Karoa 10

Daika ese King Ibounai Edia King Ia Tuari Henia Diba?

IEHOVA ena dubu Ierusalema dekenai idia hadikaia negana amo lagani 57 idia ore vadaeni. Belesasa bona ena tamana Nabonido be Baibel ese ia perovetalaia tanobada ena basileia badana ihatoina, Babulonia Basileiana, idia lohiaia hebou.a Dirava ena peroveta tauna Daniela be Babulonia dekenai ia noho. Bona “Belesasa ia king lagani namba 3 lalonai,” Iehova ese Daniela dekenai matahanai ia siaia bona tomadiho momokani hagoevaia lou lalonai idia vara gaudia haida ia hahedinaraia.​—⁠Daniela 8:⁠1.

² Daniela ia itaia peroveta matahanai ese Daniela ia hagaria bona ita, “dokona negana” ai ita noho taudia, eda lalona ia veria. Aneru Gabriela ese Daniela ia hamaoroa: “Dirava ena badu dinana ia ore neganai dahaka dohore ia vara be oi dekenai lau hedinaraia noho inai, badina unai mata hanai ese dokona negana gaudia ia herevalaia.” (Daniela 8:​16, 17, 19, 27) Unai dainai, Daniela ese ia itaia gauna bona ena anina ita dekenai be mai eda lalona ibounai ida mani ita laloa.

MAMOE TAU TA MAI ENA DOANA RUA

³ Daniela ia gwau: “Inai mata hanai dekenai lau itaia be Susa hanua badana dekenai lau noho bamona, unai be Elama kahana dekenai. Ulai Sinavai ena badinai lau gini.” (Daniela 8:⁠2) Daniela be Susa​—⁠Babulonia amo kilomita 350 ist kahanai ia noho Elama ena hanua badana​—⁠dekenai ia noho momokani eiava unai be matahanai sibona ita diba lasi.

⁴ Daniela be ma ia gwau: “Egu matana lau negea daekau neganai, lau itaia mamoe tau ta sinavai ena badinai ia gini. Iena doana be rua.” (Daniela 8:3a) Daniela dekenai unai mamoe tau ena anina be hunia gauna lasi, badina gabeai, aneru Gabriela ia gwau: “Unai mamoe tau oi itaia mai ena doana rua be Mede bona Parasa basileia edia toana.” (Daniela 8:20) Mede taudia be Asuria amo ist kahanai ia noho ororo tano palakana taudia, bona Parasa taudia be Persian Gulf amo not kahana tanona ai idia loaloa taudia. To, Mede-Parasa Basileiana ia bada ia lao lalonai, ena taunimanima ese dava bada kohu namodia idia ura henia dikadika.

⁵ Daniela ia gwau: “Iena doana be rua, badadia, gabeai ia tubu daekau gauna be ia bada, to ta be ia maragi sisina.” (Daniela 8:3b) Gabeai ia tubu daekau doana badana ese Parasa taudia ia laulaulaia, bona doana ma ta ese Mede taudia ia laulaulaia. Matamanai, Mede taudia edia siahu be bada. To lagani 550 B.C.E. ai, Parasa ena lohia tauna Kurese ese Mede ena King Astyages ia halusia. Kurese ese unai bese rua edia kastom bona taravatu ia haboua, edia basileia ia hatamonaia, bona gabu ma haida ia halusia. Unai nega amo, unai bese rua be basileia tamona bamona.

MAMOE TAU IA HEKOKOROKU

⁶ Daniela ese unai mamoe tau ia herevalaia lou, ia gwau: “Lau itaia noho neganai, unai mamoe tau ese mai dagedage danu ia heau, iena doana dekenai gau ibounai ia botaia, ia lao dina diho kahanai bona mirigini kahanai, bona diho kahanai danu. Boroma ta be iena siahu dekena amo ia roho mauri diba lasi, bona iena dala be ta ese ia koua diba lasi.”​—⁠Daniela 8:⁠4.

