‘Kara Maoromaoro Tauna ese Hahenamo Do Ia Abia’

SALAMO torea tauna Davida ia buruka neganai, ia gwau: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi.” (Salamo 37:25) Iehova Dirava ese kara maoromaoro taudia ia lalokau henidia bona mai ena hebogahisi ida idia ia naria. Iena Hereva, Baibel, lalonai tomadiho momokani taudia ia hagoadaia kara maoromaoro do idia tahua.​—⁠Sepanaia 2:⁠3.

Kara maoromaoro ena anina be Dirava vairanai ita maoro, iena taravatu hegeregerena ita abia dae dahaka be namo bona dahaka be dika. Baibel bukana Aonega Herevadia ena karoa 10 ese ita ia hagoadaia Dirava ena ura do ita badinaia, bona unai idia karaia taudia ese lauma dalanai idia moalelaia hahenamo idauidau ia herevalaia. Unai hahenamo haida be lauma dalanai ita ia durua aniani bada herea, anina bona moale ia havaraia gaukarana, bona hetura karana namona Dirava bona taunimanima ida. Unai dainai, namona be Aonega Herevadia 10:​1-14 ita laloa.

Hagoadaia Gauna Namona

Unai karoa ena hamatamaia herevana dainai, inai Aonega Herevadia ena kahana ia torea tauna ita diba namonamo. Ia gwau: “Solomona ena aonega herevadia.” Idaunegai Israela ena King Solomona ese dala maorona ita badinaia totona hagoadaia gauna namona ia hahedinaraia, ia gwau: “Aonega merona ese iena tamana ia hamoalea noho, to kavakava merona ese, iena sinana ena lalona ia hisihisi henia noho.”​—⁠Aonega Herevadia 10:⁠1.

Natuna ta ese mauri Diravana momokanina ia rakatania neganai, tama sina idia lalohisihisi bada! Aonega king ese sinana ena lalohisihisi ia gwauraia, reana ia ura ia hahedinaraia sinana ena lalohisihisi be bada herea. Doris dekenai unai be momokani.a Ia gwau: “Emai lagani 21 merona ese hereva momokani ia rakatania neganai, lau bona egu adavana, Frank, ai lalohisihisi bada. To lau dekenai unai lalohisihisi ena mamina ia goada momokani, Frank ena lalohisihisi mamina be unai bamona lasi. Idia hanaia laganidia 12 ese unai bero idia hanamoa diba lasi.”

Natudia ese edia tamana idia hamoalea diba bona edia sinana dekenai lalohisihisi idia havaraia diba. Namona be aonega ita hahedinaraia bona iseda tama sina ita hamoalea. Bona gau badana be iseda guba Tamana, Iehova, ena kudouna do ita hamoalea bada.

‘Kara Maoromaoro Taudia Idia Hitolo Lasi’

King ia gwau: “Koikoi karadia dekena amo idia abia moni o kohu, ese namo ia havaraia diba lasi, to kara maoromaoro ese, mase dekena amo oi do ia hamauria diba.” (Aonega Herevadia 10:⁠2) Dokona negana lalonai idia noho Keristani taudia momokanidia ese unai hereva idia ura henia bada. (Daniela 12:⁠4) Dirava ia dadaraia tanobadana ena dokona be kahirakahira. Taunimanima ese idia karaia gaudia​—⁠kohu, bisinesi, eiava tuari oreana​—⁠ese ‘hisihisi badana’ amo idia do ia gimaia diba lasi. (Apokalupo 7:​9, 10, 13, 14) “Kara maoromaoro taudia” sibona, “be inai tano dekenai do idia mauri noho, bona kerere lasi taudia be, iniseniai do idia noho momokani.” (Aonega Herevadia 2:​21, The New English Bible) Unai dainai, namona be ‘Dirava ena Basileia bona iena kara maoromaoro do ita tahua’ noho.​—⁠Mataio 6:⁠33.

To Iehova ena hesiai taudia be Dirava ena hahenamo idia abia totona do idia naria lasi ela bona ia gwauhamatalaia tanobada matamatana. “Lohiabada ese kara maoromaoro taudia dekenai hitolo ia siaia lasi, to kara dika taudia idia ura dikadika gauna, be ia henidia lasi.” (Aonega Herevadia 10:⁠3) Iehova ese “hesiai tauna mai ena kamonai, bona mai ena kara maoromaoro” oreana amo lauma aniani bada herea ia henia. (Mataio 24:45) Kara maoromaoro tauna be ‘ena moale bada dainai, ane do ia abia’ ena badina be momo. (Isaia 65:14) Ia ese diba ia ura henia bada. Lauma dalanai dava bada gaudia tahua karana ia moalelaia bada. Kara dika tauna be unai bamona moale gaudia ia diba lasi.

