Karoa 15

“Daika be Hegeregere Inai Buka Do Ia Kehoa?”

GAU HEREADAENA! HAGARIA GAUNA! Iehova ena terona lahi lamepa huanai, kerubi, elda taudia 24 bona hevarivari davarana be unai bamona. To Ioane e, ma dahaka oi itaia? Ioane ia gwau: “Buka ta lau itaia. Ia be helai gabuna badana latanai ia helai Diravana ena imana idibana ese ia dogoatao noho. Inai buka be mai toretore lalona kahanai, bona murimuri kahanai, bona ia be koua momokani, koua toana ibounai be 7. Vadaeni, aneru goadana ta lau itaia, ia hereva badabada, ia gwau, ‘Daika be hegeregere inai buka do ia kehoa, bona inai koua toana 7 do ia makohia?’ To guba dekenai bona tanobada dekenai, bona tanobada henunai be ta ia goada lasi unai buka do ia kehoa. Unai dainai ta lasi inai buka ena lalona do ia itaia diba. Lau be lau tai dikadika, badina be ta ena goada be hegeregere lasi buka do ia kehoa, bona iena lalonai do ia itaia.”​—⁠Apokalupo 5:​1-4.

² Iehova Dirava, tanobada bona guba ibounai ia lohiaia Lohiabadana, ese unai buka ia dogoatao. Unai buka lalonai mai anina bada hereva idia noho. Iena vaira kahanai bona ena murina kahanai toretore ia noho. Ita ura diba dahaka ia noho unai buka lalonai. Namona be Iehova ena hereva Ioane dekenai ita laloa lou, ia gwau: “Oi daekau mai iniseni, vadaeni gabeai do idia vara momokani gaudia oi dekenai do lau hedinaraia.” (Apokalupo 4:⁠1) Ita ura dikadika unai gau ita diba. To madi, koua toa 7 amo unai buka ia koua momokani!

³ Aneru goadana ese tau ta do ia davaria, ia hegeregere unai buka do ia kehoa totona, a? Kingdom Interlinear Baibel ia gwau unai buka be Iehova ena “imana idibana latanai” ia noho. Reana unai hereva ena anina be ia ese ena imana ia kehoa bona unai buka be ena imana latanai ia noho. To toana be guba dekenai bona tanobada dekenai tau ta be ia hegeregere lasi unai buka do ia abia dae bena do ia kehoa totona. Tanobada henunai danu, Dirava ena kamonai hesiai taudia, idia mase vadaeni taudia, edia huanai, ta ia noho lasi ia hegeregere unai hahenamo badana do ia abia totona. Unai dainai Ioane ia lalohisihisi bada herea! Reana ia ese “gabeai do idia vara momokani gaudia” do ia diba lasi. Hari iseda negai danu, Dirava ena horoa taudia be mai edia ura bada danu Iehova idia naria, ia ese ena diari bona hereva momokani do ia siaia, Apokalupo ena hereva ena anina do ia hahedinaraia totona. Apokalupo ena peroveta hereva ena hagugurua negana dekenai unai bamona do ia karaia metairametaira, ena orea taudia be “hahemauri badana” ena dala dekenai ia hakaudia totona.​—⁠Salamo 43:​3, 5.

Ia Hegeregere Tauna

⁴ Oibe, unai buka ia kehoa diba tauna ta ia noho! Ioane ia gwau: “Vadaeni, badana [elda] tauna ta ese lau ia hereva henia, ia gwau, ‘Oi tai lasi. Oi itaia! Iuda iduhuna ena Leona, Davida ena natuna badana, ese kwalimu ia abia vadaeni. Ia ese unai koua toana 7 ia makohia diba, bona buka ia kehoa diba.’ ” (Apokalupo 5:⁠5) Vadaeni, Ioane e, oi taitai lasi! Ioane oreana taudia bona edia kamonai bamodia hari inai negai ese hahetoho badadia idia haheaukalaidia vadaeni lagani momo lalodiai Iehova ena diari idia naria noho neganai. Hari iseda davana namona be Apokalupo ena matahanai ena anina dekenai ita lalo-parara, bona unai ese iseda lalona ia hagoadaia. Iseda hahenamo be matahanai ena anina be ma taunimanima haida dekenai ita harorolaia dainai ena anina ita hagugurua danu!