⁷ Daniela ese ia abia matahanai gunana lalonai, Babulonia ia laulaulaia dagedage gauna be davara amo ia daekau bona ena toana be laiona bamona bona ena hanina be ugava ena hanina bamona. (Daniela 7:​4, 17) Unai dagedage gauna be inai matahanai matamatana ena “mamoe tau” vairanai ia gini diba lasi. Lagani 539 B.C.E. ai Kurese Badana ese Babulonia ia hamorua. Unai ia vara bena lagani 50 bamona lalonai, “boroma ta,” eiava politikol gavamani ta, be Mede-Parasa Basileiana​—⁠Baibel ese ia perovetalaia tanobada ena basileia badana namba 4​—⁠vairanai ia gini diba lasi.

⁸ Tanobada ena Basileia Badana Mede-Parasa be ‘dina daekau kahana amo’​—⁠ist amo​—⁠ia mai bona “gau ibounai ia botaia, ia lao dina diho kahanai bona mirigini kahanai, bona diho kahanai.” (Isaia 46:11) King Cambyses Namba 2, Kurese Badana murinai ia lohia tauna, ese Aigupito ia abia. Ena murinai ia lohia tauna be Parasa ena King Dariuse Namba 1, ia be west kahana dekenai ia lao bona lagani 513 B.C.E. ai Bosporus ena gohu ia hanaia bona Europe dekenai Thrace, ena hanua badana be Byzantium (hari Istanbul), ena teritori dekenai ia vareai. Lagani 508 B.C.E. ai, Thrace ia halusia bona lagani 496 B.C.E. ai, Makedonia ia abia. Unai dainai, Dariuse ena nega ai, “mamoe tau” Mede-Parasa ese kahana badadia toi dekenai teritori ia abia: not dekenai Babulonia bona Asuria, west kahanai Asia Minor, bona saut kahanai Aigupito.

⁹ Baibel ese ia hamomokania Mede-Parasa Basileiana be bada, badina ia ese Dariuse murinai ia lohia tauna, Xerxes Namba 1, ia herevalaia neganai, ia gwau: “Parasa ena king, Ahasuero ena king neganai, ia ese basileia ibounai 127 ia biagua, India ela bona Etiopia.” (Eseta 1:⁠1) To unai basileia badana be ma ta vairanai do ia moru, bona Daniela ena matahanai ese unai dekenai gau namodia haida ia hahedinaraia bona idia ese iseda abidadama Dirava ena peroveta herevana dekenai do idia hagoadaia.

NANIGOSI TAU ESE MAMOE TAU IA HAMORUA

¹⁰ Daniela ese ia itaia gauna dainai ia hoa bada. Unai sivarai ia gwau: “Inai gau lau laloa noho, ena anina lau tahua neganai nanigosi tau ta be dina diho kahana dekena amo ia heau mai, iena heau haraga herea dainai, iena aena be tano dekenai ia moia lasi bamona. Iena matana rua edia huanai be doa badana ta ia noho. Sinavai ena badinai ia gini noho mamoe tau mai doana rua dekenai ia ginidae neganai, nanigosi tau ese mai badu dikadika ia heau lao kamokau ia dekenai. Lau itaia unai nanigosi tau ese mamoe ia heatu henia. Ia dagedage henia dikadika dainai ia heau henia, vadaeni mamoe tau ena doana rua ia hamakohia. Mamoe tau be ia goada lasi do ia koua, bona durua tauna ta be lasi. Vadaeni mamoe tau be tano dekenai ia moru, vadaeni nanigosi tau ese ia moia dikadika.” (Daniela 8:​5-7) Unai ibounai ena anina be dahaka?

¹¹ Unai matahanai ena anina be Daniela bona ita danu ese ita gwauraia toho be anina lasi. Aneru Gabriela ese Daniela ia hamaoroa: “Unai nanigosi tau be Helene basileia ena toana, bona unai doa badana iena matana rua huanai ia noho gauna be Helene ena king ginigunana ena toana.” (Daniela 8:21) Lagani 336 B.C.E. ai, Parasa Basileiana ena king ginigabena, Dariuse Namba 3 (Codommanus), ese korona ia abia. Unai lagani tamona ai, Alesana be Makedonia ena king ai ia lao. Histori ena sivarai ia hahedinaraia Alesana Badana be idia perovetalaia “Helene basileia” ena king ginigunana. Lagani 334 B.C.E. ai, Alesana be “dina diho kahana dekena amo,” eiava west amo, ia heau haraga. “Iena aena be tano dekenai ia moia lasi bamona” bona ia ese teritori idauidau ia abia bona “mamoe tau” ia hamorua. Greece ese Mede-Parasa ena lagani 200 bamona lohia negana ia hadokoa, bona Baibel ese ia herevalaia mai anina tanobada ena basileia badana namba 5 ai ia lao. Unai be Dirava ena peroveta herevana ia guguru dalana namona!