‘Gaukara Auka Neganai Kohu Oi Abia’

Kara maoromaoro tauna ese dala ma ta ai hahenamo ia abia danu. “Bema oi lahedo neganai oi be do oi ogogami, to bema oi gaukara auka neganai, oi be kohu momo do oi abia. Aniani ia mage neganai, ia haboua merona be aonega merona, to aniani haboua neganai ia mahuta noho merona, ese hemarai ia havaraia noho.”​—⁠Aonega Herevadia 10:​4, 5.

King ese uma anina haboua negana ai idia gaukara taudia dekenai ia gwauraia herevana be mai anina bada. Uma anina haboua negana be mahuta ena nega lasi. Ia be hora momo lalonai gaukara aukana karaia negana. Oibe, ia be karaharaga negana.

Iesu ese uma anina lasi to taunimanima haboua negana ia laloa, bona ena hahediba taudia ia hamaoroa: “Uiti ena anina abia negana ia ginidae vadaeni, to utua taudia be momo lasi. Uma ena biaguna [Iehova Dirava] dekenai umui noinoi, ia ese utua taudia ma haida do ia siaia, iena uiti do idia utua.” (Mataio 9:​35-38) Lagani 2000 ai, Iesu ena mase ena Memorial hebouna dekenai idia mai taudia be milioni 14 ia hanaia​—⁠unai namba ese nega rua bamona Iehova ena Witnes taudia edia namba ia hanaia. Unai dainai ‘uma anina be idia auka bona mage vadaeni’ be ta ese ia gorea diba lasi, ani? (Ioane 4:35) Tomadiho taudia momokanidia ese Biaguna idia noia gaukara taudia ma haida do ia siaia bona hahediba taudia halaoa gaukarana lalonai idia gaukara mai edia goada ida edia guriguri hegeregerena. (Mataio 28:​19, 20) Bona Iehova ese edia gaukara ia hanamoa bada! Hesiai laganina 2000 lalonai, bapatiso matamata taudia be 280,000 idia hanaia. Danu, idia ura Dirava ena Hereva hadibaia taudia ai idia lao. Inai anina haboua negana lalonai moale ita abia totona, namona be hahediba taudia halaoa gaukarana ita goadalaia.

‘Hahenamo be Ena Kwarana Totona’

Solomona ma ia gwau: “Hahenamo be kara maoromaoro tauna ena kwarana totona, to kara dika tauna ena uduna be dagedage ia hunia.”​—⁠Aonega Herevadia 10:​6, NW.

Ena kudouna ia goeva bona kara maoromaoro ia badinaia tauna ese ena kara amo ena kara maoromaoro ia hamomokania. Ena hereva namona amo ma haida ia hagoadaia, ena kara be namo bona mai hariharibada. Ma haida ese ena hebamo idia ura henia. Unai bamona tauna idia laloa bada​—⁠idia hanamoa​—⁠bona edia hereva amo idia abia isi.

To, kara dika tauna be mai ena badu bona ena ura be dika, ia ura ma haida ia hadikaia. Reana ena hereva be namo bona ena kudouna ai ia noho “dagedage ia hunia,” to gabeai ena kara eiava hereva amo ma haida ia hadikaia. (Mataio 12:​34, 35) Eiava, “kara dika tauna ena dagedage karadia ese, iena hereva gwauraia dalana idia koua noho.” (Aonega Herevadia 10:⁠6) Unai ena anina be kara dika taudia ese idia hahedinaraia karana be ma haida ese ia dekenai idia hahedinaraia, unai be inai henia karana. Unai kara ese ena uduna ia koua bamona, hereva ta ia gwauraia diba lasi. Unai bamona tauna ia laloa diba lasi ma haida amo hahenamo do ia abia, ani?

Israela ena king ia gwau: “Kara maoromaoro tauna ta ia mase murinai, taunimanima ese ia idia laloatao neganai, moale bona hanamoa idia davaria noho, to kara dika tauna ena ladana, be taunimanima do idia laloaboio [“be bodaga bamona,” NW ].” (Aonega Herevadia 10:⁠7) Iehova Dirava, bona taunimanima, ese kara maoromaoro tauna idia laloatao mai moale ida. Iesu ese kamonai karana ia hahedinaraia ela bona mase, bona unai dainai “iena ladana ese aneru edia ladana ia hereaia.” (Heberu 1:​3, 4) Hari inai negai Keristani taudia momokanidia ese Keriso ia do vara lasi neganai idia noho kamonai tatau bona hahine idia laloatao bona edia haheitalai idia tohotohoa. (Heberu 12:​1, 2) To kara dika taudia edia ladana be idau momokani, ia bodaga bamona bona taunimanima ese idia dadaraia vaitani! Oibe, “ladana namona tauna ese, kohu momo tauna ia hereaia noho. . . . Ladana namona do oi abia hidi.” (Aonega Herevadia 22:⁠1) Namona be Iehova bona iseda dekena tauna edia vairanai iseda ladana ia namo.