⁵ “Iuda iduhuna ena Leona”! Ioane ia diba, Iuda taudia edia tubuna Iakobo ese ena natuna merona namba 4, Iuda, ia herevalaia neganai, inai peroveta herevana ia gwauraia: “Iuda be leona ena natuna. Ena vamu ia alaia murinai ia giroa lou ena hunia gabu dekenai. Iuda be leona bamona, ia hekure diho, to ia hegaegae noho. Tau ta do ia hamarerea lasi do ia badu garina. Lohia [auna] be Iuda ese ia dogoatao, dohore idia kokia lasi. Ena aena ruaosi edia huanai ia atoa vadaeni. Ena siahu do ia dogoatao noho, ia lao bona siahu momokani ena biaguna do ia mai. Vadaeni bese ibounai ia dekenai dohore idia kamonai henia.” (Genese 49:​9, 10) Dirava ena orea taudia edia pavapava besena be Iuda amo ia mai. David ena nega amo ela bona Babulono taudia ese Ierusalem idia hadikaia ore neganai Ierusalem dekenai idia lohia pavapavadia iboudiai be Iuda ena bese taudia. To idia ta lasi be Iakobo ese ia perovetalaia tauna Shiloh; Shiloh ena anina be “[Gwaumaoro] Ia Abia Tauna.” Unai ladana ese Iesu ia perovetalaia. Ia ese David ena Basileia ia abia be maoro.​—⁠Esekiela 21:​25-​27; Luka 1:​32, 33; Apokalupo 19:⁠16.

⁶ Karaharaga Ioane be ia lalo-parara “David ena natuna badana” be daika. Peroveta herevana lalonai Mesia idia gwauraia “Iese [King David ena tamana] badina amo rigi maragina ta . . . rigi matamatana ta” bona “Iese ena ramuna do ia gini taunimanima idauidau edia pepe bamona.” (Isaia 11:​1, 10) Iesu be Iese ena rigi matamatana ta; ia be Iese ena natuna, David, ena pavapava besena lalonai ia vara. Danu, Iese ena ramuna bamona, Iesu ese dala ia kehoa David ena pavapava besena do ia vara lou totona. Ia ese mauri unai bese ia henia bona do ia naria ela bona hanaihanai.​—⁠2 Samuela 7:⁠16.

⁷ Tau goevadaena Iesu ese Iehova ena hesiai gaukara ia karaia mai ena kara maoromaoro bona hisihisi bona hahetoho ia davaria danu. Iesu ese Satana ena samani herevana ia koua vaitani. (Aonega Herevadia 27:11) Unai dainai, boubou bamona ia mase gwauraia neganai, ia gwau diba: “Lau ese tanobada lau halusia vadaeni.” (Ioane 16:33) Unai badina dainai, Iehova ese Iesu ia hatorea isi lou murinai, “siahu ibounai guba dekenai bona tanobada dekenai” ia henia. Dirava ena hesiai taudia amo ia sibona mo be hegeregere unai buka do ia abia bena ena hadibaia herevana badana do ia gwauraia hedinarai totona.​—⁠Mataio 28:⁠18.

⁸ Vadaeni, Iesu ese buka ia kehoa be maoro momokani. Lagani 1914 amo ia be Dirava ena Mesia Basileiana lalonai Pavapava bamona ia helai, bona unai buka ese unai Basileia bona ena gaukara ia gwauraia momo. Iesu be tanobada dekenai ia noho neganai, mai ena kamonai ida Basileia ia harorolaia. (Ioane 18:​36, 37) Iena murinai idia raka taudia ia hadibaia do idia guriguri Basileia do ia mai totona. (Mataio 6:​9, 10) Keristen taudia edia nega ia matamaia neganai Iesu ese Basileia harorolaia gaukarana ia hamatamaia bona ia peroveta, ia gwau nega dokona ai haroro gaukara do idia karaia guguru. (Mataio 4:23; Mareko 13:10) Unai hegeregerena, elda taudia 24 amo ta ese Ioane ia hamaoroa Iesu be buka ia kehoa tauna. Dahaka dainai? Badina unai elda taudia be terona haida latanai idia helai bona korona idia abia, bona Keriso ida do idia lohia hebou ena Basileia lalonai.​—⁠Roma 8:17; Apokalupo 4:⁠4.