¹² To Alesana ena siahu negana be ia kwadogi. Matahanai ese ma ia hahedinaraia: “Unai nanigosi tau ia toreisi goada herea, to iena goada ia bada herea neganai, iena doana badana ia makohia. Makohia gabuna dekenai be doa badadia 4 idia tubu, ta ta be idau gabu idau gabu dekenai idia duduia lao.” (Daniela 8:⁠8) Gabriela ese unai peroveta herevana ena anina ia gwauraia hedinarai, ia gwau: “Unai doa 4, doa ginigunana, makohia gauna dekena amo idia tubu daekau gaudia be bese 4 edia toana, unai Helene basileia dekena amo do idia tubu daekau, to do idia goada lasi unai doa ginigunana bamona.” (Daniela 8:22) Peroveta herevana hegeregerena, Alesana ese tano momo ia abia bona ena siahu ia bada neganai ia “makohia,” eiava ia mase, unai neganai ena mauri lagani be 32 sibona. Bona ena basileia badana be gabeai ena ami jeneral hani ese idia hapararaia.

ENA ANINA IA HEHUNI DOA MARAGINA

¹³ Matahanai ena kahana iharuana ena guguru negana be lagani 2,200 ia hanaia, ema bona hari iseda nega. Daniela ia gwau: “Unai doadia [hani] ta dekena amo be doa maragina ta ia tubu daekau. Inai doa maragina ena siahu be bada herea ia lao, vadaeni inai siahu ia hedinaraia diho kahanai bona dina ia daekau kahanai bona gwauhamata tanona dekenai danu. Iena siahu ia toreisi danu, guba ena taudia dekenai, bona ia ese unai tau haida bona hisiu haida danu ia hamorua tano dekenai, bona ia moidia diho momokani. Io, unai doa maragina ese guba taudia edia Biaguna danu ia dagedage henia, bona iena dina ibounai boubou henia gauna ia koua, bona Dubu Helaga ena gaukara ia hadikaia. Taunimanima edia kara dika ia toreisi dainai, dina ibounai boubou henia gauna idia hadikaia. Idia ese tomadiho kara momokani idia negea diho tano dekenai, badina be unai doa ese iena gaukara dikana ibounai dekenai ia kwalimu.”​—⁠Daniela 8:​9-12.

¹⁴ Unai hereva ena anina ita lalo-pararalaia totona, namona be Dirava ena aneru ena hereva ita laloa namonamo. Aneru Gabriela be Alesana ena basileia amo basileia hani idia vara bona siahu idia abia ia herevalaia murinai, ia gwau: “Unai basileia edia nega be kahirakahira ia ore neganai bona kara dika ia bada herea neganai, king dika rohoroho ta do ia toreisi, dagedage tauna, bona mai ena koikoi bada. Dohore ia goada dikadika, to unai goada be ia sibona ese ia havaraia lasi. Dika bada herea do ia havaraia, bona ia karaia gaudia ibounai dekenai do ia kwalimu. Mai edia siahu taudia haida, bona Dirava ena taudia korikori haida danu, be inai king ese do ia hadikaia ore. Iena aonega ia bada dainai, iena gaukara mai koikoina dekenai do ia kwalimu. Do ia hekokoroku dikadika, bona taunimanima ese ia do idia halusia diba lasi. Ia ese danu king ibounai edia King do ia tuari henia gwauraia, to do ia lusi, taunimanima edia siahu dekena amo lasi.”​—⁠Daniela 8:​23-25.

¹⁵ Aneru ese Daniela ia hamaoroa: “[Matahanai be] taunimanima dekenai do oi hedinaraia lasi, badina nega daudau ia noho ela bona do ia vara momokani.” (Daniela 8:26) Matahanai ena kahana iharuana be do ia guguru lasi ela bona “nega daudau,” bona Daniela ese do ia “hedinaraia lasi” be namo. Toana be Daniela ese ena anina ia diba lasi. To ita laloa diba unai “nega daudau” be ia ore vadaeni. Unai dainai ita henanadai: ‘Tanobada ena histori ese unai peroveta matahanai ia guguru dalana dekenai dahaka ia hahedinaraia?’