‘Kara Maoromaoro Tauna Ia Gari Lasi’

Solomona ese aonega tauna bona kavakava tauna edia idau ia herevalaia neganai, ia gwau: “Aonega tauna ese sisiba ia abia dae noho, to hereva momo kavakava tauna, ese dika do ia davaria.” (Aonega Herevadia 10:⁠8) Aonega tauna ia diba “taunimanima ta lasi ese iena mauri ia biagua” diba. (Ieremia 10:23) Ia lalo-parara Iehova ena heduru ia tahua be namo bona mai ena ura ida Dirava ena sisiba ia abia dae. To, ia hereva momo kavakava tauna ese unai hereva momokani ia lalo-pararalaia lasi. Mai kavakava ida ia hereva noho dainai dika do ia davaria.

Kara maoromaoro tauna ese noho namona ia moalelaia, to kara dika taudia ese unai ia abia diba lasi. “Kara maoromaoro ai ia raka tauna be maino ai do ia raka, to ena kara ia hagagevaia tauna be sibona do ia hedinarai. Matana ia hakapua haraga tauna be hisihisi do ia henia, bona ena udu bibinadia amo ia kavakava tauna be do idia moia diho.”​—⁠Aonega Herevadia 10:​9, 10, NW.

Kara maoromaoro badinaia tauna be mai momokani ida ia kara. Ma haida ese ia idia matauraia bona abidadama henia. Koikoi lasi tauna be gaukara tauna namona bona nega momo maduna badana idia henia. Momo idia diba ia koikoi lasi, unai dainai ena be gaukara gabudia be momo lasi to ia ese gaukara ia davaria. Danu, ena koikoi lasi karana dainai ruma dekenai maino bona namo ia havaraia. (Salamo 34:​13, 14) Iena ruma bese taudia ida hetura karana namona ia moalelaia. Noho namona ena mamina be kara maoromaoro badinaia karana ena huahua ta.

To sibona ena namo ia davaria totona koikoi karadia ia karaia tauna ena noho be idau. Reana koikoi tauna ese ena hereva gageva eiava kara ena toana amo ena koikoi karana ia hunia toho. (Aonega Herevadia 6:​12-14) Ia ura ma haida ia hadikaia eiava koia dainai iena matana amo toa ia karaia bona unai amo idia dekenai lalohisihisi bada ia havaraia. To gabeai, unai bamona tauna ena koikoi karadia do idia hedinarai. Aposetolo Paulo ia gwau: “Tau haida edia dika idia hedinarai namonamo, ia gunalaidia bamona, ia lao bona kota gabunai. To haida edia dika ita itaia diba lasi ela bona dina ta. Unai bamona danu, kara namodia haida be idia hedinarai namonamo. Ma kara namodia haida idia hedinarai haraga lasi, gabeai sibona, badina be kara namodia idia hunia ela bona hanaihanai diba lasi.” (1 Timoteo 5:​24, 25) Herevana daika ia koia​—⁠tama sina, turana, adavana, eiava ia diba tauna ta​—⁠to koikoi karana be dokonai ia hedinarai. Ta ese koikoi tauna ia abidadama henia diba lasi, ani?

‘Iena Uduna Dekena amo Mauri Herevadia Idia Mai’

Solomona ia gwau: “Kara maoromaoro tauna ena uduna dekena amo, mauri hereva idia mai noho, to kara dika tauna ena dagedage karadia ese, iena hereva gwauraia dalana idia koua noho.” (Aonega Herevadia 10:11) Uduna ena hereva ese ta idia hanamoa eiava hahisia diba. Idia ese ta idia hagoadaia diba, eiava ia dekenai lalo-metau idia havaraia diba.