‘Idia Alaia Mase Mamoe Ena Natuna’

⁹ Ioane ese “Iuda iduhuna ena Leona” ia raraia. To hoa gauna ta ia vara! Ia hedinarai tauna ena toana be idau vaitani: “Vadaeni, Mamoe ena Natuna ta lau itaia, ia gini noho, to iena toana be, haida ese idia alaia mase bamona. Ia be helai gabuna badana ena huanai ia gini, mauri gaudia 4, bona badana [elda] taudia ese ia idia hagegea. Bona Mamoe ena Natuna be mai ena doana 7 bona iena matana 7. Unai matana 7 be Dirava ena lauma 7, tanobada ena kahana ibounai dekenai ia siaia gaudia be unai.​—⁠Apokalupo 5:⁠6.

¹⁰ Huana momokani ai, terona badibadinai, mauri gaudia 4 bona elda taudia 24 edia huanai, mamoe natuna ta ia gini! Karaharaga Ioane ia lalo-parara unai mamoe natuna be “Iuda iduhuna ena Leona” bona ia be “Davida ena natuna badana.” Ia diba, lagani 60 gunanai, Ioane Bapatiso be Iuda taudia haida ia hamaorodia Iesu be “Dirava ena Mamoe Natuna . . . tanobada ena dika kokia tauna.” (Ioane 1:29) Iesu be tanobada dekenai ia mauri laganidia iboudiai lalodiai, inai tanobada ena miro amo ia gini siri​—⁠kopina goevana mamoe natuna bamona​—⁠ena mauri goevadaena be boubou gauna bamona ia henia, taunimanima durudia totona.​—⁠1 Korinto 5:7; Heberu 7:⁠26.

¹¹ Idia gwau Iesu be “Mamoe ena Natuna ta . . . iena toana be, haida ese idia alaia mase bamona.” Unai hereva ese hairai tauna Iesu ia gwauraia dika, a? Lasi vaitani! Iesu ia gini goada ela bona ia mase dainai Satana ia halusia vaitani bona Iehova Dirava ia kwalimu momokani. Iesu be unai bamona idia gwauraia dainai, ia hahedinaraia ia ese Satana ena tanobada ia halusia vadaeni bona ia hahedinaraia lou Iehova bona Iesu ese taunimanima idia lalokau henidia bada. (Ioane 3:16; 15:13; Kolose 2:15 itaia danu.) Unai ia hahedinaraia Baibel ia gwauhamatalaia Garana be Iesu, bona ia hegeregere momokani, buka do ia kehoa totona.​—⁠Genese 3:⁠15.

¹² Ma dahaka gau dainai unai “Mamoe ena Natuna” ita laloa bada diba? Ia be mai ena doana 7. Baibel lalonai nega momo doana ese goada bona siahu idia laulaulaia, bona unai namba 7 ena anina be ena siahu ibounai ia abia vadaeni. (Samuela Ginigunana 2:​1, 10; Salamo 112:9; 148:14 itaia danu.) Unai dainai, Mamoe ena Natuna ena doana 7 edia anina be Iehova ese siahu bada ia henia Iesu dekenai. Iesu ese “guba ena lohia taudia ibounai, gunalaia taudia ibounai, gavana taudia ibounai, bona siahu taudia ibounai ia ese idia ia hereaia. Iena ladana ese danu ladana ibounai inai tanobada mauri lalonai bona gabeai maurina lalonai danu ia hanaia momokani.” (Efeso 1:​20-​23; 1 Petero 3:22) Lagani 1914 ai, Iehova ese Iesu be guba Pavapavana ai ia halaoa. Unai nega amo, Iesu ese ena gavamani siahuna ia gaukaralaia.​—⁠Salamo 2:⁠6.