DOA MARAGINA ENA SIAHU IA BADA IA LAO

¹⁶ Histori ena sivarai hegeregerena, doa maragina be unai doa hani edia doa ta​—⁠west momokani kahanai ia noho doana​—⁠amo ia vara. Unai be Makedonia bona Greece ia lohiaia ami jeneral Cassander ena Helene basileiana. Gabeai, unai basileia be ami jeneral Lysimachus, Thrace bona Asia Minor edia king, ena basileia ese ia abia. Lagani 200 B.C.E. murinai, Helene basileiana ena west kahadia be Roma ese ia abia. Bona lagani 30 B.C.E. ai, Roma ese Helene basileia iboudiai ia abia vadaeni, unai amo Baibel ese ia perovetalaia tanobada ena basileia badana namba 6 ai ia lao. To Roma Basileiana be Daniela ena matahanai ena doa maragina lasi, badina unai basileia ia noho lasi ela bona “dokona negana.”​—⁠Daniela 8:⁠19.

¹⁷ Vadaeni, histori ena sivarai hegeregerena, unai dagedage “king dika rohoroho” be daika? Guna Britain be Roma Basileiana ena notwest kahana ta. Ela bona lagani 400 C.E. murinai, Roma ena provinsi haida be hari ita gwauraia Britain dekenai idia noho. Gabeai, Roma Basileiana ena siahu ia ore ia lao, to Britain bona guna Roma henunai idia noho Europe tanodia ma haida dekenai Greek bona Roma taudia edia mauri dalana ena siahu ia do noho. Mexico ena ane torea bona Nobel Ahuna ia abia tauna Octavio Paz ia gwau: “Roma Basileiana ia moru neganai, Dubu ese ena gabu ia abia.” Ma ia gwau: “Dubu ena fada taudia, bona gabeai idia noho diba bada taudia, ese Keristani hahediba herevadia lalonai Greek aonega lalohadai idia abia dae.” Bona lagani 1970 ai ia mase aonega bona matematik tauna Bertrand Russell ia gwau: “West mauri dalana, Greek mauri dalana amo ia vara gauna, be lagani 2,500 bamona gunanai Miletus [Asia Minor dekenai ia noho Greek hanuana] dekenai ia vara aonega bona saiens lalohadai idauidau latanai idia haginia.” Unai dainai, ita gwau diba Britain Basileiana ena mauri dalana be Makedonia bona Greece idia lohiaia Helene basileiana amo ia vara.

¹⁸ Lagani 1763 ai, Britain Basileiana ese ena inai taudia goadadia, Spain bona France, ia halusia vadaeni. Unai nega amo ia hahedinaraia ia be davara edia lohia bona Baibel ese ia perovetalaia tanobada ena basileia badana namba 7. Lagani 1776 ai, America ena teritori 13 ese Britain idia dadaraia bona United States of America idia haginia murinai danu, Britain Basileiana ia tubu ela bona tanobada ena kahana hani amo kahana ta bona tanobada ena taunimanima edia kahana hani amo kahana ta ia lohiaia. Unai tanobada ena basileia badana namba 7 ese ena siahu ia habadaia noho, badina United States of America be Britain ida ia gaukara hebou matamaia bona tanobada ena basileia badana Anglo-America ai idia lao. Bisinesi dalanai bona tuari ia karaia diba dalanai, unai basileia be “king dika rohoroho” ai ia lao. Unai dainai, “dokona negana” ai politikol siahu dika rohorohona ai ia lao doa maragina be Tanobada ena Basileia Badana Anglo-America.

