Iehova Ena Ladana Ita Hanamoa Hebou

“Lau danu [Iehova] do ita hanamoa. Iena ladana do ita hanamoa hebou!”​—⁠SALAMO 34:⁠3.

 1. Iesu be tanobada ai ena hesiai gaukara ia karaia neganai, dahaka haheitalai namona ia hahedinaraia?

LAGANI 33 C.E., Nisan 14 hanuaboina ai, Ierusalema ai ruma ta ena atai daiutuna ta dekenai, Iesu bona ena aposetolo taudia be Iehova hanamoa ane idia abia. (Mataio 26:30) Unai be Iesu ena nega ginigabena ena aposetolo taudia ida ia hebou. Unai dainai, dala namo hereana ai unai hebou ia hadokoa. Tanobada ai, Iesu be ena hesiai gaukara ia hamatamaia amo ela bona dokona, ia ese ena Tamana ia hanamoa bona taunimanima dekenai Iena ladana ia hadibaia. (Mataio 4:10; 6:9; 22:​37, 38; Ioane 12:28; 17:⁠6) Ia be Salamo torea tauna ena hereva ia gwauraia lou: “Lau danu Lohiabada do ita hanamoa. Iena ladana do ita hanamoa hebou!” (Salamo 34:⁠3) Unai be haheitalai namo hereana ita badinaia totona!

2, 3. (a) Edena bamona ita diba Salamo 34 be peroveta herevana ta? (b) Inai stadi bona stadi gabena dekenai dahaka do ita stadilaia?

² Aposetolo Ioane be Iesu ida Dirava hanamoa anedia idia abia murinai, mai anina bada gauna ta ia itaia. Ia itaia ena biaguna bona henao taudia rua be au dekenai idia kokoa idia mase totona. Bona, ia itaia danu Roma tuari taudia ese henao taudia rua idia mase haraga totona edia aena idia makohia. To, ia itaia danu, Iesu ena aena idia makohia lasi, badina tuari taudia be Iesu dekenai idia mai neganai, Iesu be ia mase vadaeni. Ioane ena Evanelia bukana lalonai, ia hahedinaraia ia itaia gaudia ese Salamo 34 ena peroveta herevana ta idia hagugurua, ia gwau: “Ena turiana ta idia makohia lasi.”​—⁠Ioane 19:​32-​36; Salamo 34:⁠20.

³ Keristani taudia totona, Salamo 34 be mai ena point namodia momo. Unai dainai, inai stadi bona stadi gabena dekenai, Davida be edena bamona negana ai unai Salamo ia torea, bona edena dala ai unai karoa ese ita ia durua do ita stadilaia.

Davida be Saulo amo Ia Heau

 4. (a) Dahaka dainai Samuela ese Davida ia horoa Israela ena king ai ia lao totona? (b) Dahaka dainai Saulo ese Davida ia “lalokau henia bada”?

⁴ Davida ia matamata neganai, Saulo be Israela ena king. To, Saulo ia gwau-edeede bona Iehova ena lalonamo ia haboioa. Unai dainai, peroveta tauna Samuela ese Saulo ia hamaoroa: “Lohiabada ese hari dina dekenai Israela basileia be oi dekena amo ia darea vadaeni. Bona oiemu badibadinai tauna ta, oi ia hereaia tauna, dekenai ia henia vadaeni.” (1 Samuela 15:28) Gabeai, Iehova ese Samuela ia siaia lao Iese ena natuna Davida ia horoa, Israela ena king ai ia lao totona. To, Dirava ena lauma be King Saulo amo ia kokia dainai, Saulo be ia moale lasi. Miusiki ia diba momo tauna, Davida be Gibea dekenai idia mailaia king ia hesiai henia totona, bona miusiki ia gadaralaia neganai, Saulo ena lalona ia namo, unai dainai “Saulo ese ia lalokau henia bada.”​—⁠1 Samuela 16:​11, 13, 21, 23.