¹³ Danu, Mamoe ena Natuna be mai ena matana 7. “Unai matana 7 be Dirava ena lauma 7.” Ena anina be Iesu be lauma helaga amo ia honu momokani. Iesu ena amo Iehova ena gaukara siahuna be Ena tanobada hesiai taudia dekenai ia mai. (Tito 3:⁠6) Unai lauma helaga amo Iesu be guba amo inai tanobada dekenai idia vara gaudia iboudiai ia itaia. Iena Tamana hegeregerena, Iesu ena lalo-parara ia goevadae. Gau iboudiai ia itaia diba. (Salamo 11:4; Sekaraia 4:10 itaia danu.) Unai Natuna​—⁠ena kara maoromaoro ia badinaia bona tanobada ia halusia tauna; ia be Iuda iduhuna ena Leona; ia be David ena ramuna; ena mauri ia henia taunimanima durudia totona tauna; ia be unai gaukara ibounai biaguna, lauma helaga amo ia honu momokani, bona Iehova Dirava amo lalo-parara goevadaena ia abia tauna⁠​—⁠​oibe, unai Natuna ia hegeregere vaitani Iehova ena imana amo buka do ia abia totona. Iesu be ia gari Iehova ena guba oreana lalonai dagi ia abia garina, a? Lasi! To, “ia lao, helai gabuna badana dekenai ia helai Diravana ena imana idibana dekena amo, buka ia abia.” (Apokalupo 5:⁠7) Mai manauna ida Dirava ena ura karaia dalana ia haheitalaia namo herea!

Ane amo Idia Hanamoa

¹⁴ Iehova ena terona vairanai idia gini taudia ese dahaka idia karaia? “Buka ia abia neganai, mauri gaudia 4 bona badana [elda] taudia 24 be Mamoe ena Natuna ena vairanai idia tui diho. Idia ta ta be mai edia gita, bona mai edia golo urodia. Unai uro ta ta be mai edia bonana namo muramura, kwalahu gauna. Unai muramura ena bonana namona be Dirava ena taudia edia guriguri ena toana.” (Apokalupo 5:​8) Iehova ena terona vairanai idia gini kerubi 4 hegeregerena, elda taudia 24 be Iesu dekenai idia tui diho, iena siahu dainai. To unai elda taudia sibodia ese gita bona golo urodia idia dogoatao.a Bona idia sibodia ese ane matamatana ta idia abia. (Apokalupo 5:⁠9) Unai dainai idia be “Dirava ena Israela” 144,000 taudia helagadia bamona, idia danu ese gita idia dogoatao bona ane matamatana idia abia. (Galatia 6:16; Kolose 1:12; Apokalupo 7:​3-8; 14:​1-4) Danu, elda taudia 24 ese hahelaga gaukarana idia karaia guba dekenai. Idaunegai Israel ena hahelaga taudia be tomadiho kalaga lalonai bonana namo muramurana idia gabua neganai, unai elda taudia 24 edia gaukara idia laulaulaia. Dirava ese Mose ena Taravatu ia kokia, Iesu idia satauroa neganai, satauro dekenai taravatu ia kokoa kau. Unai neganai, Israel hahelaga taudia edia gaukara ia hadokoa. (Kolose 2:14) Unai dainai dahaka ita diba? Inai siri ese horoa kwalimu taudia edia gaukara korikorina ia hahedinaraia: ‘Idia be Dirava bona Keriso edia boubou helaga karaia taudia. Bona lagani 1,000 lalonai Keriso danu idia lohia.’​—⁠Apokalupo 20:⁠6.