¹⁹ Daniela ia itaia “gwauhamata tanona” dekenai unai doa maragina ena siahu be ia “bada herea ia lao.” (Daniela 8:⁠9) Gwauhamata Tanona, Iehova ese ia abia hidi besena dekenai ia henia tanona, ena hairai be bada herea dainai idia gwauraia “tano ibounai ia hereaia tanona,” tanobada ibounai ena herahera. (Esekiela 20:​6, 15) Momokani, Britain ese December 9, 1917 ai Ierusalema ia abia, bona lagani 1920 ai, League of Nations ese Great Britain dekenai Palestine naria gwaumaorona ia henia, ela bona May 14, 1948. To unai matahanai be peroveta gauna, ena laulau be momo herea. Bona matahanai ia hahedinaraia “gwauhamata tanona” be Ierusalema lasi, to tanobada ai Dirava ena helaga taudia edia noho, tanobada ena basileia badana namba 7 ena lohia negana lalonai, ia laulaulaia. Tanobada ena Basileia Badana Anglo-America ese unai Dirava ena helaga taudia ia hagaria dalana mani ita itaia.

“DUBU HELAGA” IA HADIKAIA

²⁰ Doa maragina “ena siahu ia toreisi danu, guba ena taudia dekenai, bona ia ese unai tau haida bona hisiu haida danu ia hamorua tano dekenai.” Aneru ese ia gwauraia hedinarai bamona, doa maragina ese ia hamorua toho “guba ena taudia” bona “hisiu” be “Dirava ena taudia korikori” eiava “Dirava ena helaga taudia.” (Daniela 8:​10, 24; 7:21) Unai “helaga taudia” be Dirava ese ena lauma amo ia horoa Keristani taudia. Idia be Iesu Keriso ese ia bubua rarana amo ia vara gwauhamata matamatana dainai Dirava ida hetura karana idia moalelaia, bona Dirava ese idia ia hahelagaia, hagoevaia, bona iena hesiai gaukara karaia totona ia abia hidi. (Heberu 10:10; 13:20) Iehova ese idia ia abia hidi iena Natuna ida guba ahuna idia abia totona, unai dainai iena vairanai idia be helaga. (Efeso 1:​3, 11, 13, 18-20) Unai hegeregerena, Daniela ena matahanai lalonai “guba ena taudia” ena anina be tanobada dekenai idia do noho 144,000 “helaga taudia,” Mamoe ena Natuna ida guba dekenai do idia lohia taudia.​—⁠Apokalupo 14:​1-5.

²¹ Hari inai negai 144,000 taudia oredia be “Ierusalema, guba dekenai”​—⁠Dirava ena hanua bamona Basileiana​—⁠bona ena tomadiho dalana tanobada ai idia hahedinaraia taudia. (Heberu 12:​22, 28; 13:14) Unai dala ai idia be “Dubu Helaga,” tanobada ena basileia badana namba 7 ese ia moia toho bona ia hadikaia toho gabuna, ai idia noho. (Daniela 8:13) Daniela ese unai “Dubu Helaga” ia herevalaia neganai, ia gwau: “[Iehova ena] dina ibounai boubou henia gauna ia koua, bona Dubu Helaga ena gaukara ia hadikaia. Taunimanima edia kara dika ia toreisi dainai, dina ibounai boubou henia gauna idia hadikaia. Idia ese tomadiho kara momokani idia negea diho tano dekenai, badina be unai doa ese iena gaukara dikana ibounai dekenai ia kwalimu.” (Daniela 8:​11, 12) Unai be edena dala ai ia guguru?

²² Tanobada Ibounai Tuarina Iharuana ai, Iehova ena Witnes taudia dekenai be dahaka ia vara? Idia ese dagedage bada idia davaria! Unai dagedage be Nazi bona Fascist tanodia dekenai ia matamaia. To daudau lasi murinai, ‘ia goada dikadika doa maragina’ ese ia lohiaia tanodia ibounai ai “tomadiho kara momokani idia negea diho tano dekenai.” British Commonwealth tanodia kahirakahira ibounai ese “guba ena taudia,” Basileia idia harorolaia taudia unai, bona “Sivarai Namona” idia harorolaia gaukarana idia taravatua. (Mareko 13:10) Unai tanodia ai, ami dekenai taunimanima idia abia vareai neganai, Iehova ena Witnes taudia dekenai haroro taudia ruhaia ena maoro idia henia lasi, bona unai amo idia hahedinaraia tiokratik dalanai Dirava amo idia abia haroro dagina idia matauraia lasi. United States dekenai Iehova ena kamonai hesiai taudia idia hadikaia bona dala idauidau ai idia hahemaraia. Anina be, Iehova ena taunimanima edia “dina ibounai boubou henia gauna,” edia tomadiho lalonai hanaihanai ia dekenai idia henia hanamoa herevadia​—⁠“uduna bibina” edia huahua​—⁠be tanobada ena basileia badana namba 7 ese ia koua toho. (Heberu 13:15) Unai dala ai, unai tanobada ena basileia badana be Ataiai Momokani Diravana ena gabu​—⁠“Dubu Helaga”​—⁠dekenai ia vareai bona unai amo “kara dika rohoroho” ia karaia.

