia durua Iehova kahirakahira ita lao totona. Edena dala ai? Baibel ese laloa dobu karana be kudouna ida ia gwauraia hebou. (Salamo 19:14) Iseda diba Dirava dekenai be mai moale ida ita laloa neganai, unai diba be iseda kudouna ese ia laulaulaia lalona ai ia vareai, bona unuseniai iseda lalohadai ia haidaua, iseda ura ia habadaia, bona ita ia doria kara ta ita karaia totona. Iseda lalokau Dirava totona ia bada bona unai lalokau ese ita ia veria bona ita ura ia ita hamoalea, iseda Turana namo hereana ta bamona. (1 Ioane 5:3) Unai bamona hetura karana ita davaria totona, namona be Iehova ena kara bona dala idauidau ita diba. To, guna namona be Iehova ena kara ta—ena helaga karana—ita herevalaia, ia be badina badana ta Iehova kahirakahira ita lao totona.