 5. Dahaka dainai Saulo ena lalohadai Davida dekenai ia idau, bona Davida be dahaka ia karaia?

⁵ Iehova be Davida ida ia noho. Iehova ese Davida ia durua Pilistia tau badana Goliata ia hamasea totona. Bona tuari lalonai ia kwalimu momo dainai, Israela taudia ese ena ladana idia abia isi. To, Iehova ese Davida ia hanamoa dainai, Saulo ia mama, bona Davida ia inai henia matamaia. Nega rua Davida be Saulo ena vairanai gita ia gadaralaia noho lalonai, Saulo ese ia dekenai io ia negea. To Davida ese io ia dekea. Saulo be nega ihatoina Davida ia hamasea gwauraia neganai, Davida ia diba Saulo amo ia heau boio be namo. Bona Saulo be hanaihanai ia ura Davida ia dogoatao bona ia hamasea dainai, Davida be ena lalona ia hadaia Israela ia rakatania totona.​—⁠1 Samuela 18:11; 19:​9, 10.

 6. Dahaka dainai Saulo ese oda ia henia Nobu hanua taudia idia hamasea totona?

⁶ Davida be Israela hanuana Nobu dekenai ia lao, unuseniai Iehova ena palai dubuna ai ia noho. Tatau matamata haida be Davida ida idia lao, unai dainai Davida be ia bona idia totona aniani ia tahua. To Saulo ia kamonai hahelaga tauna badana ese Davida bona iena tatau dekenai aniani bona Goliata ena kaia ia henia. Unai dainai Saulo ia badu, bona unai hanua taudia ibounai, hahelaga taudia 85 danu, ia hamasedia.​—⁠1 Samuela 21:​1, 2; 22:​12, 13, 18, 19; Mataio 12:​3, 4.

Kahirakahira Idia Hamasea

 7. Dahaka dainai Gata be gabu namona lasi Davida ia komu totona?

⁷ Davida be Nobu hanua amo kilomita 40 bamona ia heau lao Pilistia tanona dekenai, bona Goliata ena hanua Gata dekenai, King Akisi ena heduru ia tahua. Reana Davida ia laloa Gata dekenai Saulo ese ia do ia tahua lasi. To, Gata ena king ena hesiai taudia be Davida ena toana idia diba. Davida ia kamonai unai hesiai taudia be ia idia herevalaia neganai, “Akisi, Gata ena king dekenai ia gari bada.”​—⁠1 Samuela 21:​10-​12.

 8. (a) Gata ai Davida dekenai ia vara gauna be Salamo 56 ese edena bamona ia herevalaia? (b) Edena dala ai Davida be kahirakahira ia mase?

⁸ Vadaeni, Pilistia taudia ese Davida idia dogoatao. Unai nega ai Davida be Iehova dekenai ia noinoi bona inai Salamo ia gwauraia: “Egu matana ena ranu be oiemu kavabu dekenai do oi udaia.” (Salamo 56:⁠8) Ia diba momokani Iehova ese ena lalohekwarahi do ia itaia bona mai lalokau ida ia do ia naria bona gimaia. Danu, Davida be palani ta ia karaia Pilistia ena king ia koia totona. Ia ese kavakava tauna ena kara ia tohotohoa. King Akisi be unai ia itaia neganai, ena hesiai taudia ia gwau henia badina idia ese “kavakava momokani” tauna idia mailaia ia dekenai. Momokani, Iehova ese Davida ena palani ia durua. Davida be kahirakahira idia hamasea, to unai ia karaia dainai hanua amo idia lulua.​—⁠1 Samuela 21:​13-​15.

9, 10. Dahaka dainai Davida ese Salamo 34 ia torea, bona ia torea neganai, dahaka gau ma haida ia laloa danu?

⁹ Baibel ia gwau lasi Davida idia durua taudia be ia ida Gata dekenai idia lao, eiava Israela badinai idia noho hanua dekenai Davida idia naria. To, Davida ida idia hedavari bona Iehova ese ia durua dalana be idia dekenai ia gwauraia neganai, idia moale. Salamo 34 ai Davida be unai nega ai idia vara gaudia ia torea. Unai karoa ena siri ginigunadia 7 ai, Davida ese Dirava ia hanamoa badina Ia ese ia hamauria, bona ena bamodia ia boiria ia ida Hamauria Tauna Badana idia hanamoa hebou totona.​—⁠Salamo 34:​3, 4, 7.