²³ Unai doa maragina ese Tanobada Ibounai Tuarina Iharuana ai “Dirava ena taudia korikori” ia dagedage henia neganai, “edia Biaguna danu ia dagedage henia.” Eiava, aneru Gabriela ia gwau bamona ia ese “king ibounai edia King do ia tuari henia gwauraia.” (Daniela 8:​11, 25) Iniseniai unai dagi ladana “king ibounai edia King” ese Iehova Dirava ia gwauraia. Heberu herevana sar, iniseniai idia hahanaia “king,” be hereva ma ta hegeregerena, ena anina be “ataiai ia lohia.” Unai hereva amo king ena natuna eiava king ena ruma bese tauna idia gwauraia sibona lasi, to biaguna, eiava lohia, danu idia gwauraia. Daniela ena buka ese lohia anerudia haida​—⁠hegeregere, Mikaela​—⁠ia herevalaia danu. Dirava be unai bamona lohia ibounai edia King Badana. (Daniela 10:​13, 21; mani Salamo 83:18 itaia.) Ita laloa diba ta ese Iehova​—⁠king iboudiai edia King​—⁠do ia tuari henia gwauraia, a?

“DUBU HELAGA” IDIA HAGOEVAIA LOU

²⁴ Ta ese king ibounai edia King ia tuari henia diba lasi​—⁠“king dika rohoroho” bamona, Tanobada ena Basileia Badana Anglo-America danu ese unai ia karaia diba lasi! Unai king be Dirava ena Dubu Helaga ia hadikaia toho karana dekenai do ia kwalimu lasi. Hereva ia mailaia aneru ia gwau, “dina 2,300 ia ore” murinai, “Dubu Helaga do idia hagoevaia lou,” eiava “do ia kwalimu.”​​—⁠Daniela 8:​13, 14; The New English Bible.

²⁵ Unai dina 2,300 be peroveta negana ta. Unai dainai, peroveta laganina ita laloa be namo, ia lalonai dina 360 idia noho. (Apokalupo 11:​2, 3; 12:​6, 14) Vadaeni, unai dina 2,300 edia anina be lagani 6, hua 4, bona dina 20. Unai be edena negai ia vara? Lagani 1930 murinai, tano idauidau ai Dirava ena taunimanima idia dagedage henia bada matamaia. Bona Tanobada Ibounai Tuarina Iharuana lalonai, tanobada ena basileia badana Anglo-America ese ia lohiaia tanodia dekenai Iehova ena Witnes taudia idia dagedage henia bada herea. Dahaka dainai? Badina ‘taunimanima lasi, to Dirava idia kamonai henia’ goadagoada. (Kara 5:29) Unai dainai ita laloa diba unai tuari dekenai unai dina 2,300 be mai anina bada.b To unai peroveta negana ena matamana bona dokona be edena bamona ita gwauraia diba?

²⁶ “Dubu Helaga” be do “idia hagoevaia lou” dainai, unai dina 2,300 be Dirava ena matanai guna ia goeva negana ai idia matamaia. Ita laloa diba negana be June 1, 1938, badina The Watchtower, June 1, 1938 gauna, ese hereva ladana “Orea Haheaua Dalana” ena kahana 1 idia halasia. Kahana 2 be June 15, 1938 ena magasin ai ia noho. Dina 2,300 (Heberu kalenda hegeregerena lagani 6, hua 4, bona dina 20) be June 1 eiava 15, 1938 amo ita duahia neganai, ita be October 8 eiava 22, 1944 ita davaria. September 30 bona October 1, 1944 ai, Pittsburgh, Pennsylvania, U.S.A. dekenai idia karaia hebouhebou badana ai, Watch Tower Society ena presiden ese ia henia hereva ena sinado be “Tiokratik Dalana Hanamoa Karana Hari.” October 2 ai idia karaia Society ena lagani ta ta hebouna dekenai, edia taravatu pepana idia haidaua, gavamani ena taravatu ese ia kehoa dalana hegeregerena tiokratik dalana ia badinaia namonamo totona. Baibel ena taravatu unai gauna dekenai idia halasia murinai, Iehova ena Witnes taudia edia kongregesen lalodiai tiokratik oreana ia heau namonamo.