¹⁵ Idaunegai Israel lalonai, hahelaga tauna badana sibona be Helaga Herea Gabuna lalonai ia vareai diba. Ia karaia neganai, unai be laulau bamona, anina be, Iehova vairanai ia gini. Ia dekenai, bonana namo muramura ia huaia be gau badana, bema lasi ia mase. Iehova ena taravatu ia gwau: “Iehova vairanai [Arona] ese gida amo ia honu lahi merekina do ia abia pata helagana amo, bona bonana namo muramurana be ena imana ruaosi dekenai ia dogoatao, bona seseahu murinai do ia abidia vareai. Danu, Iehova vairanai bonana namo muramurana be lahi dekenai do ia atoa bona ena kwalahu be Taravatu nadidia latanai ia noho gauna, Maua Helagana, do ia koua. Unai kara ibounai do ia karaia be namo, idau ia mase garina.” (Levitiko 16:​12, 13) Bema hahelaga tauna badana ese bonana namo muramurana ia gabua lasi, Helaga Herea Gabuna lalonai ia vareai diba lasi.

¹⁶ Keristen negana lalonai, Hahelaga Tauna Badana korikorina Iesu Keriso sibona lasi, to hahelaga taudia 144,000 danu be Helaga Herea Gabuna korikorina lalonai idia vareai; unai gabu be Iehova ena noho gabuna guba dekenai. (Heberu 10:​19-​23) Bema elda taudia 24 be ‘bonana namo muramurana idia gabua’ lasi, anina be, bema Iehova idia guriguri henia hanaihanai lasi, unai guba Helaga Herea Gabuna dekenai idia vareai diba lasi.​—⁠Heberu 5:7; Iuda 20, 21; Salamo 141:2 itaia danu.

Ane Matamatana Ta

¹⁷ Ane matamatana ta idia abia. Mamoe ena Natuna bona ia idia bamoa hahelaga taudia, elda taudia 24 unai, ese inai ane idia abia: “Ane matamata idia abia, inai bamona: ‘Oi be hegeregere momokani buka do oi abia, bona koua toana do oi hamakohia, badina be oi idia alaia mase, bona oiemu rarana dekena amo taunimanima oi hoidia. Dirava ena taudia do idia lao totona. Bese ibounai, gado ibounai, hanua ibounai bona kopina idauidau ibounai oi ese oi hoidia.’ ” (Apokalupo 5:⁠9) Baibel lalonai inai hereva: “Ane matamata” ia hedinarai nega haida, bona kahirakahira nega ibounai ena anina be Iehova idia hanamoa iena hahemauri karana badana ta dainai. (Salamo 96:1; 98:1; 144:⁠9) Unai dainai, ane ia matamata badina ane ia abia tauna ese Iehova ena kara namo hereadia ma haida ia gwauraia hedinarai diba bona Iena ladana hereadaena ia hanamoa lou diba.

¹⁸ To unai siri lalonai elda taudia 24 be Iesu vairanai ane matamatana idia abia, Iehova vairanai idia gini lasi. To edia kara ena badina be tamona. Iesu idia hanamoa badina Dirava ena Natuna bamona kara matamatadia ia karaia vadaeni idia ia durudia totona. Ena rara amo, gwauhamata matamatana ena maino karaia tauna ai ia lao, bona unai dala amo bese matamatana, Iehova ena bese idauna, ia vara diba. (Roma 2:​28, 29; 1 Korinto 11:25; Heberu 7:​18-​25) Unai lauma bese matamatana taudia be tanobada besedia idauidau momo amo idia mai, to Iesu ese ia hatamonadia kongregesen tamona lalonai, bese tamona bamona.​—⁠Isaia 26:2; 1 Petero 2:​9, 10.

¹⁹ Mose ena negai Iehova ese Israel taudia be bese tamona ai ia halaodia neganai, gwauhamata be idia danu ia karaia, bona ia gwauhamata henidia, bema unai gwauhamata idia hagugurua, ia vairanai hahelaga basileiana ai do idia lao. (Esodo 19:​5, 6) Israel taudia idia kara dika bona unai gwauhamata be idia dekenai ia guguru lasi. To bese matamatana, Iesu ena amo gwauhamata matamatana idia karaia dainai ia vara besena, ia kara namo noho. Unai dainai, unai bese taudia be pavapava bamona tanobada idia lohiaia, bona hahelaga taudia edia hesiai gaukara idia karaia danu. Kudou-maoro taudia tanobada dekenai idia durudia, Iehova ida maino do idia karaia lou totona. (Kolose 1:20) Unai be ane matamatana ena hereva bamona: “Oi ese idia oi haboua, vadaeni idia be Basileia ta. Bona Dirava ena boubou helaga karaia taudia. Oi ese idia oi halaoa vadaeni. Bona idia ese tanobada do idia gunalaia.” (Apokalupo 5:10) Unai elda taudia 24 ese moale bada idia abia, hairai tauna Iesu hanamoa ane matamatana idia abia dainai!