¹⁰ Davida bona ena tatau be Gata ena ist kahana dekenai, kilomita 10 idia heau lao Israela ena ororo gabudia dekenai bona Adulama ena kohua ai idia komu. Unuseniai, King Saulo ena lohia dalana dekenai idia moale lasi Israela taudia idia lao bona Davida bona ena tatau idia bamoa. (1 Samuela 22:​1, 2) Davida ese Salamo 34:​8-​22 ia torea neganai, ia ese unai bamona taudia ia laloa. Hari inai negai, unai siri lalonai idia noho hadibaia hereva be mai anina bada ita dekenai, bona unai salamo ita stadilaia neganai, namo bada do ita abia.

Oi Laloa Bada Gaudia be Davida Ena Hegeregerena, A?

11, 12. Nega ibounai Iehova ita hanamoa ena badina idauidau be dahaka dahaka?

¹¹ “Nega ibounai Lohiabada do lau hanamoa. Ia do lau tanikiu henia ela bona hanaihanai.” (Salamo 34:⁠1) Davida be Saulo amo ia heau dainai, reana tauanina gaudia ia lalohekwarahilaia momo, to ataiai sirina ese ia hahedinaraia bamona, unai ese ia koua lasi Iehova ia hanamoa totona. Hekwakwanai ita davaria neganai, Davida ena haheitalai ita tohotohoa be namo! Herevana ita be sikuli gabuna dekenai, gaukara gabuna ai, iseda Keristani tadikaka ida, eiava haroro gaukara lalonai, iseda ura badana be Iehova do ita hanamoa. Iehova do ita hanamoa ena badina be momo herea! Hegeregere, Iehova ese ia havaraia gau namodia momo herea ita moalelaia diba. Bona ena tanobada orea amo ia karaia gaudia idauidau mani oi laloa! Ena be Iehova ena kamonai hesiai taudia be idia goevadae lasi, to hari inai negai Ia ese ia durudia bada. Dirava ese ia havaraia gaudia bona ena tanobada oreana ese idia karaia gaudia be tanobada ena ladana bada taudia ese idia karaia gaudia idia hereaia. Unai dainai, Davida ena hereva oi abia dae, ani? Ia gwau: “Lohiabada e, dirava ta oi hegeregerena be lasi momokani. Idia ta ese oiemu kara hegeregerena idia karaia diba lasi.”​—⁠Salamo 86:⁠8.

¹² Davida hegeregerena, ita ura nega ibounai Iehova ita hanamoa badina ia ese kara badadia ia karaia. Danu, ita moale badina Dirava ena Basileia be Davida ena Garana, Iesu Keriso ese ia abia vadaeni. (Apokalupo 11:​15, NW ) Unai ena anina be inai tanobada dikana be kahirakahira do ia ore bona taunimanima 6 bilioni bamona be dika do idia davaria. Hari inai negai, Dirava ena Basileia bona unai Basileia be taunimanima totona dahaka do ia karaia, be ma haida dekenai ita hadibaia haraga be gau badana, bona ita durudia ita ida Iehova idia hanamoa totona. Namona be iseda tahua gauna be: Iseda nega ibounai ita gaukaralaia ma haida ita hagoadaia bona ma haida ita durua nega ia noho lalonai “Sivarai Namona” idia abia dae totona.​—⁠Mataio 24:⁠14.

13. (a) Davida be daika ia hanamoa, bona edena bamona taudia be Dirava kahirakahira idia lao? (b) Hari inai negai, manau taudia be edena dala ai horoa Keristani oreana ida idia gaukara hebou?