²⁷ Lagani 1939 ai ia matamaia Tanobada Ibounai Tuarina Iharuana be unai dina 2,300 negana lalonai ia vara neganai, Dirava ena dubu helaga dekenai “dina ibounai boubou henia gauna” be dagedage karana dainai idia koua. Lagani 1938 ai, tanobada hegegemadai Witnes taudia edia gaukara hakaua totona Watch Tower Society ena brens opesi be 39, to lagani 1943 ai 21 sibona idia noho. Unai nega lalonai Basileia harorolaia taudia edia namba danu be ia tubu sisina sibona.

²⁸ Ita itaia vadaeni bamona, Tanobada Ibounai Tuarina Iharuana ena hua ginigabedia lalonai, Iehova ena Witnes taudia ese tiokratik oreana lalonai Dirava ena lohia siahuna abia isi gaukarana totona edia lalona idia hadaia goadagoada lou. Unai dainai lagani 1944 ai, edia gaukara haheaua bona hakaua dalana idia hamaoromaoroa. Momokani, The Watchtower, October 15, 1944 gauna ese ia halasia hereva ena sinado be “Gaukara Orena Totona Ita Hegaegae.” Unai hereva bona unai nega lalonai idia halasia hesiai gaukara herevadia ma haida ese idia hahedinaraia unai dina 2,300 negana ia ore bona “Dubu Helaga idia hagoevaia lou” vadaeni.

²⁹ Dagedage taudia be “Dubu Helaga” idia hadikaia toho karadia dekenai idia kwalimu lasi. Oibe, tanobada dekenai idia do noho “helaga taudia” bona edia bamodia hutuma bada herea idia kwalimu. (Apokalupo 7:⁠9) Bona unai Dubu Helaga, hari tiokratik dalanai ia heau namonamo gauna, be Iehova ena hesiai gaukara helagana totona ia gaukara noho.

³⁰ Tanobada ena Basileia Badana Anglo-America ena siahu ia do dogoatao noho. To aneru Gabriela ia gwau: “Do ia lusi, taunimanima edia siahu dekena amo lasi.” (Daniela 8:25) Daudau lasi murinai, Baibel ese ia perovetalaia tanobada ena basileia badana namba 7​—⁠“king dika rohoroho”​—⁠be Aramagedono lalonai, taunimanima edia siahu amo lasi, to siahu hereadaena amo do ia moru. (Daniela 2:44; Apokalupo 16:​14, 16) Unai neganai Iehova Dirava, king ibounai edia King, ena lohia siahuna be do ia hamomokania dainai ita moale dikadika!

[Footnotes]

DAHAKA OI DIBAIA?

• Inai gaudia ese dahaka idia laulaulaia:

“mamoe tau,” ena “doana be rua”?

“nanigosi tau” mai ena “doa badana”?

“doa badana” amo idia tubu doa hani?

unai doa hani edia doa ta amo ia mai doa maragina?

• Tanobada Ibounai Tuarina Iharuana lalonai, Tanobada ena Basileia Badana Anglo-America be edena bamona “Dubu Helaga” ia hadikaia toho, bona ia kwalimu, a?

[Study Questions]

1, 2. Dahaka dainai Daniela ese Belesasa ena lohia laganina namba 3 ai ia itaia matahanai be mai anina ita dekenai?

3, 4. Daniela ese sinavai badinai ia itaia animal be dahaka, bona dahaka ia laulaulaia?

 5. Edena dala ai “gabeai ia tubu” doana be ia bada ia lao?

6, 7. Edena dala ai “boroma ta” be mamoe tau ena vairanai ia gini diba lasi?

8, 9. (a) Edena dala ai “mamoe tau” ese “gau ibounai ia botaia, ia lao dina diho kahanai bona mirigini kahanai, bona diho kahanai”? (b) Eseta bukana ese Parasa ena King Dariuse Namba 1 murinai ia lohia tauna be edena bamona ia herevalaia?