Israela ena king be ta ena hereva ia havaraia hemami ia diba dainai, ia gwau: “Badu ese heai ia havaraia noho, to lalokau ese kerere ibounai ia koua noho.” (Aonega Herevadia 10:12) Badu ese taunimanima huanai heai ia havaraia, bona ia amo hepapahuahu ia vara. Iehova idia lalokau henia taudia ese edia mauri amo badu idia kokia be gau badana. Edena dala ai? Iena gabu ai lalokau idia atoa. “Lalokau ese kara dika momo ia koudia.” (1 Petero 4:​8, NW ) Lalokau “ia hesiku lasi,” anina be “gau iboudiai ia koua.” (1 Korinto 13:7; Kingdom Interlinear) Dirava amo ia mai lalokauna dainai ta ia laloa lasi goevadae lasi taudia ese goevadae karadia idia karaia be namo. Unai bamona lalokau dainai ma haida edia kerere ita hahedinaraia lasi, bona ita ia durua edia kerere do ita laloaboio sibona, to bema kara dika badana idia karaia unai be idau. Bona ena be haroro gaukara, gaukara gabuna, eiava sikuli dekenai ita idia kara dika henia, to lalokau dainai ita hesiku lasi.

Aonega king ma ia gwau: “Laloa kehoa tauna ese aonega hereva ia gwauraia noho, to kavakava tauna be do idia dadabaia be namo.” (Aonega Herevadia 10:13) Lalo-parara tauna ena aonega ese ena raka dalana ia hakaua. Ena uduna amo ia gwauraia hagoadaia herevadia ese ma haida idia durua, kara maoromaoro idia badinaia totona. Ia bona iena hereva idia kamonai taudia be dala maorona badinaia totona idia doria​—⁠dadabaia auna​—⁠be mai badina lasi.

“Edia Diba Idia Habadaia Noho”

Dahaka ese ita ia durua bena iseda ‘hereva amo aonega ia heau goada, ranu ia lohilohi bamona’ to iseda uduna amo anina lasi herevadia idia heau haraga lasi? (Aonega Herevadia 18:⁠4) Solomona ia haere, ia gwau: “Aonega taudia ese edia diba idia habadaia noho, to kavakava tauna ena hereva momo, ese kerere ia mailaia noho.”​—⁠Aonega Herevadia 10:⁠14.

Gau ginigunana be iseda lalona be ita ia hagoadaia Dirava ena diba amo ia honu be namo. Unai diba be gabu tamona amo ita abia diba. Aposetolo Paulo ia gwau: “Buka Helaga ibounai be Dirava ena lauma amo ia vara bona ia be mai ena namo hadibaia totona, sisiba henia totona, gau idauidau hamaoromaoroa totona, kara maoromaoro ai matahakani henia totona, vadaeni Dirava ena tau be do ia hegeregere momokani, gau ibounai ia abia hegaegae gaukara namodia ibounai karaia totona.” (2 Timoteo 3:​16, 17, NW ) Namona be iseda diba ita habadaia noho bona Dirava ena Hereva ita tahua mai goada ida, idia hunia dava bada gauna ita tahua bamona. Unai tahua karana be mai ena moale bada bona anina namona ia havaraia!

Iseda uduna amo aonega herevadia ita gwauraia diba totona, Baibel amo ita abia dibana be iseda kudouna dekenai ia vareai be gau badana. Iesu ese ena hereva idia kamonai taudia ia hamaoroa: “Tau namona ena lalona dekenai ia laloa gaudia be namo dainai, kara namodia do ia havaraia. Tau dikana ena lalona dekenai ia laloa gaudia be dika dainai, kara dikadia do ia havaraia. Taunimanima ese edia lalona dekenai idia honu gaudia, be do idia gwauraia, edia uduna dekenai.” (Luka 6:45) Unai dainai, ita dibaia gaudia be hanaihanai ita lalohadailaia be gau badana. Momokani, stadi bona laloa dobu karana be mai edia hekwarahi, to unai bamona stadi karana ese lauma dalanai ita ia hagoadaia bada! Badina ta ia noho lasi ita ese anina lasi herevadia ia gwauraia kava tauna ena dala dikana do ita badinaia.

Oibe, aonega tauna ese Dirava ena matana ai idia maoro karadia ia karaia bona ma haida dekenai namo ia havaraia. Ia ese lauma dalanai ia abia aniani bada herea ia moalelaia bona Lohiabada ena gaukara namona lalonai ia gaukara goadagoada. (1 Korinto 15:58) Ia be kara maoromaoro badinaia tauna dainai, ia raka mai gari lasi ida bona Dirava ese ena lalo-namo ia henia. Oibe, kara maoromaoro tauna ena hahenamo be momo. Namona be Dirava ena taravatu hegeregerena ita laloa dahaka be namo bona dahaka be dika bona unai amo kara maoromaoro ita tahua.

[Footnote]

[Picture on page 25]

Koikoi lasi karana ese ruma bese ena moale ia habadaia

[Picture on page 26]

“Aonega taudia ese edia diba idia habadaia noho”