¹³ “Dirava ena durua lau dekenai lau laloa neganai, ia lau hanamoa bada. Hisihisi idia abia noho [“manau,” BHğ] taudia ese, inai egu hereva do idia kamonai, vadaeni do idia moale be namo.” (Salamo 34:⁠2) Davida be sibona ia karaia gaudia ia heagilaia lasi. Hegeregere, Gata ena king ia koia dalana ia heagilaia lasi. Ia diba Gata dekenai Iehova ese ia gimaia bona Iehova ena heduru dainai ia heau mauri. (Aonega Herevadia 21:⁠1) Unai dainai Davida be sibona dekenai ia heagi lasi, to Iehova ia hanamoa. Unai kara dainai, manau taudia be Iehova kahirakahira idia lao diba. Danu, Iesu be Iehova ena ladana ia hanamoa hanaihanai dainai, manau taudia be Iehova kahirakahira idia lao. Hari inai negai, manau taudia be bese idauidau amo idia mai bona horoa Keristani oreana ida idia gaukara hebou, bona Iesu Keriso be unai orea ena kwarana. (Kolose 1:18) Unai bamona manau taudia be idia itaia horoa taudia ese Dirava ena ladana idia hanamoa neganai, edia kudouna ia hamarerea. Bona Baibel ena hereva idia kamonai neganai, Dirava ena lauma helaga ese idia dekenai laloparara ia henia.​—⁠Ioane 6:44; Kara 16:⁠14.

Keristani Hebou ese Iseda Abidadama Idia Hagoadaia

14. (a) Davida ia ura ia sibona ese Iehova do ia hanamoa, a? (b) Hebou karana dekenai, Iesu ese edena bamona haheitalai namona ia hahedinaraia?

¹⁴ “Lau danu Lohiabada do ita hanamoa. Iena ladana do ita hanamoa hebou!” (Salamo 34:⁠3) Davida ia ura lasi ia sibona ese Iehova do ia hanamoa. Iena bamodia ia boiria ia ida Dirava ena ladana idia hanamoa totona. Danu Iesu Keriso, Davida Badana unai, be ia ura taunimanima ibounai vairanai Iehova ia hanamoa, hegeregere dubu dekenai, Ierusalema ena dubu helaga dekenai aria idia karaia neganai, bona iena hahediba taudia ida ia noho neganai, unai bamona ia karaia. (Luka 2:49; 4:​16-​19; 10:21; Ioane 18:20) Iesu ena haheitalai ita badinaia be hahenamo badana. Anina be nega ibounai iseda tadikaka ida Iehova ita hanamoa, bona unai be mai anina bada badina “Lohiabada ena Dina be kahirakahira do ia ginidae”!​—⁠Heberu 10:​24, 25.

15. (a) Davida dekenai ia vara gauna ese ena tatau be edena bamona ia durua? (b) Hebou dekenai ita lao neganai, unai ese edena dala ai ita ia durua?

¹⁵ “Lohiabada dekenai lau guriguri, bona ia ese lau dekenai ia haere. Ia ese egu gari ibounai dekena amo, lau ia hamauria.” (Salamo 34:⁠4) Unai be mai anina bada Davida dekenai, badina ia gwau: “Lau be durua tauna ta lasi neganai, Lohiabada dekenai lau taitai, vadaeni ia ese lau dekenai ia haere, bona egu hekwarahi ibounai dekena amo lau ia hamauria.” (Salamo 34:⁠6) Iseda tadikaka ita bamoa neganai, unai be nega namona Iehova ese ita ia durua hekwakwanai ta ita hanaia sivaraina ita kikilaia totona. Unai ese iseda tadikaka edia abidadama ia hagoadaia, Davida ena hereva ese ia idia badinaia taudia ia hagoadaia bamona. Davida idia bamoa taudia “edia matana [Iehova] dekenai idia negea, vadaeni idia moale. Unai dainai edia abidadama do ia dika lasi.” (Salamo 34:⁠5) Ena be Davida be King Saulo amo ia heau, to ena tatau be idia hemarai lasi. Idia diba momokani Dirava ese Davida ia durua noho, bona idia moale. Unai hegeregerena, kamonai matamata taudia bona lagani daudau lalonai Iehova idia hesiai henia taudia be Iehova ena heduru idia tahua. Bona idia ta ta be Iehova ena heduru idia itaia dainai, idia moale, bona unai ese edia lalona ia veria Dirava idia badinaia noho totona.