10. Daniela ena matahanai lalonai, dahaka animal ese “mamoe tau” ia hamorua?

11. (a) Aneru Gabriela ese “nanigosi tau” bona ena “doa badana” be edena bamona ia gwauraia hedinarai? (b) Unai doa idauna ese daika ia laulaulaia?

12. Edena dala ai nanigosi tau ena “doa badana” ia “makohia,” bona edena doa hani be ena gabu ai idia hedinarai?

13. Doa hani edia doa ta amo dahaka ia tubu, bona iena kara be edena bamona?

14. Aneru Gabriela ese doa maragina ena kara be edena bamona ia gwauraia, bona unai doa dekenai dahaka ia vara?

15. Aneru ia gwau Daniela ese unai matahanai dekenai dahaka ia karaia be namo?

16. (a) Doa maragina be edena doa amo ia vara? (b) Edena dala ai Roma be Baibel ese ia perovetalaia tanobada ena basileia badana namba 6 ai ia lao, to dahaka dainai ia be unai doa maragina lasi?

17. (a) Roma Basileiana lalonai Britain ena noho be edena bamona? (b) Edena dala ai Makedonia bona Greece ia lohiaia Helene basileiana be mai ena anina Britain Basileiana dekenai?

18. Dahaka be “dokona negana” ai “king dika rohoroho” ai ia lao doa maragina? Oi gwauraia hedinarai.

19. Matahanai ia hahedinaraia “gwauhamata tanona” be dahaka?

20. Doa maragina ese ia hamorua toho “guba ena taudia” bona “hisiu” be daidia?

21. Tanobada ena basileia badana namba 7 ese ia hadikaia toho “Dubu Helaga” dekenai daidia idia noho?

22. Tanobada Ibounai Tuarina Iharuana ai, tanobada ena basileia badana namba 7 ese edena dala ai “kara dika rohoroho” ia karaia?

23. (a) Tanobada Ibounai Tuarina Iharuana ai, Tanobada ena Basileia Badana Anglo-America be edena bamona “king ibounai edia King” ia tuari henia gwauraia? (b) “King ibounai edia King” be daika?

24. Daniela 8:​14 ese dahaka hereva amo ita ia hagoadaia?

25. Dina 2,300 ena peroveta negana ena lata be edena bamona, bona dahaka dekenai ia be mai anina bada?

26. (a) Edena nega amo unai dina 2,300 ita duahia matamaia be maoro? (b) Dina 2,300 be edena negai idia ore?

27. Dahaka ese ia hamomokania Tanobada Ibounai Tuarina Iharuana lalonai dagedage karadia ese “dina ibounai boubou henia gauna” idia koua?

28, 29. (a) Tanobada Ibounai Tuarina Iharuana ia ore gwauraia neganai, Iehova ena orea lalonai dahaka ia vara? (b) Dagedage taudia ese “Dubu Helaga” bona ena gaukara idia hadikaia toho karadia be edena bamona oi gwauraia diba?

30. Daudau lasi murinai, “king dika rohoroho” dekenai dahaka do ia vara?

[Map/Picture on page 166]

(For fully formatted text, see publication)

Mede-Parasa Basileiana

MAKEDONIA

AIGUPITO

Memepisi

ETIOPIA

Ierusalema

Babulonia

Ekebatana

Susa

Persepolis

INDIA

[Map/Picture on page 169]

(For fully formatted text, see publication)

Greek Basileiana

MAKEDONIA

AIGUPITO

Babulonia

Indus Sinavaina

[Map on page 172]

(For fully formatted text, see publication)

Roma Basileiana

BRITANNIA

ITALIA

Roma

Ierusalema

AIGUPITO

[Full-page picture on page 164]

[Pictures on page 174]

Tanobada ena Basileia Badana Anglo-America ena siahu bada taudia:

1. George Washington, U.S. presiden ginigunana (1789-​97)

2. Britain ena Kwini Victoria (1837-​1901)

3. Woodrow Wilson, U.S. presiden (1913-​21)

4. David Lloyd George, Britain ena praiminista (1916-​22)

5. Winston Churchill, Britain ena praiminista (1940-​45, 1951-​55)

6. Franklin D. Roosevelt, U.S. presiden (1933-​45)