Guba Taudia Momo ese Ane Idia Abia

²⁰ Iehova ena orea guba taudia ma haida ese unai ane matamatana be edena bamona idia laloa? Ioane be mai ena moale bada ida edia lalo-tamona ia itaia: “Vadaeni, lauegu matana lau negea, bona aneru momo herea edia gadona lau kamonai. Idia ese helai gabuna badana, mauri gaudia, bona badana [elda] taudia idia gini hagegea. Edia momo be daha bona daha, milioni bona milioni. Idia boiboi goada, idia gwau, ‘Inai Mamoe ena Natuna, guna idia alaia mase, ia be hegeregere momokani siahu bona kohu momo do ia abia. Ia be hegeregere momokani aonega bada bona goada bada, hemataurai, hairai bona hanamoa bada do ia abia!’ ” (Apokalupo 5:​11, 12) Ane namo hereana unai, ani?

²¹ Unai anina be Iesu ese Iehova Dirava ena gabu ia abia, a? Bona havaraia gaudia iboudiai ese Iesu idia hanamoa, iena Tamana idia hanamoa lasi, a? Lasi vaitani! To unai hanamoa ane matamatana be aposetolo Paulo ena hereva hegeregerena, ia gwau: “Unai dainai Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hanaia. Bona Iesu ena ladana hanamoa totona ibounai do idia tui diho, guba taudia, tanobada taudia, bona tanobada henunai idia noho taudia danu. Bona taunimanima ibounai ese Iesu Keriso do idia gwauraia hedinarai ‘Lohiabada,’ badina be unai dekena amo Tamana Dirava ena ladana do idia abia isi momokani.” (Italik be aiemai.) (Filipi 2:​9-​11) Unai siri lalodiai Iesu idia hanamoa badina mauri taudia iboudiai edia vairanai ia ese henanadai badana ena haere korikorina ia henia​—⁠Iehova ese gau ibounai ia lohiaia karana ena maoro ia hamomokania unai. Momokani, unai ese ena Tamana ia hahairaia bada!

Ane Badana Ta

²² Ioane ia hahedinaraia guba taudia ese Iesu hanamoa totona ane namodia idia abia, badina Iesu ia kara maoromaoro bona guba dekenai ia be mai ena siahu. Unai idia karaia neganai tanobada dekenai ma haida danu ese ane idia abia, Tamana bona Natuna idia hanamoa totona. Natuna ta ena kara dainai ena tamana bona sinana do idia hanamoa diba. Unai hegeregerena, Iesu ena abidadama dalana dainai mauri taudia iboudiai ese “Tamana Dirava ena ladana do idia abia isi momokani.” Vadaeni, Ioane be ma ia gwau: “Bona Dirava ese ia karaia gaudia ibounai, guba dekenai, tanobada dekenai, bona tanobada henunai, bona davara dekenai, inai gabudia lalonai gau ibounai edia boiboi lau kamonai, idia gwau, ‘Helai gabuna badana dekenai ia helai Diravana, bona Mamoe ena Natuna be, hanamoa, bona hairai, bona hemataurai, bona siahu do idia abia, ela bona hanaihanai.’ ”​—⁠Apokalupo 5:⁠13.