Aneru Edia Heduru Dainai Ita Moale

16. Edena dala ai Iehova ese ena aneru ia gaukaralaia ita idia naria totona?

¹⁶ “Lohiabada ena aneru ese, Dirava dekenai idia gari taudia ia naridia noho, bona dika dekena amo ia hamauridia noho.” (Salamo 34:⁠7) Davida ia laloa lasi Iehova ena hahemauri karana be ia sibona dekenai ia vara gauna. Momokani, Iehova ese Davida ia horoa Israela ena king ai ia lao totona; to ia diba Iehova ese ena aneru ia gaukaralaia ena abidadama hesiai taudia ibounai, herevana idia be ladana bada eiava ogogami taudia, ia naria totona. Iseda negai danu, tomadiho momokani taudia danu be Iehova ena gimaia karana idia itaia. Nazi Germany, Angola, Malawi, Mozambique, bona tano ma haida dekenai, gavamani taudia be Iehova ena Witnes taudia edia gaukara idia koua toho. To idia kwalimu lasi. Unai tano dekenai Iehova ena taunimanima edia namba be ia bada daekau bona Iehova ena ladana idia hanamoa noho. Dahaka dainai? Badina Iehova ese ena aneru ia gaukaralaia ena taunimanima ia gimaia bona hakaua totona.​—⁠Heberu 1:⁠14.

17. Edena dala ai Dirava ena aneru ese ita idia durua?

¹⁷ Danu, Iehova ena orea lalonai bema ta ese ma haida ia hahekwakwanaia, Iehova ena aneru ese dala idia karaia diba unai tauna idia kokia totona. (Mataio 13:41; 18:​6, 10) Bona ena be ita itaia lasi, to aneru ese iseda hetura karana Iehova ida idia gimaia bona iseda hesiai gaukara idia hadikaia diba gaudia idia kokia. Mai anina bada gauna be, aneru ese “noho hanaihanai Sivarai Namona” harorolaia gaukarana dekenai ita idia hakaua. Bona teritori dikadia dekenai haroro gaukara ita karaia neganai, ita idia gimaia danu. (Apokalupo 14:⁠6) Nega momo Iehova ena Witnes taudia ese idia karaia buka lalonai aneru ese idia durudia edia sivarai idia gwauraia.a Bona unai bamona ekspiriens momo idia vara dainai ita diba idia be momokani.

18. (a) Aneru edia heduru ita abia totona, dahaka ita karaia be namo? (b) Stadi gabena ai dahaka do ita herevalaia?

¹⁸ Aneru ese ita idia hakaua bona gimaia totona, dagedage negadia lalonai Iehova ena ladana ita hanamoa noho be gau badana. Laloaboio lasi, Dirava ena aneru be “[Iehova] dekenai idia gari taudia ia naridia.” Unai ese dahaka ia hahedinaraia? Dirava gari henia karana be dahaka, bona edena bamona ita hahedinaraia diba? Dahaka dainai lalokau Diravana ia ura ia ita gari henia? Stadi gabena ai unai henanadai do ita herevalaia.

[Footnote]

Edena Bamona Do Oi Haere?

• Davida ia matamata neganai, dahaka hahetoho ia haheaukalaia?

• Davida bamona, ita laloa bada gauna be dahaka?

• Keristani hebou be edena bamona ita laloa?

• Iehova ese edena dala ai ena aneru ia gaukaralaia ita idia durua totona?

[Map on page 23]

(For fully formatted text, see publication)

Rama

Gata

Sikilaga

Gibea

Nobu

Ierusalema

Betelehema

Adulama

Keila

Heberona

Sipi

Horese

Karamele

Maono

Ene Gedi

Mase Davarana

[Credit Line]

Map: Based on maps copyrighted by Pictorial Archive (Near Eastern History) Est. and Survey of Israel

[Picture on page 23]

Ena be Davida be Saulo dainai ia komu loaloa, to Iehova ena ladana ia hanamoa noho

[Picture on page 25]

Iseda hebou dekenai abidadama ia hagoadaia ekspiriens idauidau ita kamonai neganai, unai ese ita ia hagoadaia