²³ Unai ane badana be edena negai idia abia? Lohiabada ena dina ia matamaia neganai idia abia matamaia. Satana bona ena demoni be guba amo idia negea diho neganai, “Dirava ese ia karaia gaudia ibounai, guba dekenai” ese unai hanamoa anena idia abia hebou diba. Bona, sivarai ia gwau bamona, lagani 1919 amo tanobada dekenai taunimanima momo ese Iehova idia hanamoa danu. Guna idia be tausen haida sibona to edia namba ia bada daekau ela bona lagani 2005 ai idia be milion 6 idia hanaia.b Satana ena tanobada oreana idia hadikaia ore murinai, “Dirava ese ia karaia gaudia ibounai . . . tanobada dekenai” ese ane do idia abia Iehova bona ena Natuna do idia hanamoa totona. Iehova ese do ia abia hidi negana ai, mase taudia milion momo idia toreisi lou negana do ia matamaia, bona unai neganai “Dirava ese ia karaia gaudia ibounai . . . tanobada henunai,” Dirava ese ia laloatao taudia unai, ese unai ane badana do idia abia diba danu.

²⁴ Hari, ‘tanobada dokona amo davara bona motumotu’ amo taunimanima milion milion be Iehova ena tanobada orea taudia iboudiai ida ane matamatana idia abia hebou. (Isaia 42:10; Salamo 150:​1-6) Unai moale anena be Lagani 1,000 Lohia Negana ena dokona ai do idia abia, taunimanima idia goevadae neganai. Unai murinai, idaunegai gaigaina, koikoi tauna badana, Satana, do idia hadikaia ore bona Genese 3⁠:15 ena hereva do ia guguru, bona kwalimu negana ai, mauri iboudiai, lauma mauridia bona taunimanima, ese inai ane do idia abia hebou: “Helai gabuna badana dekenai ia helai Diravana, bona Mamoe ena Natuna be, hanamoa, bona hairai, bona hemataurai, bona siahu do idia abia, ela bona hanaihanai.” Guba bona tanobada ibounai lalonai unai hereva do ia dadaraia tauna ta be lasi.

²⁵ Unai be moale bada negana! Momokani, Ioane ena hereva dainai iseda kudouna dekenai ita moale bada bona ita ura guba taudia ida ane ita abia hebou, Iehova Dirava bona Iesu Keriso ita hanamoa totona. Iseda lalona ita hadaia momokani, mai eda haheauka ida kara maorodia do ita karaia noho, ani? Bema unai bamona ita karaia, ita diba Iehova ena heduru amo unai dokona mai moale negana do ita itaia, bona guba bona tanobada ibounai lalonai idia abia hanamoa anena do ita abia danu. Momokani, mauri gaudia 4, kerubi unai, bona idia toreisi lou horoa Keristen taudia idia lalo-tamona momokani, matahanai sivaraina ena hereva dokodia hegeregeredia: “Vadaeni unai mauri gaudia 4 idia gwau, ‘Amen.’ Bona badana [elda] taudia idia tui diho, idia tomadiho henia.”​—⁠Apokalupo 5:⁠14.

²⁶ Duahiduahi tauna e, namona be Mamoe ena Natuna​—⁠ia hegeregere tauna​—⁠ena boubou oi abidadama henia, bona mai emu manau ida Iehova, “helai gabuna badana latanai ia helai Diravana,” oi tomadiho henia, bona ena hesiai gaukara oi karaia neganai, ia ese oi ia hanamoa be namo. Ioane oreana taudia edia heduru oi abia dae hari, badina ‘aniani neganai lauma aniani ia henia.’ (Luka 12:42) Itaia! Mamoe ena Natuna ese buka ena koua toadia 7 ia makohia gwauraia. Madi, dahaka mai anina bada gaudia do ia hahedinaraia ita dekenai?

[Footnotes]

[Study Questions]

 1. Ioane ena matahanai lalonai ma dahaka ia vara?

2, 3. (a) Dahaka dainai Ioane ia ura dikadika buka kehoa tauna ta ia mai, to unai do ia vara ena toana be edena bamona? (b) Hari iseda negai Dirava ena horoa taudia ese dahaka idia naria?

 4. (a) Unai buka bona ena koua toadia do ia kehoa diba totona, edena tauna idia davaria? (b) Ioane oreana taudia bona edia bamodia ese dahaka davana namona bona hahenamo idia abia hari?

 5. (a) Peroveta herevana lalonai Iuda be edena bamona idia perovetalaia, bona Iuda ena bese taudia be edeseniai idia lohia? (b) Shiloh be daika?

 6. Iesu be edena dala amo ia be Iese ena “rigi maragina ta” bona “David ena natuna badana” danu?

 7. Dahaka dainai Iesu ia hegeregere terona latanai ia helai Tauna ena imana amo buka ia abia totona?

 8. (a) Iesu be Basileia dekenai dahaka ia karaia dainai ia hahedinaraia ia hegeregere buka do ia kehoa totona? (b) Dahaka dainai elda taudia 24 amo ta ese Ioane ia hamaoroa daika ia hegeregere buka do ia kehoa totona be maoro?

 9. Ioane ia itaia, leona lasi, to dahaka be “helai gabuna badana ena huanai” ia gini, bona Ioane ese edena bamona ia gwauraia?

10. Ioane ese ia itaia “Mamoe ena Natuna” be daika, bona dahaka dainai unai bamona idia gwauraia be maoro?

11. Iesu idia gwauraia “Mamoe ena Natuna ta . . . iena toana be, haida ese idia alaia mase bamona” neganai, dahaka dainai unai ese Iesu ia gwauraia dika lasi?

12. Mamoe ena Natuna ena doana 7 edia anina be dahaka?

13. (a) Mamoe ena Natuna ena matana 7 ese dahaka idia laulaulaia? (b) Mamoe ena Natuna ese dahaka ia karaia?

14. (a) Iesu ese buka ia abia neganai, mauri gaudia 4 bona elda taudia 24 ese dahaka idia karaia? (b) Elda taudia 24 dainai Ioane ese ia abia sivaraina ese edena bamona ia hahedinaraia idia be daika bona edia dagi be dahaka?

15. (a) Israel lalonai daika sibona be tomadiho kalagana ena Helaga Herea Gabuna lalonai ia vareai diba? (b) Hahelaga tauna badana be Helaga Herea Gabuna lalonai ia do vareai lasi neganai, bema bonana namo muramurana ia gabua lasi, dahaka dainai do ia mase?

16. (a) Keristen negana ai, daidia be Helaga Herea Gabuna korikorina lalonai idia vareai? (b) Dahaka dainai horoa Keristen taudia ese ‘bonana namo muramurana idia gabua’ be gau badana?

17. (a) Elda taudia 24 ese dahaka ane matamatana idia abia? (b) Nega momo Baibel lalonai inai hereva “ane matamata” ena anina be dahaka?

18. Badina be dahaka elda taudia 24 be edia ane matamatana amo Iesu idia hanamoa?

19. (a) Israel besena idia kara dika dainai, dahaka hahenamo idia davaria lasi? (b) Iehova ena bese matamatana ese dahaka hahenamo idia davaria?

20. Dahaka ane idia abia Mamoe ena Natuna idia hanamoa totona?

21. Mamoe ena Natuna idia hanamoa dainai, Iehova ena dagi idia hamaragia, a? Emu haere ena badina mani oi gwauraia.

22. Tanobada taudia ese dahaka ane badana lalonai idia vareai?

23, 24. (a) Dahaka ese ia hahedinaraia ane badana be edena negai do idia abia matamaia guba dekenai, bona edena negai idia abia matamaia tanobada dekenai? (b) Lagani idia hanai neganai, ane badana be edena bamona ia bada ia lao?

25. (a) Ioane ena hereva, guba bona tanobada ibounai lalonai idia abia ane badana ena sivarai, ita duahia dainai ita ura dahaka ita karaia? (b) Matahanai ia ore neganai, mauri gaudia 4 bona elda taudia 24 ese dahaka haheitalai namona be ita dekenai idia hahedinaraia?

26. Namona be dahaka ita abidadama henia, bona Mamoe ena Natuna ese dahaka ia karaia gwauraia?

[Full-page picture on page 86]